Yi ẍchajol tib Jesús ẍchiwutz juk ẍchusbeꞌtz
21
1 Itzun yi bajeꞌn yi eꞌchk takleꞌneꞌj, ẍchajol tzun tib Jesús junt tir ẍchiwutz cobox ẍchusbeꞌtz tzi yi aꞌ Tiberias. Nin je baneꞌj: 2 At cuꞌn Simón Luꞌ, tu Maẍ yi yoẍ, tu Natanael yi aj Caná cwent Galilea. Ej nin nchaꞌtz ateꞌ yi eꞌ cyꞌajl Zebedeo scyuchꞌ cobt ẍchusbeꞌtz Jesús.3 Itzun bantz nin tal Simón Luꞌ scyetz:
—Ma jaluꞌ, yi in wetz, nchimben tan cayiꞌn.
—Nchaꞌtz bin oꞌ ketz, nkaben bin teꞌjuꞌ, —cheꞌch eꞌ mas.
Chibeneꞌn tzuntz tzi aꞌ, nin eꞌ octz tul jun barc tan cayiꞌn. Poro quiꞌc nin jun cay txꞌamxijtz cyaꞌn te jun akꞌbalaꞌtz. 4 Ma yi sajeꞌn xe cyaꞌj, nin jeꞌ jobsal tib Jesús tzi aꞌ. Poro qui el chitxum tetz yi ko yaꞌstzun Jesús. Jiloneꞌn nintzun Jesús scyetz:
5 —Yaj, axwok jun cꞌoloj witzꞌun, ¿ja peꞌ txꞌamxij cay itaꞌn? —stzun Jesús ban nin scyetz.
—Quiꞌc, —cheꞌch.
6 —Joꞌlwok nin bin yi ileb le isbal. Ej nin txꞌamxok cay itaꞌn, —stzun Jesús scyetz.
I nin tzun cyulejaꞌs. Nin quinin chixcyeꞌ tan jeꞌseꞌn tzaj yi leb tan paj yi nsken noj tan cay.
7 Itzun yi jun ẍchusbeꞌtz Jesús yi wiꞌnin na pekꞌ iꞌ teꞌj, nin ben tlol tetz Luꞌ:
—Iꞌtz wutzileꞌn Kajcaw.
Na nin tbit Luꞌ yi yaꞌstzun wutzileꞌn Kajcaw, toqueꞌn tzun yi beꞌch tetz. Nin ben cꞌoxol tibtz wi aꞌ tan tponeꞌn chan te Jesús.
8 Ma yi eꞌ mas ẍchusbeꞌtz yi ateꞌ tul barc eꞌchk cyaj teꞌn cyꞌajaj tan cyoponeꞌn tzi aꞌ. Nin jutuꞌn tuꞌ taneꞌn yi chileb cyaꞌn xe aꞌ na nojnak tan cay. 9 Ma yi cyeleꞌn poneꞌn tzi aꞌ, nin ben chixmayil jun kꞌakꞌ yi cuꞌnak tunin jatx. Nin tib yi xtxakꞌakꞌaꞌtz, at jun cay tu pam yi na tzan wotxeꞌn.
10 —Cyꞌajwok tzaj cobox cay yi anaꞌ ntxꞌamx itaꞌn, —stzun Jesús scyetz.
11 Toqueꞌn tzun Luꞌ tul yi barc tan pujleꞌn len yi leb. Nin icyꞌ tzaj jutul wi puklaj, na nojnak tan cay. At xkancaꞌp cient tu ox cay tul yi leb poro qui katz.
12 —Or itetz, kawank tetz tzꞌutzeꞌn, —stzun Jesús scyetz.
Poro cyaꞌl nin jun scyeri eꞌ ẍchusbeꞌtz yi nink nimsaj cꞌuꞌl tan jakleꞌn tetz yi naꞌ scyetz iꞌ. Na nsken el chitxum tetz yi yaꞌstzun Kajcaw. 13 Sajeꞌn tzun ẍkansal tib Jesús scyeꞌj, nin je tcyꞌal yi pam tan jatxleꞌn nin scyetz. Nchaꞌtz tulej iꞌ yi cay.
14 Yaꞌstzun yi toxiꞌn tir yi ẍchajol tib Jesús ẍchiwutz yi eꞌ ẍchusbeꞌtz te yi titzꞌeꞌn iꞌ ẍchixoꞌl almaꞌ.
Yi jiloneꞌn Jesús tetz Simón Luꞌ
15 Yi wiꞌt chiwaneꞌn tetz tzꞌutzeꞌn, nin ben jakol Jesús tetz Simón Luꞌ:
—I bin jaluꞌ Simón cyꞌajl Jonás, ¿na peꞌ cẍpekꞌ mas sweꞌj swutz yi jeꞌj? —stzun Jesús tetz Luꞌ.
—Na, Taꞌ, elnakt xtxumuꞌ tetz yi na chimpekꞌ teꞌjuꞌ, —stzun Luꞌ.
—Ko yaꞌtz, cun cꞌaꞌchweꞌ yi eꞌ tal wawun, —stzun Jesús tetz Luꞌ.
16 Beneꞌnt tzun jakol Jesús le caꞌp tir:
—Simón, cyꞌajl Jonás, ¿na nin peꞌ cẍpekꞌ sweꞌj? —stzun Jesús tetz.
—Na Taꞌ, sak cuꞌn swutzuꞌ yi na chimpekꞌ teꞌjuꞌ.
—Ko yaꞌtz, quiloꞌk bin tan chipstoreꞌn eꞌ tal wawun.
17 Beneꞌnt tzun jakol Jesús le toxiꞌn tir:
—Simón, cyꞌajl Jonás, ¿na nin peꞌ cẍpekꞌ sweꞌj?
Yi jakolt Jesús tetz Luꞌ, ninin tzun bisun Luꞌ-tz tan paj. Nin ben tlotz tetz:
—Taꞌ, sak cuꞌn cyakil swutzuꞌ, nin na el xtxumuꞌ tetz yi na chimpekꞌ teꞌjuꞌ.
—Cun cꞌaꞌchweꞌ bin tal wawun. 18 Nchaꞌtz swaleꞌ junt xtxolbil tzatz yi bintzinin tetz. Yi aẍ tzaj xicy, ja aban yi awajbil. Nin aẍ teꞌn ncꞌalon cyen yi acꞌalbil xe acꞌuꞌl, nin aẍ teꞌn ntxumun tetz yi naꞌ ncẍbeneꞌt. Poro yil tijin acꞌuꞌl tzꞌelepon achichꞌbal akꞌab nin tzꞌocopon junt tan cꞌalcheꞌn cyen beꞌchatz. Nin ncẍben ticyꞌleꞌn tul junt amaꞌl, mpe nkꞌeraꞌtzk awajbil tan abeneꞌn.
19 Ja xcon yi jun yolaꞌtz tan Jesús bantz teleꞌn xtxum Luꞌ tetz yi mbi jilwutz quimichil sbajok te iꞌ, tan jaleꞌn mas kꞌej Ryos.
—Poro quin, xomen tzaj sweꞌj, —stzun Jesús bantz tetz Luꞌ.
Yi jun ẍchusbeꞌtz yi wiꞌnin na pekꞌ Jesús teꞌj
20 Beneꞌn nintzun ban xomok Luꞌ-tz teꞌj. Poro yi ticyꞌeꞌn xmayil wutz coc, xomt tzaj yi junt ẍchusbeꞌtz Jesús yi wiꞌnin na pekꞌ teꞌj. Yaꞌstzun yi jun ẍchusbeꞌtz yi cꞌoleꞌ quen xlaj Jesús tan waꞌaꞌn. Nin jak tetz: “¿Naꞌ scyetz iꞌ yi jun yil jatxonuꞌ Taꞌ?”
21 Yi beneꞌn tilol Luꞌ yi xomij yi jun ẍchusbeꞌtzaꞌtz, nintzun ben jakoltz tetz Jesús:
—Taꞌ, ¿mbi sbajok te yi jun ẍchusbeꞌtzuꞌeꞌj?
22 —¿Mbi awetz tuchꞌ ko yaꞌtz wajbil yi at nin iꞌ-tz yil nuꞌlt tzaj junt tir? Ntin awetz, xomen tzaj sweꞌj.
23 Tan tuꞌ yi yol yi tal Jesús, nin eꞌ oc eꞌ ẍchusbeꞌtz tan xtxumleꞌn yi quiꞌc quimbil yi jun ẍchusbeꞌtzaꞌtz. Poro qui tal Jesús yi quiꞌc quimbil. Ntin tal: “¿Mbi awetz tuchꞌ ko yaꞌtz wajbil yi at nin iꞌ yil nuꞌlt tzaj?”
24 Yi jun ẍchusbeꞌtzaꞌtz, yaꞌstzun yi jun yi na tzan tan xtxoleꞌn cyakil eꞌchk xtxolbileꞌj, nin yaꞌstzun yi jun yi cuꞌ stzꞌibal eꞌchk xtxolbilaꞌtzeꞌj. Ej nin sak skawutz ketz yi bintzi yi yol iꞌ yi na tal.
25 At wiꞌnin eꞌchk takleꞌn yi banak Jesús. Yi nink tzꞌoc stzꞌibeꞌn cyakil cuꞌn, qui loꞌ ljal amaꞌl wi munt tan colcheꞌn tircuꞌn. Ntinaꞌtz cuntuꞌ cobox inyol.