Yi xtxolbil tetz okꞌbeꞌn ib
7
1 Ma jaluꞌ, swaleꞌ nin scyeruꞌ te yi xtxolbil yi nchijakuꞌ swetz tul yi uꞌj yi ulnak tinkꞌab. Baꞌn ko quil tzꞌumeꞌ jun yaj. 2 Poro, tan qui juchul til baꞌn tcuꞌn yil tzꞌoc txkel jun yaj nin baꞌn tcuꞌn yil tzꞌoc chmil jun xnaꞌn. 3 Baꞌn cyakꞌ quib yi eꞌ yaj tetz quixkel, nin baꞌn cyakꞌ quib yi eꞌ xnaꞌn tetz quichmil. 4 Na qui na yub kol lmak xnaꞌn yi tajbil yi chmil, nin qui na yub kol lmak jun yaj yi tajbil yi txkel. Na tetz yaj yi wankil yi txkel, nin nchaꞌtz tetz yi xnaꞌn yi wankil yi chmil. 5 Baꞌn tcuꞌn quil chimak quib squibil quib. Ntin kol tzꞌoc chiyol teꞌj yil choꞌc tan nachleꞌn Kataj tetz cobox kꞌej. Poro yil tzꞌel tol yi tiemp yi mbixeꞌ cyaꞌn baꞌn tzun quilt quib tan qui cyakꞌol amaꞌl tetz Baybaꞌn tan chipitleꞌnin tul il. 6 Poro yi xtxolbileꞌj yi na intzꞌib nin scyeruꞌ iꞌtz tan takꞌleꞌn jun cyajtzaꞌkluꞌ, nkꞌeꞌtz tan chicaweꞌnuꞌ. 7 Poro le wutz wetz wajtzaꞌkl, baꞌn tcuꞌn kloꞌ yi choꞌnk quitaneꞌnuꞌ chi wutaneꞌn wetz. Na yi in wetz quiꞌc wetz wuxkel. Poro bintzinin apart len kajtzaꞌkl yi akꞌijt tan Ryos. Apart tajtzaꞌkl jun, nin apart tetz yi junt.8 Chaꞌstzun te tzinwutz wetz, yi axwok yi quiꞌc itxkel nin quiꞌc ichmil, baꞌn tcuꞌn kloꞌ yi choꞌnk tzibanwok chi wutaneꞌn wetz. 9 Poro ko quil tzitxꞌaj, baꞌn tcuꞌn tzitokꞌbej itib. Baꞌn tcuꞌn yi okꞌbeꞌn ib swutz yi tu na sotz tuꞌ icꞌuꞌl.
10 Ma jaluꞌ, chin cawunk scyetz yi eꞌ yi ja wiꞌt cyokꞌbej quib. Poro nkꞌeꞌtz in chincawunk, ma na Kajcaw. Quiꞌc cu tan cyajeꞌn cyen chipaxil yi eꞌ xnaꞌn quichmil. 11 Poro kol chipax cyen yi eꞌ xnaꞌn quichmil, quiꞌc cu yil cyokꞌbej quib tu junt, ntin kol chimoxt quib tu cyetz quichmil. Nchaꞌtz yi eꞌ yaj, quiꞌc cu tan cyajeꞌn cyen chipaxil yi quixkel.
12 Ma jaluꞌ katxumeꞌ yi eꞌ mas yi umnakeꞌ te yi ntaxk cyocsaj poro nkꞌeꞌtz Kajcaw na aꞌlon, ma na in na chintzan tan talcheꞌn scyeruꞌ. Ko at jun kajwutz yi nkꞌeꞌtz creyent yi txkel, nin qui na taj xnaꞌn yi paxeꞌn, baꞌn tcuꞌn quil chijatx quib. 13 Nchaꞌtz ko at jun xnaꞌn yi nkꞌeꞌtz creyent yi chmil, nin qui na taj yaj paxeꞌn, baꞌn tcun quil chijatx quib. 14 Na ko nkꞌeꞌtz creyent yi yaj, ilenin at banl Kataj squibaj na cyokꞌbeꞌn quib. Na tan tuꞌ yi creyent yi xnaꞌn, at banl Kataj squibaj. Nchaꞌtz mpe ik yi xnaꞌn yi qui na tocsaj, stkꞌeꞌ Kataj banl squibaj na cyokꞌbeꞌn quib. Ma yi quiꞌk quiꞌc kloꞌ banl Kataj squibaj chinitxaꞌ. 15 Poro ko na taj paxeꞌn yi jun yi qui na tocsaj, baꞌn chipax. Baꞌn scujij yi kajwutz, na cyaꞌl na talwit yi quiꞌck cu teꞌj. Na yi tajbil Ryos iꞌtz tan jaleꞌn tzatzin paz te talmaꞌ yi creyent. 16 Na qui ilij tan yi xnaꞌn mi pe sclaxk yi chmil taꞌn. Nin nchaꞌtz yi yaj, qui ilij taꞌn mi pe sclaxk yi txkel taꞌn.
17 Baꞌn tcuꞌn kaxomok quen tuꞌ te yi akꞌij sketz skajunal tan Kajcaw. Nin kaxomok quen tuꞌ teꞌj yi ẍeꞌn kutaneꞌn yi kajeꞌn xtxaꞌol Ryos. Yaꞌstzun caꞌwl na wakꞌ scyetzak cyakil yi eꞌ cmon creyent.
18 Na ko ja jeꞌ xtxaꞌol Ryos jun yi banijt circuncidar, baꞌn atit chi taneꞌn iꞌ. Poro ko ja jeꞌ xtxaꞌol Ryos junt yi qui banijt circuncidar, quiꞌc na ban. Qui tajweꞌn tan bnol circuncidar tib. 19 Na ko banij circuncidar jun, quiꞌc na takꞌ swutz Ryos. Nchaꞌtz ko qui banij circuncidar, quiꞌc na takꞌ swutz Ryos. Yi mas tajweꞌn iꞌtz yil kaban taneꞌn yi eꞌchk caꞌwl Ryos. 20 Kacuk cuntuꞌ-tz chi kutaneꞌn yi kajeꞌn xtxaꞌol Ryos.
21 Nchaꞌtz yi ko at jun yi esclaw yi jeꞌn txaꞌij tan Ryos, baꞌn tcuꞌn quil bisun taꞌn. Poro kol tzꞌakꞌlij amaꞌl tetz tan teleꞌn liwr, baꞌn tzꞌel liwr. 22 Na yi ko esclaw jun creyent tkꞌab junt yaj yi ntaxk jeꞌ xtxaꞌol Kajcaw, quiꞌc na ban, na yi mas tajweꞌn iꞌtz yi ja wiꞌt el liwr tkꞌab Baybaꞌn tan Cristo. Ma yi eꞌ yi nkꞌeꞌtz eꞌ esclaw yi njeꞌ xtxaꞌol Kajcaw, at cyetz cyaw jaluꞌ, nin iꞌtz yi Cristo. 23 Na lokꞌij nkuꞌlij tan jun takleꞌn yi at wiꞌnin walor. Chaꞌstzun te quiꞌt koꞌc jakꞌ caꞌwl junt wunak tan banleꞌn yi tetz tajbil. 24 Na quib yi kutaneꞌn yi kajeꞌn xtxaꞌol Kataj Ryos, i nin lkabanaꞌstz tkꞌab iꞌ.
25 Ma jaluꞌ swaleꞌ jun xtxolbil scyetz yi eꞌ yi txeꞌn bixeꞌ chiyol tan cyokꞌbel quib. Quil wal yi Ryos mmakꞌon yi caꞌwleꞌj swetz. Ma na iꞌtz wetz wajtzaꞌkl cuntuꞌ. Poro baꞌn chixomuꞌ teꞌj na akꞌijt wajtzaꞌkl tan Kajcaw. 26 Je yi wajtzaꞌkleꞌj: Tan paj yi qꞌuixcꞌuj yi atoꞌ tkꞌab jaluꞌ, baꞌn tcuꞌn quil cyokꞌbej quibuꞌ. 27 Poro yi ko at eꞌ yi ja wiꞌt bnix chitrat tan cyokꞌbel quib, baꞌn tcuꞌn cheꞌlk cuꞌn te chiyol. Poro ko at eꞌ yi quiꞌc chitrat baꞌn tcuꞌn quil chitxum yi okꞌbeꞌn ib. 28 Poro ko na cyaj okꞌbeꞌn ib, quiꞌc quil teꞌj. Nchaꞌtz yi eꞌ xun, kol cyokꞌbej quib, quiꞌc quil teꞌj. Ma na ntin ẍchitijeꞌ qꞌuixcꞌuj. Poro yi wetz wajbil iꞌtz yi qui kloꞌ chitij qꞌuixcꞌuj.
29 Poro eꞌuꞌ wajwutz, yi mero bintzi iꞌtz: Yi quiꞌct ampon tiemp tetz yi tulbil Jesucristo. Chaꞌstzun te yi eꞌ yi at quixkel, nkꞌeꞌtz yi jalt nink quixkel choꞌc tan xtxumleꞌn. 30 Nchaꞌtz yi eꞌ yi na chibisun, nkꞌeꞌtz yi jalt nink bis choꞌc tan xtxumleꞌn. Nin yi eꞌ yi na chitzatzin, nkꞌeꞌtz yi jalt nink yi tzatziꞌn choꞌc tan xtxumleꞌn. Nin yi eꞌ yi ja chilokꞌ jun takleꞌn, nkꞌeꞌtz yi jaltaꞌtz nink choꞌc tan xtxumleꞌn. 31 Na cyakil yi eꞌ yi choꞌn ajlij chicꞌuꞌl te yi eꞌchk takleꞌn tetz tzoneꞌj wi munt, baꞌn tcuꞌn yi quil kꞌukeꞌ chicꞌuꞌl teꞌj, na sotzok teraꞌtz.
32 Na yi wetz wajbil iꞌtz yi quil sotz chicꞌuꞌluꞌ te yi eꞌchk takleꞌn tetz tzoneꞌj wi munt. Na yi eꞌ yi quiꞌc quixkel, at mas amaꞌl scyetz tan chixconeꞌn tetz Kataj. 33 Poro yi eꞌ yi at quixkel, at na ban cuꞌnt yi ntin na chitzan tan xtxumleꞌn yi eꞌchk takleꞌn xe chinajbil, tan tzatzineꞌn quixkel scyeꞌj. 34 Nchaꞌtz taneꞌn jun xnaꞌn yi at chmil. Poro yi eꞌ yi quiꞌc quichmil, at mas amaꞌl scyetz tan chixconeꞌn tetz Kajcaw. Poro yi eꞌ xnaꞌn yi at quichmil wiꞌnin tajweꞌn tan chibnol scyuchꞌak tan stzatzineꞌn quichmil scyeꞌj.
35 Yi jun xtxolbilaꞌtz yi ja wiꞌt wal scyeruꞌ, iꞌtz tan takꞌoneꞌn baꞌn scyeruꞌ. Nin nkꞌeꞌtz tan cuꞌseꞌn jun peꞌm ẍchiwutzuꞌ, na yi wetz wajbil iꞌtz tan chixomeꞌnuꞌ te yi balaj ajtzaꞌkl bantz cyakꞌol quibuꞌ tan chixconeꞌnuꞌ tetz Ryos.
36 Nchaꞌtz ko at jun yaj yi le wutz yi tetz tajtzaꞌkl cachiꞌ na ban tan paj yi qui na cyokꞌbej quib tu yi trat, nin ko ja balkꞌij tiemp yi xun, nin yi ko ja xtxum yi xun yi baꞌn tzꞌoc chmil, quiꞌc quil teꞌj yi kol cyokꞌbej quib.a 37 Poro ko at jun yaj yi tetz cuꞌn talmaꞌ yil bixeꞌ taꞌn tan qui toqueꞌn txkel, nin yi qui na cabej cꞌuꞌl iꞌ, baꞌn atit. 38 Baꞌn atit kol chumeꞌ. Poro mas balaj yi ko quiꞌ.
39 Ko at chmil jun xnaꞌn quiꞌc cu tan cyajeꞌn cyen paxil. Poro kol quim yi chmil at tzun rmeril tan beneꞌn stzaꞌwel junt chmil, poro tajweꞌn yi creyent. 40 Poro le wutz wetz wajtzaꞌkl, stzatzink mas iꞌ yi tuꞌk lcuꞌ tuꞌ-tz. Ej nin tzinwutz wetz at yi Espíritu Sant te walmaꞌ. Chaꞌstzun te baꞌn na imban yi na wal nin yi xtxolbilaꞌtz scyeruꞌ.