Tajweꞌn tan cyajeꞌn cyen quilol yi yab ajtzaꞌkl yi cyꞌaꞌneꞌt cyaꞌn
5
1 Nchaꞌtz at stziblal yi at aj xnaꞌninl tu aj yajinl ẍchixoꞌluꞌ. Nin na kubit yi iꞌtz jun jilwutz xnaꞌniꞌn yi chin juntlen nin.a Qui nin peꞌ na chiban yi eꞌ yi qui na cyocsaj yi yol Ryos. Na ja jeꞌ tuchꞌlel jun yaj yi txkel yi taj. 2 Wech na cyaluꞌ yi eꞌuꞌ balaj, ma na baꞌn tcuꞌn yi nink chibisunuꞌ tan yi eꞌchk ilaꞌtz yi at ẍchixoꞌluꞌ. Nin jajk wiꞌt el chilajuluꞌ yi jun juchul ilaꞌtz yi at ẍchixoꞌluꞌ.3 Bintzi quibin ẍchixoꞌluꞌ, poro na chimbisun tan yi il yi na bajij ẍchixoꞌluꞌ. Chaꞌstzun te, tzinwutz wetz tajweꞌn tan takꞌleꞌn caws yi jun juchul ilaꞌtz.
4 Baꞌn bin chicham cuꞌn quibuꞌ chi atin nink ẍchixoꞌluꞌ, na at yi porer Kajcaw Jesucristo ẍchixoꞌluꞌ. 5 Nin baꞌn chijatxlenuꞌ yi jun juchul ilaꞌtz tkꞌab Satanás tan toqueꞌn tan buchleꞌn yi wankil iꞌ, bantz claxeꞌn yi talmaꞌ yil tzꞌul tzaj Kajcaw Jesucristo tan pujleꞌn xtisyaꞌ.b
6 Cachiꞌ na chibanuꞌ yi na cyaluꞌ yi chumbalaj nin eꞌuꞌ. ¿Qui peꞌ na quiluꞌ, yi muꞌẍ txꞌam na ben loꞌon txoꞌl cyakil yi kꞌotil pam? 7 Quil cyen binuꞌ yi jun yab ajtzaꞌklaꞌtz yi xomcheꞌuꞌ teꞌj sajleꞌn tunintz. Na yi jun ajtzaꞌklaꞌtz na ben loꞌon chi taneꞌn txꞌam. Na kol quil cyenuꞌ yi jun yab ajtzaꞌklaꞌtz, chocopon tzunuꞌ-tz chi taneꞌn acꞌaj kꞌot yi quiꞌc muꞌẍ tal xtxꞌamil. Ko yaꞌtz chibanuꞌ choꞌn tzun ẍchibneꞌuꞌ chi yi pam yi quiꞌc xtxꞌamil yi na bajsij lak pasc.c Tajweꞌn tan cyajeꞌn cyen quiloluꞌ yi eꞌchk yab ajtzaꞌklaꞌtz na bintzinin ja wiꞌt quim yi ketz kacneꞌr tetz pasc, iꞌtz yi Cristo.d
8 Chaꞌstzun te, chin tajweꞌn cunin tan cyajeꞌn cyen kilol eꞌchk ajtzaꞌkl cachiꞌ tu yi eꞌchk takleꞌn cachiꞌ yi nkaban cyen. Na yi eꞌchk ajtzaꞌklaꞌtz, niꞌcuꞌn tu txꞌam. Kabneꞌ bin yi kamunl swutz Ryos cyakil nin kꞌej chi yaꞌstzunk kꞌejlal pasc. Kaxconseꞌ yi pam yi quiꞌc xtxꞌamil, yi iꞌtz jun jilwutz ajtzaꞌkl yi quiꞌc paltil, yi jicyuch teꞌj.
9 Ma jaluꞌ benak intzꞌibal scyeruꞌ tul jun uꞌj tan quiꞌt chixomeꞌn cyenuꞌ scyeꞌj yi eꞌ aj xnaꞌninl nka aj yajinl. 10 Poro yi na elepont inyol iꞌtz yi quiꞌc cu tan kaxomeꞌn cyen scyeꞌj yi jun jilwutz wunakaꞌtz yi ko na cyocsaj quib creyent. Qui na jop yi eꞌ yi quiꞌc na cyocsaj. Na yi ik yi quiꞌc cu tan kaxomeꞌn te jun alkꞌom, nka jun yi na mejeꞌ swutz eꞌchk takleꞌn yi banij tuꞌ taneꞌn, tajweꞌn tzun kloꞌ tan keleꞌn tcꞌuꞌl yi munteꞌj. Na chin tajweꞌn cunin kaꞌtij ẍchixoꞌl yi eꞌ wunakaꞌtz, na cyakil wunak yaꞌstzun quitaneꞌn.
11 Ma jaluꞌ, tzintzꞌibeꞌ nin scyeruꞌ yi clar cunin, quiꞌt cyamiwi quibuꞌ tu jun yaj yi na tocsaj tib kajwutz ko wiꞌtz bnol tetz, nka txkantzaj nink na taj, nka na mejeꞌ cyen swutzak eꞌchk takleꞌn yi banij quitaneꞌn, nka aj jisonl, nka kbarel, nka alkꞌom. Quiꞌt cyamiwi quibuꞌ nin quil chiwanuꞌ tuchꞌ. 12 Quiꞌc cu tan koqueꞌn tan pujleꞌn chixoꞌl yi eꞌ yi qui na cyocsaj, poro yi ketz kamunl iꞌtz tan pujleꞌn chixoꞌl yi eꞌ yi na cyocsaj.
13 Yi eꞌ yi qui na cyocsaj, Ryos lpujun chixoꞌl cyeraꞌtz. Chilajlen binuꞌ yi jun juchul ilaꞌtz yi at ẍchixoꞌluꞌ.