Yi chibixeweꞌn juk diácono
6
1 Itzun bantz yi ẍchꞌuyeꞌn tajlal yi cmon creyent, nintzun jal muꞌẍ tal oyintziꞌ ẍchixoꞌl yi eꞌ creyent griego scyuchꞌ eꞌ creyent hebreo tan paj yi qui na akꞌlij ẍchꞌeybil cyetz yi eꞌ xmaꞌlcaꞌn griego, yi quimnak quichmil. 2 Chichakxeꞌn tzun yi eꞌ creyent cyakꞌun yi eꞌ apostl, itzun cyaltz scyetz:—Quil scꞌul yil kil cyen yi xtxoleꞌn yi yol Ryos tan jatxleꞌn ẍchꞌeybil cyetz yi eꞌ xmaꞌlcaꞌnaꞌtz. 3 Chaꞌstzun te eꞌuꞌ kajwutz, chisicyꞌeꞌnuꞌ juk yaj ẍchixoꞌluꞌ tan chixconeꞌn te yi akꞌunaꞌtz. Tajweꞌn tan jeꞌn txaꞌij juk balaj yaj yi nojnak cyalmaꞌ tan yi Espíritu Sant nin yi tzꞌaknak cuꞌn eꞌ tu chitxumuꞌn. 4 Ma yi oꞌ ketz, kocopon il tan nachleꞌn Kataj, nin tan xtxꞌolcheꞌn xoꞌl yi yol iꞌ.
5 Yi quibital yi eꞌ mas kajwutz yi xtxolbilaꞌseꞌj, tircunin tzun eꞌ, eꞌ tzatzin teꞌj. Nintzun jeꞌ chitxaꞌol Esteban, jun yaj yi kꞌuklij cꞌuꞌl te Kataj Ryos, nin yi nojnak talmaꞌ tan yi Espíritu Sant. Nchaꞌtz Liꞌp tu Prócuro, nin Nicanor, tu Timón, tu Parmenas, tu Laẍ, yi jun aj Antioquía yi choꞌn xomij wiꞌ te ketz kacstumbr yi oꞌ judiy. 6 Cyoponeꞌn tzun ticyꞌleꞌn yi eꞌ yajaꞌtz ẍchiwutz yi eꞌ apostl. Nintzun jeꞌ cyakꞌol yi eꞌ apostl chikꞌab ẍchiwiꞌ, nin eꞌ octz tan nachleꞌn Kataj squibaj.
7 Wiꞌnin beneꞌn loꞌon yi stziblal yi yol Kataj, nin wiꞌnin ẍchꞌuyeꞌn tajlal yi cmon creyent Jerusalén. Nchaꞌtz wiꞌnin paleꞌ cyocsaj yi yol Kataj.
Yi xtxꞌamxeꞌn Esteban
8 Inti Esteban iꞌtz jun yaj yi nternin kꞌuklij cꞌuꞌl te Kataj. Nin tan yi banl tu porer Kataj bnix wiꞌnin eꞌchk milawr taꞌn ẍchixoꞌl wunak.
9 Cyoqueꞌn tzun cobox tan wakꞌ ib tu Esteban. Yi eꞌaꞌtz eꞌ cwent yi sinagoga kale na chibenakit yi eꞌ yi na chibiꞌaj Elnakeꞌ Liwr. Nchaꞌtz at cobox tkan aj Cirene, nin cobox tkan aj Alejandría tu cobox aj Cilicia nin cobox aj Asia. Cyakil yi eꞌaꞌtz eꞌ oc tan wakꞌ ib tu Esteban. 10 Poro quinin tzun eꞌ xcyeꞌ teꞌj na yi Espíritu Sant akꞌol tetz yi tajtzaꞌkl iꞌ. 11 Cyoqueꞌn tzun yi eꞌaꞌtz tan takꞌleꞌn xoꞌc scyetz cobox tkan wunak tan cyalol yi ja quibit yi na tzan Esteban tan jisleꞌn Moisés tu Ryos. 12 Tan yi ajtzaꞌklaꞌtz eꞌ xcyeꞌ tan tocseꞌn chicꞌuꞌl cyakil wunak, na nin cyal yi contr Esteban te Ryos. Nchaꞌtz eꞌ xcyeꞌ tan tocseꞌn chicꞌuꞌl yi eꞌ wiꞌ banl wiꞌ scyuchꞌ yi eꞌ txꞌolol xoꞌl yi ley Moisés. Chibeneꞌn tzun cyakil yi eꞌaꞌtz tan stzꞌamleꞌn Esteban. Ma yi xtxꞌamxeꞌn cyaꞌn, nin ben quicyꞌaltz ẍchiwutz yi eꞌ wiꞌ banl wiꞌ. 13 Nchaꞌtz at eꞌ stiw yi opontz cyaꞌn yi laꞌjil cuꞌn xcon cyaꞌn tan takꞌleꞌn til Esteban. Je cyaleꞌj:
—Yi yajeꞌj quinin na taneꞌ tan jisleꞌn yi katemplo yi wiꞌnin xanil, nin qui na taneꞌ tan jisleꞌn kaley. 14 Ej nin ja kubit yi ntal iꞌ: “Yi Jesús yi aj Nazaret cupon ẍchꞌukil yi katemplo, nin jepon xtxꞌixpul yi chusuꞌn yi cyajnak tkꞌol Moisés sketz, stzun,” —cheꞌch bantz.
15 Ma yi beneꞌn chixmayil yi eꞌ wiꞌ banl wiꞌ yi ateꞌ-tz yi wutz Esteban, i cunin wutz jun ángel taneꞌn.