Luꞌ tu Waꞌn ẍchiwutz yi eꞌ wiꞌ banl wiꞌ tetz tnum
4
1 Itzun te yi na chitzaneꞌt Luꞌ tu Waꞌn tan yol scyetz yi eꞌ wunak cyoponeꞌn tzun nil yi eꞌ paleꞌ tu chijepil yi eꞌ wart cwent yi templo scyeꞌj. Nin nchaꞌtz yi eꞌ sadusey eꞌ opon nil scyeꞌj. 2 Na wiꞌnin ẍchiꞌcheꞌn chicꞌuꞌl scyeꞌj Luꞌ tu Waꞌn tan paj yi na chitzan tan chichusleꞌn wunak, nin tan xtxoleꞌn scyetz yi at itzꞌeꞌn junt tir tan tuꞌ yi itzꞌnak Jesús ẍchixoꞌl almaꞌ. 3 Chitxꞌamxeꞌn tzun Luꞌ tu Waꞌn nin eꞌ octz cyaꞌn xetzeꞌ. Eꞌ oc cyen tuꞌ lamij na nsken cuꞌ kꞌej. 4 Poro wiꞌnin eꞌ cyocsaj yi xtxolbil yi nsken tal Luꞌ. Eꞌchk oꞌ loꞌ mil yaj yi cyocsaj.5 Itzun le junt eklok, nintzun chicham quib cyakil yi eꞌ ajcaw, scyuchꞌ yi eꞌ wiꞌ banl wiꞌ, nin scyuchꞌ yi eꞌ txꞌolol xoꞌl yi ley Moisés le tnum Jerusalén. 6 Nchaꞌtz eꞌ opon Anás yi wiꞌtz paleꞌ, tu Caifás tu Waꞌn nin Alejandro, nin cyakil yi eꞌ mas chixonl yi eꞌ wiꞌtz paleꞌ. 7 Cweꞌn tzun chitxicbal Luꞌ tu Waꞌn chinicyꞌal, nin eꞌ octz tan jakleꞌn scyetz:
—¿Mbi jilwutz porer nxcon itaꞌn tan tulseꞌn yos tu yi jun yaj yi coꞌx? ¿nka mbiꞌ biꞌajil nxcon itaꞌn tan banleꞌn yi jun jilwutz milawraꞌtz? —cheꞌch scyetz.
8 Sajeꞌn tzun tlol Luꞌ scyetz tan porer yi Espíritu Sant:
—I bin jaluꞌ eꞌuꞌ ajcaw tetz yi katnumil, nin eꞌuꞌ wiꞌ banl kawiꞌ yi oꞌ xonl kꞌajtzun kamam Israel. 9 Ntyoẍ binaꞌtz yi nchoꞌcuꞌ tan jakleꞌn sketz yi ẍeꞌn mbnix yi jun baꞌn te yi jun tal prow yaj yi yabiꞌẍ, nin yi ẍeꞌn mmuꞌl yos tuchꞌ. 10 Na je bin mbaneꞌj: Baꞌn quibit tzajuꞌ eꞌuꞌ kabajxom, nin cyakil eꞌuꞌ katanum. Yi yaj yi txiclij tzoneꞌjeꞌj, quiꞌct yab, ja wiꞌt ul yos tuchꞌ. Poro tan biꞌ Jesucristo yi aj Nazaret, yi jun yi jeꞌnak chipajoluꞌ swutz pasyon, yi jun yi itzꞌij junt tir ẍchixoꞌl almaꞌ, iꞌ muꞌlsan yos tuchꞌ nin baꞌnt xon jaluꞌ. 11 Na yi Jesúsaꞌtz, yaꞌstzun yi jun yi cꞌub taneꞌn yi qui maꞌwij wutz cyanuꞌ yi eꞌuꞌ bnol caꞌl taneꞌn. Poro jun cuꞌn, ja xcon iꞌ chi na xcon yi bajx cꞌub yi na cuꞌ le xtxꞌuꞌc jun caꞌl. 12 Ej nin cyaꞌl nin junt yi nink xcyeꞌ tan kacolpeꞌn tkꞌab eꞌchk kil, na quiꞌc nin junt yi akꞌijt tan Ryos yi nink xcyeꞌ tan kacolpeꞌn, —chij Luꞌ bantz scyetz.
13 Itzun yi quilol yi quinin na chixob Luꞌ tu Waꞌn tan yol, nintzun eꞌ el yabtz scyeꞌj. Na nin el chitxum tetz yi eꞌ tu tal sloj wunak. Na nkꞌeꞌtz chusijcheꞌ, poro nin ul txꞌakx chicꞌuꞌl yi xomnakeꞌ te Jesús. 14 Quiꞌct nin tzun ben cyalol tetz Luꞌ tu Waꞌn na quiꞌc rmeril tan jaleꞌn quil, na txiclij yi yaj ẍchiwutz yi nsken ul yos tuchꞌ.
15 Chicawuneꞌn nin tzuntz scyetz Luꞌ tu Waꞌn tan cyeleꞌn tzaj jun tkuj ẍchixoꞌl yi cmon. Nintzun eꞌ baj jilon cuꞌntz squibil quib. 16 Itzun cyaltz:
—I bin jaluꞌ ¿mbil cheꞌ kulej? na bintzinin iꞌtz jun chin milawr yi mbnix cyaꞌn. Nin ja wiꞌt quil cyakil wunak yi ẍeꞌn mmuꞌl yos tu yi yajeꞌj. Quiꞌc rmeril yi nink kal yi quiꞌc mbajij, —cheꞌch tzun squibil quib. 17 —Cheꞌ kaxoꞌwseꞌ tuꞌ tan cyaꞌl chitxol wit yi jun biꞌajaꞌtz, nin tan qui beneꞌn loꞌon yi jun stziblalaꞌtz ẍchixoꞌl cyakil wunak, —cheꞌch bantz.
18 Cheꞌ chichakol tzun junt tir yi Luꞌ tu Waꞌn nin cyal scyetz, yi quiꞌc rmeril tan chiyolol, nin tan chitxolil yi mbi ekaꞌn tan Jesús. 19 Poro beneꞌn tzun chitzaꞌwel Luꞌ tu Waꞌn yi chiyol:
—Choꞌkuꞌ tan xtxumleꞌn yi ko baꞌn yil kaxom te cyeruꞌ chicaꞌwluꞌ nka i te yi caꞌwl Ryos. 20 Na quiꞌc rmeril yi quiꞌk katxol yi eꞌchk xtxolbil yi kilnak tan kawutz, nin quiꞌc rmeril yi quiꞌk katxol yi eꞌchk xtxolbil yi kubitnak, —cheꞌch tzun Luꞌ tu Waꞌn scyetz.
21 Itzun yi eꞌ wiꞌ banl wiꞌ yi wiꞌt bajeꞌn chixoꞌwsal Luꞌ tu Waꞌn, cyeleꞌn tzun chitzakpultz. Na cyaꞌl jaleꞌt quil tan chiloꞌoneꞌn. Nchaꞌtz quinin eꞌ oc tan chibiyleꞌn tan tuꞌ yi na chixob scyetz cyakil wunak. Na cyakil yi eꞌ wunak na chitzan len tan takꞌleꞌn chikꞌajsbil tetz Ryos tan yi milawr yi mbnix. 22 Na nsken el caꞌwnakix yob yi qui na xon yi jun yajaꞌtz yi mmuꞌl yos tuchꞌ.
Yi chicꞌuchul yi eꞌ creyent chichamil tan xtxoleꞌn yi yol Kataj
23 Itzun yi cyeleꞌn liwr, nintzun eꞌ opontz scyeꞌj eꞌ cyuchꞌ. Nin baj chitxolil cyakil yi mbi cuꞌn aꞌlchij scyetz cyakꞌun yi eꞌ wiꞌtz paleꞌ, scyuchꞌ yi eꞌ wiꞌ banl chiwiꞌ cyakil yi eꞌ judiy. 24 Ma yi quibital cyakil yi puntil, junit tzun ban yi cyajtzaꞌkl tan nachleꞌn Kataj, itzun cyaltz tul chiꞌoración: “Kajcaw, i iluꞌaꞌtz yi Ryos yi bnol tetz yi tcyaꞌj tu yi wuxtxꞌotxꞌ tu yi mar, tu cyakil yi beneꞌn tziꞌn. 25 Ej nin cyajnak cyen stzꞌibal Luwiy yi ẍchakumuꞌ yi xtxolbileꞌj yi talnakuꞌ tetz tan porer yi Espíritu Sant:
‘¿Mbi xac na chinil quib yi eꞌ wunak?
¿Mbi xac yi na chitzaneꞌt tan xtxumleꞌn eꞌchk takleꞌn yi quiꞌc na takꞌ?
26 Na ja jeꞌ chimolol quib cyakil yi eꞌ ajcaw yi ateꞌ beneꞌn tziꞌn wi munt
tan contriꞌn te Kajcaw yi kaRyosil,
nin te yi jun yi bixbaꞌnt taꞌn tan tuleꞌn tan kacolpeꞌn.’
27 “Ja bin el cuꞌn te yi xtxolbilaꞌs yi alijt cyen Taꞌ, na bintzinin ja cuꞌ chichamol quib Herodes tu Poncio Pilato tzoneꞌj scyuchꞌ yi eꞌ yi nkꞌeꞌtz eꞌ judiy, nin scyuchꞌ yi eꞌ katanum aj Israel tan contriꞌn te Cyꞌajluꞌ, yi Jesús yi wiꞌnin xanil, nin yi bixbaꞌnt tanuꞌ tan kacolpeꞌn. 28 Ej nin yi cyoqueꞌn yi eꞌ wunakaꞌtz tan contriꞌn te Cyꞌajluꞌ, ja el cuꞌn te yi txumijt cyen tanuꞌ, nin yi alijt cyen tanuꞌ.
29 “Ma jaluꞌ Taꞌ, na chitzan tan kaxoꞌwseꞌn, poro takꞌ tzajuꞌ kachamil tan xtxoleꞌn yi yoluꞌ na yi oꞌ ketz oꞌ ẍchakumuꞌ. 30 Nchaꞌtz takꞌ tzajuꞌ yi poreruꞌ tan kaxcyeweꞌn tan tulseꞌn yos scyuchꞌ yi eꞌ yabiꞌẍ, nin tan kabnol eꞌchk milawr tan biꞌ Jesús yi Cyꞌajluꞌ, yi jun yi wiꞌnin xanil,” cheꞌch bantz tul chiꞌoración.
31 Itzun yi stzajeꞌn wiꞌ chiꞌoración ninin yucan yi amaꞌl kale chichamoneꞌt quib tan porer Ryos. Nin baj oc len lacꞌp yi Espíritu Sant tetz cyalmaꞌ. Nin mas tcunin saj chichamil tan xtxoleꞌn yol Kataj.
Junit ban chimebiꞌl chicyakil cuꞌn
32 Cyakil yi eꞌ yi kꞌuklij chicꞌuꞌl te Ryos junit ban cyajtzaꞌkl nin junit ban chitxumuꞌn. Cyaꞌl nin jun aꞌlon yi tetz cun tuꞌk yi at tuchꞌ, ma na ja chichꞌey len quib squibil quib. 33 Jaleꞌn nin tzun ban chichamil yi eꞌ apostl tan xtxoleꞌn yi ẍeꞌn titzꞌeꞌn junt tir Jesucristo ẍchixoꞌl almaꞌ. Nin takꞌ Kataj banl squibaj. 34 Quiꞌct nin jun na sotz cꞌuꞌltz ẍchixoꞌl. Na yi eꞌ yi at wiꞌnin chitxꞌotxꞌ na chicꞌay nin jun piẍ, nin yi eꞌ yi at cobox chicaꞌl na chicꞌay nin jun, 35 nin na opon yi jamel cyaꞌn ẍchiwutz yi eꞌ apostl. Ma yi eꞌ apostl na baj chijatxol scyetz yi eꞌ yi quiꞌc chiwaꞌ. 36 At tzun jun yaj yi na biꞌaj Ẍep, poro nin oc cyakꞌol yi eꞌ apostl junt biꞌ-tz. Bernabé tzun cyulejtz. (Yi na elepont yi jun biꞌaj iꞌtz aj ichꞌeyanl.) Yi jun yajaꞌtz iꞌ jun xonl Leví, nin iꞌ jun aj Chipre. 37 Beneꞌn tzun cꞌayil iꞌ jalaj xtxꞌotxꞌ nin opon tcyꞌal yi jamel ẍchiwutz yi eꞌ apostl.