Yi quimeꞌn Lázaro
11
1 Itzun bantz, at jun yaj yi na biꞌaj Lázaro. Yabiꞌẍ iꞌ. Ej nin at cob tanub iꞌ yi na chibiꞌaj Mariy tu Mart. Choꞌn najlcheꞌ le tnum Betania. 2 Nin yi jun yi na biꞌaj Mariy, yaꞌstzun yi xnaꞌn yi oc kojol yi tzꞌacꞌbil yi wiꞌnin cꞌoꞌcal te tkan Jesús, nin yi oc tan skejseꞌn tan yi xiꞌil wiꞌ. 3 Nintzun ben chimantar yi eꞌ tanubaꞌtz tan ẍchakleꞌn Jesús.—Taꞌ, yi jun tamiwuꞌ, yabiꞌẍ, —cheꞌch yi eꞌ chakum yi ben cyakꞌun.
4 Yi tbital Jesús yi chiyoltz, nintzun taltz:
—Yi jun yabiꞌẍ, nkꞌeꞌtz sotzeꞌnk sbneꞌ. Na yi tetz yablil, iꞌtz tan ẍchajleꞌn yi at kꞌej Ryos. Nin tan ẍchajleꞌn yi at wetz inkꞌej, yi in Cyꞌajl Ryos.
5 Wiꞌnin na pekꞌ Jesús scyeꞌj Lázaro tu Mart tu Mariy. 6 Poro yi tbital Jesús yi stziblal Lázaro yi yabiꞌẍ iꞌ, qui ben chan tan tilweꞌn. Cobt loꞌ kꞌej cyaj iꞌ-tz le amaꞌl kale ateꞌt. 7 Kalenaꞌs tzun tloltz scyetz yi eꞌ ẍchusbeꞌtz:
—Quin kapakxok junt tir Judea, —stzun iꞌ scyetz.
8 —Poro Taꞌ, acꞌaj chan cyoqueꞌn kloꞌ eꞌ judiy tan biyleꞌn kloꞌuꞌ tan cꞌub. ¿Mbi tzuntz yi na tajuꞌ benuꞌ junt tir? —cheꞌch tzun bantz tetz Jesús.
9 —Baꞌn chimben, na txeꞌn jepon tamp yi ankꞌiꞌn yi akꞌijt tan Kataj swetz. Je jun elsawutzileꞌj: Niꞌcuꞌn yi ankꞌiꞌn yi akꞌij swetz tu yi coblaj or tkan skil yi at tul jun kꞌej. Nin kol nakꞌuj tkan skil, quiꞌc lbajij sweꞌj. 10 Poro kol tzinchꞌiw jalen yil tzꞌoc tzꞌoꞌtz, quil bnix yi wakꞌun. Nin chinjepon tzotp tan paj yi qui lajluch.
11 Ej nin nchaꞌtz, nin ben tlol scyetz:
—Yi kamiw Lázaro, watl tuꞌ na ban. Poro nchimben tan cꞌaseꞌn.
12 —Poro Taꞌ, yi ko na wit, iꞌtz jun techl yi tzꞌul yos tuchꞌ, —cheꞌch bantz tetz.
13 Yi ekaꞌn tan yol Jesús iꞌtz yi nsken quim Lázaro, poro ẍchiwutz cyetz yi watl tuꞌ na ban. 14 Toqueꞌn tzun Jesús tan yol scyetz yi clar cunin:
—I bin Lázaro, quimich nin mban teꞌtz. 15 Poro wiꞌnin na chintzatzin yi quibin yi toqueꞌn noj il swutz, na tan yi xtxolbil yi sbajok, tzitocsajeꞌ yi mbi ekaꞌn waꞌn. Or itetz, quin tan tilweꞌn, —stzun Jesús scyetz.
16 Itzun Maẍ, yi jun yi na aꞌlchij yoẍ tetz, nin ben tloltz scyetz yi eꞌ mas ẍchusbeꞌtz Jesús:
—Nchaꞌtz oꞌ ketz, quin bin. Baꞌn kaquim tuchꞌ Jesús.
Jesús yaꞌstzun na akꞌon itzꞌajbil
17 Ma yi tponeꞌn Jesús Betania le luwar kale atit yi najbil Lázaro, nintzun tbit yi nsken el cyajix kꞌej mukxleꞌnix. 18 Choꞌn at Betania nakaꞌjil Jerusalén. Qui loꞌ obnak jun ujlub. 19 Chaꞌstzun te wiꞌnin wunak ateꞌ-tz tan mayseꞌn chicꞌuꞌl Mart tu Mariy tan yi il yi noj quen swutz chixibin.
20 Itzun yi tbital Mart yi txant tan tponeꞌn Jesús, nintzun bentz tan cꞌulcheꞌn. Ma yi Mariy, choꞌn cyajeꞌn cyen teꞌtz xe caꞌl. 21 Yi chicꞌulul quib Mart tu Jesús, nintzun ben tlol tetz:
—Taꞌ, yi atkuꞌ tzoneꞌj quiꞌ kloꞌ nquim yi inxibin. 22 Poro na el intxum tetz yi stkꞌeꞌ Ryos cyakil eꞌchk takleꞌn yil scꞌuchuꞌ tetz, —chij Mart.
23 —Yi axibin, tzꞌitzꞌok junt tir.
24 —Bintzi Taꞌ, na wocsaj yi tzꞌitzꞌok junt tir, poro jalen yil chitzꞌij junt tir yi eꞌ almaꞌ le wiꞌtzbil kꞌejlal, —chij Mart tetz.
25 —I inaꞌtz yi na chinjeꞌsan tzaj yi eꞌ quimnakeꞌ ẍchixoꞌl almaꞌ, nin i inaꞌtz yi na nakꞌon itzꞌajbil. Alchok scyetz yil tocsaj inyol, mpe nink quim, tzꞌitzꞌok waꞌn. 26 Ej nin cyakil eꞌ yi itzꞌeꞌ jaluꞌ, kol cyocsaj inyol quil chisotz cyeraꞌtz. ¡Mart! ¿na peꞌ awocsaj yi xtxolbileꞌj?
27 —Na Taꞌ, na wocsaj. Na wocsaj yi i iluꞌaꞌtz yi Cristo yi at tulbil. Iluꞌ Cyꞌajl Ryos, —stzun Mart tetz Jesús.
Yi tokꞌeꞌn Jesús kale oc quent yi wankil Lázaro
28 Yi wiꞌt talol yi eꞌchk yoleꞌj, beneꞌn tzun Mart tan yol tetz Mariy yi stzicy, nin eꞌ jilontz chichuc cuntuꞌ:
—Ja ul wutzileꞌn taꞌ, nin na taj jilon teruꞌ, —stzun Mart tetz.
29 Na nin tbit Mariy yi yoleꞌj, yi beneꞌn tan cꞌulcheꞌn Jesús. 30 Na ntaxk ucuꞌl Jesús tnum. Atiteꞌt nin iꞌ le amaꞌl kale chicꞌulwit quib tu Mart. 31 Yi teleꞌn tzaj Mariy xe caꞌl, cyakil yi eꞌ judiy yi ateꞌ tan chimayseꞌn, eꞌ el tzaj xomok teꞌj, na le wutz cyetz cyajtzaꞌkl, at bembil tan oꞌkl kale oc quent yi wankil Lázaro.
32 Ma yi tponeꞌn Mariy kale atit Jesús, nin cu mejloktz swutz iꞌ, nintzun taltz:
—Taꞌ, yi atkuꞌ tzoneꞌj, quiꞌ kloꞌ nquim inxibin, —stzun iꞌ.
33 Yi tilol Jesús yi wiꞌnin tokꞌeꞌn Mariy scyuchꞌ yi eꞌ mas wunak yi xomcheꞌ teꞌj, nintzun el kꞌajab scyeꞌj nin okꞌ cꞌuꞌltz.
34 —¿Naꞌ tzun mukxeꞌt cyanuꞌ? —stzun Jesús scyetz.
—Or bin teruꞌ Taꞌ, benkuꞌ skeꞌj. Kachajeꞌ kale oc quent wankil kaꞌn, —cheꞌch.
—¡Ah! wiꞌnin na pekꞌ Jesús te Lázaro.
37 Poro at cobox yi cyal:
—Ja jakxij wutz yi moyiꞌẍ taꞌn, ¿mbi tzun loꞌ-tz yi qui xcyeꞌ tan tulseꞌn yos tu Lázaro? —cheꞌch bantz squibil quib.
Yi titzꞌeꞌn Lázaro chixoꞌl almaꞌ
38 Ma yi tponeꞌn Jesús kale ocnak quent wankil Lázaro, tech cuꞌn tib yi na bisun. Ma yi nich kale oc cyent yi almaꞌ, picy tuꞌ. Nin at cyen jun lepaj cꞌub tan jopleꞌn stzi yi jul.
39 —Quicyꞌajlenuꞌ yi cꞌub yi at tan jopleꞌn yi jul, —stzun Jesús scyetz.
—Poro Taꞌ, —chij Mart yi tanub yi kꞌajtzun almaꞌ—, na loꞌ xew, na ja wiꞌt el cyajix kꞌej quimleꞌnix.
40 —Walnak tzawetz, kol tzawocsaj inyol tzawileꞌ yi porer Ryos, —stzun Jesús bantz tetz.
Teleꞌn tzun yi jun cꞌubaꞌtz cyaꞌn.
41 Ma tetz Jesús, nin aj nin wutz tcyaꞌj, nintzun taltz:
—Ntyoẍ teruꞌ Taꞌ, na ja tbituꞌ yi intziꞌ yi inkul. 42 Na elnak intxum tetz yi ilenin na el xtxumuꞌ te yi eꞌchk takleꞌn yi na intxum. Poro yi jalcuꞌn na chinjilon teruꞌ tan takꞌoneꞌn baꞌn scyetz yi eꞌ wunakeꞌj. Na yi wajbil iꞌtz, yil cyocsaj yi iluꞌ nchinchakon tzaj.
43 Yi wiꞌt talol yi yoleꞌj, nintzun ẍchꞌin cyentz tetz Lázaro:
—¡Lázaro, caleꞌn tzaj!
44 Eleꞌn tzaj nin ban tetz Lázaro. Wech na sken quim. Nin cꞌalij yi tkan tu yi kꞌab tan xbuꞌk. Nin at jun suꞌt te wutz. Beneꞌn tzun tlol Jesús scyetz wunak:
—Chipujleꞌnuꞌ, bantz tajeꞌn xe caꞌl, —stzun Jesús ban nintz.
Yi joyleꞌn puntil tan stzꞌamleꞌn Jesús
(Mt 26.1-5; Mr 14.1-2; Lc 22.1-2)
45 Chaꞌstzun te at wiꞌnin eꞌ judiy yi cyocsaj yi Jesús iꞌ yi Cristo. Iꞌtz yi eꞌ yi xomcheꞌ te Mariy, nin quil yi mbi mbajij. 46 Poro at coboxt eꞌ, eꞌ ben tan talcheꞌn stziblal scyetz yi eꞌ parisey yi mbi cuꞌn ban Jesús.
47 Cyoqueꞌn tzun eꞌ parisey, scyuchꞌ eꞌ wiꞌtz paleꞌ, tan chichamleꞌn yi eꞌ wiꞌ banl wiꞌ tetz tnum, itzun cyaltz:
—¿Mbil kaban jaluꞌ le chiwutz cyeruꞌ? Yi nocx, na tzan tan banleꞌn wiꞌnin eꞌchk milawr. 48 Nin kol kakꞌ mas amaꞌl tetx, cyakil cuꞌn yi eꞌ wunak chixomok te yi ẍchusuꞌnx. Ko yaꞌtz, qui cunin bantz chocopon yi eꞌ aj Roma yi na chicawun skibaj, tan kaxiteꞌn, nin tan xiteꞌn yi caꞌl Ryos, —cheꞌch tzun bantz.
49 Jeꞌn tzun txiclok Caifás ẍchixoꞌl. Yaꞌstzun yi jun wiꞌtz ajcaw scyeꞌj yi eꞌ paleꞌ yi at cyentz te jun yobaꞌtz, nintzun taltz:
—Yi eꞌ cyeruꞌ, quiꞌc nin muꞌẍ cyajtzaꞌkluꞌ. 50 Nin qui na el chitxumuꞌ tetz yi mbiꞌtz yi xtxolbilil yi mas balaj tetz ketz. Na tzinwutz wetz baꞌn tcuꞌn yi nink quim jun ntziꞌ yaj tetz chixel cyakil wunak, —chij iꞌ bantz.
51 Nkꞌeꞌtz tajtzaꞌkl cuntuꞌ Caifás yi yolaꞌtz yi baj yolol, poro iꞌtz tajtzaꞌkl Ryos yi oc julpuj le wiꞌ, na iꞌ wiꞌtz paleꞌ te jun yobaꞌtz. Ja tzun xcon stziꞌ tan Ryos tan talcheꞌn nin yi tajweꞌn tan quimeꞌn Jesús tetz chixel cyakil eꞌ judiy. 52 Poro nkꞌeꞌtz ntin tan chicolpeꞌn eꞌ judiy, ma na nchaꞌtz, tan chicolpeꞌn, nin tan chimolcheꞌn cyakil yi eꞌ yi ateꞌ beneꞌn tziꞌn wi munt yi na cyaj choꞌc tetz nitxajil Ryos bantz junit chiban. 53 Nin te yi jun kꞌejaꞌtz yaꞌstzun yi bixeweꞌn cyakꞌun yi eꞌ wiꞌ banl chiwiꞌ judiy tan biyleꞌn Jesús.
54 Chaꞌstzun te qui ẍchaj tib Jesús ẍchiwutz eꞌ judiy yi eꞌ contr teꞌj. Nin cyaj cyen yi eꞌchk luwar cwent Judea taꞌn. Choꞌn tponeꞌntz tcꞌuꞌl jun luwar tzꞌinunin tuꞌ, nakaꞌjil yi tnum yi na biꞌaj Efraín. Yaꞌstzun eꞌ aꞌteꞌt scyuchꞌ eꞌ ẍchusbeꞌtz.
55 Itzun bantz, yi txant tan tucumuleꞌn yi jun kꞌej Pasc yi na icyꞌ chixoꞌl eꞌ judiy, wiꞌnin tzun wunak yi najlcheꞌ lakak eꞌchk aldey eꞌ baj bentz Jerusalén. At chibembil tan pujleꞌn quil, yi ntaxk ucuꞌl yi jun kꞌej Pascaꞌtz. 56 Ej nin at wiꞌnin eꞌ yi nternin na chitzan tan joyleꞌn Jesús. Nin te yi ateꞌ le templo tan pujleꞌn quil, ja chijak squibil quib:
—¿Mbi na cyal cyeruꞌ, tzꞌul poloꞌ iꞌ tan ticyꞌseꞌn kꞌej nka quiꞌ?
57 Ja chijak yi xtxolbileꞌj squibil quib, na nsken el jun ort cyakꞌun eꞌ parisey scyuchꞌ eꞌ wiꞌtz paleꞌ, yi na tal yi alchok scyetz yi bitan tkanil Jesús, tajweꞌn tan talol, bantz xtxꞌamxeꞌn tan toqueꞌn xetzeꞌ.