Yi jakxeꞌn wutz jun yaj yi moyiꞌẍ iꞌ yi titzꞌleꞌnix
9
1 Itzun bantz yi quicyꞌeꞌn cuꞌn Jesús scyuchꞌ eꞌ ẍchusbeꞌtz tul jun amaꞌl, nin ben quilol jun yaj yi moyiꞌẍ nin iꞌ yi titzꞌeꞌn. 2 Cyoqueꞌn tzun yi eꞌ ẍchusbeꞌtz tan jakleꞌn tetz Jesús:—Taꞌ, ¿mbi tzuntz yi moyiꞌẍ yi yajeꞌj yi titzꞌeꞌn? ¿I ploꞌ tan paj yi til yi taj xtxuꞌ, nka tan paj yi at tetz til? —cheꞌch tetz Jesús.
3 —Nkꞌeꞌtz tan paj yi tetz til, nin nkꞌeꞌtz tan paj yi til yi taj xtxuꞌ. Poro yi puntil iꞌtz: moyiꞌẍ iꞌ yi titzꞌeꞌn tan lajluchaxeꞌn yi porer Ryos te iꞌ. 4 Jalen peꞌk yi at amaꞌl tajweꞌn tan bnixeꞌn yi tajbil yi jun yi nchinchakon tzaj, na tzꞌul jun tiemp yi quiꞌc rmeril tan wakꞌujeꞌn. 5 Poro jalen peꞌk yi atin tzoneꞌj wi munt, in chitxekbil wunak taneꞌn.
6 Yi wiꞌt bajeꞌn yolol eꞌchk yoleꞌj, nintzun cuꞌ stzubil yi tꞌaꞌal stziꞌ wuxtxꞌotxꞌ, nin oc tan banleꞌn muꞌẍ tal niꞌ xkꞌol tan yi tꞌaꞌal stziꞌaꞌtz. Yi bnixeꞌn, nin oc tkꞌoltz te wutz moyiꞌẍ.
7 —Quiloꞌk tan xtxꞌajleꞌn awutz tul yi pilaꞌ yi na biꞌaj Siloé. (Yi na elepont yi biꞌ yi aꞌaꞌtz iꞌtz: Chakijt.)
Nintzun bentz, nin oc tan xtxꞌajleꞌn yi wutz tcꞌuꞌl yi jun pilaꞌaꞌtz.
Ma yi tuleꞌn, nsken jakxij yi wutz. 8 Yi quilol yi eꞌ wisin scyuchꞌ yi eꞌ mas wunak, yi cyajskeꞌn wutz yi moyiꞌẍaꞌtz, nintzun cyaltz:
—¿Nkꞌeꞌtz peꞌ yi yajeꞌj yi cꞌolch cun tunin tan rmosumiꞌn?
9 —Iꞌtz, —cheꞌch cobox.
Poro at eꞌ cyal:
—I cunin iꞌaꞌtz, poro nkꞌeraꞌtz.
Beneꞌn tzun tlol yi yajaꞌtz scyetz:
—I inaꞌtz.
10 —Poro ¿ẍeꞌn tzuntz? na baꞌnt bin cxmayin jaluꞌ, —cheꞌch tetz.
11 —I bin yi jun yaj yi na biꞌaj Jesús iꞌ njakon inwutz, na ja cuꞌ bnol muꞌẍ tal xkꞌol nin oc tkꞌol stziꞌak inwutz, nin taltz swetz: “Or, quiloꞌk tan xtxꞌajleꞌn awutz le pilaꞌ Siloé,” chij iꞌ ban swetz. Nintzun imbentz tan xtxꞌajleꞌn inwutz le jun pilaꞌaꞌtz. Jakxeꞌn nin tzun ban inwutz, —stzun yaj scyetz.
12 —¿Naꞌ tzun atit yi jun yajaꞌtz jaluꞌ? —cheꞌch.
—Cuquen, aloꞌ atit, —stzun moyiꞌẍ bantz.
Yi cyoqueꞌn yi eꞌ parisey tan ẍchꞌoteꞌn stziꞌ yi yaj yi jakxij wutz
13 Beneꞌn tzun quicyꞌal yi jun yajaꞌtz ẍchiwutz yi eꞌ parisey. 14 Na yi jun kꞌejaꞌtz, yi cweꞌn bnol Jesús yi xkꞌol tan tulseꞌn yos tu moyiꞌẍ, iꞌtz jun kꞌej yi quiꞌc cu tan cyakꞌujeꞌn eꞌ judiy. 15 Cyoqueꞌnt tzun yi eꞌ pariseyaꞌtz tan ẍchꞌoteꞌn stziꞌ yi yajaꞌtz yi ẍeꞌn cuꞌn ban yi mmuꞌl yos tuchꞌ. Beneꞌn tzun tlol yi yaj scyetz:
—Xkꞌol tuꞌ bin oc tkꞌol te inwutz. Nin cawun iꞌ tan imbeneꞌn tan xtxꞌajleꞌn inwutz. Ntinaꞌtz tuꞌ-tz. Ma jaluꞌ baꞌn chinxmayin, —stzun iꞌ bantz.
16 At tzun cobox ẍchixoꞌl yi eꞌ parisey yi cyal:
—Yi jun yajaꞌtz, yi mbnon yi eꞌchk takleꞌneꞌj, nkꞌeꞌtz iꞌ tetz Ryos, na qui na tek ẍchiꞌ yi jun kꞌej yi quiꞌc cu tan kakꞌujeꞌn, —cheꞌch eꞌ bantz.
Ej nin at coboxt cyaꞌltz:
—Yi juchul ilk yi jun yajaꞌtz, ¿ẍeꞌn kloꞌ xcyeꞌ iꞌ tan banleꞌn jun milawr chi taneꞌn yi jeꞌj yi mbnix taꞌn? —cheꞌchtz.
Baj cun tunin jatxol tib yi cyajtzaꞌkl.
17 Cyoqueꞌn tzuntz tan jakleꞌn junt tir tetz yi yajaꞌtz, yi jakxij wutz:
—Ma aẍ, ¿mbi na atxum te yi yajaꞌtz, yi njakon awutz?
—Yi wetz yi na intxum iꞌtz yi iꞌ jun elsanl stziꞌ Ryos, —stzun yi yajaꞌtz.
18 Poro yi eꞌ judiy quinin cyocsaj ko moyiꞌẍ wutz yaj sajleꞌn. Chaꞌstzun te yi beneꞌn mantar tan chichakleꞌn yi taj xtxuꞌ yi moyiꞌẍ, yi nsken ul yos tuchꞌ. 19 Ej nin eꞌ baj octz tan jakleꞌn quen scyetz:
—Yi yajeꞌj, ¿yaꞌtz peꞌ chinitxajiluꞌ, yi na cyal wunak yi moyiꞌẍ iꞌ titzꞌeꞌn? ¿Ẍeꞌn tzun bantz yi baꞌn xmayin jaluꞌ? —cheꞌch bantz.
20 —Yi yajeꞌj, yaꞌstzun kanitxaꞌ. Ej nin bintzinin moyiꞌẍ iꞌ yi titzꞌeꞌn. 21 Poro yi oꞌ ketz qui na el katxum tetz yi ẍeꞌn loꞌ mban yi mmuꞌl yos tuchꞌ na baꞌnt na xmayin jaluꞌ. Ej nin nchaꞌtz, qui na el katxum tetz aloꞌ scyetz njakon wutz. Poro baꞌn chijak ninuꞌ tetz. Iẍkaj nitxaꞌeꞌt tzunk iꞌ. At rmeril tan tlol iꞌ scyeruꞌ yi mbi mbajij.
22 Ja cyal yi eꞌ taj xtxuꞌ yi yoleꞌj tan paj xoꞌw, na elnak chitxum tetz yi nsken bixeꞌ cyakꞌun eꞌ judiy, yi alchok scyetz yil tocsaj yi Jesús yaꞌstzun yi Cristo, tajweꞌn cuꞌn tan teleꞌn lajuꞌn ẍchixoꞌl yi cmon yi na chimol quib le sinagoga. 23 Chaꞌstzun te beneꞌn cyalol yi eꞌ taj xtxuꞌ: “Chijak ninuꞌ tetz. Iẍkaj nitxaꞌeꞌt tzunk iꞌ,” cheꞌch.
24 Sajeꞌn tzun chichakol junt tir yi yajaꞌtz, yi nsken jakxij wutz. Itzun cyaltz tetz:
—Ma jaluꞌ, swutz cuꞌn Ryos, alaj yi mero bintzi sketz. Na elnak katxum tetz yi jun yajaꞌtz iꞌ jun juchul il, —cheꞌch tzun.
25 —Qui bin na wil wetz yi ko juchul il yi jun yajaꞌtz nka quiꞌ. Ntinaꞌtz wetz yi na el intxum tetz, iꞌtz yi in moyiꞌẍ sajleꞌn, ma jaluꞌ baꞌn chinxmayin, —stzun iꞌ scyetz.
26 Poro qui icyꞌ chipaj tan jakleꞌn tetz:
—Poro ¿ẍeꞌn tulej tan jakleꞌn awutz?
27 —Ja wiꞌt wal yi puntil scyeruꞌ, nin qui na cyocsajuꞌ. ¿Mbi xac scyeruꞌ kol wal nin junt tir? ¿Nka na tzun cyajuꞌ chixomuꞌ teꞌj?
28 Cyoqueꞌn tzun yi eꞌ judiy tan xcyꞌaklil teꞌj.
—Yi aẍatz, choꞌn xomij awiꞌ te yi jun yajaꞌtz, poro yi oꞌ ketz choꞌn xomij kawiꞌ te tajtzaꞌkl kꞌajtzun Moisés. 29 Yi oꞌ ketz, elnak katxum tetz yi Ryos akꞌon tajtzaꞌkl Moisés, poro yi nocxaꞌtz qui na el ketz katxum tetz aloꞌ nsajeꞌt-x, —cheꞌch tetz yaj.
30 —¡Ah! Wiꞌnin na neꞌl yab te cyajtzaꞌkluꞌ yi qui na el chitxumuꞌ tetz yi naꞌ nsiteꞌt yi jun yajaꞌtz, wech na ja jakxij inwutz taꞌn. 31 Elnak katxum tetz yi qui na tbit Ryos chitziꞌ chikul yi eꞌ juchul il. Ntin na tbit iꞌ chitziꞌ chikul yi eꞌ yi na chitzan tan cꞌuꞌlajeꞌn, nin tan banleꞌn taneꞌn yi tetz tajbil. 32 Na cyaꞌl na kubit wit yi jajk ul yos tu jun moyiꞌẍ tan jun yaj. 33 Yi nkꞌeꞌtz choꞌnk mpon tzaj yi yajaꞌtz te Ryos, quil bnix jun takleꞌn taꞌn ẍchuc, —stzun yi yajaꞌtz yi jakxij wutz.
34 —Yi aẍaꞌtz, iẍkaj ploj nink il cꞌol cyꞌaꞌn awaꞌn. ¿Na ptzun awaj cẍoꞌc tan kachusleꞌn? —cheꞌch tzun bantz.
Teleꞌn tzaj tzun chilajultz chixoꞌl.
Yi eꞌ yi moy wutz cyajtzaꞌkl
35 Yi ticyꞌeꞌn cobox kꞌej, nin quilt quib Jesús tu yi jun yajaꞌtz, yi jakxij wutz taꞌn. Nsken tbit Jesús yi elnak tzaj lajuꞌn iꞌ ẍchixoꞌl cmon. Beneꞌn tzun jakol Jesús tetz:
—¿Na peꞌ awocsaj yi at yi Cyꞌajl Ryos skaxoꞌl? —chij Jesús tetz.
36 —Taꞌ, ẍchajeꞌuꞌ swetz naꞌ scyetz iꞌ tan wocsal, —chij yaj.
37 —Awajskeꞌn wutz, na i iꞌaꞌtz yi in, yi na chijilon nin tzatz.
38 Lajkeꞌl nin tzun cweꞌn mejlok yaj swutz Jesús, nintzun taltz:
—Taꞌ, na wocsajuꞌ yi iluꞌaꞌtz yi mero Cyꞌajl Ryos.
39 —Yi in wetz, ja nuꞌl tzoneꞌj wi munt tan maꞌleꞌn cyajtzaꞌkl yi eꞌ wunak bantz jakxeꞌn wutz cyajtzaꞌkl yi eꞌ yi jopij wutz cyajtzaꞌkl. Ej nin ja nuꞌl tan jopleꞌn wutz cyajtzaꞌkl yi eꞌ yi jakij wutz cyetz cyajtzaꞌkl taneꞌn ẍchiwutz, —stzun Jesús bantz tetz.
40 At tzun cobox parisey yi ateꞌ quentz xlaj. Ej nin yi quibital yi yol Jesús, nin ben chitzaꞌweltz:
—Iẍkaj jopij tzunk wutz ketz kajtzaꞌkl, —cheꞌch.
41 —Yi bintzinink yi moy wutzil tuꞌk na chicyꞌanuꞌ, quiꞌc kloꞌ chipajuꞌ te quiluꞌ yi na chitzanuꞌ tan juchleꞌn. Poro tan paj yi na cyaluꞌ yi qui jopij wutz cyajtzaꞌkluꞌ ẍchicyajk cyenuꞌ tkꞌab quiluꞌ, —stzun Jesús bantz scyetz.