Ananías tu Safira
5
1 At tzun jun yaj yi na biꞌaj Ananías. Nin Safira biꞌ yi txkel. Nintzun ben chicꞌayil jalaj chitxꞌotxꞌ. 2 Poro jun tzun chiwutz bantz tu yi txkel tan cabseꞌn cyen noc yi jamel yi txꞌotxꞌ. Ma yi mas, yaꞌstzun yi ben tcyꞌal Ananías tan takꞌleꞌn scyetz yi eꞌ apostl, chi ntinaꞌtz nink jamel yi txꞌotxꞌaꞌtz. 3 Yi tponeꞌn Ananías swutz Luꞌ, nintzun tal Luꞌ-tz tetz:—Ananías, ¿mbi tzuntz mawakꞌ amaꞌl tetz Baybaꞌn, yi ncuꞌ atxumul yi wi awakꞌ tetz yi Espíritu Sant? Na ja cyaj cyen acabsal noc te yi mero jamel yi txꞌotxꞌ. 4 Bintzi, awetz yi txꞌotxꞌ yi ntaxk acꞌay, nin awetz kloꞌ yi jamel yi macꞌay. Poro ¿nxac mawakꞌ amaꞌl te jun ajtzaꞌklaꞌtz? Na nkꞌeꞌtz choꞌn ncuꞌ ajalul yi wi awakꞌ tetz jun wunak ma na choꞌn ncuꞌ ajalul wi awakꞌ tetz Ryos.
5 Yi tbital Ananías yi yoleꞌj, sajeꞌn tzun colpujtz, nintzun aj makij yi xewtz. Ma yi eꞌ mas wunak wiꞌnin chixobeꞌn yi quibital yi xtxolbilaꞌseꞌj.
6 Ej itzun te yi nsken wiꞌt quim Ananías nintzun eꞌ oc cobox xicytz tan toleꞌn cuꞌn wankil tul jun xbuꞌk nin eꞌ bentz tan mukleꞌn.
7 Eꞌchk oxix nin loꞌ or yi mukxleꞌnix Ananías yi tuleꞌn tzaj yi txkeltz. Quiꞌc nin muꞌẍ tal tetz tajal yi mbi cuꞌn bajij te chmil. 8 Toqueꞌn tzun Luꞌ tan jakleꞌn tetz:
—Safira, al tzaj swetz, ¿yaꞌtz nin peꞌ mbeneꞌt yi txꞌotxꞌ itaꞌn chi yi ntal yi awuchmil?
—Yaꞌtz nin bin taꞌ, —chij Safira.
9 —Bit nin yi eꞌ yi na chitencan tziꞌn. Yaꞌstzun yi eꞌ yi ja ẍchaꞌk tan mukleꞌn yi awuchmil. Nin nchaꞌtz aẍ, ẍquimok nin cẍben ticyꞌleꞌn cyaꞌn. Na ¿nxac moꞌc iyol teꞌj tan pileꞌn yi Espíritu tetz Kajcaw?
10 I nin tzun banaꞌstz, na te yi iteꞌn nin tkujaꞌtz sajeꞌn colpuj Safira swutz Luꞌ, nin aj makij yi xew. Nin nsken quim iꞌ yi cyocomponeꞌn yi eꞌ xicy. Nintzun el tzaj quicyꞌaltz. Nin eꞌ ben tan mukleꞌn xlaj yi chmil. 11 Toqueꞌn tzun lacꞌp jun chin xoꞌw scyetz cyakil yi cmon creyent, nin scyuchꞌ cyakil yi eꞌ yi baj quibital yi jun xtxolbilaꞌtz.
Yi bnixeꞌn wiꞌnin eꞌchk milawr
12 Ma yi eꞌ apostl wiꞌnin milawr mbnix cyaꞌn ẍchixoꞌl wunak. Ej nin choꞌn na chicham quib cyakil yi eꞌ creyent le galer yi na biꞌaj Tetz Salomón, yi at cwent yi templo. 13 Poro cyaꞌl nin jun scyetz yi eꞌ mas wunak yi nquiwix cꞌuꞌl tan tocomponeꞌn ẍchixoꞌl. Na wiꞌnin jaleꞌn chikꞌej yi eꞌ apostl ẍchiwutz cyakil wunak. 14 Wiꞌnin tzun ẍchꞌuyeꞌn tajlal yi cmon, na wiꞌnin eꞌ cyocsaj yi yol Kajcaw Jesús. Quin tech nin yaj nin quin tech nin xnaꞌn yi cyocsaj. 15 Nchaꞌtz wiꞌnin yabiꞌẍ baj el tzaj ticyꞌleꞌn tbeꞌ cyakꞌun yi eꞌ wunak. At eꞌ yi ateꞌ wiꞌak chisoc, na yi cyajbil iꞌtz tan ticyꞌeꞌn cuꞌn yi mujil Luꞌ squibaj, bantz tuleꞌn yos scyuchꞌ. 16 Nchaꞌtz at wunak yi choꞌn nchisaj lakak eꞌchk tnum yi at nakaꞌjil Jerusalén. Cyꞌaꞌn yabiꞌẍ cyaꞌn, scyuchꞌ yi eꞌ yi at espíritu cwent Baybaꞌn chiwankil. Nintzun ul len yos scyuchꞌ chicyakil cuꞌn.
Yi chiqꞌuixpeꞌn Luꞌ tu Waꞌn
17 Itzun yi wiꞌtz paleꞌ nintzun jal jun chin chiꞌch cꞌuꞌlal tetz scyuchꞌ yi eꞌ sadusey yi xomij chiwiꞌ teꞌj. 18 Cyoqueꞌn tzuntz tan chitzꞌamleꞌn yi eꞌ apostl, nin eꞌ octz cyaꞌn xetzeꞌ. 19 Poro lakꞌbal tuleꞌn jun ángel cwent Kajcaw tan jakleꞌn yi puertil yi xetzeꞌ, nintzun eꞌ baj el liwr. 20 Itzun tal yi ángel scyetz:
—Quibeneꞌnk le templo nin txolwok scyetz cyakil wunak yi ẍeꞌn ljal yi acꞌaj itzꞌajbil cyaꞌn, —stzun yi ángel bantz scyetz.
21 Yi wiꞌt quibital yi yolaꞌseꞌj nintzun eꞌ ajtz. Nin yi tuleꞌn skil nintzun eꞌ octz tan chichusleꞌn wunak le templo.
Itzun te yi na chitzan cyetz tan xtxoleꞌn yi yol Ryos le templo, chichamol tzun quib yi wiꞌtz paleꞌ, scyuchꞌ yi eꞌ xomij chiwiꞌ teꞌj, nin scyuchꞌ cyakil yi eꞌ wiꞌ banl chiwiꞌ yi eꞌ aj Israel. Ma yi chichamol quib nintzun ben chimantar tan quicyꞌleꞌn tzaj yi eꞌ apostl yi ateꞌ xetzeꞌ taneꞌn. 22 Poro yi cyocomponeꞌn yi eꞌ aj txꞌamij xetzeꞌ, cyaꞌl junt at xetzeꞌ. Chipakxeꞌn tzaj tzuntz tan talcheꞌn stziblal scyetz yi eꞌ wiꞌtz paleꞌ. 23 Itzun cyaltz:
—Ma jaluꞌ eꞌuꞌ kawutzileꞌn, yi nkopon xetzeꞌ lamij cyakil cuꞌn. Nchaꞌtz txiclcheꞌ nin yi eꞌ qꞌuicyꞌlom stziꞌak eꞌchk puert. Poro yi nkoꞌc xetzeꞌ cyaꞌl at, —cheꞌch bantz.
24 Yi tbital yi jepil wart cwent yi templo, nin yi tbital yi wiꞌtz paleꞌ yi chiyol yi eꞌ ajtxꞌamij, quinin el chitxum tetz yi mbi sbajok nin yi naꞌl tzajpont wiꞌ. 25 I cunin na chitzan tan txumuꞌn yi toponeꞌn jun tan talcheꞌn scyetz:
—Yi eꞌ yaj yi eꞌ oc cyanuꞌ xetzeꞌ ewt, choꞌn ateꞌ cyeꞌtz le templo tan chichusleꞌn wunak, —stzun yi junaꞌtz bantz.
26 Chibeneꞌn tzun chijepil yi eꞌ wart scyuchꞌ yi eꞌ aj txꞌamij, tan chichakleꞌn. Penin skꞌil chisajeꞌn chimoxol, na nin cyek ẍchiꞌ yi eꞌ wunak yi xomij chiwiꞌ scyeꞌj yi eꞌ apostl. Na ko tzun ẍeꞌn choꞌc yi eꞌ wunak tan chicꞌoxleꞌn tan cꞌub. 27 Ma yi cyoponeꞌn scyeꞌj yi eꞌ wiꞌ banl wiꞌ, nintzun eꞌ cuꞌ txicbaꞌntz ẍchiwutz. Toqueꞌn tzun yi wiꞌtz paleꞌ tan jakleꞌn scyetz:
28 —I bin jaluꞌ ¿qui peꞌ nkal tzitetz tan quiꞌt itxolil yi mbi ekaꞌn tan yi jun yajaꞌtz? Poro quinin moꞌc te iwiꞌwok na ja wiꞌt baj quibital cyakil wunak yi ichusuꞌn. Nchaꞌtz na cxtzanwok tan talcheꞌn yi oꞌ nkabiyon cuꞌn yi yajaꞌtz.
29 Beneꞌn tzun tlol Luꞌ tu yi eꞌ mas apostl:
—Mas tajweꞌn yil kaban taneꞌn yi tajbil Ryos, swutz yi cyajbil wunak. 30 Na yi chiRyosil yi eꞌ kamam kateꞌ, iꞌ njeꞌsan tzaj yi Jesúsaꞌtz ẍchixoꞌl almaꞌ, yi jun yi njeꞌ chipajoluꞌ wutz pasyon tan biyleꞌn cuꞌn. 31 Nin Ryos teꞌn nin mmakꞌon kꞌej iꞌ, na choꞌn cꞌolchij iꞌ le sbal, nin ja oc taꞌn tetz wiꞌtz bajxom, nin tetz colol ketz. Yaꞌstzun tulej Ryos bantz jeꞌn katxꞌixpul yi kajtzaꞌkl tan jaleꞌn cuybil kapaj yi oꞌ aj Israel. 32 Ej nin yi oꞌ ketz oꞌ stiw teꞌj. Nchaꞌtz yi Espíritu Sant yi na takꞌ Ryos scyetz cyakil yi eꞌ yi na cyek ẍchiꞌ iꞌ, iꞌ stiw teꞌj, —stzun Luꞌ scyetz.
33 Poro yi quibital yi eꞌ paleꞌ yi xtxolbilaꞌseꞌj nintzun chiꞌch mas chicꞌuꞌl scyeꞌj nin kloꞌ eꞌ octz tan chibiyleꞌn cuꞌn. 34 Poro nintzun jeꞌ txiclok jun scyeri yi eꞌ parisey yi wiꞌnin kꞌej yi na biꞌaj Gamaliel, nin cawuntz tan cyeleꞌn jun tkuj yi eꞌ apostl ẍchixoꞌl. 35 Beneꞌn tzun tlol iꞌ scyetz yi eꞌ mas paleꞌ:
—Eꞌuꞌ intanum, or quiluꞌ yi mbiꞌtz yi na chitzanuꞌ tan xtxumleꞌn scyeꞌj yi eꞌ yajaꞌtz. 36 Na ulk txꞌakx chicꞌuꞌluꞌ yi mbi banak Teudas. Na yi iꞌ tetz tocsaj tib nim. Nin ja loꞌ chixom cyaj cient wunak te iꞌ. Poro yi cweꞌn biyij, ja tzun cheꞌl xit yi eꞌ yi eꞌ xom teꞌj. 37 Nchaꞌtz yi xoneꞌn tiemp nin yi jeꞌn yi censo iteꞌn nin banaꞌs te yi junt yaj yi na biꞌaj Judas yi aj Galilea. Na quin tech nin wunak xom chiwiꞌ-tz teꞌj. Poro yi cweꞌn biyij, eꞌ baj len xit cyakil yi eꞌ yi xom chiwiꞌ teꞌj. 38 Chaꞌstzun te, baꞌn tcuꞌn quiꞌc cyaj cyenuꞌ scyeꞌj. Nin quil cheꞌ chixuxuꞌ. Na ko tetz tuꞌ wunak yi ajtzaꞌkl yi na chitzan tan xtxoleꞌn, tzꞌelpon cꞌuꞌl. 39 Poro ko tetz Ryos, quil chixcyeꞌuꞌ tan xiteꞌn. Ej nin lastum yi ko choꞌn na chitzanuꞌ tan oyintziꞌ tu Ryos, —stzun Gamaliel bantz scyetz.
40 Baꞌn tzun ban yi xtxumuꞌn Gamaliel ẍchiwutz. Chichakxeꞌn tzun yi eꞌ apostl nin eꞌ oc tan chibiyleꞌn tan xicyꞌxab. Ma yi wiꞌt chiloꞌoneꞌn, nintzun eꞌ octz tan chicaweꞌn tan quiꞌt chitxolil yi mbi ekaꞌn tan Jesús. Kalenaꞌs tzun cyeleꞌn tzakpuꞌntz. 41 Ma yi cyeleꞌn yi eꞌ apostl ẍchiwutz yi wiꞌ banl wiꞌ, wiꞌnin chitzatzineꞌn, na nin jal chikꞌej swutz Ryos tan tuꞌ yi nchitij qꞌuixcꞌuj tan paj yi baj chitxolil yi mbi ekaꞌn tan Jesús. 42 Quiꞌc nin jun kꞌej yi najk chujeꞌ tan xtxꞌolcheꞌn xoꞌl yi mbi ekaꞌn tan Jesús yi iꞌ yi Cristo. Na cyakil nin kꞌej ja chitxol le templo nin lakak eꞌchk caꞌl.