Yi toqueꞌn Jesús tan xtxꞌajleꞌn quikan yi eꞌ ẍchusbeꞌtz
13
1 I ban yi junteꞌn kꞌej tan tucumuleꞌn yi kꞌej yi na biꞌaj Pasc. Nsken el xtxum Jesús tetz yi txant tan tponeꞌn yi oril tan cyajeꞌn cyen tilol yi munteꞌj tan tajeꞌn te Taj. Ilenin pekꞌ iꞌ scyeꞌj yi eꞌ tetz yi eꞌ xom teꞌj tzoneꞌj wi munt, pyor nin te yi txant tan tajeꞌn iꞌ tcyaꞌj, mas tcunin pekꞌ iꞌ scyeꞌj.2 Itzun te yi na chiwan Jesús nsken oc Baybaꞌn tan xuyleꞌn yab ajtzaꞌkl le wiꞌ Judas Iscariot,a yi cyꞌajl Simón, tan beneꞌn cꞌayil iꞌ Jesús. 3 Inti Jesús elnak xtxum tetz yi akꞌijt cyakil eꞌchk takleꞌn tkꞌab tan Ryos. Nin elnak xtxum tetz yi choꞌn nsaj iꞌ te Ryos nin yi at tajbil iꞌ junt tir teꞌj. 4 Poro te yi na chiwan qui xtxum iꞌ yi tetz kꞌejaꞌtz, ma na ja cyaj quen tilol iꞌ yi waꞌ nin oc tan telseꞌn yi beꞌch tetz. Nin oc tkꞌol jun tway xe cꞌuꞌl. 5 Ej nin ben iꞌ-tz tan nojseꞌn jun plancan tan aꞌ. Yi wiꞌt nojeꞌn yi plancan nintzun octz tan xtxꞌajleꞌn quikan yi eꞌ ẍchusbeꞌtz nin tan skejseꞌn tan yi tway yi cyꞌaꞌn taꞌn.
6 Ma yi toqueꞌn tan xtxꞌajleꞌn yi tkan Luꞌ, nintzun ben tlol Luꞌ-tz tetz:
—Taꞌ, ¿mbi tzuntz yi na tajuꞌ yil tzꞌocuꞌ tan xtxꞌajleꞌn wukan?
7 —Qui na pujx awaꞌn jaluꞌ Luꞌ, poro tzantzaj tzꞌelepon atxum tetz yi mbi na chintzan tan banleꞌn, —stzun Jesús tetz.
8 —Quil wakꞌ amaꞌl teruꞌ tan xtxꞌajleꞌn wukan, —stzun Luꞌ.
—Ko quil tzintxꞌaj te awukan, nkꞌeꞌtz bin jun oꞌaꞌs tzawuchꞌ, —stzun Jesús.
9 —Taꞌ, ko yaꞌtz, nkꞌeꞌtz bin ntin wukan xtxꞌajeꞌuꞌ, ma na nchaꞌtz bin inkꞌab tu inwiꞌ, —stzun Luꞌ tetz Jesús.
10 —Nkꞌeꞌtz tajweꞌn Luꞌ, na alchok scyetz yi ja wiꞌt txꞌajon, qui tajweꞌn tan xtxꞌajoneꞌn junt tir, na quiꞌc tzꞌil teꞌj. Ntin na taj xtxꞌajleꞌn yi tkan. Niꞌcuꞌn yi axwok itetz, ja wiꞌt cuylij cyakil ipaj. Poro lastum nkꞌeꞌtz icyakil cuꞌn.
11 Yi jun yolaꞌtz, yi “nkꞌeꞌtz icyakil cuꞌn”, xcon tan Jesús tan yolcheꞌn Judas, na elnakt xtxum tetz yi naꞌ scyetz yi junaꞌtz yi tzꞌocopon tan jatxleꞌn iꞌ ẍchikꞌab yi eꞌ malnak.
12 Yi wiꞌt bajeꞌn xtxꞌajol Jesús quikan yi eꞌ ẍchusbeꞌtz toqueꞌnt tzun tkꞌol yi beꞌch tetz yi el tcyꞌal. Kalenaꞌs tzun cꞌoleweꞌn cuꞌn junt tir wi mes, itzun taltz:
—¿Ja peꞌ el itxum tetz yi mbi tzuntz yi nnoꞌc tan xtxꞌajleꞌn itkan? 13 Je puntileꞌj: Na italwok Taꞌ, nin na italwok Wajcaw swetz. Baꞌn atit, na in ajcaw tziteꞌj. Poro ja wocsaj wib juy. Chaꞌstzun te nnoꞌc tan xtxꞌajleꞌn te itkan, wech na at mas wetz inkꞌej tziwutz itetz, na in ajcaw tziteꞌj. 14 I bin jaluꞌ, yi ko yaꞌtz mimban wetz, nchaꞌtz bin axwok itetz, tajweꞌn tan itxꞌajol te itkan tzitibil itib. 15 Na ja inchaj yi xtxolbileꞌj tzitetz tan ichusleꞌn. Na na waj yil cxomwok te wajtzaꞌkl. 16 Nin jun cuꞌn yol na wal nin tzitetz, quiꞌc mas ikꞌej tzinwutz wetz, na quiꞌc nin jun mos yi atk mas kꞌej swutz yi patrón. Baꞌn tzun tzitocsaj itib juy, chi mimban wetz, na quiꞌc nin jun chakum yi atk mas kꞌej swutz yi na chakon nin. 17 Kol tzꞌel itxum te xtxolbilaꞌseꞌj, nin kol cxoꞌcwok tan banleꞌn taneꞌn, cxtzatzinkwok.
Yi talol Jesús yi at tocbil Judas tan contriꞌn teꞌj
(Mt 26.20-25; Mr 14.17-21; Lc 22.21-23)
18 “Poro quil cxtzatzinwok icyakil cuꞌn na elnak intxum tetz yi ẍeꞌn taneꞌn itajtzaꞌkl, yi axwok itetz yi jeꞌnak quix intxaꞌol. At jun tzixoꞌlwok yi tzꞌocopon tan contriꞌn sweꞌj, na tajweꞌn cuꞌn tan teleꞌn cuꞌn te yi xtxolbil yi tzꞌibaꞌnt cyen yi na tal: ‘Yi jun yi niꞌcuꞌn na kawan tuchꞌ, iteꞌn iꞌ jepon xtxꞌixpul tajtzaꞌkl tan contriꞌn sweꞌj.’ 19 Yil bajij yi eꞌchk takleꞌnaꞌseꞌj, qui na waj yil tzicabej icꞌuꞌl sweꞌj, ma na na waj yil tzꞌel itxum tetz yi mbi ekaꞌn waꞌn. Chaꞌstzun te na chintzan tan xtxꞌolcheꞌn xoꞌl jaluꞌ, jalen peꞌk yi ntaxk bajij yi il. 20 Jun cuꞌn yol na wal nin tzitetz, cyakil yi eꞌ yil cyocsaj chiyol yi eꞌ yi chakijcheꞌt waꞌn, chi itaneꞌn itetz, na tzun cyocsaj yi inyoltz. Ej nin kol cyocsaj inyol, na tzun cyocsaj yi yol yi Intaj yi nchinchakon tzaj.
21 Ma yi wiꞌt talol Jesús yi jun xtxolbilaꞌtz, nin oc lacꞌpuj jun chin bis tetz talmaꞌ, nin ben tlol yi mero claril scyetz:
—Jun cuꞌn yol na wal nin tzitetz, at jun skaxoꞌl yi tzꞌocopon tan injatxleꞌn ẍchikꞌab incontr.
22 Bajeꞌn cuꞌn tzun chixmayil quib yi eꞌ ẍchusbeꞌtz squibil quib, na qui pujx cyaꞌn naꞌ scyetz iꞌ yi junaꞌtz yi na tzan Jesús tan yolcheꞌn. 23 At tzun jun scyeri yi eꞌ ẍchusbeꞌtz Jesús yi mas na pekꞌ iꞌ teꞌj. Nin nakaꞌj cꞌolchij xlaj Jesús tan waꞌaꞌn. 24 Toqueꞌn tzun Simón Luꞌ tan ẍchajleꞌn jun techl tetz yi jun ẍchusbeꞌtzaꞌtz tan beneꞌn jakol tetz Jesús yi naꞌ scyetz iꞌ yi junaꞌtz yi tzꞌocopon tan contriꞌn teꞌj. 25 Toqueꞌn tzun iꞌ-tz tan jakleꞌn tetz Jesús:
—Taꞌ, ¿naꞌ scyetz iꞌ yi junaꞌtz? —stzun.
26 —Cupon inmuꞌul jun piẍ pam, nin kale lwakꞌ nint, itzun iꞌaꞌtz, —stzun Jesús tetz.
Inin tzun tulejaꞌtz, nin cuꞌ muꞌul, nin ben tkꞌol tetz Judas Iscariot, yi cyꞌajl Simón. 27 Ej nin yi jeꞌn stzꞌamol Judas yi jun piẍ pamaꞌtz, yaꞌstzun toqueꞌn julpuj tajtzaꞌkl Baybaꞌn le wiꞌ iꞌ. Nintzun ben tlol Jesús tetz:
—Quiloꞌk bin lajkeꞌl tan banleꞌn yi awajtzaꞌkl yi ja cuꞌ atxumul, —stzun Jesús tetz.
28 Poro chixoꞌl cyakil yi eꞌ yi cꞌolẍcheꞌ wi mes, cyaꞌl nin jun el xtxum tetz yi mbi ekaꞌn tan yol Jesús. 29 Le wutz yi cyetz cyajtzaꞌkl, choꞌn loꞌ mben chakij Judas tan lokꞌcheꞌn mbi cuꞌn tajweꞌn tetz kꞌej, nka tan toyeꞌn muꞌẍ tal oy scyetz yi eꞌ mebaꞌ, na iꞌ colol tetz yi pwok yi na molxij.
30 Ma yi wiꞌt bajeꞌn yi jun piẍ pam tan Judas, eleꞌn nin bantz tbeꞌ. Nsken oc tzꞌoꞌtz yi teleꞌn iꞌ.
Yi acꞌaj caꞌwl
31 Ma yi nsken el Judas, toqueꞌn tzun Jesús tan yol scyetz yi eꞌ mas ẍchusbeꞌtz:
—Yi in wetz, yi in Bajx Cyꞌajol txant tan lajluchaxeꞌn yi at inkꞌej. Ej nin nchaꞌtz slajluchaxk yi kꞌej Ryos waꞌn. 32 Nin yil jal kꞌej Ryos waꞌn, nchaꞌtz in, sjalok wetz inkꞌej tan Ryos. Ej nin txant tan bnixeꞌn yi xtxolbileꞌj. 33 Axwok jun cꞌoloj witzꞌun, quiꞌct ampon yi jun tkuj yi atin tzixoꞌlwok. Ẍchinjoyonk tzitetz, poro chi walnak scyetz eꞌ judiy,b iteꞌn nin iꞌaꞌs swaleꞌ nin tzitetz: Quiꞌc rmeril tan itponeꞌn chan kalel noponeꞌt wetz. 34 Poro swaleꞌ cyen jun acꞌaj caꞌwl tzitetz, iꞌtz tan ilokꞌil itib tzitibil itib. Tajweꞌn tan ilokꞌil itib tzitibil itib, chi na chintzan wetz tan ilokꞌeꞌn. 35 Ej nin kol tzilokꞌ itib tzitibil itib, tzꞌelepon tzun chitxum cyakil wunak tetz yi xomquixwok sweꞌj, yi axwok inchusbeꞌtz, —stzun Jesús scyetz.
Yi talol Jesús yi at tocbil Luꞌ tan teweꞌn yi iꞌ ẍchusbeꞌtz
(Mt 26.31-35; Mr 14.27-31; Lc 22.31-34)
36 Beneꞌn tzun jakol Simón Luꞌ yi xtxolbileꞌj tetz Jesús:
—Taꞌ, ¿naꞌ tzun beneꞌtuꞌ?
—Quiꞌc rmeril tan axomeꞌn nin sweꞌj jalcuꞌn chan, poro tzantzaj cẍopon sweꞌj, —stzun Jesús bantz tetz Luꞌ.
37 —Taꞌ, ¿mbi tzuntz yi quiꞌc rmeril tan inxomeꞌn nin chan teꞌjuꞌ? na wukꞌoꞌnt wib tkꞌab quimichil tan colcheꞌnuꞌ, —stzun Luꞌ bantz tetz.
38 —¿Yaꞌtz peꞌ na atxum, yi awukꞌoꞌnt awib tkꞌab quimichil tan incolcheꞌn? Jun cuꞌn yol na wal nin tzatz Luꞌ, yil tzꞌokꞌ yi aj tzoꞌ, nsken cuꞌ ajalul ox tir wi awakꞌ tan teweꞌn yi xomquiẍ sweꞌj, —stzun Jesús bantz.