Qui na yub yi kol kaben tan xtisyaꞌiꞌn ẍchiwutz yi eꞌ yi quiꞌc na cyocsaj
6
1 I bin jaluꞌ, at eꞌ ẍchixoꞌluꞌ yi na choyintzin squibil quib, nin na chiben ẍchiwutz yi eꞌ yi qui na cyek ẍchiꞌ Ryos. Qui peꞌ na el chitxum tetz yi wiꞌnin xtxintxal ko yaꞌtz na chibanuꞌ? ¿Mbi tzuntz yi qui na chibenuꞌ ẍchiwutz kajwutz tan pujleꞌn chixoꞌluꞌ? 2 ¿Na qui peꞌ na el chitxumuꞌ tetz: Yil tzꞌul tzaj Kajcaw, kocopon yi oꞌ, yi xansaꞌnchoꞌt tan chicaweꞌn yi eꞌ mas wunak wi munt? Ej nin kol kacawun scyeꞌj yi eꞌ wunakaꞌtz, ¿qui ptzun kaxcyeꞌ-tz tan pujleꞌn yi eꞌchk takleꞌn tal juy yi na jal skaxoꞌl jaluꞌ?3 Nchaꞌtz ¿qui peꞌ na el chitxumuꞌ tetz yi kocopon tan pujleꞌn chixoꞌl yi eꞌ ángel? Yi ko yaꞌtz, ¿qui ptzun kaxcyeꞌ-tz tan pujleꞌn xoꞌl yi eꞌchk takleꞌn yi na jal skaxoꞌl ketz jaluꞌ? 4 ¿Nxac na chibenuꞌ ẍchiwutz yi eꞌ yi nkꞌeꞌtz eꞌ kajwutz?
5 Na chintzan tan talcheꞌn yi xtxolbileꞌj scyeruꞌ tan chitxꞌixweꞌnuꞌ. ¿Quiꞌc peꞌ jun kajwutz yi baꞌn xcyeꞌ tan pujleꞌn chixoꞌluꞌ? ¿Quiꞌc ptzun jun ẍchixoꞌluꞌ yi at muꞌẍ tajtzaꞌkl? 6 Poro yi na choyintzinuꞌ squibil quibuꞌ, choꞌn na chibenuꞌ tan pujleꞌn xoꞌl ẍchiwutz yi eꞌ yi qui na cyocsaj yol Kataj.
7 Poro jun cuꞌn yol, tan tuꞌ yi at eꞌchk oyintziꞌ ẍchixoꞌluꞌ na ẍchaj yi ja wiꞌt chitxꞌakxijuꞌ. ¿Mbi tzuntz yi nink nchimucꞌuꞌ yi eꞌchk oyintziꞌ yi na bajij scyeꞌjuꞌ? Nin ¿nxac qui na chitxꞌajuꞌ? Ej nin ko na el majij jun takleꞌn scyeruꞌ, ¿nxac qui na chimucꞌuꞌ? 8 Poro yi eꞌ cyeruꞌ, ntin oyintziꞌ na chibanuꞌ. Nin eꞌ teꞌnuꞌ na chipoꞌtzaj quibuꞌ squibil quibuꞌ.
9 ¿Qui peꞌ na el chitxumuꞌ tetz, yi eꞌ aj oyintziꞌinlaꞌtz quiꞌc cyopombil cyeraꞌtz te Ryos? Na yi eꞌ wiꞌtz bnol tetz, scyuchꞌ yi eꞌ yi na chimejeꞌ quen swutz yi eꞌchk takleꞌn yi banij tuꞌ taneꞌn, scyuchꞌ yi eꞌ jopol wutzaj, scyuchꞌ yi eꞌ yaj yi na chixconsaj quib squibil quib chi na xcon jun xnaꞌn, quiꞌc cyopombil cyeraꞌtz te Ryos.
10 Nchaꞌtz yi eꞌ alkꞌom, scyuchꞌ yi eꞌ txkantzaj nink na cyaj, scyuchꞌ yi eꞌ kbarel, scyuchꞌ yi eꞌ aj jisonl, scyuchꞌ yi eꞌ subul nak, cyakil yi eꞌaꞌtz quiꞌc cyopombil cyeraꞌtz te Ryos.
11 Ej nin at jujuntz ẍchixoꞌluꞌ yi yaꞌtz banakeꞌ. Poro yi jaluꞌ, ja wiꞌt chitxꞌaj quibuꞌ. Nin ja wiꞌt chixansijuꞌ. Ej nin ja wiꞌt choꞌcuꞌ chi quitaneꞌn yi eꞌ yi quiꞌct cyetz quil. Yaꞌtz tzun chibanuꞌ tan tuꞌ yi mbi cuꞌn banak Kajcaw Jesús, nin tan yi porer yi Espíritu yi kaRyosil.
Quil kapoꞌtzaj kawankil na tetz Cristo
12 Ma jaluꞌ je junt xtxolbileꞌj: At eꞌ yi na cyal yi baꞌn chiban yi eꞌchk takleꞌn yi na cyaj. Baꞌn, poro at eꞌchk takleꞌn yi quiꞌc xtxicbaj sketz. Baꞌn lkaban yi eꞌchk takleꞌnaꞌtz, poro yi wetz, quil wakꞌ amaꞌl tetz jun eꞌchk takleꞌn tan toqueꞌn tan incaweꞌn.
13 Chi taneꞌn kawaꞌ. At eꞌ na cyal: “Yi kawaꞌ iꞌtz tetz kacꞌuꞌl, nin yi kacꞌuꞌl iꞌtz tetz kawaꞌ. ¿Mbi tzun kililtz teꞌj kol baj alchok eꞌchk takleꞌn kaꞌn?” cheꞌch. Bintzinin quiꞌc kil teꞌj, poro ilenin xitok yi kacꞌuꞌl tu kawaꞌ tan Ryos. Poro apart yi munl yi kawankil. Na nkꞌeraꞌtz xac tan xnaꞌniꞌn nka yajiꞌn. Ma na iꞌtz tan xconeꞌn tetz Kajcaw. Na yi tajbil Kajcaw iꞌtz yil kakꞌ kawankil tan xconeꞌn tetz iꞌ. 14 Nin yi iꞌ tetz xconk tan claxeꞌn kawankil. Na tzantzaj tzꞌocopon Ryos tan jeꞌseꞌn tzaj kawankil ẍchixoꞌl almaꞌ chi banak iꞌ tan jeꞌseꞌn tzaj yi wankil Cristo ẍchixoꞌl almaꞌ.
15 ¿Qui ptzun na el chitxumuꞌ tetz, yi kawankil banijt tan xconeꞌn tetz Cristo? Ko yaꞌtz ¿baꞌn ptzun ko lquicyꞌajeꞌl tzajuꞌ chiwankiluꞌ tkꞌab Cristo tan beneꞌn cyakꞌoluꞌ tkꞌab jun wiꞌtz bnol tetz? Qui na yub. 16 Na ¿qui peꞌ na el chitxumuꞌ tetz, yi alchok scyetz yi na chiwitbej quib tu jun wiꞌtz bnol tetz, junit chiwankil na ban? na yaꞌstzun tzꞌibaꞌnt cyen le tuꞌj Kataj.a 17 Poro yi na tokꞌbej tib jun tu Cristo, junit cyajtzaꞌkl na ban.
18 Quil cyen binuꞌ yi yajiꞌn tu xnaꞌniꞌn. Na yi eꞌ aj yajinl, nka yi eꞌ aj xnaꞌninl, eꞌ teꞌn na chipoꞌtzan chiwankil. 19 ¿Qui peꞌ na el chitxumuꞌ tetz, yi kawankil yaꞌstzun yi caꞌlil yi Espíritu Sant yi najlij tetz kalmaꞌ? Na akꞌij sketz tan Kataj. Nin nkꞌeꞌtz ketz, ma na tetz Ryos. 20 Na lokꞌij nkuꞌlij tan jun takleꞌn, yi wiꞌnin walor.b Kakꞌeꞌ bin kib tetz cuꞌn kalmaꞌ tan takꞌleꞌn kakꞌajsbil tetz Ryos. Na oꞌ cuꞌn tetz iꞌ.