Elsawutzil tetz jun wiꞌ uva
15
1 “Je junt elsawutzileꞌj: Yi in wetz choꞌn wutaneꞌn chi xmilil jun balaj wiꞌ uva. Ma Intaj, choꞌn taneꞌn iꞌ chi taneꞌn taw ujul yi na tzan tan qꞌuicyꞌleꞌn yi jun wiꞌ uvajaꞌtz. 2 Ma yi eꞌchk kꞌab, iꞌtz jun elsawutzil yi axwok itetz. Nin chi na el tamij jalaj kꞌab tzeꞌ yi qui na wutzin, iteꞌn nin sbneꞌ Intajaꞌs tan tamleꞌn len cyakil yi eꞌ yi qui na chiwutzin. Inti yi eꞌ yi baꞌn ateꞌt, tzꞌocopon Intaj tan cꞌapleꞌn chiyanaꞌsil, bantz chiwutzineꞌn mas. 3 Yi axwok itetz ja wiꞌt banlij baꞌn tzitetz tan tuꞌ yi chusuꞌn yi ja itbitwok sweꞌj. 4 Quil tzijatxlen itib sweꞌj, na yi in wetz quil tzinjatxlen wib tziteꞌj. ¿Qui peꞌ na el itxum tetz? ko qui lacꞌchij jun kꞌab tzeꞌ te xmilil, quiꞌc rmeril tan wutzineꞌn. Niꞌcuꞌn tzun itaneꞌnwok. Quiꞌc rmeril yil cxakꞌon baꞌnwok kol tzijatxlen itib sweꞌj.5 “Yi in, choꞌn wutaneꞌn chi taneꞌn xmilil jun wiꞌ loꞌbaj. Ma yi axwok itetz choꞌn itaneꞌnwok sweꞌj chi taneꞌn eꞌchk kꞌab tzeꞌ. Cyakil yi eꞌ yi quil chijatxlen quib sweꞌj, ẍchiwutzink chi taneꞌn jalaj kꞌab loꞌbaj yi wiꞌnin wutz na jal. Poro kol tzijatxlen itib sweꞌj, quiꞌc rmeril tan ibnol jun takleꞌn balaj. 6 Ej nin alchok scyetz yi na jatxlen tib sweꞌj, tzꞌelepon joꞌliꞌn teꞌtz. Niꞌcuꞌn sbajok teꞌj chi na ban eꞌchk kꞌab tzeꞌ yi na el tamij nin na skej. Chimolxok cyeꞌtz nin nchiben joꞌliꞌn tkꞌakꞌ.
7 “Poro ko quil tzijatxlen itib sweꞌj, nin ko quil tzꞌel inchusuꞌn te icꞌuꞌl, baꞌn bin tzijakwok yi mbi tajweꞌn tzitetz, nin swakꞌeꞌ. 8 Ej nin kol cxwutzinwok sjalok kꞌej Intaj, nin slajluchaxk yi bintzinin axwok inchusbeꞌtz. 9 Nchaꞌtz chi na pekꞌ Intaj sweꞌj, nchaꞌtz in wetz, wiꞌnin na chimpekꞌ tziteꞌj. Qui bin tzijatxlen itib sweꞌj. 10 Na kol tzibanwok taneꞌn incaꞌwl, ilenin chimpekꞌok tziteꞌj. Choꞌn wutaneꞌn tzituchꞌ chi wutaneꞌn wetz tu Intaj. Yi Intaj na pekꞌ sweꞌj, na na chintzan tan banleꞌn taneꞌn yi tetz caꞌwl.
11 “Na waj yil cxtzatzinwok, chaꞌstzun te na chintzan tan talcheꞌn cyen eꞌchk xtxolbileꞌj tzitetz. Kol cxomwok te inchusuꞌn, sjalok wiꞌnin tzatziꞌn itaꞌn. 12 Nin je bin yi incaꞌwleꞌj yi na waj lwal cyen tzitetz: Lokꞌwok itib tzitibil itib, chi na inlokꞌ iwutz. 13 Nin yi lokꞌ ib mas balaj, iꞌtz kol quim jun yaj tan chicolcheꞌn yi eꞌ tamiw. 14 Ej nin kol tzibanwok taneꞌn yi incaꞌwl axwok tzun wamiwtz. 15 Nkꞌeꞌtz axwok inmos taneꞌn jaluꞌ, na yi jun mos qui na til yi mbi na tzan yi patrón tan xtxumleꞌn. Ma axwok itetz ja wiꞌt itbit cyakil yi puntil yi alijt tan Intaj swetz. Chaꞌstzun te axwok wamiw jaluꞌ. 16 Yi in wetz nkꞌeꞌtz txaꞌij chin itaꞌn, ma na axwok itetz txaꞌij quixwok waꞌn. Nin ncxben inchakol tan pucꞌuneꞌn iwutz. Nin quil tzꞌel cꞌuꞌl yi itakꞌun tetz cyakil tiemp. Ej nin stakꞌeꞌ Intaj cyakil cuꞌn yi mbi cuꞌn tzijakwok tetz yi kol xcon imbiꞌ itaꞌn. 17 Poro swaleꞌ cyen junt tir yi incaꞌwl tzitetz: Lokꞌwok itib tzitibil itib.
Yi eꞌ wunak na chiꞌch chicꞌuꞌl te Jesús, nin scyeꞌj yi eꞌ yi xomcheꞌ teꞌj
18 “Na yi eꞌ wunak yi ateꞌ cwent Baybaꞌn ẍchiꞌchok chicꞌuꞌl tziteꞌj. Poro yi ntaxk chiꞌch chicꞌuꞌl tziteꞌj, nsken chiꞌch chicꞌuꞌl sweꞌj. 19 Yi niꞌcuꞌnk yi itajtzaꞌkl scyuchꞌ yi eꞌ wunakaꞌtz, na kloꞌ chipekꞌ tziteꞌj, chi na chipekꞌ scyeꞌj eꞌ mas cyuchꞌ, poro tan tuꞌ yi ja cxeꞌl tzaj ẍchixoꞌl, chaꞌstzun te na chiꞌch chicꞌuꞌl tziteꞌj na quiꞌt na cxomwok te cyetz cyajtzaꞌkl. 20 Nachonwok te yi xtxolbil yi walnak tzitetz: ‘Quiꞌc nin jun mos yi atk mas kꞌej swutz yi patrón.’ Na nin peꞌ choꞌc tan imbuchleꞌn wetz, yi in ajcaw, lmal tzun yi axwok itetz, na axwok tuꞌ inmos taneꞌn. Chaꞌstzun te chocopon tan ibuchleꞌn, na ja bin choꞌc tan imbuchleꞌn wetz. Poro ilenin at eꞌ yi ja wiꞌt cyocsaj inchusuꞌn. Ej nin nchaꞌtz at eꞌ yi scyocsajeꞌ yi chusuꞌn yi tzitxoleꞌwok. 21 Poro tan tuꞌ yi cxomwok sweꞌj, chocopon yi eꞌ wunakaꞌtz yi ateꞌ cwent Baybaꞌn tan ibuchleꞌn, na qui na pujx cyaꞌn naꞌ scyetz yi jun yi nchinchakon tzaj.
22 “Yi quiꞌk nnuꞌl tan xtxoleꞌn puntil scyetz, qui kloꞌ njal quil. Na qui nin ncyocsaj weri inchusuꞌn, chaꞌstzun te quiꞌc rmeril tan chiclaxeꞌn tkꞌab quil. 23 Ej nin cyakil yi eꞌ yi na chiꞌch chicꞌuꞌl sweꞌj na elepont yi na chiꞌch chicꞌuꞌl te Intaj. 24 Qui kloꞌ njal quil yi quiꞌk mbnix eꞌchk milawr waꞌn, na ja bnix eꞌchk milawr waꞌn yi cyaꞌl nin jun jajk xcyeꞌ tan banleꞌn. Wech quilnak eꞌchk milawraꞌtz, poro ilenin na chiꞌch chicꞌuꞌl skeꞌj tu Intaj. 25 Poro ja wiꞌt el cuꞌn te yi xtxolbil yi tzꞌibaꞌnt cyen le cyetz chiley yi na tal: ‘Tunin na chiꞌch tuꞌ chicꞌuꞌl sweꞌj, wech na quiꞌc wetz wil.’ Yaꞌstzun yi tzꞌibaꞌnt cyen le cyetz chiliwr.a
26 “Poro tzꞌul jun tan ichꞌeyeꞌnwok, nin tan mayseꞌn icꞌuꞌl, iꞌtz yi Espíritu Sant, yi bintzinin tetz. Yi junaꞌtz, tzꞌul inchakol yil nopon te Intaj. Iꞌ lchajon yi imbalajil. 27 Ej nin nchaꞌtz axwok itetz cxocoponwok tan xtxoleꞌn yi mbi ekaꞌn waꞌn, na ja cxomwok sweꞌj jetz yi inxeꞌtleꞌnix tan chichusleꞌn wunak.