Yi xnaꞌn yi wiꞌtz bnol tetz
8
1 Ma Jesús, choꞌn beneꞌn iꞌ wi juꞌwtz yi na biꞌaj wi Olivo. 2 Itzun yi tuleꞌn skil le junt eklok, choꞌn tzun tponeꞌnt le templo. Nin wiꞌnin eꞌ wunak eꞌ baj opon teꞌj. Cꞌoleweꞌn cuꞌn tzun Jesústz ẍchixoꞌl tan chichusleꞌn. 3 Nin te yi na tzan iꞌ tan chichusleꞌn, eꞌ opon cobox scyeri yi txꞌolol xoꞌl yi ley Moisés, scyuchꞌ cobox parisey te iꞌ. Cyꞌaꞌn jun xnaꞌn cyaꞌn yi jopol wutzaj, yi choꞌn txꞌamxeꞌn cyaꞌn te junt yaj. Nintzun cu chitxicbaltz chinicyꞌal wunak. 4 Ma yi cweꞌn chitxicbaltz, nintzun ben chijakol tetz Jesús:—I bin jaluꞌ Taꞌ, ja txꞌamxij yi xnaꞌneꞌj kaꞌn te junt yaj yi nkꞌeꞌtz chmil. 5 Ej nin yi kaley yi tzꞌibaꞌnt cyen tan Moisés, na tal yi tajweꞌn tan cweꞌn kabiyol yi jun jilwutz xnaꞌnaꞌtz tan cꞌub. Ma iluꞌ teruꞌ Taꞌ, ¿mbi na tal teruꞌ taꞌn? —cheꞌch tzun bantz tetz Jesús.
6 Ja cuꞌ chitxumul yi jun ajtzaꞌklaꞌtz tan joyleꞌn puntil yi ẍeꞌnk jal til Jesús.
Cweꞌn tzun mejlok Jesús, nintzun octz tan stzꞌibeꞌn cuꞌn cobox yol wuxtxꞌotxꞌ tan wi kꞌab. 7 Poro yi eꞌ cyetz, qui eꞌ taneꞌ tan jakleꞌn quen tetz yi mbi xtxumuꞌn iꞌ te yi xnaꞌn. Jeꞌn tzun txiclok Jesús, nintzun taltz scyetz:
—Ma jaluꞌ ko at jun ẍchixoꞌluꞌ yi na nachon teꞌj yi quiꞌc muꞌẍ tal tetz til, baꞌn scꞌox nin yi bajx cꞌub te yi xnaꞌneꞌj, na ja juch til.
8 Cweꞌn tzun mejlok junt tir Jesús tan stzꞌibeꞌnt wuxtxꞌotxꞌ. 9 Ma yi quibital yi eꞌ pariseyaꞌtz yi yol Jesús, nin el chitxum tetz yi cyetz chipaltil. Chijunaleꞌn tzun cyeleꞌntz. Bajx cunin cyeleꞌn ojk yi eꞌ tijlcꞌuꞌlal, xomcheꞌ tlen yi eꞌ xicy. Ma yi cyeleꞌn ojk chicyakil, ẍchuc tzun Jesús cyaj cyentz tu xnaꞌn. 10 Nin yi jeꞌn txiclok junt tir Jesús, cyaꞌl junt at. Jalt cuntuꞌ yi xnaꞌn txiclij xlaj iꞌ.
Beneꞌn tzun jakol Jesús tetz:
—¿Loꞌk beꞌ tzun yi jun cꞌoloj wunak yi na chitzan tan takꞌleꞌn awil? ¿Cyaꞌl peꞌ jun ẍchixoꞌl yi mmakꞌon acaws?
11 —Cyaꞌl jun, Taꞌ, —stzun xnaꞌn bantz.
—Nchaꞌtz bin in, quil wakꞌ acaws. Ma jaluꞌ quiloꞌk, poro ntin tuꞌ swaleꞌ nin tzatz: Quiꞌt tzajuch awil, —stzun Jesús bantz tetz xnaꞌn.
Jesús iꞌ yi chitxekbil wunak taneꞌn
12 Toqueꞌnt tzun junt tir Jesús tan yol scyetz wunak. Itzun taltz scyetz:
—I inaꞌtz, in chitxekbil yi eꞌ wunak wi munt. Alchok scyetz yil xom sweꞌj, quil tzꞌaꞌtij tul tzꞌoꞌtz wutzil, ma na sjalok tajtzaꞌkl, nin scambok te yi stzꞌajbil.
13 Sajeꞌn tzun chitzaꞌwel yi eꞌ parisey yi yol iꞌ:
—Quiꞌc xeꞌ ayol, na aẍteꞌn na ayolbej awib, —cheꞌch.
14 —Quiꞌ. At xeꞌ yi yol yi na wal nin. Quiꞌc na ban ko inteꞌn na wakꞌ inkꞌej. Na yi in wetz, elnak intxum tetz naꞌ nchinsiteꞌt, nin na wil naꞌ nchimbeneꞌt. Poro yi eꞌ cyeruꞌ, qui na el chitxumuꞌ tetz naꞌ nchinsiteꞌt, nka naꞌ nchimbeneꞌt. 15 Na yi na choꞌcuꞌ tan maꞌleꞌn wajtzaꞌkl, cyajtzaꞌkl tuꞌ wunak na xcon cyanuꞌ. Ma yi in wetz, quiꞌc nin jun wunak yi najk chintzan tan maꞌleꞌn yi tajtzaꞌkl. 16 Yi nink noꞌc wetz tan maꞌleꞌn tajtzaꞌkl jun yaj, tzꞌaknak cuꞌn lwulej maꞌleꞌn. Na nkꞌeꞌtz inchuc yil noꞌc tan maꞌleꞌn tajtzaꞌkl, poro Intaj yi nchinchakon tzaj, iꞌ jun xomij sweꞌj, tan maꞌleꞌn cyajtzaꞌkl wunak. 17 Nchaꞌtz, at jun xtxolbil yi tzꞌibaꞌnt cyen le chileyuꞌ yi na tal: ‘Ko at cob yaj yi niꞌcuꞌn taneꞌn claril chiyol, baꞌn tzun kocsajtz.’ 18 Ej nin chaꞌstzun wutaneꞌn wetz. Na at cob kaxoneꞌn yi na katzan tan talcheꞌn yi imbalajil. Iteꞌn nin junaꞌtz yi in. Ma yi junt iꞌtz yi Intaj yi nchinchakon tzaj, —stzun Jesús scyetz.
19 Beneꞌnt tzun chijakoltz tetz:
—¿Naꞌ tzun najleꞌt ataj?
—Qui na el chitxumuꞌ tetz yi naꞌ scyetz in, itzun pyor Intajtz. Yi nink tzꞌel chitxumuꞌ tetz yi naꞌ scyetz in, tzꞌelepon tzun chitxumuꞌ-tz tetz yi naꞌ scyetz Intaj, —stzun Jesús bantz scyetz.
20 Yi yolaꞌseꞌj xcon tan Jesús te yi na tzan iꞌ tan chichusleꞌn wunak le templo. Choꞌn at iꞌ le kꞌab caꞌl kale na cuꞌ quent ofrent. Poro cyaꞌl nin jun nimsaj cꞌuꞌl tan tocseꞌn iꞌ xetzeꞌ, na ntaxk opon yi tiempil.
Yi talol Jesús yi at eꞌ ẍchiquimok tkꞌab quil
21 Beneꞌn tzun tlol Jesús junt xtxolbil scyetz:
—Yi in wetz, naꞌjeꞌn. Nin chocoponuꞌ tan injoyleꞌn, poro quil chinjal cyanuꞌ. Ẍchiquimokuꞌ tkꞌab quiluꞌ. Chaꞌstzun te quiꞌc rmeril yi nink choponuꞌ kalel noponeꞌt wetz.
22 Cyoqueꞌn tzun yi eꞌ judiy tan yol squibil quib:
—¿Copon ploꞌ biyol tib, yi na tal tzaj iꞌ sketz yi quiꞌc rmeril tan koponeꞌn ketz kalel tzꞌoponeꞌt iꞌ? —cheꞌch tzun bantz.
23 —Yi eꞌ cyeruꞌ, eꞌuꞌ tetz wuxtxꞌotxꞌ. Ma yi in wetz, in tetz tcyaꞌj. Yi eꞌ cyeruꞌ, cyajtzaꞌkl tuꞌ wunak xomcheꞌuꞌ teꞌj. Ma yi in wetz nkꞌeꞌtz cyajtzaꞌkl wunak xomchin teꞌj. 24 Chaꞌstzun te sotzel chiwutzuꞌ sbneꞌ tan paj quiluꞌ. Na ko quil cyocsajuꞌ naꞌ scyetz in, ẍchiquimokuꞌ tkꞌab quiluꞌ, —stzun Jesús scyetz.
25 —¿Naꞌ tzun scyetz aẍ? —cheꞌch tzun.
—Walnak bin scyeruꞌ le xeꞌtzbil tzaj naꞌ scyetz in. 26 Ej nin nchaꞌtz, at wiꞌnin eꞌchk takleꞌn yi na icyꞌ tincꞌuꞌl tan talcheꞌn kloꞌ scyeruꞌ. Na at wiꞌnin chipaltiluꞌ yi tajweꞌn tan walol scyeruꞌ. Ej nin bintzinin yi inyol yi na wal scyeruꞌ, na choꞌn sajnak wital te yi jun yi nchinchakon tzaj, —stzun Jesús bantz scyetz.
27 Poro qui el chitxum tetz yi iꞌtz yi Taj iꞌ yi na tzan tan yolcheꞌn nin scyetz. 28 Chaꞌstzun te, beneꞌnt tlol junt yol scyetz:
—Yil chin chichꞌimbajeꞌnuꞌ tcyaꞌj, kalenaꞌs tzun tzꞌel chitxumuꞌ tetz yi naꞌ scyetz in. Ej nin tzꞌelepon chitxumuꞌ tetz yi qui na chintzan tan banleꞌn jun takleꞌn yi in cuntuꞌk. Ma na Intaj, yaꞌstzun qꞌuil wukanil. 29 Na yi jun yi nchinchakon tzaj, at nin iꞌ sweꞌj. Qui na chin takꞌ cyen Intaj inchuc, na ilenin na chintzan tan banleꞌn yi eꞌchk takleꞌn yi na pekꞌ iꞌ teꞌj, —stzun iꞌ bantz scyetz.
30 Yi talol Jesús yi eꞌchk yolaꞌseꞌj, wiꞌnin tzun wunak cyocsaj yol iꞌ.
Yi eꞌ mero nitxajil Ryos tu yi eꞌ pres tkꞌab Baybaꞌn
31 Beneꞌn tzun tlol Jesús scyetz yi eꞌ judiyaꞌtz, yi watok cunin cyocsaj yol iꞌ:
—I bin jaluꞌ, yi eꞌ cyeruꞌ, kol chixomuꞌ te weri inchusuꞌn, chocoponuꞌ tetz mero inchusbeꞌtz. 32 Nchaꞌtz, kol chixomuꞌ te weri inchusuꞌn, tzꞌelepon chitxumuꞌ tetz, yi iꞌtz yi bintzi, nin cheleponuꞌ liwr tkꞌab quiluꞌ taꞌn, —chij iꞌ ban scyetz.
33 —¿Ẍeꞌn tzuntz Taꞌ? Na yi oꞌ ketz, oꞌ xonl kꞌajtzun Abraham. Ej nin xomchoꞌ te yi ẍchusuꞌn iꞌ. Nin quiꞌc nin jun tir jajk kaxom te ẍchusuꞌn junt. ¿Mbi xac na taluꞌ sketz yi tajweꞌn tan keleꞌn liwr? —cheꞌch tzun bantz tetz Jesús.
34 Beneꞌn tzun tlol Jesús scyetz:
—Jun cuꞌn yol na wal nin scyeruꞌ, cyakil yi eꞌ yi na chitzan tan juchleꞌn quil, eꞌ pres tkꞌab quil. 35 Je jun elsawutzileꞌj: Cyakil yi eꞌ yi na chitzan tan juchleꞌn quil, niꞌcuꞌn eꞌ chi taneꞌn jun esclaw, yi pres wutz iꞌ tkꞌab patrón. Na jun esclaw, nkꞌeꞌtz iꞌ jun tajlal nitxajil patrón. Na nkꞌeꞌtz niꞌcuꞌn jun esclaw chi jun cyꞌajol, yi baꞌn sban yi tetz tajbil. 36 Chaꞌstzun te na wal nin scyeruꞌ, yi in wetz in Cyꞌajol. Kol chicolpijuꞌ waꞌn, cheleponuꞌ liwr le bintzinin. 37 Yi eꞌ cyeruꞌ, eꞌuꞌ xonl Abraham chi wutaneꞌn wetz. Poro na cyajuꞌ choꞌcuꞌ tan imbiyleꞌn, na qui na cyocsajuꞌ yi inyol yi na wal. 38 Ej nin yi in wetz, na inyol yi yol yi alijt tan Intaj swetz. Ma eꞌ cyeruꞌ, na chitzanuꞌ tan banleꞌn yi tajbil yi cyajcawiluꞌ, —stzun Jesús scyetz.
39 —Poro yi ajcaw skeꞌj, iꞌtz kꞌajtzun kamam Abraham, na yi oꞌ ketz, oꞌ mero xonl iꞌ, —cheꞌch tzun.
—Yi bintzinink eꞌuꞌk xonl Abraham, na kloꞌ chitzanuꞌ tan banleꞌn yi eꞌchk takleꞌn balaj yi ban iꞌ. 40 Poro quiꞌ, na yi cyeruꞌ cyajbiluꞌ iꞌtz tan cyoqueꞌnuꞌ tan imbiyleꞌn. Na cyajuꞌ choꞌcuꞌ tan imbiyleꞌn tan tuꞌ yi na chintzan tan xtxoleꞌn yi mero bintzi scyeruꞌ, yi sajnak tlol Ryos swetz. Poro yi ajtzaꞌkl yi na chitzan cyeruꞌ tan nucꞌleꞌn, nkꞌeraꞌtz banak kꞌajtzun Abraham. 41 Yi cyajtzaꞌkluꞌ choꞌn na saj te yi cyajcawiluꞌ, yi tzꞌamol quikaniluꞌ, —stzun Jesús scyetz.
—¿Ẍeꞌn tzuntz? na yi oꞌ ketz, oꞌ mero meꞌl cyꞌajl Ryos. Quiꞌc junt yi tzꞌamol kukanil, —cheꞌch.
42 —Yi bintzinink eꞌuꞌ meꞌl cyꞌajl Ryos, na kloꞌ chipekꞌuꞌ sweꞌj, na choꞌn sajnakin te Ryos. Na nkꞌeꞌtz yi wajbil tuꞌk yi nuꞌl tzoneꞌj, ma na Ryos nchinchakon tzaj. 43 ¿Mbi tzuntz yi qui na el chitxumuꞌ te yi weri inyol? Je puntileꞌj, qui na el chitxumuꞌ tetz tan paj yi qui na cyajuꞌ quibituꞌ. 44 Na yi eꞌ cyeruꞌ, yi tzꞌamol quikaniluꞌ iꞌtz yi Baybaꞌn, na eꞌuꞌ tetz. Nin na chitzanuꞌ tan banleꞌn yi tetz tajbil. Iꞌ biyol nak le xeꞌtzbil tzaj. Quiꞌc nin jun tir yi jajk xom iꞌ te bintzi. Ej nin quiꞌc nin jun tir yi najk jilon iꞌ bintzi. Yi na xtxum cuꞌn eꞌchk laꞌjil, tetz nin iꞌ, na chin laꞌj nin iꞌ, na iꞌ txumun cyen yi laꞌjil le xeꞌtzbil tzaj. 45 Yi in wetz, na wal yi mero bintzi scyeruꞌ, poro qui na cyocsajuꞌ inyol. 46 I bin jaluꞌ, ¿naꞌ scyetz jun chixoꞌluꞌ yi nink xcyeꞌ tan talcheꞌn tzaj yi jajk injuch jun wil? Na ja lajluchax ẍchiwutzuꞌ yi bintzinin yi yol yi na chintzan tan yolcheꞌn. ¿Mbi tzuntz yi qui na cyajuꞌ cyocsajuꞌ? 47 Poro cyakil yi eꞌ yi bintzinin eꞌ tetz Ryos, quibiteꞌ yi yol Ryos. Ma yi eꞌ cyeruꞌ, nkꞌeꞌtz eꞌuꞌ tetz Ryos. Chaꞌstzun te qui na cyajuꞌ quibituꞌ inyol.
At nin Cristo yi ntaxk itzꞌij Abraham
48 Cyoqueꞌn tzun yi eꞌ judiy, yi contr te Jesús, tan talcheꞌn tetz:
—Bintzi yi na kal yi aẍ tuꞌ aj Samaria. Ej nin pitij quiẍ tan jun espíritu cwent Baybaꞌn, —cheꞌch tzun bantz tetz.
49 —Yi in wetz, nkꞌeꞌtz pitij chin tan jun espíritu cwent Baybaꞌn, na cyakil yi eꞌchk takleꞌn yi na chintzan tan banleꞌn, iꞌtz tan takꞌleꞌn kꞌej Intaj. Ma yi eꞌ cyeruꞌ, na chitzanuꞌ tan telseꞌn inkꞌej. 50 Yi in wetz qui na chintzan tan joyleꞌn inkꞌej. Poro at jun yi stakꞌeꞌ inkꞌej. Ej yi junaꞌtz baꞌn na xcyeꞌ teꞌtz tan maꞌleꞌn ajtzaꞌkl, ko baꞌn atit nka quiꞌ. 51 Jun cuꞌn yol na wal nin scyeruꞌ, alchok scyetz yil xom te yi weri inchusuꞌn, quil quim teraꞌtz, —stzun iꞌ bantz scyetz.
52 —Ma jaluꞌ, tan tuꞌ ayol mas tcuꞌn na el katxum tetz yi pitij quiẍ tan jun espíritu cwent Baybaꞌn. Na yi Abraham quimnak iꞌ. Nin cyakil yi eꞌ elsanl stziꞌ Ryos ja chiquim len. Ma yi aẍ awetz na cẍtzan tan talcheꞌn: ‘Alchok scyetz yil sban taneꞌn yi eꞌchk takleꞌn yi na wal, quil quim teraꞌtz,’ cẍchij bin sketz. 53 ¿Ẍeꞌn tzuntz? ¿At ptzun mas arakꞌej swutz kꞌajtzun Abraham? Na yi kꞌajtzun Abraham ten quim. Nin nchaꞌtz yi eꞌ elsanl stziꞌ Ryos, ja chiquim len. Ma aẍatz, ¿mbi ekaꞌn awaꞌn? —cheꞌch bantz tetz.
54 —Yi nink noꞌc tan takꞌleꞌn inkꞌej swibil wib, quiꞌc na takꞌ. Poro yi jun yi na tzan tan takꞌleꞌn inkꞌej, iꞌtz yi Intaj. Iteꞌn chiryosiluꞌ yi na cyaluꞌ. 55 Poro qui na pujxij iꞌ cyanuꞌ. Ma yi in wetz pujxnakt waꞌn. Yi nink wal nin scyeruꞌ yi qui wajskeꞌn wutz, in tzun kloꞌ laꞌj chi quitaneꞌn cyeruꞌ. Poro jun cuꞌn yol, wajskeꞌn wutz Intaj. Nin na chintzan tan banleꞌn taneꞌn yi mbi cuꞌn na tal tzaj swetz. 56 Nchaꞌtz yi Abraham, yi chimam chiteꞌuꞌ, wiꞌnin tzatzineꞌn iꞌ yi kꞌukeweꞌn cꞌuꞌl sweꞌj. Ej nin wiꞌnin tzatzineꞌn yi teleꞌn xtxum iꞌ swetz, —stzun Jesús scyetz.
57 —Txeꞌn nin tzꞌak nicyꞌ cient yob awaꞌn, nin na awal tzaj sketz yi awilnak Abraham, —cheꞌch tzun tetz.
58 —Jun cuꞌn yol na wal nin scyeruꞌ, yi ntaxk ul itzꞌok Abraham, atin nin wetz, —stzun Jesús scyetz.
59 Cyoqueꞌn tzuntz tan sicyꞌleꞌn cꞌub, tan cꞌoxleꞌn Jesús. Poro nin tew tib, nin el tzaj ẍchinicyꞌal. Nin yi teleꞌn tzaj le templo, ajeꞌn nin bantz.