Ryos smaꞌlank yi cyakꞌun yi eꞌ bajxom
4
1 Chaꞌstzun te, na kaj yil cyocsajuꞌ yi oꞌ ketz yi oꞌ aj txolinl oꞌ tuꞌ xconsbeꞌtz nin ẍchakum Cristo. Oꞌ tuꞌ martomaꞌ iꞌ tan chichusleꞌnuꞌ te yi ẍchusuꞌn Ryos. 2 Poro chin tajweꞌn cunin yil keꞌl cuꞌn te kakꞌun. 3 Poro kol choꞌcuꞌ tan maꞌleꞌn wajtzaꞌkl quil wajlaj. Nin kol choꞌc yi eꞌ mas wunak tan maꞌleꞌn yi wajtzaꞌkl quil wajlaj. Nchaꞌtz in, quiꞌc rmeril tan inmaꞌlal wib tu wetz wajtzaꞌkl. 4 Na tzinwutz wetz, quiꞌc wetz wil. Poro tan yi jun yolaꞌtz qui na elepont yi quiꞌc wil. Na ntin cuꞌn Kajcaw na xcyeꞌ tan maꞌleꞌn kajtzaꞌkl nin tan tilweꞌn yi ko at kil nka quiꞌc. 5 Chaꞌstzun te eꞌuꞌ wajwutz, quil choꞌcuꞌ tan maꞌleꞌn tajtzaꞌkl jun yaj te yi ntaxk ul Kajcaw. Na yil tzꞌul tzaj iꞌ, iꞌ lchajon cyakil yi eꞌchk ajtzaꞌkl yi ewaꞌn cuntuꞌ kakꞌun. Nin iꞌ lchajon mbi cuꞌn na icyꞌ len tkacꞌuꞌl. Nin yaꞌstzun yil takꞌ Kataj Ryos kakꞌej, skajunalen.6 I bin jaluꞌ wajwutz, ja kaxcon tu Apolos waꞌn tetz jun elsawutzil tan ẍchajleꞌn scyeruꞌ yi qui na yub yi kol cyakꞌuꞌ mas kꞌej jun ẍchakum Ryos swutz junt. Na ko yaꞌtz na chibanuꞌ na tzun cyocsaj quibuꞌ nim tu yi cyajtzaꞌkluꞌ. Quil chibenuꞌ mas joylaj, ma na ntin chitxumeꞌuꞌ yi yol yi tzꞌibaꞌnt cyen. 7 Poro ko at muꞌẍ tal cyajtzaꞌkluꞌ, ¿naꞌ mmakꞌon tetz? Cotziꞌn tuꞌ ncyulejuꞌ tetz Ryos. Ej nin ko bintzinin cotz tuꞌ ncyulejuꞌ yi cyajtzaꞌkluꞌ ¿mbi tzuntz na cyocsaj quibuꞌ nim tuchꞌ?
8 Wech le chiwutz cyeruꞌ ja wiꞌt jal chibalajiluꞌ. Wech, le chiwutz cyeruꞌ, eꞌuꞌ balaj ajcaw. Nin qui tajweꞌn yi oꞌ ketz taneꞌn ẍchiwutzuꞌ. Ej nin le wutz cyeruꞌ cyajtzaꞌkluꞌ, joylaj xomchoꞌ tzaj ketz. Chumbalaj nin kloꞌ yi yaꞌtz nink quitaneꞌnuꞌ. Chumbalaj nin kloꞌ yi pe nink skꞌil na chicawunuꞌ. Yi yaꞌtzk, ja kloꞌ wiꞌt jal kakꞌej scyuchꞌuꞌ.
9 Poro tzinwutz wetz, yi oꞌ, yi oꞌ apostl ja koꞌc tan Ryos chi quitaneꞌn yi eꞌ yi quiꞌc chixac. Ja koꞌc chi quitaneꞌn yi eꞌ pres yi akꞌijt chicaws tan chiquimeꞌn. Oꞌ tuꞌ chitzeꞌlbeꞌtz wunak. Oꞌ chitzeꞌlbeꞌtz yi eꞌ ángel yi ateꞌ tcyaꞌj.
10 Nchaꞌtz at cobox ẍchixoꞌl yi na cyal yi quiꞌc nin ketz kajtzaꞌkl taneꞌn tkꞌab Cristo. Na chin ploj nin oꞌ taneꞌn ẍchiwutz. Poro yi eꞌuꞌ cyeruꞌ chin quiw nin quitaneꞌnuꞌ ẍchiwutz. Na le wutz cyetz cyajtzaꞌkl yi at cyeruꞌ chikꞌejuꞌ, ma yi oꞌ ketz, quiꞌc ketz kakꞌej taneꞌntz.
11 Poro yi oꞌ ketz sajleꞌnix tunintz ja katij weꞌj, ja katij saktziꞌ. Ja katij buꞌyil. Nin oꞌ tuꞌ chibuchbeꞌtz wunak. Cyaꞌl atit ketz kacaꞌl. 12 Nin ja kakꞌuj tan kakꞌab tan joyleꞌn kawaꞌ. Nin na kakꞌeꞌxij tan akꞌun. Ja kajislij cyaꞌn wunak, poro ja kajak chibanl. Ja kabuchlij, poro ja icyꞌpon kaꞌn. 13 Ja koꞌc tetz chiyolbeꞌtz wunak, poro ja kajak cuybil chipaj. Sajleꞌnix tunintz oꞌ tunin tzꞌis kutaneꞌntz ẍchiwutz. Quiꞌc muꞌẍ kaxac.
Yi tajbil Pawl iꞌtz tan cꞌaseꞌn cyajtzaꞌkl yi eꞌ aj Corint
14 I bin jaluꞌ, qui na chintzan tan stzꞌibeꞌn nin yi xtxolbilaꞌseꞌj ik tan telseꞌn chitxꞌixuꞌ, ma na iꞌtz tan cꞌaseꞌn cyajtzaꞌkluꞌ tan qui chipoꞌteꞌnuꞌ. Na eꞌuꞌ inmeꞌl incyꞌajl taneꞌn. Chin okꞌleꞌn nin chiwutzuꞌ waꞌn. 15 Nin mpe atk lajuj mil chusul cyeruꞌ te yi ẍchusuꞌn Cristo, ntin in, nchin xcon tan cyocseꞌnuꞌ tkꞌab Cristo. Nin tan tuꞌ yi mintxol yi balaj stziblal scyeruꞌ, ja choꞌcuꞌ tetz inmeꞌl incyꞌajl taneꞌn tkꞌab Cristo.
16 Ej nin chaꞌstzun te na cuꞌ inwutz scyeruꞌ yi nink chixomuꞌ te yi wetz yi na imban. 17 Nin yaꞌstzun xac yi beneꞌn inchakol Timoteo ẍchixoꞌluꞌ tan talcheꞌn scyeruꞌ yi tajweꞌn tan chixomeꞌnuꞌ te yi wetz yi xomchin teꞌj. Baꞌn quibituꞌ yol iꞌ, na tan in ntocswit iꞌ Cristo. Nin wiꞌnin na chin tzatzin teꞌj, na baꞌn kꞌukeꞌ kacꞌuꞌl teꞌj. Tzꞌocopon tzun iꞌ tan naꞌwseꞌn scyeruꞌ yi ẍeꞌn wutaneꞌn tkꞌab Cristo. Ej nin tzꞌocopon iꞌ tan tulseꞌn txꞌakx ẍchicꞌuꞌluꞌ yi inchusuꞌn yi walnak scyeruꞌ, yi chusuꞌn yi na chintzan tan xtxoleꞌn scyetzak cyakil cmon creyent, yi ateꞌ beneꞌn tziꞌn.
18 Poro lastum yi at eꞌ ẍchixoꞌluꞌ yi na cyocsaj quib nim. Na le wutz cyetz cyajtzaꞌkl yi quiꞌct wupombil tan chixajseꞌnuꞌ. 19 Poro Ryos cuꞌn txant tan wuponeꞌn scyeꞌjuꞌ. Kalenaꞌs tzun tzinmaꞌlaj cyajtzaꞌkl yi eꞌaꞌtz yi na cyocsaj quib nim. Nkꞌeꞌtz ik chijilon tuꞌ tzinmaꞌlaj, ma na i yi ko na chixcyeꞌ tan xtxꞌixpeꞌn chitxumuꞌn yi eꞌ wunak tan chixomeꞌn teꞌj Cristo. 20 Na na lajluchax yi oꞌ creyent nka qui tan yi eꞌchk takleꞌn yi na kaban, nkꞌeꞌtz tan yi eꞌchk balaj yol yi na kaxconsaj.
21 Ma jaluꞌ, ¿mbiꞌtz na cyajuꞌ? ¿Na peꞌ cyajuꞌ yil nopon ẍchixoꞌluꞌ tu jun tzꞌuꞌm, nka tu imputzpal, ej nin tu lokꞌ ib?