Yi cweꞌn muleꞌn yi Espíritu Sant
2
1 Itzun yi tucumuleꞌn yi jun kꞌej yi na biꞌaj Pentecostés, tircuꞌn tzun yi eꞌ kajwutzaꞌtz chichamoꞌn quib tul jun ntziꞌ amaꞌl. Nin junit ban yi cyajtzaꞌkl. 2 Ej nin te yi cꞌolẍcheꞌ xe jun caꞌlaꞌtz, nin ben quibital jun jincaneꞌn tcyaꞌj. I cunin yi na jincan jun chin wutzileꞌn cyekꞌekꞌ. Nin choꞌn tocomponeꞌn xe caꞌl kale ateꞌt. 3 Jeꞌn tzun jobtuj jun takleꞌn ẍchixoꞌl. I cunin kꞌakꞌ taneꞌn. Nin cuꞌ xitul tib tan toqueꞌn lacꞌp ẍchiwiꞌ yi eꞌ yi ateꞌ-tz. 4 Yaꞌstzun yi toqueꞌn lacꞌp yi Espíritu Sant te cyalmaꞌ chicyakil cuꞌn. Nin tan porer yi Espíritu Sant eꞌ xcyeꞌ tan yolcheꞌn jujun jilwutz yol. Ej nin quib yi yol yi takꞌ yi Espíritu Sant scyetz, inin yolaꞌtz nchiyoltz.5 Itzun te yi jun kꞌejaꞌtz, ateꞌ tzun wiꞌnin judiy yi ateꞌ-tz Jerusalén yi naꞌ cuntuꞌ eꞌ baj sajeꞌt beneꞌn tziꞌn wi munt. Nin yi eꞌaꞌs na cyek len ẍchiꞌ Ryos.
6 Ej itzun yi quibital yi eꞌ wunakaꞌtz yi jun jincaneꞌnaꞌtz, nintzun eꞌ saj nil kale ateꞌt yi eꞌ apostl. Quinin el chitxum tetz yi mbi cunin na bajij, na chijunalen cuꞌn ben quibital yi na chitzan yi eꞌ apostl tan yol le cyetz chiyol. 7 Baj cyeleꞌn tzun yabtz teꞌj. Itzun cyaltz squibil quib:
—Yi eꞌaꞌtz yi na chijiloneꞌj eꞌ cuꞌn aj Galilea. 8 Poro ¿ẍeꞌn tzuntz yi baꞌn na aꞌw yi ketz kayol cyaꞌn, na apart len yi kayol? 9 Na ateꞌ aj Partia skaxoꞌl, nin ateꞌ aj Media; nin ateꞌ aj Elam, nin ateꞌ aj Mesopotamia. Nin at eꞌ yi choꞌn nchibaj saj Judea tu Capadocia tu Ponto. Nin at eꞌ yi choꞌn nchisaj Asia. 10 Nin at eꞌ yi choꞌn nchisaj Frigia nin Panfilia, nin Egipto. Nin at eꞌ yi choꞌn nchisaj tulak eꞌchk amaꞌl cwent Libia yi at swutz cyen yi amaꞌl Cirene. Nin at judiy yi choꞌn nchisaj Roma. Ej nin at wiꞌnin aj Roma yi najlcheꞌ tzoneꞌj yi eꞌ judiy nka yi ja cyocsaj quib tetz judiy. 11 Nchaꞌtz at eꞌ yi choꞌn nchisaj Creta nin Arabia. Poro clar cunin na kubit scyeꞌj le ketz kayol cyakil yi eꞌchk milawr yi bnixnak tan Ryos, —cheꞌch tzun.
12 Wiꞌnin tzun cyeleꞌn yab te cyakil yi xtxolbil yi bajij, nintzun baj chijakol squibil quib.
—¿Mbi na elepont yi xtxolbil yi na chitzan tan xtxoleꞌn?
13 Poro at eꞌ yi ntin tzeꞌeꞌn na chiban nintz.
—Eꞌ loꞌ kbarel, —cheꞌch.
Yi toqueꞌn Luꞌ tan xtxoleꞌn yi yol Kataj le jun kꞌej Pentecostés
14 Jeꞌn tzun txiclok Luꞌ-tz ẍchixoꞌl yi junlaj apostlaꞌtz, nin chin wiꞌ nin iꞌ bantz tan yol scyetz yi eꞌ wunak yi ateꞌ-tz:
“Eꞌuꞌ jun cꞌoloj aj Judea, scyuchꞌ yi eꞌuꞌ yi eꞌuꞌ aj tnum Jerusalén, na waj yil quibituꞌ nin yil tzꞌel chitxumuꞌ tetz yi xtxolbil yi swaleꞌ scyeruꞌ. 15 Nkꞌeꞌtz oꞌ kbarel chi na cyal cobox ẍchixoꞌluꞌ, na anaꞌ beluj chꞌichꞌ, jalchan. 16 Yi xtxolbileꞌj yi na chitzanuꞌ tan xmayeꞌn, iꞌtz yi tzꞌibaꞌnt cyen tan Joel yi elsanl stziꞌ Ryos tentz. 17 Na je yol Katajeꞌj:
‘Yi txant tan tucumuleꞌn yi wiꞌtzbil kꞌejlal,
swakꞌeꞌ inEspíritu scyetz cyakil wunak.
Nin chocopon chinitxajil tan xtxꞌolcheꞌn xoꞌl tan porer yi Espíritu Sant.
Nin ẍchijilonk eꞌ xicy yi tzꞌocopon ẍchajol tib eꞌchk techl ẍchiwutz.
Nchaꞌtz ẍchijalok eꞌ tijlcꞌuꞌlal yi ẍchiwutzicyꞌajeꞌ eꞌchk balaj wutzicyꞌ.
18 Swakꞌeꞌ inEspíritu scyetz yi eꞌ inchakum yaj,
nin scyetz yi eꞌ inchakum xnaꞌn,
nin chocopon tan xtxꞌolcheꞌn xoꞌl yi inyol.
19 Sbnixk eꞌchk milawr waꞌn tcyaꞌj,
nin tzinchajeꞌ eꞌchk techl tzoneꞌj wuxtxꞌotxꞌ.
At wiꞌnin eꞌ ẍchiquimok.
Wiꞌnin kꞌakꞌ sbneꞌ tu sib.
20 Xcyek tan jopleꞌn yi wutz kꞌej.
Nin tzꞌoꞌtz nin tuꞌ sbneꞌ beneꞌn tziꞌn.
Chin cyak nin sbneꞌ wutz yi xaw, chi taneꞌn chichꞌ.
Na yaꞌstzun sbajoktz te yi ntaxk ul yi jun chin wutzileꞌn kꞌej yil tzꞌul tzaj Kajcaw.
21 Poro cyakil yi eꞌ yi na cuꞌ chitziꞌ tan naꞌwseꞌn yi biꞌ Kajcaw, ẍchiclaxok cyeraꞌtz,’ stzun Ryos banak cyen.
22 “Ma jaluꞌ eꞌuꞌ jun cꞌoloj xonl kꞌajtzun Israel, quibit tzajuꞌ yi xtxolbileꞌj yi swaleꞌ scyeruꞌ: Na el chitxumuꞌ tetz yi akꞌijt yi kꞌej Jesús yi aj Nazaret tan Kataj Ryos. Nin na el chitxumuꞌ tetz tan yi eꞌchk milawr yi banak iꞌ ẍchixoꞌluꞌ tan yi porer Ryos. 23 Poro yi eꞌ cyeruꞌ ja ben chijatxoluꞌ ẍchikꞌab yi eꞌ mal nak, tan jeꞌn cyaꞌn wutz pasyon, nin tan cweꞌn chibiyol. Tan yi xtxolbilaꞌseꞌj ja el cuꞌn teꞌj yi txumijt cyen tan Ryos tentz, na yaꞌstzun xtxumbeꞌn tetz tan beneꞌn ẍchikꞌab yi eꞌ mal nak bantz cweꞌn biyij. 24 Poro nin jetzaj junt tir taꞌn ẍchixoꞌl almaꞌ. Na quinin xcyeꞌ yi quimichil teꞌj. 25 Nchaꞌtz tzꞌibaꞌnt cyen tan Luwiy yi yaꞌstzun sbajoktz te Jesús. Na je yol iꞌeꞌj:
‘Ilenin na wil wutz Kajcaw,
na choꞌn at iꞌ le insbal tan qui incabel incꞌuꞌl teꞌj.
26 Chaꞌstzun te na tzatzin yi walmaꞌ.
Nin na wakꞌ inkꞌajsbil tetz.
Ej nin wiꞌnin na chintzatzin teꞌj.
Na tzꞌitzꞌok junt tir inwankil,
na choꞌn kꞌuklij incꞌuꞌl teꞌj yi yaꞌstzun tulej iꞌ.
27 Wiꞌnin na chintzatzin,
na quil cyaj cyen walmaꞌ xetzeꞌ,
nin quil kꞌay inwankil,
na wiꞌnin na pekꞌ iꞌ sweꞌj,
na in yi ẍchakum yi wiꞌnin okꞌleꞌn inwutz taꞌn.
28 Nternin tzatzink walmaꞌ, na ẍchinnajank teꞌjuꞌ.’
Ej nin yaꞌstzun cyajnak yolol Luwiy te Jesús.
29 “Ma jaluꞌ eꞌuꞌ intanum, chin tajweꞌn cunin yil wal yi mero claril scyeruꞌ. Yi xtxolbilaꞌtz yi tzꞌibaꞌnt cyen qui na jop kꞌajtzun Luwiy, na yi iꞌ tetz ten quim, nin mukxnak, nin atit nin yi nichil kale mukxnakit iꞌ. 30 Poro yi Luwiy iꞌ jun scyeri eꞌ elsanl stziꞌ Ryos, nin elnak xtxum iꞌ tetz yi at tocbil jun xonl iꞌ tan cawuꞌn, na yaꞌstzun alijt cyen tan Ryos tetz. Nin yi junaꞌtz iꞌtz yi Cristo. 31 Ej nin yi talol Luwiy yi yoleꞌj niꞌcuꞌntz chi ilijtk taꞌn yi stzꞌitzꞌok junt tir yi Cristo. Chaꞌstzun te cyajeꞌn cyen tlol iꞌ yi quil cyaj cyen talmaꞌ Cristo xetzeꞌ, nin yi quil kꞌay yi wankil. 32 Nin jun cuꞌn ja itzꞌij junt tir Jesús takꞌun Ryos ẍchixoꞌl almaꞌ. Ej nin oꞌ stiw teꞌj. 33 Poro jaluꞌ choꞌn at iꞌ le sbal Ryos nin at tetz kꞌej, nin ja wiꞌt akꞌlij yi Espíritu Sant tetz yi sukiꞌnt tan Kataj tetz. Ej nin yi xtxolbil yi na chitzanuꞌ tan tilweꞌn nin tan tbiteꞌn skeꞌj, iꞌtz yi porer yi Espíritu Santaꞌtz yi mmakꞌon sketz. 34 Inti kꞌajtzun Luwiy, quinin aj tcyaꞌj, poro ja cyaj tlol iꞌ yi yaꞌstzun sbajok te Jesús:
‘Ja tal yi wutzileꞌn Kataj Ryos tetz Wajcaw:
Cꞌolchen cuꞌn tzinxlaj,
35 jalen cuꞌn yil choꞌc yi eꞌ acontr waꞌn tzakꞌ awukan.’a
36 “Ma jaluꞌ, cyakil yi eꞌuꞌ intanum aj Israel, ok yi yoleꞌj le chiwiꞌuꞌ yi na wal nin scyeruꞌ. Yi Jesús yi quim cyanuꞌ wutz pasyon, yaꞌstzun yi jun yi ja oc tan Ryos tetz ajcaw, nin tetz Cristo,” chij Luꞌ bantz scyetz wunak.
37 Itzun yi quibital yi eꞌ wunak yi yolaꞌseꞌj, nintzun oc lacꞌpuj jun chin bis scyetz.
Beneꞌn tzun chijakoltz tetz Luꞌ, nin scyetz yi eꞌ mas apostl:
—Ma jaluꞌ, eꞌuꞌ katanum, ¿mbi tzun tajweꞌn tan kabnol ketz? —cheꞌch.
38 —Chitxꞌixpeꞌnuꞌ cyajtzaꞌkluꞌ, nin baꞌn jeꞌ aꞌ ẍchiwiꞌuꞌ tan biꞌ Jesucristo, bantz stzajeꞌn quiluꞌ, stkꞌeꞌ tzun Ryos yi Espíritu Sant scyeruꞌ. 39 Na cyakil yi sukiꞌnt tan Kataj iꞌtz tetz cyeruꞌ nin scyetz yi eꞌ chinitxajiluꞌ. Nin nchaꞌtz iꞌtz cyetz yi eꞌ yi ateꞌ joylaj, nin cyetz yi eꞌ yi na taj Kataj Ryos cheꞌ ẍchak tzaj, —chij Luꞌ bantz scyetz.
40 Nin nkꞌeꞌtz ntinaꞌtz baj tlol scyetz, ma na nchaꞌtz tal mas xtxolbil scyetz. Je yol iꞌeꞌj:
—Chijoyeꞌuꞌ puntil tan teleꞌn tzaj chijatxol quibuꞌ scyeꞌj yi eꞌ mal wunakeꞌj, tan qui tuleꞌn chicawsuꞌ.
41 Wiꞌnin tzun eꞌ cyocsaj yi xtxolbil yi baj xtxolil Luꞌ, nin baj jeꞌ aꞌ ẍchiwiꞌ. Te yi jun kꞌejaꞌtz at loꞌ ox mil wunak yi eꞌ octz tajlal yi eꞌ yi kꞌuklij chicꞌuꞌl te Cristo. 42 Quiwixeꞌn nintzun eꞌ bantz tan yi chusuꞌn yi cyakꞌ yi eꞌ apostl scyetz. Nin nternin na cheꞌl na choꞌc yi na chicham cuꞌn quib tan nachleꞌn Kataj, nin yi na chimol cuꞌn quib tan waꞌn.b
Yi cyajtzaꞌkl yi eꞌ acꞌaj creyent
43 Wiꞌnin tzun cyeleꞌn yabtz te eꞌchk milawr yi baj chibnol yi eꞌ apostl. 44 Junit tzun cyajtzaꞌkl ban chicyakil yi eꞌ yi kꞌuklij chicꞌuꞌl, nin junit ban chimebiꞌl. 45 Na at eꞌ yi ja ben chicyꞌayil chimebiꞌl, nin ja cyakꞌ yi jamel scyetz yi eꞌ yi at tajweꞌn scyetz. 46 Ej nin cyakil nin kꞌej ateꞌ-tz wutz kꞌanil yi caꞌl Ryos. Ej nin junit taneꞌn cyajtzaꞌkl. Nin tzatzin cuꞌn na chimol cuꞌn quib tan waꞌn xeꞌak chicaꞌl. 47 Nchaꞌtz na cyakꞌ chikꞌajsbil tetz Ryos. Nin chumbalaj nin eꞌ bantz ẍchiwutz cyakil wunak. Ej nin cyakil nin kꞌej at eꞌ yi nchoꞌc tajlal cmon. Na Ryos nchichakon tzaj yi eꞌ yi tzan chiclaxeꞌn.