Yi tuleꞌn yos tu jun coꞌx tkan
3
1 Itzun bantz yi toponeꞌn yi oril tan nachleꞌn Kataj, ox chꞌichꞌ cweꞌn kꞌej, nintzun eꞌ ben Luꞌ tu Waꞌn tan nachleꞌn Kataj le templo. 2 Nchaꞌtz nin opon ticyꞌleꞌn jun yaj yi coꞌx tkan. Tetz nin iꞌ-tz yi titzꞌeꞌn. Na cyakil nin kꞌej choꞌn na cyaj cyen iꞌ swutz yi sawanil yi templo yi na biꞌaj Chin Yubeꞌn Nin. Choꞌn na cyaj cyen iꞌ-tz tan jakleꞌn rmosum scyetz yi eꞌ wunak yi na choꞌc le templo.3 Itzun yi beneꞌn tilol iꞌ chiwutz Luꞌ tu Waꞌn yi cyuleꞌn tzi templo, beneꞌn tzun cꞌuchul jun rmosum scyetz. 4 Beneꞌn tzun chixmayil Luꞌ tu Waꞌn, itzun ben tlol Luꞌ tetz:
—Xmayin tzaj sketz.
5 Xmayineꞌn nin tzuntz scyetz, na chij loꞌ tetz iꞌ yi ko rmosum tzꞌakꞌlok tetz. 6 Poro beneꞌn tzun tlol Luꞌ tetz:
—Quiꞌc or cyꞌaꞌn waꞌn, nin quiꞌc sakal. Ntin yi at swuchꞌ swakꞌeꞌ tzatz: Tan biꞌ Jesucristo yi aj Nazaret, txiclijeꞌn, nin xon.
7 Beneꞌn tzun Luꞌ tan stzꞌamleꞌn yi kꞌab nin jeꞌ xtxicbal. Jalcunin quiwixeꞌn yi tkan. 8 Cyꞌaꞌnt nin tzꞌitpuꞌn taꞌn yi jeꞌn txiclok, nintzun xom quen iꞌ scyeꞌj Luꞌ tu Waꞌn le templo. Baꞌnt na xon iꞌ. Nin baꞌnt tzꞌitpun. Nin octz tan takꞌleꞌn kꞌajsbil tetz Ryos. 9 Nin cyakil wunak iꞌlon tetz yi baꞌnt xon iꞌ, nin na tzan iꞌ tan takꞌleꞌn yi kꞌajsbil tetz Ryos. 10 Wiꞌnin tzun cyeleꞌn yabtz teꞌj, na nin quil yi yaꞌstzun yi aj rmosuminl yi na cꞌoleꞌ cuꞌn tzi puertil yi templo, yi na biꞌaj Chin Yubeꞌn Nin.
Yi toqueꞌn Luꞌ tan xtxoleꞌn yi yol Ryos le galer yi cyꞌanl te yi templo.
11 Wiꞌnin tzun cyeleꞌn yabtz scyeꞌj Luꞌ tu Waꞌn, na xom quen tunin yi jun coꞌxaꞌtz scyeꞌj yi na chixon le templo. Cyakil cunin tzun wunak eꞌ baj ben niltz scyeꞌj le galer yi na biꞌaj Tetz Salomón.
12 Ma yi tilol Luꞌ yi cyakil wunak na chitzan tan chixmayeꞌn, nintzun taltz scyetz:
“Eꞌuꞌ intanum aj Israel, ¿mbi tzuntz na cheꞌl yabuꞌ te yi yajeꞌj? ¿Mbi tzun na chixmayin tzajuꞌ sketz? Na nkꞌeꞌtz ik tan ketz kaporer, nin nkꞌeꞌtz ik tan tuꞌ yi chin tzꞌaknakoꞌ cuꞌn swutz Ryos yi baꞌnt xon yi yajeꞌj. 13 Poro yi puntil iꞌtz: Yi chiRyosil Abraham tu Isaac nin Jacow scyuchꞌ yi eꞌ ketz kamam, iꞌ mmuꞌlsan yos tu yi yajeꞌj. Ej nin yi jun Ryosaꞌtz i teꞌnin iꞌaꞌtz na kocsaj ketz. Nin yaꞌstzun yi Ryos yi akꞌon kꞌej Jesús yi tetz Cyꞌajl. Ej nin yi Jesúsaꞌtz yaꞌstzun yi jun yi mben chijatxoluꞌ tkꞌab Pilat, nin yi quinin nchicujijuꞌ tan teleꞌn liwr. 14 Wech na chin sant nin iꞌ. Quiꞌc muꞌẍ til. Poro yi eꞌ cyeruꞌ ja chicꞌuchuꞌ tan teleꞌn liwr jun biyolnak. 15 Ej nin cuꞌ chibiyoluꞌ Jesús yi akꞌol teri itzꞌajbil. Poro Ryos jeꞌsan tzaj junt tir iꞌ ẍchixoꞌl almaꞌ. Nin yi oꞌ ketz oꞌ stiw teꞌj. 16 Ma jaluꞌ tan porer yi jun Jesúsaꞌtz muꞌleꞌt yos tu yi yajeꞌj yi na quil tzajuꞌ yi baꞌnt xon. Na Jesús makꞌon yi walor iꞌ tan kꞌukeweꞌn cꞌuꞌl. Nin tan tuꞌ yi nkꞌukeꞌ cꞌuꞌl te Jesús ja ul yos tuchꞌ, nin sak ẍchiwutzuꞌ yi yaꞌtz mban.
17 “Poro ja quim Jesús cyanuꞌ tan paj yi xupsnak cyajtzaꞌkluꞌ. Nin nchaꞌtz taneꞌn yi chibajxomuꞌ quinin pujx cyaꞌn yi mbi i ilaꞌtz na chiban. 18 Poro tan tuꞌ yi quimichil yi ban iꞌ ja el kꞌab Ryos te yi alijt cyen taꞌn scyetz yi eꞌ elsanl stziꞌ iꞌ tentz. Na alijt cyen cyaꞌn yi tajweꞌn tan tijol yi Cristo qꞌuixcꞌuj. 19 Chaꞌstzun te chitxꞌixpeꞌnuꞌ cyajtzaꞌkluꞌ, nin quil cyenuꞌ yi eꞌchk ajtzaꞌkl cachiꞌ, bantz stzajeꞌn yi quiluꞌ. 20 Nin ko yaꞌtz chibanuꞌ tzꞌul tzun yi jun balaj tiempaꞌtz. Na tzꞌul ẍchakol Ryos yi Cristo, yi Jesús scyeꞌjuꞌ, yi jun yi bixbaꞌnt tan tuleꞌn. 21 Poro jaluꞌ chin tajweꞌn cunin tan taꞌteꞌn iꞌ tcyaꞌj, jalen cuꞌn yil nucꞌxij cyakil yi at beneꞌn tziꞌn. Na yaꞌstzun yi alijt cyen tan Ryos scyetz yi eꞌ elsanl stziꞌ iꞌ sajleꞌn tunintz. 22 Na je yol Moisés yi talnak scyetz yi eꞌ aj Israel: ‘Jepon xtxaꞌol Kajcaw yi kaRyosil junt elsanl stziꞌ iꞌ ẍchixoꞌluꞌ, chi wutaneꞌn wetz. Nin tajweꞌn yil quibituꞌ yi mbi cuꞌn staleꞌ iꞌ. 23 Na cyakil yi eꞌ yi quil quibit yi mbi staleꞌ yi jun elsanl stziꞌ Ryosaꞌtz, sotzel chiwutz sbneꞌ,’ chij Moisés banak cyen.
24 “Na cyakil yi eꞌ elsanl stziꞌ Ryos tentz ja chitxol yi at tulbil yi tiemp yi atoꞌ tul jaluꞌ. Nchaꞌtz Samuel iteꞌn nin xtxolbilaꞌtz tal iꞌ. Ej nin cyakil yi eꞌ elsanl stziꞌ Ryos yi eꞌ jal yi nsken quim Samuel, nchaꞌtz eꞌ cyetz cyal yi sbajok yi eꞌchk takleꞌneꞌj yi na bajij tul yi tiemp yi atoꞌ tul jaluꞌ. 25 Na alijt cyen cyakꞌun yi nkꞌeꞌtz ntin tetz cyetz ma na nchaꞌtz tetz cyeruꞌ. Nin iꞌtz tan takꞌoneꞌn baꞌn sketz kacyakil cuꞌn. Na je talnak Ryos tetz Abraham: ‘Tan aẍ, lwakꞌ wit imbanl squibaj cyakil jilwutz wunak beneꞌn tziꞌn wi munt.’a 26 Ja tzun wiꞌt saj ẍchakol Ryos yi tetz ẍchakumaꞌtz, nin bajx mmuꞌl ẍchakol skaxoꞌl ketz tan cyajeꞌn cyen kilol yi eꞌchk kajtzaꞌkl cachiꞌ bantz jaleꞌn kabanl,” chij Luꞌ bantz scyetz.