Tan Jesús kopon te Kataj
14
1 I bin jaluꞌ, quil cxbisunwok. Ma na kꞌukek icꞌuꞌl te Ryos, nin kꞌukek icꞌuꞌl sweꞌj. 2 Na kale atit yi caꞌl Intaj, wiꞌnin eꞌchk amaꞌl at kalel kanajeweꞌt tzituchꞌ. Quiꞌ kloꞌ na wal cyen tzitetz yi nkꞌeꞌtzk bintzi. Nchimben bin tan nucꞌleꞌn amaꞌl tetz itetz. 3 Ej nin yil nucꞌx cyen yi amaꞌl, nuꞌlt tzun tan iticyꞌleꞌn nin. Na kalel chin najeweꞌt wetz, yaꞌtz nin cxnajeweꞌt itetz. 4 Ej nin elnak itxum tetz yi naꞌ nchimbeneꞌt. Nin nchaꞌtz elnak itxum tetz yi naꞌ scyetz yi beꞌ tan toponeꞌn kalel nchimbeneꞌt wetz.5 —Poro Taꞌ—, stzun Maẍ —qui na el katxum tetz yi naꞌ mbeneꞌtuꞌ, ¿ẍeꞌn tzun tzꞌel katxum tetz yi jun beꞌaꞌtz?
6 —I inaꞌtz yi mero beꞌ. Ej nin i inaꞌtz yi mero bintzi. I inaꞌtz in itzꞌajbil. Nin cyaꞌl jun tzꞌopon te Intaj yi quiꞌk in. 7 Yi nink tzꞌel itxum tetz yi naꞌ scyetz in, tzꞌelepon tzun kloꞌ itxum tetz yi naꞌ scyetz iꞌ yi Intaj. Poro jaluꞌ ja wiꞌt el itxum tetz yi ẍeꞌn taneꞌn Intaj, na ja itil inwutz, —stzun Jesús scyetz.
8 —Taꞌ, ntinaꞌtz kloꞌ na kaj, yi nink ẍchajuꞌ Kataj Ryos sketz, —stzun Liꞌp tetz Jesús.
9 —Lastum aẍ Liꞌp. Ja el tiemp waꞌn tzixoꞌlwok, ¿mbi tzuntz yi qui na el atxum tetz yi naꞌ scyetz in? Na alchok scyetz yi na el xtxum swetz, ja tzun wiꞌt el xtxum tetz Intaj. ¿Nxac tzun na cẍtzan tan jakleꞌn tkanil Intaj? 10 ¿Qui peꞌ mawocsaj yi junit oꞌ tu Intaj? Iteꞌn nin inaꞌtz yi Intaj. Ej nin yi Intaj, iteꞌn nin iꞌaꞌtz yi in. Nin cyakil yi eꞌchk yol yi na wal nin tzitetz, nkꞌeꞌtz in cun tuꞌk txumul tetz, ma na Intaj txumul tetz, na xomij iꞌ sweꞌj. 11 Ocswok yi iteꞌn nin inaꞌtz yi Intaj. Ej nin ocswok yi iteꞌn nin Intajaꞌtz yi in. Poro ko qui na itocsaj inyol, baꞌn tzitocsaj tan yi eꞌchk milawr yi na chintzan tan banleꞌn. 12 Poro jun cuꞌn yol na wal nin tzitetz: Alchok scyetz yil tocsaj inyol xcyek tan banleꞌn yi eꞌchk takleꞌn yi na chintzan tan banleꞌn. Ej nin nchaꞌtz yil naꞌj wetz tcyaꞌj, chixcyek cyakil yi eꞌ yil cyocsaj inyol tan banleꞌn eꞌchk takleꞌn yi mas tcuꞌn xoꞌwbil swutz yi wetz yi na imban. 13 Na tzimbneꞌ cyakil yi eꞌchk takleꞌn yil tzijakwok tan imbiꞌ, tan lajluchaxeꞌn yi kꞌej Intaj. 14 Na kol cxoꞌc tan jakleꞌn alchok scyetz takleꞌnil tan imbiꞌ, swakꞌeꞌ tzitetz, —stzun Jesús bantz scyetz.
Yi tlol Jesús yi at tulbil yi Espíritu Sant
15 “Ma jaluꞌ, yi ko bintzinin na cxpekꞌwok sweꞌj, banwok bin taneꞌn yi incaꞌwl. 16 Tzincꞌucheꞌ tzun pawortz tetz Intaj tan sajeꞌn ẍchakol jun tan ichꞌeyeꞌnwok, nin tan mayseꞌn icꞌuꞌl. Iꞌtz yi Espíritu yi na aꞌlon tetz yi bintzi. Iꞌ tzꞌaꞌlon yi mero bintzi tzitetz. Ej nin tzꞌaꞌtok tziteꞌj tetz cyakil tiemp. 17 Poro quiꞌc rmeril tan najeweꞌn scyeꞌj yi eꞌ mas wunak yi qui na cyakꞌ amaꞌl tetz, na qui na pujx cyaꞌn, nin qui na el chitxum tetz yi mbi iꞌil yi jun Espíritujaꞌtz. Poro yi axwok itetz, ja wiꞌt el itxum tetz, na xomij iꞌ tziteꞌj, nin snajank iꞌ tziteꞌj sbneꞌ opon tunintz. 18 Quil cxwilwok cyen ichuc, na nuꞌl junt tir tan innajeweꞌn tziteꞌj. 19 Tetz nin coboxt kꞌej, quiꞌt quil wunak inwutz, poro yi axwok itetz tzitileꞌ inwutz. Nin tan tuꞌ yil nitzꞌij junt tir, sjalok itzꞌajbil itaꞌn. 20 Nin yil nitzꞌij junt tir, kalenaꞌs tzun tzꞌel itxum tetz yi junit oꞌ tu Intaj. Ej nin tzꞌelepon itxum tetz yi junit oꞌ tzituchꞌ, na ẍchinnajank te italmaꞌ. Ej nin nchaꞌtz axwok, cxnajankwok sweꞌj. 21 Cyakil yi eꞌ yi na el chitxum tetz incaꞌwl, nin na chitzan tan banleꞌn taneꞌn, yaꞌstzun yi eꞌ yi na chipekꞌ sweꞌj. Ej nin nchaꞌtz in chimpekꞌok scyeꞌj. Nin pekꞌok Intaj scyeꞌj yi eꞌ yi na chipekꞌ sweꞌj. Nin slajluchaxk ẍchiwutz yi xomchin scyeꞌj, —stzun Jesús scyetz yi eꞌ ẍchusbeꞌtz.
22 —Taꞌ, ¿mbi tzuntz yi ntin skawutz ketz ẍchajeꞌ tibuꞌ, nin quil ẍchaj tibuꞌ ẍchiwutz yi eꞌ mas wunak yi qui na cyocsaj? —stzun Judas tetz. (Nkꞌeꞌtz yi Judas Iscariot.)
23 —Cyakil yi eꞌ yi na chipekꞌ sweꞌj, na chitzan tan banleꞌn taneꞌn wetz inchusuꞌn yi na intxol. Nchaꞌtz Intaj, spekꞌok scyeꞌj. Nin skanajank scyeꞌj. 24 Ma yi eꞌ yi qui na chipekꞌ sweꞌj, qui na cyocsaj yi inyol. Poro yi eꞌchk yol yi na inyol, nkꞌeꞌtz wetz cun tuꞌ, ma na tetz Intaj yi nchinchakon tzaj.
25 “Jalen peꞌk yi atineꞌt tziteꞌj, na chintzan tan talcheꞌn yi eꞌchk xtxolbileꞌj tzitetz. 26 Poro yil tzꞌul yi Espíritu Sant tan Intaj, iꞌ tzꞌocopon tan ichꞌeyeꞌnwok, nin tan mayseꞌn icꞌuꞌl. Tan iꞌ slajluchaxk cyakil eꞌchk xtxolbil tziwutz. Ej nchaꞌtz, xcyek tan tuleꞌn txꞌakx ticꞌuꞌl cyakil yi eꞌchk xtxolbil yi ja wiꞌt wal tzitetz.
27 “I bin jaluꞌ, yi ntaxk naꞌj, na waj lwakꞌ cyen xtxaxl walmaꞌ tzitibaj. Tetz cuꞌn walmaꞌ yil wakꞌ cyen. Na nkꞌeꞌtz in laꞌj, chi quitaneꞌn yi eꞌ mas wunak yi quiꞌc na cyocsaj. Chaꞌstzun te, yil naꞌj quil cxbisunwok, nin quil cxobwok. 28 Ja bin wal tzitetz yi naꞌjeꞌn. Ej nin ja bin wal tzitetz yi nuꞌlt junt tir tziteꞌj. Nin ko bintzinin na cxpekꞌwok sweꞌj, ja kloꞌ cxtzatzinwok yi mitbitwok yi najeꞌnt te Intaj, yi ajcaw sweꞌj. 29 Con tiemp cuꞌn na chintzan tan talcheꞌn cyen yi jun xtxolbilaꞌtz tzitetz, bantz ilenin tzitocsaj yil naꞌj wetz.
30 “Poro quiꞌc mas tmaꞌlil tan injiloneꞌn tzitetz, na tzꞌul chan yi jun yi na cawun tzoneꞌj wuxtxꞌotxꞌ tan makleꞌn kloꞌ inwutz. Nkꞌeꞌtz iꞌ ajcaw sweꞌj, 31 poro tajweꞌn cuꞌn tan bnol yi tetz tajbil sweꞌj, bantz teleꞌn chitxum wunak tetz yi na chimpekꞌ te Intaj, nin tan teleꞌn chitxum tetz yi list in tan banleꞌn taneꞌn yi tetz tajbil yi cawuꞌnchint tzaj teꞌj. Kaleꞌ bin. Txiclijeꞌnwok. Quin, —stzun Jesús bantz.