Yi tlol Pawl yi chicotxcal yi eꞌ cmon creyent Corint
3
1 Ma jaluꞌ wajwutz na waj lwal scyeruꞌ, yi woqueꞌn tan xtxoleꞌn yol Kataj scyeruꞌ, ja cheꞌ inchusuꞌ chi na cheꞌ inchus yi eꞌ cotxcoj, yi eꞌ yi chi niꞌ quitaneꞌn tkꞌab Cristo. 2 Na ja xcon eꞌchk yol waꞌn yi chin sensiy nin, chi na ban tcꞌajleꞌn lech. Quinin xcon eꞌchk chusuꞌn waꞌn yi wiꞌnin qꞌuixbel tan pujxeꞌn cyanuꞌ, na ntaxk el chitxumuꞌ tetz. Nchaꞌtz jaluꞌ txeꞌn el chitxumuꞌ tetz. 3 ¿Qui peꞌ na el chitxumuꞌ tetz, yi eꞌ cuꞌnuꞌ cotxcoj? Na at xcyꞌaklil ẍchixoꞌluꞌ. Nin na choyintzinuꞌ squibil quibuꞌ. Nin at jatxoꞌn ib ẍchixoꞌluꞌ, na yi cyajtzaꞌkluꞌaꞌtz niꞌcuꞌn tu cyajtzaꞌkl yi eꞌ mas wunak yi quiꞌc na cyocsaj. 4 Chin cotxcojeꞌt nin eꞌuꞌ, na at eꞌ ẍchixoꞌluꞌ yi na cyal: “Choꞌn xomij ketz kawiꞌ teꞌj Pawl.” Nin at eꞌ yi na cyal: “Choꞌn xomij ketz kawiꞌ teꞌj Apolos.” ¿Nkꞌeraꞌtz peꞌ chicotxcaluꞌ?Yi tlol Pawl yi eꞌ bajxom eꞌ tuꞌ xconsbeꞌtz Ryos
5 ¿Mbi ekaꞌn waꞌn? ¿Nin mbi ekaꞌn tan Apolos? Bintzi, tan oꞌ yi ncyocswituꞌ yol Kataj. Poro oꞌ tuꞌ ẍchakum Ryos, nin aparchk len yi eꞌchk kamunl yi akꞌij sketz tan Kajcaw. 6 Na yi in wetz niꞌcuꞌn chi ink awal tetz yi ij, yi iꞌtz yi yol Kataj. Ma Apolos niꞌcuꞌn chi iꞌ-k kꞌaꞌjanl tetz. Poro Ryos na chꞌuysan yi ujul. Nin yi ujul iꞌtz yi eꞌuꞌ cyeruꞌ.
7 Chaꞌstzun te, quiꞌc ekaꞌn kaꞌn yi oꞌ awal teri ij, tu yi oꞌ aj kꞌaꞌjanl. Quiꞌc ketz kakꞌej, na iꞌtz Ryos yi na tzan tan ẍchꞌuyseꞌn yi ujul. Nin yaꞌstzun yi jun yi at tetz kꞌej. 8 Ej nin quiꞌc na ban yi ko awal jun, nka aj kꞌaꞌjanl junt, na iteꞌn nin kamunlaꞌtz. Poro skajunal len, stkꞌeꞌ Ryos jun oy sketz. Nin xom cyen tuꞌ te yi balajil yi kakꞌun. 9 Na yi oꞌ ketz oꞌ tuꞌ takꞌunsom Ryos te yi takꞌun iꞌ. Ma yi eꞌ cyeruꞌ, eꞌuꞌ yi tetz tujul taneꞌn.
Yi tlol Pawl yi niꞌcuꞌn yi cmon creyent tu jun caꞌl
Nin nchaꞌtz niꞌcuꞌn eꞌuꞌ tu jun caꞌl Ryos yi na tzan banleꞌn. 10 Yi in wetz, niꞌcuꞌn in tu jun bnol caꞌl, nin tan tuꞌ banl talmaꞌ Ryos ja saj inxeꞌtzal yi xeꞌ yi jun caꞌlaꞌtz. Poro apart yi eꞌ yi na chitzan tan jeꞌseꞌn pon yi wutz tkan. Nin sjunalen cuꞌn tan xtxumleꞌn ẍeꞌn sban. 11 Chaꞌstzun te quiꞌc rmeril tan cweꞌn junt xeꞌ takꞌun junt, na ja wiꞌt cuꞌ yi xeꞌtzbil. Nin iꞌtz yi Jesucristo.
12 Ej nin le wiꞌtzbil kꞌejlal, slajluchaxk yi kakꞌun ko baꞌn nkulej nka quiꞌ. Slajluchaxk ko ja xcon or kaꞌn, nka sakal, nka balaj cꞌub, nka tzeꞌ, nka chꞌim, nka xak xtzeꞌ tuꞌ. 13 Na tzꞌul jun kꞌej yi skajunal cuꞌn slajluchaxk yi ko baꞌn nka ploj yi kakꞌun. Na xconk kꞌakꞌ tan pileꞌn yi kakꞌun. 14 Nin ko quil tzꞌeꞌ yi akꞌun yi njeꞌ katxicbal, sketzaj tzun jun oy. 15 Poro kol tzꞌeꞌ yi kakꞌun yi njeꞌ katxicbal, quil ketzaj yi oy. Poro ilenin skaclaxok.
16 ¿Qui peꞌ na el chitxumuꞌ tetz, yi chi eꞌuꞌ cuꞌn caꞌl Ryos? na choꞌn najlij yi Espíritu Sant scyeꞌjuꞌ. 17 Ej nin ko at jun yil tzꞌoc tan xiteꞌn yi caꞌl Ryos, Ryos teꞌn tzꞌocopon tan xiteꞌn iꞌ. Na cyakil yi eꞌuꞌ, eꞌuꞌ caꞌl Ryos, nin yi caꞌl Ryos chin xan nin.
Quiꞌc cyajtzaꞌkl yi eꞌ bajxom yi na cyocsaj quib nim tu cyajtzaꞌkl
18 Quil chisub quibuꞌ. Ko at jun ẍchixoꞌluꞌ yi na tal yi chin tzꞌaknak cuꞌn iꞌ te eꞌchk takleꞌn tetz tzoneꞌj wi munt, mas baꞌn yi nink tocsaj tib juy tu tajtzaꞌkl. Ko yaꞌtz sban, ja tzun jal yi mero tajbil iꞌ taꞌn. 19 Na swutz Ryos, quiꞌc xac yi eꞌchk ajtzaꞌklaꞌtz cwent tetz tzoneꞌj wuxtxꞌotxꞌ, na je yol iꞌ yi tzꞌibaꞌnt cyen: “Yi eꞌ wunak yi le wutz cyetz cyajtzaꞌkl yi chin tzꞌaknak cuꞌn eꞌ, chitxꞌamxok cyeꞌtz tan yi cyetz cyajtzaꞌklaꞌtz yi na cyocsaj quib nim tuchꞌ.”
20 Ej nin at junt xtxolbil yi na tal “Na til Kajcaw yi quiꞌc xac yi chitxumuꞌn yi eꞌ yi chin tzꞌaknak cuꞌn eꞌ na cyal.”
21 Chaꞌstzun te, quil cyocsaj quibuꞌ nim tan tuꞌ yi na chixomuꞌ te alchok aj txolinl na cyakil yi eꞌ ajtxolinlaꞌtz, eꞌ cuꞌn chixconsbeꞌtzuꞌ, yi eꞌuꞌ cmon creyent. 22 Mpe ik in, mpe ik Apolos, mpe ik Luꞌ, oꞌ len cuꞌn chixconsbeꞌtzuꞌ. Nchaꞌtz cyakil yi at wi munt, at jakꞌ chicaꞌwluꞌ taneꞌn. Mpe ik kutzꞌajbil, mpe ik quimichil, oꞌ len cuꞌn ajcaw teꞌj. Mpe ik yi eꞌchk takleꞌn yi na kaxmay jaluꞌ, nka yi eꞌchk takleꞌn yi na xon tzaj ek caꞌp, cyakil cuꞌn yi eꞌchk takleꞌnaꞌtz choꞌn cuꞌn ateꞌ cyen jakꞌ kacaꞌwl scyuchꞌuꞌ. 23 Ma yi oꞌ ketz, yi oꞌ creyent atoꞌ len jakꞌ caꞌwl Cristo, nin yi Cristo choꞌn at iꞌ jakꞌ caꞌwl Kataj Ryos.