16
1 “Na chintzan tan xtxꞌolcheꞌn xoꞌl yi eꞌchk xtxolbilaꞌseꞌj tzitetz, na qui na waj yi nink cxpakxijwok. 2 Na tzꞌul jun tiemp yi chocopon tan ilajeꞌn len lakak sinagoga. Ej nin mas tcunin pyor ẍchibneꞌ, na chocopon tan ibiyleꞌn cuꞌn, nin scyaleꞌ yi iꞌtz jun chimunl yi na chitzan tan banleꞌn swutz Ryos. 3 Chocopon tan banleꞌn eꞌchk takleꞌnaꞌtz, na qui na el chitxum tetz Intaj, nin qui na el chitxum tetz yi mbi ekaꞌn waꞌn. 4 Na chintzan tan talcheꞌn cyen yi eꞌchk xtxolbilaꞌs tzitetz, na na waj yil tzꞌul txꞌakxuj ticꞌuꞌl yil xeꞌtij yi eꞌchk ilaꞌtz.Yi munl yi Espíritu Sant
“Qui nin wal eꞌchk puntilaꞌtz tzitetz le xeꞌtzbil tzaj, na atin tzixoꞌlwok. 5 Poro yi jaluꞌ, na chintzan tan talcheꞌn cyen, na naꞌjeꞌn te yi jun yi nchinchakon tzaj. Poro at muꞌẍ tal ipaltil, na qui na ijak naꞌ nchimbeneꞌt. 6 Ntin ja jal jun bis tzitetz tan tuꞌ yi eꞌchk xtxolbil yi na chintzan tan xtxoleꞌn cyen. 7 Poro jun cuꞌn yol yi na wal nin tzitetz, baꞌn tcuꞌn tetz itetz yil naꞌj, na yi ko quil naꞌj quil tzꞌul yi jun yi at tulbil tan ichꞌeyeꞌnwok. Poro yil naꞌj, tzꞌul inchakol tziteꞌj. 8 Nin yil tzꞌul tzaj iꞌ, ẍchinachonk wunak teꞌj yi at len chipaj. Ej nin spujxok cyakꞌun yi naꞌ scyetz iꞌ yi jun yi tzꞌaknak cuꞌn, yi quiꞌc tetz til. Ej nin slajluchaxk ẍchiwutz taꞌn yi txꞌaklij len chicaws. 9 Sjalok chipaj swutz Ryos tan tuꞌ yi qui na cyocsaj inyol. 10 Ej nin slajluchaxk ẍchiwutz yi tzꞌaknak cuꞌn in, yi quiꞌc wetz wil, na nnaꞌj wetz tcyaꞌj te Intaj, nin quiꞌt tzitilwok inwutz. 11 Ej nin tzꞌelepon chitxum tetz yi at tulbil chicaws, na banijt caws Baybaꞌn, yi ajcaw tzoneꞌj wuxtxꞌotxꞌ.
12 “At mas eꞌchk takleꞌn yi na waj lwal tzitetz, poro quil pujx itaꞌn jaluꞌ. 13 Poro yil tzꞌul tzaj yi Espíritu Sant, yi jun yi cyꞌanl te yi bintzi, iꞌ tzꞌocopon tan ichusleꞌn te yi mero bintzi. Poro quil xcon yi tetz tajtzaꞌkl taꞌn, ma na i yi ajtzaꞌkl yi tzꞌul tbital te Ryos. Ej nin staleꞌ iꞌ yi mbi cuꞌn eꞌchk takleꞌn yi na xon tzaj. 14 Nin sjalok weri inkꞌej taꞌn, na wetz teꞌn yi ajtzaꞌkl yi stkꞌeꞌ iꞌ tzitetz. 15 Ej nin cyakil yi at tu Intaj, wetz teꞌn nintz. Chaꞌstzun te na wal nin tzitetz yi wetz teꞌn yi ajtzaꞌkl yi stkꞌeꞌ yi Espíritu Sant tzitetz.
Yi bis jaluꞌ tzatziꞌn tzajpont wiꞌ
16 “Txant tan tponeꞌn yi oril tan qui itilol inwutz tetz jun tkuj, poro tzitileꞌt inwutz junt tir. Na te yi jun tkujaꞌtz yi quil tzitilwok inwutz, choꞌn nchimben tzaj te Intaj yi at tcyaꞌj,” stzun Jesús bantz scyetz.
17 Cyoqueꞌn tzun cobox scyeri eꞌ ẍchusbeꞌtz tan xtxumleꞌn yi mbi na elepont yi eꞌchk yolaꞌtz yi tal Jesús.
—¿Mbi ekaꞌn tan yi jun yolaꞌtz yi ntal iꞌ yi ‘txant tan toponeꞌn yi oril tan qui itilol inwutz tetz jun tkuj, poro tzitileꞌ junt tir inwutz’? 18 Ej nin ¿mbi ekaꞌn tan yi jun yol yi ‘txant’? ¿Ẍeꞌn tzꞌel katxum tetz yi mbi na tzan tan yolcheꞌn? —cheꞌch squibil quib.
19 Nachoneꞌn tzun Jesús teꞌj yi at cyajbil tan jakleꞌn yi puntil tetz. Chaꞌstzun te tlol iꞌ scyetz:
—I bin yi yol yi nwal tzitetz yi ‘Txant tan toponeꞌn yi oril tan qui itilol inwutz tetz jun tkuj, poro tzitileꞌ junt tir inwutz,’ ¿i loꞌ yolaꞌtz yi na cxtzanwok tan xtxꞌajleꞌn teꞌj? 20 Je puntileꞌj: Swaleꞌ cyen yi mero claril tzitetz. Yi axwok itetz cxokꞌokwok, nin cxbisunkwok, ma yi eꞌ mas wunak ẍchitzatzink cyeraꞌtz. Bintzinin, tzꞌul bis oꞌkl tziwutz, poro yil tzajpon wiꞌ, cxtzatzinkwok. 21 Na je jun elsawutzileꞌj: ¿Qui peꞌ na itil jun xnaꞌn yi chꞌon wiꞌ? Yi na opon yi oril tan tuleꞌn yos tuchꞌ, wiꞌnin bis oꞌkl na ul swutz, tan paj yi qꞌuixcꞌuj yi at cuꞌnt. Poro yi na ul itzꞌok yi niꞌ, quiꞌt na ul txꞌakx yi qꞌuixcꞌuj tcꞌuꞌl tan tuꞌ yi wiꞌnin na tzatzin quen te yi niꞌ. 22 Nchaꞌtz tzun itaneꞌn itetz. Wiꞌnin na cxbisunwok jaluꞌ, poro yil nuꞌlt tan itilweꞌn, nternin sjalok jun tzatziꞌn tetz italmaꞌ. Yi jun tzatziꞌnaꞌtz, cyaꞌl nin jun xcyeꞌ tan majleꞌn len tzitetz.
23 “Yil tzꞌul yi jun kꞌejlalaꞌtz, quiꞌt tzijak jun ajtzaꞌkl swetz, na spujxok cyakil itaꞌn. Ej nin jun cuꞌn yol na wal nin tzitetz, stkꞌeꞌ Intaj cyakil yi eꞌchk takleꞌn yil tzicꞌuchwok tan weri imbiꞌ. 24 Quiꞌc nin jun takleꞌn yi jajk icꞌuch tan imbiꞌ sajleꞌnix tunintz. Nqueꞌn binwok tan cꞌucheꞌn jaluꞌ, nin tzꞌakꞌlok tzitetz. Ej nin cxtzatzinkwok teꞌj.
Ja wiꞌt xcyeꞌ Jesús scyeꞌj cyakil eꞌ contr yi ateꞌ wi munt
25 “Yi sajleꞌnix tunintz elsawutzil cuꞌn na xcon waꞌn tan ichusleꞌn. Poro txant tan tuleꞌn yi kꞌejlal yi quiꞌt xcon elsawutzil waꞌn. Clar cunin swaleꞌ tzitetz yi ẍeꞌn taneꞌn Intaj. 26 Ej nin yil tzꞌul yi jun kꞌejlalaꞌtz, xconk imbiꞌ itaꞌn tan cꞌucheꞌn tetz Intaj yi mbi tajweꞌn tzitetz. Na qui tajweꞌn tan woqueꞌn wetz tetz iyolol. 27 Na wiꞌnin na pekꞌ Intaj tziteꞌj. Na pekꞌ iꞌ tziteꞌj, na na cxpekꞌwok sweꞌj. Ej nin na pekꞌ iꞌ tziteꞌj na ja itocsaj yi choꞌn sajnakin te iꞌ. 28 Choꞌn sajnakin te Intaj tan wuleꞌn tzoneꞌj wuxtxꞌotxꞌ. Ma jaluꞌ swileꞌ cyen yi jun amaꞌleꞌj, nin naꞌjeꞌn junt tir te iꞌ, —stzun Jesús scyetz.
29 —Taꞌ, clar cunin na kubit nin yoluꞌ jaluꞌ, na nkꞌeꞌtz elsawutzil na xcon tanuꞌ. 30 Ej nin ja el katxum tetz jaluꞌ, yi quiꞌc nin jun takleꞌn yi quiꞌk na pujx tanuꞌ. Ja taluꞌ cyakil yi xtxolbil sketz. Chaꞌstzun te quiꞌt tajweꞌn tan kajakol jun takleꞌn teruꞌ, na ja lajluchax cyakil skawutz. Tan tuꞌ yi mpujx kaꞌn, ja el katxum tetz yi choꞌn sajnakuꞌ te Ryos, —cheꞌch tzun bantz tetz Jesús.
31 —¿Ja nin poloꞌ itocsaj? 32 Na txant tan tuleꞌn yi oril, nin xeꞌtok chan, yi cxeꞌlwok len xit. Jalt in chincyajk cyen inchuc. Poro nkꞌeꞌtz inchuc chincyajk, na xomij Intaj sweꞌj. 33 Poro na waj yil kꞌukeꞌ icꞌuꞌl sweꞌj, bantz itzatzineꞌnwok. Chaꞌstzun te na chintzan tan talcheꞌn cyen yi xtxolbileꞌj tzitetz. Tajweꞌn tan itijol qꞌuixcꞌuj tzoneꞌj wuxtxꞌotxꞌ. Poro quiwit, na yi in wetz ja chinxcyeꞌ scyeꞌj cyakil kacontr yi ateꞌ tzoneꞌj wuxtxꞌotxꞌ.