Yi titzꞌeꞌn junt tir Jesús ẍchixoꞌl almaꞌ
(Mt 28.1-10; Mr 16.1-8; Lc 24.1-12)
20
1 Itzun bantz, tcꞌuꞌl yi bajx kꞌej te sman, chin jalchan nin, yi beneꞌn Luꞌch Mat stzi jul. Tal tzꞌoꞌtzeꞌt nin wuxtxꞌotxꞌ yi tponeꞌn. Ma yi beneꞌn tilol, elnakt yi cꞌub tzi jul. 2 Lajkeꞌl nin tzun beneꞌntz tan talcheꞌn stziblal kale atiteꞌt Simón Luꞌ tu yi junt ẍchusbeꞌtz Jesús yi wiꞌnin na pekꞌ teꞌj. Itzun taltz yi tponeꞌn:—Ja el ticyꞌleꞌn wankil Kajcaw tjul. Aloꞌ nin mponeꞌt, —stzun iꞌ bantz.
3 Teleꞌn tzaj tzun Luꞌ-tz tu yi junt ẍchusbeꞌtz Jesús, nin eꞌ bentz tan tilweꞌn. 4 Lajkeꞌl nin chibeneꞌn chicabil. Poro yi junt, mas tcuꞌn tzꞌojkel swutz Luꞌ. Bajx cunin tponeꞌn iꞌ stzi yi jul. 5 Ma yi cweꞌn cꞌoꞌlok tan tilweꞌn quen tjul, jaltaꞌtz oc xmayiltz yi eꞌchk xbuꞌk yi oc nin toliꞌn te wankil Jesús. Poro qui oc iꞌ tjul. 6 Ma tetz Luꞌ, cyequen tuꞌ iꞌ tjul tan xmayeꞌn. Ej nin nchaꞌtz iꞌ, til yi xbuꞌk yi at cyentz tjul, 7 tu yi suꞌt yi nxcon te wiꞌ Jesús. Apart nin pakij cyent wutz. 8 Inti yi junt ẍchusbeꞌtz yi bajx toponeꞌn, toqueꞌn tzuntz tjul. Xmay iꞌ yi mbi cuꞌn bajij, nin tocsaj yi itzꞌeꞌn bant Jesús. 9 Na ntaxk nin el chitxum tetz yi xtxolbil yi tzꞌibaꞌnt cyen le tuꞌj Kataj yi na tal yi at titzꞌbil Jesús ẍchixoꞌl almaꞌ. 10 Chipakxeꞌnt tzun yi cob ẍchusbeꞌtzaꞌtz.
Yi ẍchajol tib Jesús swutz Luꞌch Mat
(Mr 16.9-11)
11 Inti Luꞌch Mat, nin pakxijt stzi jul tan oꞌkl. Itzun te yi na okꞌtz, nintzun cꞌoꞌeꞌ quentz tan xmayeꞌn quen tjul. 12 Nin oc tilol cob ángel. Chin stum nin te beꞌch cyetz. Choꞌn cꞌolẍcheꞌ-tz kale ocnak cyent yi wankil Jesús. Choꞌn at jun kale ajnak nin yi wiꞌ Jesús. Ej nin choꞌn at junt stkan. 13 Chijiloneꞌn tzaj tzun yi eꞌ ángel tetz:
—Xnaꞌn, ¿mbi na awokꞌlej? —cheꞌch.
—Na nokꞌ, na ja ben ticyꞌleꞌn yi wankil Wajcaw tzoneꞌj, nin qui na wil naꞌ mponeꞌt, —stzun Mat bantz scyetz.
14 Na nin el tzaj yi yoleꞌj le stziꞌ Mat yi xmayineꞌn cyꞌen wutz coc, nin ben tilol yi txiclij Jesús. Poro qui tech iꞌ wutz yi ko yaꞌtz Jesús. 15 Beneꞌn tzun jakol Jesús tetz:
—Xnaꞌn, ¿mbi na awokꞌlej? ¿Naꞌ na cẍtzan tan joyleꞌn?
Le wutz yi tajtzaꞌkl Mat, yaꞌstzun yi qꞌuicyꞌlom yi tal neꞌẍ laworaꞌtz. Chaꞌstzun te beneꞌn tlol tetz:
—Taꞌ, yi ko iluꞌ micyꞌan nin, tal tzajuꞌ swetz naꞌ mponeꞌt tanuꞌ, bantz imbeneꞌn tan ticyꞌleꞌn tzaj, —stzun Mat tetz.
16 —¡Mat! —stzun Jesús.
Jeꞌn tzun suchꞌkꞌil tib Mat, nintzun taltz le yol hebreo:
—¡Raboni! —stzun. (Yi na elepont yi jun yolaꞌtz iꞌtz Wutzileꞌn Taꞌ.)
17 —Quil chin amac, na txeꞌn chimben tzaj kale atit Intaj. Poro quiloꞌk. Cun al scyetz yi eꞌ witzꞌun yi at imbembil kale atit Intaj, yi Kataj tzituchꞌ, na yi weri inRyosil, iteꞌn nin iRyosilaꞌtz, —stzun Jesús tetz.
18 Beneꞌn nin ban Luꞌch Mat tan talcheꞌn stziblal scyetz eꞌ ẍchusbeꞌtz. Tal iꞌ scyetz yi ja til iꞌ wutz Jesús. Ej nin nchaꞌtz tal iꞌ cyakil yi eꞌchk yol yi baj tlol Jesús tetz.
Yi jeꞌn jobtuj Jesús ẍchixoꞌl yi eꞌ ẍchusbeꞌtz
(Mt 28.16-20; Mr 16.14-18; Lc 24.36-49)
19 Itzun bantz te yi akaleꞌn te yi jun kꞌejaꞌs, nsken chicham quib yi eꞌ ẍchusbeꞌtz xe jun caꞌl. Nin jopij cuꞌn yi eꞌchk puert cyaꞌn tan paj yi na chixob scyetz yi eꞌ judiy, yi eꞌ contr te Jesús. Jeꞌn tzun jobtuj Jesús ẍchixoꞌl. Itzun taltz:
—Takꞌ tzaj Kataj yi banl tu yi tzatzin paz tzitibaj.
20 Yi wiꞌt beneꞌn tlol yi yoleꞌj, nintzun ben ẍchajol yi kꞌabtz tu yi jakꞌ teml yi loꞌonakt. Ma yi eꞌ ẍchusbeꞌtz wiꞌnin chitzatzineꞌn yi quilol wutz Kajcaw Jesús. 21 Beneꞌn tzun tlol Jesús scyetz:
—Takꞌ tzaj Kataj yi banl tu yi tzatzin paz tzitibaj. Choꞌn tzimbneꞌ tan ichakleꞌn nin tan xtxoleꞌn yi balaj stziblal chi banak Intaj tan inchakleꞌn tzaj wetz tzoneꞌj wuxtxꞌotxꞌ.
22 Cyajeꞌn cyen tzun juclul yi Espíritu Sant scyeꞌj, nintzun taltz:
—Na chintzan tan takꞌleꞌn cyen yi Espíritu Sant tzitetz. 23 Ej nin kol tzicuywok paj jun yaj, nchaꞌtz Intaj nsken cuy iꞌ paj. Ej nin ko quil tzicuywok paj jun yaj, nchaꞌtz Intaj nsken bixeꞌ yi quil scuy iꞌ paj.a \s Yi teleꞌn xtxum Maẍ tetz yi bintzinin itzꞌij junt tir Jesús
24 Inti Maẍ, yi yoẍ, quiꞌc iꞌ at ẍchixoꞌl yi eꞌ mas ẍchusbeꞌtz Jesús yi ẍchajol tib ẍchiwutz. 25 Nintzun cyal yi eꞌ mas ẍchusbeꞌtz tetz:
—Maẍ, yi oꞌ ketz ja kil wutz Kajcaw, —cheꞌch.
—Quil wocsaj chiyoluꞌ ko quil wil yi ticyꞌleꞌn clawẍ le kꞌab. Ej nin quil wocsaj chiyoluꞌ jalen cuꞌn yil tzimpit quen wiꞌ inkꞌab kale ocnakit yi clawẍ. Ej nin quil wocsaj chiyoluꞌ jalen cuꞌn yil tzimpit quen inkꞌab jakꞌ yi teml yi loꞌonakt, —stzun Maẍ bantz.
26 Itzun yi teleꞌn wajxok kꞌej, cweꞌn tzun chichamol quib yi eꞌ ẍchusbeꞌtz xe jun caꞌl. Poro te yi jun tiraꞌtz yi cweꞌn chichamol quibtz, at tzun Maẍ ẍchixoꞌl. Yi puert chin lamij cunin taneꞌn, poro yi Jesús nin jeꞌ jobtuj ẍchixoꞌl.
—Quil cxbisunwok, —stzun iꞌ.
27 Jiloneꞌn nin tzuntz tetz Maẍ:
—Xmaycuꞌn inkꞌab, nin pitoꞌc tzaj wiꞌ akꞌab tcꞌuꞌl yi qꞌuixpnakt. Akꞌoꞌctzaj akꞌab jakꞌ weml. Quil tzacabej acꞌuꞌl sweꞌj, ma na ocsaj yi i inaꞌtz, —stzun Jesús tetz.
28 —Wajcaw, i iluꞌaꞌtz inRyosil, —stzun Maẍ.
29 —Maẍ, ja bin awocsaj yi ja nitzꞌij junt tir, poro jalen cuꞌn mawil inwutz. Poro mas tcuꞌn chibanl yi eꞌ yi na cyocsaj inyol, nkꞌeꞌtz jalen cuꞌn na quil inwutz.
Yi tajbil yi jun yi banon cyen yi liwreꞌj
30 I bin jaluꞌ, at wiꞌnin eꞌchk milawr yi bnixnakt tan Jesús ẍchiwutz yi eꞌ ẍchusbeꞌtz, yi qui tzꞌibaꞌn tul yi liwreꞌj. 31 Poro ja cyaj intzꞌibal cyakil eꞌchk xtxolbilaꞌseꞌj bantz cyocsaluꞌ yi Jesús yaꞌstzun yi Cristo yi Cyꞌajl Ryos. Ej nin cyakil yi eꞌ yil cyocsaj yi xtxolbilaꞌseꞌj, ẍchicambok cyeraꞌtz te yi jun itzꞌajbil yi qui nin bajsbeꞌn tetz.