Yi toqueꞌn Jesús tan nachleꞌn Kataj squibaj eꞌ ẍchusbeꞌtz
17
1 Yi wiꞌt bajeꞌn yolol yi eꞌchk yolaꞌtz, nintzun xmayin nintz tcyaꞌj, nin octz tan orariꞌn:“I bin jaluꞌ Taꞌ, i inaꞌtz in Cyꞌajluꞌ nin ja wiꞌt opon yi oril tan jaleꞌn weri inkꞌej. Takꞌ tzajuꞌ bin yi inkꞌej bantz wukꞌol yi teruꞌ kꞌejuꞌ. 2 Na bixbaꞌn chint tetz ajcaw squibaj cyakil wunak tan wukꞌol yi itzꞌajbil scyetz yi quinin bajsbeꞌn tetz, scyetz cyakil yi eꞌ yil cheꞌ takꞌuꞌ swetz. 3 Ẍchicambok te yi jun itzꞌajbilaꞌtz yi qui bajsbeꞌn tetz yi kol tzꞌel chitxum teruꞌ yi i iluꞌaꞌtz yi jun Ryos yi bintzinin tetz, ej nin kol tzꞌel chitxum swetz yi choꞌn insajeꞌn teꞌjuꞌ Taꞌ.
4 “Nchaꞌtz ja lajluchax yi kꞌejuꞌ waꞌn tzoneꞌj wuxtxꞌotxꞌ. Na ja bnix yi intarey yi alijt tzaj takꞌunuꞌ swetz. 5 I bin jaluꞌ Taꞌ, takꞌ tzajuꞌ junt tir yi inkꞌej, chi wutaneꞌn nin yi atin tzaj teꞌjuꞌ yi ntaxk tzaj bnix yi wuxtxꞌotxꞌ.
6 “Ja chinxcyeꞌ tan ẍchajleꞌnuꞌ ẍchiwutz yi eꞌ wunak yi elnakeꞌt tzaj tanuꞌ tkꞌab yi yab ajtzaꞌkl tetz tzoneꞌj wuxtxꞌotxꞌ. Yaꞌstzun eꞌaꞌs yi ncheꞌ takꞌuꞌ swetz. Eꞌ teruꞌ Taꞌ, poro ja cheꞌ takꞌuꞌ swetz, na ja chiban taneꞌn yi yoluꞌ. 7 Ja wiꞌt el chitxum tetz yi choꞌn na saj wajtzaꞌkl teꞌjuꞌ. 8 Na ja intxol scyetz cyakil yi xtxolbil yi sajnak tloluꞌ swetz, nin ja cyocsaj. Ja el chitxum tetz yi bintzinin choꞌn sajnakin teꞌjuꞌ. Na ja cyocsaj yi iluꞌ nchinchakon tzaj.
9 “Yaꞌstzun yi eꞌaꞌtz yi na chintzan tan jakleꞌn chibanl teruꞌ Taꞌ. Na qui na chintzan tan jakleꞌn chibanl yi eꞌ mas wunak wi munt. Poro ntin na chintzan tan jakleꞌn chibanl yi eꞌ yi na cheꞌ takꞌuꞌ swetz, na eꞌ cuꞌn teruꞌ Taꞌ. 10 Cyakil yi eꞌ wetz, eꞌ nin ketz tuchꞌuꞌ. Ej nin cyakil yi eꞌ teruꞌ, eꞌ nin ketz tuchꞌuꞌ. Tan eꞌ na jaleꞌt inkꞌej.
11 “Yi in wetz, quiꞌt naꞌtij mas tzoneꞌj wi munt, na naꞌjeꞌnt teꞌjuꞌ Taꞌ. Chin xan nin iluꞌ Taꞌ. Cheꞌ qꞌuicyꞌlejuꞌ bin yi eꞌ yi ncheꞌ takꞌuꞌ swetz. Cheꞌ qꞌuicyꞌlejuꞌ tan yi poreruꞌ, bantz cweꞌn tokꞌbel tib yi cyajtzaꞌkl, chi kutaneꞌn ketz tuchꞌuꞌ Taꞌ. 12 Te yi atin scyeꞌj sajleꞌnix tunintz, ja cheꞌ inqꞌuicyꞌlej tan poreruꞌ Taꞌ. Cyaꞌl jun pakxij scyetz, ntin yi jun yi txꞌakxnak nin teraꞌtz. Ej nin tan yi xtxolbileꞌj Taꞌ, ja el cuꞌn te yi yol yi tzꞌibaꞌnt cyen.
13 “Naꞌjeꞌn wetz jaluꞌ kale atituꞌ, poro jalen peꞌk atineꞌt tzoneꞌj, na chintzan tan talcheꞌn cyen yi eꞌchk xtxolbileꞌj bantz chitzatzineꞌn. Na na waj yil chitzatzin chi wutaneꞌn wetz. 14 Ja wiꞌt wal yi xtxolbil scyetz, yi alijt tanuꞌ swetz. Poro yi eꞌ mas wunak, na chiꞌch len chicꞌuꞌl scyeꞌj, tan paj yi qui na chixom te yi cyetz cyajtzaꞌkl. Niꞌcuꞌn kutaneꞌn scyuchꞌ na qui na xom kawiꞌ te cyajtzaꞌkl yi eꞌ mas wunak yi ntin ajlij chicꞌuꞌl te yi ajtzaꞌkl tetz tzoneꞌj wuxtxꞌotxꞌ. 15 Ej nin qui na chintzan tan cꞌucheꞌn teruꞌ tan chibeneꞌn tcyꞌaluꞌ teꞌjuꞌ, ma na ntin na chintzan tan cꞌucheꞌn teruꞌ tan toqueꞌnuꞌ tan chicolcheꞌn tkꞌab Baybaꞌn. 16 Ej nin yi in wetz, quiꞌc wocleꞌn te yi eꞌchk takleꞌn tetz tzoneꞌj wuxtxꞌotxꞌ. Nchaꞌtz eꞌ quiꞌc cyocleꞌn te yi eꞌchk takleꞌn tetz tzoneꞌj wuxtxꞌotxꞌ. 17 Cheꞌ jatxeꞌl tzajuꞌ Taꞌ tan yi yoluꞌ yi bintzinin tetz, bantz chixconeꞌn teruꞌ. 18 Ja chinsaj ẍchakoluꞌ ẍchixoꞌl yi eꞌ wunak wi munt, nchaꞌtz eꞌ nchiben inchakol ẍchixoꞌl yi eꞌ mas wunak wi munt tan xtxoleꞌn yi yoluꞌ Taꞌ. 19 Tan tuꞌ yi na chimpekꞌ scyeꞌj, ja injatx wib tan banleꞌn taneꞌn yi tajbiluꞌ, na yi wetz wajbil iꞌtz yi nternink bintzi chijatx quib tan chixconeꞌn teruꞌ.
20 “Poro Taꞌ, nkꞌeꞌtz ntin eꞌ na chintzan tan jakleꞌn chibanl, ma na nchaꞌtz yi eꞌ yil chincyocsaj tzantzaj yil quibit yi chiyol yi eꞌaꞌtz. 21 Nchaꞌtz tzincꞌucheꞌ teruꞌ Taꞌ yi junit sban cyajtzaꞌkl. Ej nin yi junit sban kajtzaꞌkl kacyakil cuꞌn tuchꞌuꞌ. Choꞌnk chiban chi kutaneꞌn ketz tuchꞌuꞌ. Yi wetz wajbil iꞌtz yi junit sban cyajtzaꞌkl, bantz cyocsal cyakil yi wunak yi iluꞌ nchinchakon tzaj. 22 Ja wakꞌ chikꞌej yi eꞌaꞌtz chi taneꞌn wetz inkꞌej yi ntakꞌuꞌ, na yi wajbil iꞌtz yi junit sban cyajtzaꞌkl chi kutaneꞌn ketz tuchꞌuꞌ Taꞌ. 23 Ej nin yi wetz wajbil iꞌtz yi junit oꞌ scyuchꞌ, ej nin yi junit oꞌ ketz tuchꞌuꞌ, bantz junit sban kajtzaꞌkl. Na ko yaꞌtz, tzꞌelepon chitxum wunak tetz yi iluꞌ nchinchakon tzaj. Ej nin tzꞌelepon chitxum tetz yi na pekꞌuꞌ scyeꞌj, chi na pekꞌuꞌ sweꞌj wetz.
24 “Taꞌ, ja cheꞌ takꞌuꞌ swetz, nin yi wajbil iꞌtz yil chopon kalel noponeꞌt wetz. Na na waj yil quil yi inkꞌej yi takꞌnakuꞌ swetz. Na yi iluꞌ teruꞌ iẍnin na pekꞌuꞌ sweꞌj te yi ntaxk bnix yi wuxtxꞌotxꞌ. 25 Taꞌ, chin tzꞌaknak cuꞌn iluꞌ. Yi eꞌ wunak qui na el chitxum teruꞌ. Poro yi in wetz elnak intxum teruꞌ. Nin nchaꞌtz yi eꞌ yi xomcheꞌ sweꞌj, ja el chitxum tetz yi iluꞌ nchinchakon tzaj. 26 Ja inchaj scyetz yi ẍeꞌn taneꞌnuꞌ Taꞌ. Ej nin quil chinsactij tan ẍchajleꞌn scyetz, na yi wajbil iꞌtz yil chilokꞌ quib squibil quib, chi na pekꞌuꞌ sweꞌj wetz bantz junit oꞌ sban scyuchꞌ,” stzun Jesús bantz tul oración.