Yi beneꞌn Jesús pres
(Mt 26.47-56; Mr 14.42-50; Lc 22.47-53)
18
1 Yi bajeꞌn tlol yi eꞌchk yolaꞌseꞌj, teleꞌn tzaj tzun Jesús scyuchꞌ yi eꞌ ẍchusbeꞌtz Jerusalén. Choꞌn tzun quicyꞌeꞌn poneꞌntz jalaj icyꞌen yi tal neꞌẍ aꞌ yi na biꞌaj Cedrón. Ej nin choꞌn cyoponeꞌn le jun lawor yi at jalaj icyꞌen yi jun neꞌẍ aꞌaꞌtz. Yaꞌstzun eꞌ oqueꞌt Jesús scyuchꞌ yi eꞌ ẍchusbeꞌtz. 2 Yi jun amaꞌlaꞌtz, ajskeꞌnt tan Judas, yi cꞌayin Jesús, na alaꞌ tir eꞌ cham quib Jesús scyuchꞌ eꞌ ẍchusbeꞌtz tcꞌuꞌl yi jun amaꞌlaꞌtz. 3 Chaꞌstzun te cyenin tponeꞌn Judas scyuchꞌ jun cꞌoloj sanlar scyuchꞌ cobox aj ront cwent paleꞌ. Chakijcheꞌ cyakꞌun eꞌ wiꞌtz paleꞌ scyuchꞌ yi eꞌ parisey. Cyꞌaꞌn len chimaꞌcl cyaꞌn. Ej nin cyꞌaꞌn chikꞌakꞌ cyaꞌn tetz chitxekbil. 4 Ma yi Jesús sken el xtxum tetz yi mbi cuꞌn sbajok te iꞌ. Chaꞌstzun te teleꞌn tzaj tan chicꞌulcheꞌn. Itzun ben jakol scyetz:—¿Naꞌ na chijoyuꞌ?
5 —Na katzan tan joyleꞌn Jesús aj Nazaret, —cheꞌch tzun bantz.
—Je bin ineꞌj, —stzun Jesús scyetz.
Inti Judas, yi cꞌayin nin Jesús, xomij scyeꞌj yi eꞌ sanlar. 6 Yi tlol Jesús scyetz: “Je bin ineꞌj”, pacꞌl nin baj cyoponeꞌn len wuxtxꞌotxꞌ. 7 Beneꞌn tzun jakol Jesús junt tir scyetz:
—¿Naꞌ nin tzun scyetz yi na chitzanuꞌ tan joyleꞌn?
—Na katzan tan joyleꞌn Jesús aj Nazaret, —cheꞌch.
8 —Ja wiꞌt wal scyeruꞌ yi i inaꞌtz. Ma jaluꞌ yi ko in na cyajuꞌ, chicyajk cyen bin yi eꞌ wamiweꞌj cyanuꞌ.
9 Ja xcon yi yolaꞌseꞌj tan Jesús bantz teleꞌn cuꞌn te yi yol yi nsken cyen tal iꞌ, iꞌtz: “Quiꞌc mbajij te jun scyeri yi eꞌ yi ntakꞌ Intaj swetz.”
10 Inti Simón Luꞌ, jeꞌn tzaj tzun tcyꞌal yi spar iꞌ tcꞌuꞌl soc, nin el tamol jalaj ẍchin jun yaj yi na biꞌaj Malco, jun scyeri yi eꞌ ẍchakum yi wiꞌtz paleꞌ. 11 Beneꞌn tzun tlol Jesús tetz Luꞌ:
—Col cuꞌn yi aspar tul soc. Na tajweꞌn tan intijol yi qꞌuixcꞌuj yi txumijt tan Intaj tan ticyꞌeꞌn poneꞌn waꞌn, —stzun Jesús bantz tetz Luꞌ.
Yi tponeꞌn Jesús ẍchiwutz yi eꞌ wiꞌtz paleꞌ
(Mt 26.57-58; Mr 14.53-54; Lc 22.54)
12 Cyoqueꞌn tzun yi eꞌ sanlar tu chijepil tan stzꞌamleꞌn, nin tan cꞌalcheꞌn Jesús. Beneꞌn nin bantz cyaꞌn pres. Nchaꞌtz xomcheꞌ yi chi aj ront yi eꞌ judiy scyeꞌj yi eꞌ sanlar. 13 Bajx beneꞌn quicyꞌaltz xe caꞌl Anás, yi jiꞌ Caifás, yi wiꞌtz paleꞌ, yi at-tz te yobaꞌtz. 14 Iteꞌn nin Caifásaꞌtz yi aꞌlon scyetz yi eꞌ mas judiy yi mas baꞌn tcuꞌn yil quim jun ntziꞌ yaj swutz yi nink chisotz chicyakil wunak.
Yi talol Luꞌ yi qui xomij te Jesús
(Mt 26.69-70; Mr 14.66-68; Lc 22.55-57)
15 Ma yi beneꞌn Jesús pres, nin eꞌ ben xomok Simón Luꞌ tu junt ẍchusbeꞌtz Jesús wutz chicoc. Yi jun ẍchusbeꞌtzaꞌtz, cyamiw quib tu chijepil yi eꞌ wiꞌtz paleꞌ. Chaꞌstzun te yi takꞌleꞌn amaꞌl tetz tan tocomponeꞌn wutzkꞌanil yi jun caꞌlaꞌtz. 16 Ma yi Luꞌ cyaj cyen tuꞌ iꞌ tbeꞌ. Chaꞌstzun te nin ben yi jun ẍchusbeꞌtzaꞌtz yi nsken ocopon wutzkꞌanil, tan yol tetz yi xnaꞌn yi qꞌuicyꞌlom puert tan tkꞌol amaꞌl tan toqueꞌn Luꞌ wutzkꞌanil.
17 Itzun yi tocomponeꞌn Luꞌ, nintzun ben jakol yi xnaꞌnaꞌtz tetz:
—¿Nkꞌeꞌtz peꞌ aẍ jun scyeri eꞌ ẍchusbeꞌtz yi yaj yi at tziꞌn?
—Quiꞌ, nkꞌeꞌtz in jun scyuchꞌ, —stzun Luꞌ bantz.
18 Wiꞌnin tzun cheꞌw bantz te jun akꞌbalaꞌtz. Chaꞌstzun te at jun kꞌakꞌ yi nsken cu jatx cyakꞌun eꞌ mos scyuchꞌ yi eꞌ aj ront. Txiclcheꞌ len stziꞌ kꞌakꞌaꞌtz. Nchaꞌtz Luꞌ, iꞌ jun txiclij ẍchixoꞌl tan makꞌoꞌn ib stzi jun kꞌakꞌaꞌtz.
Yi toqueꞌn yi wiꞌtz paleꞌ tan ẍchꞌoteꞌn stziꞌ Jesús
(Mt 26.59-66; Mr 14.55-64; Lc 22.66-71)
19 Inti yi ajcaw scyetz yi eꞌ paleꞌ, nin octz tan ẍchꞌoteꞌn stziꞌ Jesús xe caꞌl. Na yi tajbil yi jun ajcawaꞌtz iꞌtz tan tbiteꞌn naꞌ scyetz eꞌ yi ẍchusbeꞌtz Jesús, nin mbi chusuꞌnil yi nẍchaj Jesús scyetz. 20 Beneꞌn tzun stzaꞌwel Jesús:
—Quiꞌc jun takleꞌn yi ewun cuꞌn minyol, na ja chinjilon ẍchiwutz cuꞌn cyakil wunak. Nin ja chinjilon lakak eꞌchk sinagoga. Nin ja chinjilon ẍchiwutz cyakil wunak yi ateꞌ le templo. 21 ¿Mbi xac na tzan tzajuꞌ tan jakleꞌn swetz? Jakeꞌuꞌ scyetz yi eꞌ yi ja quibit inyol. Yi eꞌ cyetz, baꞌn cyal yi mbi jilwutz chusuꞌnil nquibit sweꞌj. Sak ẍchiwutz yi mbi cuꞌn minyol, —stzun Jesús bantz tetz yi wiꞌtz paleꞌ.
22 At tzun jun aj ront attz, yi cwent cyetz paleꞌ. Yi tlol Jesús yi yoleꞌj, nintzun el lajol jun kꞌab xak stziꞌ Jesús, itzun taltz:
—¿Mbi xac na atzaꞌw nin yi yol yi wiꞌtz kapaleꞌil? Juntlen na aban, —stzun aj ront bantz.
23 —Ko cachiꞌ yi inyol yi nwal, al tzaj yi paltil swetz. Poro ko baꞌn inyol yi mben walol, ¿mbi tzun xac nchinjeꞌ atzekꞌlul? —stzun Jesús bantz tetz.
24 Cawuneꞌn tzun Anás tan beneꞌn ticyꞌleꞌn Jesús swutz Caifás, yi wiꞌtz paleꞌ. Cꞌalij Jesús yi beneꞌn quicyꞌal.
Yi talolt Luꞌ le toxiꞌn tir yi qui xomij wiꞌ te Jesús
(Mt 26.71-75; Mr 14.69-72; Lc 22.58-62)
25 Itzun te yi na tzan ẍchꞌoteꞌn stziꞌ Jesús, iẍnin txiclij Luꞌ tan makꞌoꞌn ib stzi kꞌakꞌ.
—¿Nkꞌeꞌtz peꞌ aẍ jun scyeri yi eꞌ ẍchusbeꞌtz nocx yi at tziꞌn xe caꞌl? —cheꞌch bantz tetz Luꞌ.
—Quiꞌ, nkꞌeꞌtz in jun wetz scyuchꞌ, —stzun Luꞌ.
26 Nintzun oc jun mos yi wiꞌtz paleꞌ tan ẍchꞌoteꞌn stziꞌ Luꞌ. Yi jun mosaꞌtz iꞌ jun xaꞌk tan stzꞌamleꞌn Jesús, nin cyajwutz quib tu yi yaj yi el josol Luꞌ yi ẍchin.
—Yaj, i cun wajskeꞌn awutz, na atiẍ te nocx le tal neꞌẍ lawor.
27 —Quiꞌ, cyaꞌl na kilwit kib tuchꞌuꞌ, —stzun Luꞌ bantz le toxiꞌn tir.
I cunin na el tzaj jun yolaꞌtz le stziꞌ yi tokꞌeꞌn yi aj tzoꞌ.
Yi tponeꞌn Jesús swutz Pilat
(Mt 27.1-2, 11-14; Mr 15.1-5; Lc 23.1-5)
28 Ma yi teleꞌn tzaj quicyꞌal Jesús le caꞌl Caifás, choꞌn tzun tponeꞌntz cyaꞌn le caꞌl kale na cawuneꞌt yi gobernador. Nsken saj xe cyaꞌj. Chaꞌstzun te qui eꞌ oc yi eꞌ judiy xe caꞌl yi gobernador, na wiꞌnin xanil ẍchiwutz yi kol choꞌc xe caꞌl jun awer nak. Na yi nink nchoꞌc, quiꞌc rmeril tan chiwaneꞌn te jun chin wutzileꞌn waꞌaꞌn tetz Pasc. 29 Chaꞌstzun te teleꞌn tzaj Pilat tan yol scyetz:
—¿Mbi tzun til yi jun yajeꞌj yi muꞌl quicyꞌaluꞌ tzinwutz? —stzun Pilat scyetz.
30 —Yi quiꞌk muꞌẍ til, qui kloꞌ muꞌl kucyꞌal swutzuꞌ, —cheꞌch.
31 —Ko yaꞌtz taneꞌn, quicyꞌaj nin binuꞌ, nin chibneꞌuꞌ taneꞌn yi til quib yi taneꞌn chicstumbruꞌ, —chij Pilat scyetz.
—Poro taꞌ, yi oꞌ ketz yi oꞌ judiy, quiꞌc caꞌwl tkakꞌab tan biyleꞌn cuꞌn jun yaj, —cheꞌch.
32 Tan tuꞌ yi xtxolbileꞌj, el cuꞌn te yi yol yi talnak Jesús yi mbi jilwutzil quimichil sbajok te iꞌ. 33 Pakxeꞌnt quen tzun Pilat-tz xe caꞌl, nin ben mantar tan ẍchakleꞌn tzaj Jesús.
—¿I peꞌ aẍaꞌtz chireyil yi eꞌ judiy? —stzun iꞌ bantz tetz.
34 —¿Na peꞌ el xtxumuꞌ te yi mbi ekaꞌn tan yi yoluꞌ yi na tzanuꞌ tan jakleꞌn swetz, nka tan tuꞌ yi yol yi ntbituꞌ scyetz wunak? —stzun Jesús tetz.
35 —Cuquen bin, iẍkaj in tzunk judiy. Poro yi eꞌ atanum scyuchꞌ yi eꞌ wiꞌtz chipaleꞌil, yaꞌstzun yi ncẍjatxon tinkꞌab. Chinch wetz, at loꞌ awil. ¿Mbi majuch? —stzun Pilat tetz.
36 —Yi caꞌwl yi at tinkꞌab, nkꞌeꞌtz niꞌcuꞌn chi taneꞌn yi caꞌwl yi at tkꞌabuꞌ, na yi niꞌcuꞌnk taneꞌn, ja kloꞌ choꞌc yi eꞌ yi xomcheꞌ sweꞌj tan incolcheꞌn ẍchikꞌab yi eꞌ incontr. Na yi weri incaꞌwl nkꞌeꞌtz niꞌcuꞌn teꞌtz tu yi caꞌwl yi na xcon tzoneꞌj wi munt, —stzun Jesús bantz.
37 —¿Aẍ ptzun rey? —stzun Pilat tetz.
—Bintzi taꞌ, in rey, ja nojponuꞌ teꞌj, nin yaꞌstzun xac yi choꞌn nuꞌl itzꞌok tzoneꞌj wi munt. Ja nuꞌl tan talcheꞌn yi mero bintzi. Ej nin cyakil yi eꞌ yi na chixom te weri inchusuꞌn, yaꞌstzun yi eꞌ yi na cyocsaj yi bintzi, —stzun Jesús tetz Pilat.
38 —¿Naꞌ at cyent jun bintzi? Cyaꞌl jaleꞌt kaꞌn. Quiꞌc bintzi at, —stzun Pilat.
Yi bnixeꞌn caws Jesús tan teleꞌn cuꞌn iꞌ swutz
(Mt 27.15-31; Mr 15.6-20; Lc 23.13-25)
Yi wiꞌt bajeꞌn ẍchꞌotil Pilat yi stziꞌ Jesús, teleꞌn tzaj tzun junt tir tan yol scyetz eꞌ judiy:
—I bin jaluꞌ, eꞌuꞌ judiy, yi yajeꞌj yi mmuꞌl quicyꞌaluꞌ tzinwutz, quiꞌc muꞌẍ tal til nlajluchax tzinwutz wetz. 39 Ma jaluꞌ, at bin jun chileyuꞌ yi ilenin na cyajuꞌ yil tzintzakplen jun pres lakak eꞌchk Pasc. ¿Cu peꞌ cyanuꞌ yi nink tzintzakplen yi jun yajeꞌj yi na tocsaj tib tetz chireyiluꞌ? —stzun Pilat scyetz.
40 Chibaj ẍchꞌineꞌn tzuntz cyakil yi eꞌ wunak:
—¡Quiꞌ! Qui na kaj yil stzakplenuꞌ yi yajeꞌj, nin ko yaꞌtz tajbiluꞌ baꞌn tcuꞌn i Barrabás tzakplenuꞌ, —cheꞌch bantz.
Poro yi jun Barrabásaꞌtz iꞌ jun contr te gobierum, nin iꞌ jun alkꞌom.