19
1 Cawuneꞌn nin tzun Pilat tan toqueꞌn jicyleꞌn Jesús tan charyon. 2 Nintzun eꞌ oc yi eꞌ sanlar tan banleꞌn jun coron yi txꞌiꞌx; nin jeꞌ cyakꞌol twiꞌ Jesús. Nin oc cyakꞌol jun beꞌch tetz chi taneꞌn yubil beꞌch tetz jun rey yi txib yubil. 3 Nin eꞌ baj quentz tan kꞌajlaꞌn swutz Jesús, chi na chiban swutz jun rey. Poro xcyꞌaklil tuꞌ na chiban.—Iluꞌ kareyil, chumbalaj nin iluꞌ, —cheꞌch na ban cyentz tetz.
Nin el cobox kꞌabtz xlajak stziꞌ cyaꞌn.
4 Teleꞌn tzaj tzun junt tir Pilat ẍchiwutz wunak tan talcheꞌn scyetz:
—Ma jaluꞌ tzꞌeluꞌl junt tir waꞌn tan ẍchajleꞌn scyeruꞌ. Na yi wetz, cyaꞌl na jaleꞌt til waꞌn.
5 Teleꞌn tzaj tzun Jesústz ẍchiwutz. Nsken jeꞌ jun coron txꞌiꞌx twiꞌ. Ej nin atit nin yi beꞌch tetz teꞌj, chi beꞌch tetz jun rey, yi txib yubil. Beneꞌn tzun tlol Pilat scyetz wunak:
—¡Chixmay tzajuꞌ yi yajeꞌj!
6 Yi beneꞌn quilol, cyoqueꞌn tzun yi eꞌ wiꞌtz paleꞌ, scyuchꞌ eꞌ aj ront tan sichꞌ:
—¡Jeken swutz pasyon! ¡Jeken swutz pasyon! —cheꞌch tzun ban nintz.
—Tzinwutz wetz quiꞌc til, poro quicyꞌaj nin binuꞌ. Chipajeꞌnuꞌ swutz pasyon, —stzun Pilat bantz scyetz.
7 —Poro at til taꞌ, na at jun ketz kaley yi na tal yi tajweꞌn tan quimeꞌn jun yaj yi ko na tocsaj tib tetz Cyꞌajl Ryos. Ej nin yaꞌstzun tal yi juneꞌj, —cheꞌch tzun eꞌ judiy.
8 Yi beneꞌn tbital Pilat yi xtxolbil yi Jesús iꞌ Cyꞌajl Ryos, mas tcunin xoꞌw octz tetz. Pakxeꞌnt cyen tzun junt tir xe caꞌl tan ẍchꞌoteꞌn stziꞌ Jesús:
9 —¿Naꞌ ncsiteꞌt?
Poro quiꞌc nin jun yol ben stzaꞌwel Jesús.
10 —¿Mbi xac yi qui na atzaꞌw tzaj yi inyol? ¿Qui peꞌ na el atxum tetz yi at caꞌwl tinkꞌab tan ajeꞌn swutz pasyon nka tan aweleꞌn liwr? —stzun Pilat tetz.
11 —Quiꞌc kloꞌ kꞌejuꞌ tan incaweꞌn yi quiꞌk ntakꞌ Ryos teruꞌ. Poro at mas quil yi eꞌ yi nchinjatxon tkꞌabuꞌ, —stzun Jesús.
12 Te jun tkujaꞌs oc Pilat tan joyleꞌn puntil tan teleꞌn kloꞌ Jesús liwr. Poro yi eꞌ judiy, wiꞌnin chiẍchꞌineꞌn. Itzun cyaltz:
—Kol stzakplenuꞌ yi jun yajaꞌtz, qui tzun xomij wiꞌuꞌ-tz te César, yi mero wiꞌtz kajcaw yi at jalen Roma. Na alchok scyetz yi na taj tzꞌoc tetz xel César, contr iꞌ te César, —cheꞌch tzun eꞌ judiy bantz.
13 Yi tbital Pilat chiyol, beneꞌn tzun mantartz tan ticyꞌleꞌn tzaj Jesús, nin cꞌolecuꞌntz wi chem le pujbil xtisyaꞌ tan cawuꞌn. Yi jun amaꞌlaꞌtz, Gabata biꞌ le chiyol eꞌ judiy. Iꞌtz jun amaꞌl yi tzꞌakij taneꞌn yi wuxtxꞌotxꞌ tan balaj cꞌub. 14 Ej nin iꞌtz junteꞌn kꞌej tan xeꞌteꞌn Pasc, nin iꞌtz loꞌ kak chꞌichꞌ jalchana yi bajeꞌn yi eꞌchk takleꞌneꞌj.
Beneꞌn tzun tlol Pilat scyetz eꞌ judiy:
—Je bin yi yajeꞌj, yi chireyiluꞌ, —stzun Pilat scyetz.
15 Chibaj ẍchꞌineꞌn tzun cyakil wunak:
—¡Elk cuꞌn swutz! ¡Elk cuꞌn swutz! ¡Jeken swutz pasyon! —cheꞌch bantz.
—¿Mbi xac ljeꞌ waꞌn swutz pasyon? na chireyil binuꞌ, —stzun Pilat scyetz.
Beneꞌn tzun chitzaꞌwel yi eꞌ wiꞌtz paleꞌ:
—Cyaꞌl atit junt ketz kareyil, ntin César yi at Roma yi wiꞌtz ajcaw, —cheꞌch bantz.
16 Tan tuꞌ yi yoleꞌj, eltzaj tkꞌol Pilat Jesús scyetz tan jeꞌn swutz pasyon. Beneꞌn nin bantz cyaꞌn.
Yi quimeꞌn Jesús swutz pasyon
(Mt 27.32-44; Mr 15.21-32; Lc 23.26-43)
17 Itzun yi teleꞌn tzaj Jesús cyaꞌn, palij yi pasyon taꞌn kalel jeꞌt pajij. Choꞌn at topombil le amaꞌl yi na biꞌaj Wi Bakil Wiꞌbaj. Gólgota biꞌ yi jun amaꞌlaꞌtz le yol hebreo. 18 Yaꞌstzun eꞌ jeꞌt scyuchꞌ cobt yaj swutz pasyon. Jujun len xlajak iꞌ. 19 Inti Pilat, nin cawunintz tan jeꞌn takꞌleꞌn jun uꞌj swiꞌeꞌn Jesús tan ẍchajleꞌn yi mbiꞌtz yi til. Nin yi yol yi jeꞌ tzꞌibaꞌn na tal: “Jesús aj Nazaret, chireyil yi eꞌ judiy.” 20 Wiꞌnin judiy eꞌ octz tan siꞌleꞌn yi jun uꞌjaꞌtz yi je takꞌleꞌn swiꞌeꞌn Jesús, na nakaꞌjil cuꞌn yi tnum atiteꞌt yi luwaraꞌtz. Nin yi yol yi je tzꞌibaꞌn, bnix le hebreo yi chiyol yi eꞌ judiy, nin bnix le chiyol yi eꞌ griego, nin bnix le chiyol yi eꞌ aj Roma, yi na biꞌaj latín. 21 Cyoqueꞌn tzun yi eꞌ wiꞌtz paleꞌ cwent eꞌ judiy tan xochoꞌn swutz Pilat, nintzun cyaltz:
—Baꞌn tcuꞌn yi quiꞌck njeꞌ stzꞌibaluꞌ yi yoleꞌj yi na tal ‘Chireyil eꞌ judiy’. Baꞌn tcuꞌn yi nink njeꞌ stzꞌibaluꞌ ‘Yi jun yi ja tocsaj tib tetz chireyil yi eꞌ judiy,’ —cheꞌch tzun tetz Pilat.
22 —Yi eꞌchk yolaꞌtz yi ja chincawun tan stzꞌibeꞌn quiꞌc rmeril takꞌun stzajeꞌn, —stzun Pilat bantz scyetz.
23 Yi wiꞌt jeꞌn Jesús swutz pasyon cyakꞌun yi eꞌ sanlar, nintzun eꞌ octz tan jatxleꞌn cuꞌn yi beꞌch tetz. Cyaj cuntuꞌ el ẍchiwutz. Poro at tzun jun beꞌch tetz yi chukpiꞌn nintuꞌ. Junit taneꞌn. Quiꞌc ẍchupbilil tetz. 24 Cyoqueꞌn tzun eꞌ sanlartz tan yol teꞌj:
—Baꞌn tcuꞌn quil kakatz cuꞌn, ma na ok txꞌiluꞌn kaꞌn teꞌj, naꞌ tzun lcamban tetz.
Tan tuꞌ yi xtxolbileꞌj yi cuꞌ chinucꞌul, el cuꞌn te yi yol yi tzꞌibaꞌnt cyen yi na tal: “Ja cuꞌ chijatxol yi beꞌch wetz ẍchiwutz, nin ja choꞌc tan txꞌiluꞌn tibaj.”b Ej nin yaꞌtz cunin bajij te beꞌch tetz Jesús.
25 Itzun te yi at Jesús swutz pasyon, txiclcheꞌ tzun cobox xnaꞌn tan xmayeꞌn. At yi xtxuꞌ Jesús tu jun titzꞌun. Ej nin at Luꞌch yi txkel Cleofas, tu Luꞌch Mat. 26 Choꞌn txiclij yi xtxuꞌ Jesús xlaj jun scyeri yi eꞌ ẍchusbeꞌtz Jesús yi wiꞌnin na pekꞌ Jesús teꞌj. Yi sajeꞌn tilol Jesús wutz yi xtxuꞌ, itzun saj tloltz tetz:
—Naꞌ, yi yaj yi txiclij xlajuꞌ, yaꞌstzun inkꞌajbil sbneꞌ cyen.
27 Iteꞌn nin saj tlolaꞌtz tetz yi jun ẍchusbeꞌtzaꞌtz:
—Yaj, yi xnaꞌneꞌj, yaꞌstzun kꞌajbil atxuꞌ sbneꞌ-tz, —stzun Jesús tetz.
Kalenaꞌs tzun tkꞌol yi jun ẍchusbeꞌtzaꞌtz amaꞌl tetz Mariy tan najeweꞌn xe tetz caꞌl.
Yi quimeꞌn Jesús
(Mt 27.45-56; Mr 15.33-41; Lc 23.44-49)
28 Itzun bantz yi wiꞌt bajeꞌn yi eꞌchk takleꞌnaꞌtz, nin el xtxum Jesús tetz yi ja wiꞌt bnix cyakil yi eꞌchk takleꞌn taꞌn yi tzꞌibaꞌnt cyen yi tajweꞌn tan bnol.
Beneꞌn tzun tloltz:
—Saktziꞌ na nicyꞌan.
29 At tzun jun xaruꞌ yi nojnak tan binagr. Cweꞌn tzun muꞌij jun sponj tul yi aꞌaꞌtz, nin oc takꞌleꞌntz twiꞌ jun tzeꞌ tan jeꞌn poneꞌn le stziꞌ Jesús. 30 Ma yi jeꞌn stzꞌubul Jesús yi jun jilwutz aꞌaꞌtz, nintzun taltz:
—Ja chin jepon te yi inmunl jaluꞌ, —stzun iꞌ.c
Na nin el tzaj yi jun yolaꞌtz le stziꞌ yi sajeꞌn chꞌuypuj yi wiꞌ. Ej nin quimich nin bantz.
Yi jeꞌn kopol jun sanlar yi jakꞌ teml Jesús
31 Itzun le junt eklok yaꞌstzun yi jun kꞌej ujleꞌn. Chaꞌstzun te nkꞌeraꞌtz cyajbil yi eꞌ judiy yi nink tzꞌaꞌtij chiwankil yi ox almaꞌaꞌtz swutz pasyon tcꞌuꞌl yi jun kꞌej ujleꞌnaꞌtz, na ẍchiwutz cyetz chin xan nin yi jun kꞌejaꞌtz. Chaꞌstzun te, nin eꞌ octz tan jakleꞌn tetz Pilat tan cawuneꞌn iꞌ tan wakꞌeꞌn quikan yi eꞌaꞌtz yi ateꞌ wutz pasyon, nin tan chicweꞌn tzaj. 32 Chibeneꞌn tzun yi eꞌ sanlar tan wakꞌeꞌn tkan yi bajx, nin tan wakꞌeꞌn tkan yi junt yi at nintz wutz jun pasyon xlaj Jesús. 33 Poro yi cyoponeꞌn te Jesús nsken quim teꞌtz. Chaꞌstzun te qui je chiwakꞌul yi tetz tkan.
34 Poro at tzun jun scyeri eꞌ sanlar, nin je kopol jakꞌ teml Jesús tan yi tetz lans. Yi loꞌoneꞌn yi jakꞌ teml, nin el tzaj kojx chichꞌ tu aꞌ. 35 Yi jun yi iꞌlon yi xtxolbileꞌj, yaꞌstzun yi jun yi na tzan tan stzꞌibeꞌn cyen. Na el intxum tetz yi yaꞌstzun yi mero bintzi, nin baꞌn cyocsajuꞌ. 36 Yi wiꞌt bnixeꞌn yi eꞌchk takleꞌneꞌj, ja el cuꞌn te yi tzꞌibaꞌnt cyen yi na tal: “Quiꞌc nin jun bakil yi wankil yi nink lje wakꞌuꞌn.”d 37 Ej nin at junt xtxolbil yi tzꞌibaꞌnt cyen yi na tal: “Yi eꞌaꞌtz yi kopon quen jakꞌ teml, squileꞌ cyeraꞌtz junt tir wutz iꞌ tzantzaj.”e
Yi mukxeꞌn Jesús
(Mt 27.57-61; Mr 15.42-47; Lc 23.50-56)
38 At tzun jun yaj yi na biꞌaj Ẍep, aj Arimatea iꞌ. Ewun cuꞌn xomij wiꞌ te Jesús tan paj yi na xob iꞌ scyetz yi eꞌ judiy yi eꞌ contr te Jesús. Yi wiꞌt bajeꞌn yi eꞌchk takleꞌneꞌj, nintzun bentz swutz Pilat tan jakleꞌn permis tan cweꞌn tzaj yi wankil Jesús taꞌn nin tan beneꞌn tan mukleꞌn. Nintzun takꞌ Pilat amaꞌl tetz. Beneꞌn tzun Ẍeptz tan ticyꞌleꞌn yi wankil Jesús. 39 Nchaꞌtz Nicodemo, nin xomnin te Ẍep. Yaꞌstzun yi Nicodemaꞌtz yi jilon tetz Jesús lakꞌbal. Cyꞌaꞌn mas oxcꞌal tu lajuj liwr tzꞌacꞌbil taꞌn. Iꞌtz mirra yujuꞌn tib tu áloe. 40 Cyoqueꞌn tzun Ẍep tu Nicodemo tan toleꞌn quen xbuꞌk te wankil Jesús. Nchaꞌtz yi tzꞌacꞌbil yi cyꞌaꞌn cyaꞌn, nin oc cyakꞌol te xbuꞌk. Yaꞌstzun cyulej, na yaꞌstzun chicstumbr yi eꞌ judiy yi na quim jun almaꞌ. 41 Nakaꞌjil yi amaꞌl kale jeꞌt Jesús swutz pasyon, at tzun jun tal neꞌẍ lawor. Nin tul yi jun tal laworaꞌtz at tzun jun julil almaꞌ yi kopij quentz. Acꞌaj cunin kopxeꞌn. Ntaxk xconsij. 42 Choꞌn tzun toqueꞌn quen yi wankil Jesús, na nsken xeꞌtij yi jun kꞌej ujleꞌnaꞌtz yi chin xan nin ẍchiwutz yi eꞌ judiy.