Yi elsawutzil tetz jun peꞌm cneruꞌ
10
1 Jun cuꞌn yol na wal nin scyeruꞌ, alchok scyetz yi choꞌn na jeꞌ wi peꞌm tan tocomponeꞌn ẍchixoꞌl cneruꞌ, alkꞌom iꞌ, na qui na xcon yi puert taꞌn. Ntin na jeꞌ wi peꞌm. 2 Ma yi mero pstor na xcon yi puert taꞌn. 3 Nchaꞌtz yi qꞌuicyꞌlom puert, na takꞌ amaꞌl tetz tan toqueꞌn. Nin nchaꞌtz yi eꞌ cneruꞌ, elnak chitxum te wiꞌ yi pstor scyetz. Ej nin na oc yi pstor cyetz tan chimoxeꞌneꞌl tzaj tan chibiꞌ. 4 Yi na cheꞌl tzaj tpeꞌm, na bajxij iꞌ ẍchiwutz, nin na chixom nin yi eꞌ cneruꞌ wutz coc, na echaꞌnt yi wiꞌ yi pstor cyetz cyaꞌn. 5 Quil chixom nin yi eꞌ cneruꞌ te junt yi qui ajskeꞌn wutz cyaꞌn. Ojkeꞌn ẍchibneꞌ swutz, na qui echaꞌnt wiꞌ cyaꞌn.6 Ja xcon yi jun elsawutzileꞌj tan Jesús, poro qui el chitxum tetz yi mbi na elepont.
Jesús yaꞌstzun balaj pstor
7 Toqueꞌn tzun Jesús tan talcheꞌn nin junt tir scyetz:
“Jun cuꞌn yol na wal nin scyeruꞌ: I inaꞌtz, in puertil chipeꞌm cneruꞌ taneꞌn. 8 Cyakil yi eꞌ yi ja cyocsaj quib chi pstor cneruꞌ sajleꞌnix tunintz, eꞌ cuꞌn alkꞌom.a Poro yi eꞌ wetz wawun, quil chixom nin scyeꞌj. 9 I inaꞌtz, in puertil yi peꞌm cneruꞌ. Alchok scyetz yil chin xconsaj tan toqueꞌn tpeꞌm, sclaxok. Stzatzink yil tzꞌoc iꞌ tetz tajlal wawun. Nin nternin tzꞌoc, nternin tzꞌel tzaj tan biꞌl tzatziꞌn. Sjalok yi bi cuꞌn tajweꞌn tetz.
10 “Yi eꞌ alkꞌom, ntin na chuꞌl tan cyalkꞌeꞌn, nin tan chibiyleꞌn yi eꞌ cneruꞌ, nin tan chixiteꞌn. Poro yi in wetz, ja nuꞌl tan takꞌleꞌn quitzꞌajbil wunak, jun itzꞌajbil yi qui bajsbeꞌn tetz. 11 I inaꞌtz in balaj pstor. Na na quiluꞌ jun balaj pstor na takꞌ tib tan chicolcheꞌn yi eꞌ tawun. 12 Poro yi eꞌ yi mosiꞌn tuꞌ quitaneꞌn tan chiqꞌuicyꞌleꞌn cneruꞌ, quil choꞌc il scyeꞌj yil tzꞌul tzaj xoꞌj, squileꞌ cyen yi eꞌ cneruꞌ, nin chelepon ojk. Quil tzꞌokꞌ chicꞌuꞌl scyeꞌj, na nkꞌeꞌtz cyetz. Eꞌ tu mos. Pwok tuꞌ na chiwutz cyen teꞌj. Ej nin yil tzꞌocopon xoꞌj ẍchixoꞌl yi eꞌ cneruꞌ, xcyek tan chibiyleꞌn cuꞌn, nin tan chixiteꞌn. 13 Yi jun jilwutz pstoraꞌtz, qui na okꞌ chicꞌuꞌl scyeꞌj cneruꞌ, na nkꞌeꞌtz cyetz, eꞌ tuꞌ mos, ntin na chipekꞌ te chichojoꞌn.
14-15 “Ma yi in wetz, i inaꞌtz yi balaj pstor. Ej nin ajskeꞌn inwutz tan Intaj. Nchaꞌtz in, wajskeꞌn wutz iꞌ. Niꞌcuꞌn tzun kutaneꞌn scyuchꞌ eꞌ wawun. Echaꞌn chiwutz waꞌn, nin nchaꞌtz eꞌ, cyajskeꞌn inwutz. Yi in wetz, swakꞌeꞌ wib tan chiclaxeꞌn. 16 Poro nchaꞌtz, ateꞌ mas wawun yi nkꞌeꞌtz choꞌn ateꞌ ẍchixoꞌl yi cyuchꞌeꞌj, poro tajweꞌn tan chisajeꞌn sweꞌj. Chocopon cyeꞌtz cꞌulutxum jakꞌ incaꞌwl. Ej nin junit buꞌj ẍchibneꞌ scyuchꞌ yi eꞌ mas. Ej nin jun ntziꞌ pstor cyetz sbneꞌ.
17 “Na pekꞌ Intaj sweꞌj, na wakꞌoꞌnt wib tkꞌab quimichil, poro nitzꞌokt junt tir. 18 Cyaꞌl jun yi nink xcyeꞌ tan imbiyleꞌn. Inteꞌn swakꞌeꞌ wib. Baꞌn chinquim, ej nin baꞌn nitzꞌij junt tir, na yaꞌstzun cawbeꞌn wetz tan Intaj.”
—¿Nxac yi taclcheꞌ wunak tan tbiteꞌn yol yi nocxeꞌj? Na pitij iꞌ tan jun espíritu cachiꞌ. Nin ja loꞌ oc yab le wiꞌ, —cheꞌch.
21 Poro at coboxt yi cyal:
—Poro quil xcyeꞌ jun yaj tan talcheꞌn yi eꞌchk yolaꞌtz yi ko pitij iꞌ tan jun espíritu cwent Baybaꞌn. Iẍkaj nink xcyeꞌ jun espíritu cwent Baybaꞌn tan jakleꞌn wutz jun moyiꞌẍ, —cheꞌch tzun bantz.
Yi teleꞌn kꞌej Jesús cyakꞌun eꞌ judiy
22 Itzun bantz yi ticyꞌeꞌn wutz kꞌej yi templo Jerusalén, iꞌtz tiemp tetz cheꞌw. 23 Choꞌn tzun na xon Jesús xe jun galer, yi cyꞌanl tetz yi templo, yi na biꞌaj Galer Tetz Salomón. 24 Cyoqueꞌn tzun chicmonil quib yi eꞌ judiytz teꞌj, itzun cyaltz:
—Na cabej kacꞌuꞌl tzaweꞌj. ¿Tonaꞌ tzawal sketz yi mero bintzi? ¿I peꞌ aẍaꞌtz yi Cristo yi bixbaꞌnt tan Ryos tan tuleꞌn, nka quiꞌ? Yaꞌstzun kloꞌ na kaj kubit, —cheꞌch tzun bantz tetz.
25 —Alijt waꞌn scyeruꞌ, poro qui na cyocsajuꞌ inyol. Nchaꞌtz yi eꞌchk milawr yi na chintzan tan banleꞌn tan porer Intaj, na tzan tan ẍchajleꞌn yi claril scyeruꞌ. 26 Poro yi eꞌ cyeruꞌ, qui na cyocsajuꞌ, na nkꞌeꞌtz eꞌuꞌ tajlal yi eꞌ wawun. Ej nin je jun xtxolbileꞌj yi walnak scyeruꞌ: 27 Yi eꞌ wetz wawun, echaꞌn inwiꞌ cyaꞌn. Ej nin wajskeꞌn chiwutz. Nchaꞌtz eꞌ cyetz, xomcheꞌ sweꞌj. 28 Swakꞌeꞌ jun itzꞌajbil scyetz yi qui bajsbeꞌn tetz. Quil chisotz cyeraꞌtz. Nin cyaꞌl nin jun yi nink xcyeꞌ tan majleꞌn len jun tinkꞌab. 29 Akꞌij cheꞌt tan Intaj swetz, nin cyaꞌl nin jun yi nink xcyeꞌ tan chimajleꞌn len tkꞌab iꞌ, na quiꞌc nin jun yi mas cham swutz iꞌ. 30 Ej nchaꞌtz, yi in wetz tu Intaj, junit oꞌ, —stzun iꞌ scyetz.
31 Cyoqueꞌn tzun yi eꞌ judiy tan sicyꞌleꞌn cꞌub tan cyoqueꞌn kloꞌ tan cꞌoxleꞌn Jesús. 32 Poro nintzun ben tlol Jesús scyetz:
—Ẍchiwutz cuninuꞌ yi ja bnix wiꞌnin eꞌchk takleꞌn balaj waꞌn tan porer Intaj. ¿Naꞌ scyetz jun scyeri eꞌchk takleꞌnaꞌtz yi minjuch wil teꞌj yi chocoponuꞌ tan incꞌoxleꞌn tan cꞌub?
33 —Nkꞌeꞌtz tan paj yi eꞌchk takleꞌn balaj yi maban, itzunk awilaꞌs yi kocopon tan acꞌoxleꞌn tan cꞌub. Ma na tan paj yi eꞌchk yol yi na cẍtzan tan yolcheꞌn, yi na el kꞌej Ryos taꞌn. Aẍ tuꞌ jun sloj wunak, poro na awocsaj awib tetz Ryos, —cheꞌch tetz.
34 —Je yol Ryos talnakeꞌj. Tzꞌibaꞌnt cyen tul chileyuꞌ. Chin clar cunin na tal: ‘Eꞌ cuꞌnuꞌ ryos.’ Yaꞌstzun yol yi tzꞌibaꞌnt cyen. 35 Quil scꞌul yi quiꞌk kocsaj yi yol yi tzꞌibaꞌnt cyen, na ja chibiꞌaj ryos yi eꞌ yi ja cyocsaj yol Ryos tentz. 36 ¿Nxac tzun yi na cyaluꞌ swetz yi na chintzan tan telseꞌn kꞌej Ryos tan tuꞌ yi nwal scyeruꞌ yi in Cyꞌajl Ryos? wech na jatxij chint, nin chakij chint taꞌn tan inxconeꞌn tetz. 37 Yi ko nkꞌeraꞌtz yi tajbil Intaj yi na chintzan tan banleꞌn, qui bin cyocsajuꞌ inyol. 38 Na chintzan tan banleꞌn yi tajbil Intaj, poro yi eꞌ cyeruꞌ qui na cyocsajuꞌ yi in Cyꞌajl iꞌ. Siquier nink yi eꞌchk milawr nink cyocsajuꞌ, tan teleꞌn chitxumuꞌ tetz yi junit oꞌ tu Intaj, —stzun iꞌ bantz scyetz.
39 Oqueꞌn nin tzun kloꞌ ban Jesústz cyaꞌn xetzeꞌ, poro qui txꞌamxij cyaꞌn.
40 Choꞌn tzun pakxeꞌn Jesústz lilen jalaj icyꞌen yi aꞌ Jordán. Choꞌn tzun cyajeꞌn cyen tul yi amaꞌl kale oqueꞌt Waꞌn tan jeseꞌn aꞌ ẍchiwiꞌ wunak. 41 Poro wiꞌnin wunak eꞌ ẍchaꞌk tan tbiteꞌn yol Jesús, ej nin cyaltz:
—Yi Waꞌn, quiꞌc nin jun milawr bnix taꞌn, poro cyakil yi eꞌchk yol yi yolnak iꞌ te yajeꞌj, bintzinin teꞌtz, —cheꞌch tzun cobox tkant.
42 Le yi jun luwaraꞌtz wiꞌnin wunak cyocsaj yi Jesús iꞌ yi Cristo.