Yi eꞌchk puntil yi xcon tan Pawl tan txoliꞌn
2
1 Nchaꞌtz yi in wetz, qui nin xcon lmak yol waꞌn yi nxnaꞌkeꞌn ẍchixoꞌluꞌ tan xtxꞌolcheꞌn xoꞌl yi tajbil Ryos. 2 Na yi ntaxk nopon scyeꞌjuꞌ, nsken intxum tan qui xconeꞌn junt xtxolbil waꞌn, ma na ntin cuꞌn yi mbi cuꞌn banak Jesucristo, nin yi mbi tzuntz yi quimeꞌn iꞌ swutz pasyon. 3 Ej nin yi xnaꞌkeꞌn ẍchixoꞌluꞌ ja chinxob, nin wiꞌnin inlucneweꞌn ẍchiwutzuꞌ tan paj yi chin ploj nin in taneꞌn tzinwutz. 4 Ej nin yi woqueꞌn tan txoliꞌn, quinin xcon eꞌchk yol waꞌn yi at qꞌuixbel tan teleꞌn chitxumuꞌ tetz. Ma na ja chinxcyeꞌ tan xtxꞌixpeꞌn chitxumuꞌnuꞌ tan yi Espíritu Sant tu yi porer Ryos. 5 Na tan tuꞌ porer Ryos ncyocsajuꞌ yol iꞌ. Nkꞌeꞌtz tan paj yi wetz wajtzaꞌkl nka yi chinjilon.Yi xeꞌ yi ẍchusuꞌn Pawl choꞌn na saj tu Ryos
6 Poro apart eꞌchk yol yi na xcon kaꞌn yi na koꞌc tan txoliꞌn scyetz yi eꞌ kajwutz yi tzꞌaknak cuꞌn eꞌ te yi na kocsaj, na na xcon eꞌchk yol kaꞌn yi wiꞌnin ajtzaꞌkl tcꞌuꞌl. Ej nin yi jun ajtzaꞌklaꞌtz, nkꞌeꞌtz tetz tzoneꞌj wuxtxꞌotxꞌ, nka scyetz yi eꞌ wiꞌtz ajcaw tetz tzoneꞌj wuxtxꞌotxꞌ yi sotzel chiwutz sbneꞌ. 7 Poro yi ajtzaꞌkl yi na xcon kaꞌn, choꞌn na saj tu Ryos. Ewaꞌn cuntuꞌ yi jun ajtzaꞌklaꞌtz taꞌn sajleꞌnix tunintz, poro jaluꞌ ja lajluchax skawutz. Nin yi na ẍchaj sketz iꞌtz: Yi ntaxk bnix yi munt, txumijt cyen tan Kataj tan tkꞌol kakꞌej. 8 Poro yi eꞌ ajcawaꞌtz quinin pujx cyaꞌn na yi ko yaꞌtz, ja kloꞌ jal chikꞌej tuchꞌ. Nchaꞌtz yi jak pujx cyaꞌn, qui kloꞌ njeꞌ chipajol Kajcaw swutz pasyon. 9 Na jeꞌ tzꞌibaꞌnt cyen:
“Cyaꞌl nin jun jak til yi eꞌchk takleꞌn balaj
yi bnixnak tan Ryos scyetz yi eꞌ yi na chipekꞌ teꞌj.
Nin cyaꞌl nin jun bitan tetz yi ẍeꞌn quitaneꞌn.
Nin cyaꞌl nin jun najk el xtxum tetz
yi eꞌchk takleꞌnaꞌtz yi bnixnak tan Ryos
scyetz yi eꞌ yi na chipekꞌ teꞌj.”a
10 Poro yi oꞌ ketz, ja el katxum tetz, na Ryos nchajon sketz tan yi tetz Espíritu. Na ajskeꞌn cyakil yi xeꞌ yi tajtzaꞌkl Ryos tan yi tetz Espíritu.
11 Na cyaꞌl nin jun najk el xtxum tetz yi mbi na icyꞌ tcꞌuꞌl jun yaj, ma na ntin yi tetz espíritu. Chaꞌstzun taneꞌn Ryos. Cyaꞌl nin jun na el xtxum tetz yi mbi na icyꞌ tcꞌuꞌl iꞌ, ma na ntin yi tetz Espíritu. 12 Poro yi oꞌ ketz, ja kakꞌ amaꞌl tetz yi Espíritu tetz Ryos tan clarineꞌn yi eꞌchk xtxolbilaꞌtz skawutz. Quinin kakꞌ amaꞌl tetz yi espíritu cwent tetz munt. Chaꞌstzun te ja wiꞌt el katxum tetz cyakil yi xtxolbil yi akꞌijt sketz tan Ryos. 13 Ej nin yi na koꞌc tan xtxꞌolcheꞌn xoꞌl yi eꞌchk ajtzaꞌklaꞌtz, qui na xcon cyajtzaꞌkl wunak kaꞌn. Poro na xcon yi yol yi akꞌijt sketz tan yi Espíritu Sant tan xtxꞌolcheꞌn xoꞌl yi tajbil yi Espíritu Sant scyetz yi eꞌ yi at yi Espíritu Sant te cyalmaꞌ.
14 Poro yi eꞌ wunak yi quiꞌc Espíritu Ryos te cyalmaꞌ, qui na cyaj yi ẍchusuꞌn yi Espíritu tetz Ryos. Na ẍchiwutz cyetz, quiꞌc ekaꞌn taꞌn. Chaꞌstzun te quiꞌc rmeril yi nink pujx yi tajbil Ryos cyaꞌn, na quiꞌc yi Espíritu Ryos at tetz cyalmaꞌ.
15 Poro yi oꞌ yi at yi Espíritu Ryos te kalmaꞌ, na kaxcyeꞌ tan maꞌleꞌn jun ajtzaꞌkl yi ko baꞌn nka cachiꞌ. Ma yi eꞌ yi quiꞌc Espíritu Ryos te cyalmaꞌ, qui na el chitxum tetz yi mbi i ilaꞌtz tajtzaꞌkl jun yi at Espíritu Sant te talmaꞌ. 16 Bintzi yi jun yolaꞌtz, na tzꞌibaꞌnt cyen: “Quiꞌc nin jun yi na el xtxum tetz yi mbi na icyꞌ tcꞌuꞌl Kataj Ryos. Nin cyaꞌl nin jun yi nink tzꞌoc tan ẍchusleꞌn iꞌ, na at cyakil yi ajtzaꞌkl tuchꞌ.”b Poro nchaꞌtz oꞌ ketz jaluꞌ, at len kajtzaꞌkl, na akꞌijt yi tajtzaꞌkl Cristo sketz.