Poꞌtiꞌch len jun kajwutz tan yi eꞌchk takleꞌn yi na kaban
8
1 Ma jaluꞌ katxumeꞌ yi junt xtxolbil yi nchijakuꞌ swetz te yi ko baꞌn baj ẍchiꞌbel chitxꞌixwatz wunak kaꞌn yi na akꞌlij scyetzak yi eꞌchk ryos yi banij cuntuꞌ taneꞌn. Bintzinin ja pujx cyanuꞌ yi nkꞌeꞌtz xan kol baj cyanuꞌ, poro tan tuꞌ yi cyajtzaꞌkluꞌaꞌtz, na cyocsaj quibuꞌ nim. Poro quil xcyeꞌ yi jun ajtzaꞌklaꞌtz tan kaquiwseꞌn, ma na ntin kol kachaj yi lokꞌ ib. 2 Poro ko at jun yi le wutz yi tetz tajtzaꞌkl yi at tajtzaꞌkl, yi mero bintzi iꞌtz yi quiꞌc tajtzaꞌkl. 3 Poro ko at jun yi na pekꞌ te Ryos na el xtxum Ryos tetz yi mbi na icyꞌ tcꞌuꞌl.4 Katxumeꞌ bin yi ko baꞌn kabajsaj yi ẍchiꞌbel jun txꞌixwatz yi ja oyij tetz jun ryos yi banij cuntuꞌ taneꞌn. Bintzinin, yi oꞌ ketz, ja el katxum tetz yi quiꞌc ekaꞌn tan yi eꞌchk ryosaꞌtz yi banij cuntuꞌ. Na ja el katxum tetz yi jun ntziꞌ Ryos at. 5 Bintzinin wiꞌnin eꞌchk takleꞌn at tcyaꞌj nin at wuxtxꞌotxꞌ yi eꞌ cuꞌn ryos taneꞌn ẍchiwutz wunak, na at jun cꞌoloj chiryosil nin jun cꞌoloj cyajcaw. 6 Poro skawutz ketz, jun ntziꞌ Ryos at, iꞌtz yi Kataj Ryos. Ej nin iꞌ txumul tetz cyakil, tuml yi oꞌ ketz. Nchaꞌtz jun ntziꞌ Ajcaw at, iꞌtz Jesucristo, yi bnol tetz cyakil yi eꞌchk takleꞌn, tuml yi oꞌ ketz.
7 Poro nkꞌeꞌtz cyakil kajwutz yi at yi jun ajtzaꞌklaꞌtz le chiwiꞌ, na at eꞌ yi na cyocsaj yi at quil teꞌj kol chibajsaj yi ẍchiꞌbel yi eꞌchk txꞌixwatzaꞌtz. 8 Poro quil xcyeꞌ yi eꞌchk takleꞌn yi na kabajsaj tan takꞌleꞌn mas kakꞌej swutz Ryos. Iẍkaj nintzunk jal mas kakꞌej taꞌn kol kabajsaj. Ej nin nchaꞌtz ko quil kabajsaj, quil jal kakꞌej taꞌn. 9 Poro or quiluꞌ yi cyajtzaꞌkluꞌ, yi nkꞌeꞌtz xan yil baj yi chiꞌbajaꞌtz cyanuꞌ. Xconiꞌch len tan chipoꞌtzeꞌn yi eꞌ yi txeꞌn chiquiwix. 10 Na at loꞌ eꞌ chixoꞌluꞌ yi ja pujx cyaꞌn yi quiꞌc quil teꞌj kol chibajsaj yi chiꞌbaj yi na akꞌlij tetz jun ryos yi banij cuntuꞌ taneꞌn. Poro kol til nin junt creyent, yi txeꞌn quiwix, yi na chitzan yi eꞌaꞌtz tan bajseꞌn yi jun chiꞌbajaꞌtz xe caꞌl jun ryos, ¿qui peꞌ lquiwix cꞌuꞌl tan bajseꞌn muꞌẍ tetz, mpe xank swutz iꞌ? 11 Poꞌtiꞌch len yi jun kajwutzaꞌtz tan paj cyajtzaꞌkluꞌ. Wech iꞌ jun kajwutz yi ja quim Cristo tan colpeꞌn. 12 Ej nin kol chipoꞌtij yi eꞌ kajwutz yi txeꞌn chiquiwix tan paj yi na chixom te cyeruꞌ cyajtzaꞌkluꞌ, iꞌtz jun cyektzuꞌ. Na ja chijuchuꞌ quiluꞌ swutz Cristo. 13 Chaꞌstzun te kol poꞌtij jun kajwutz tan paj yi na baj jun eꞌchk takleꞌn waꞌn, quiꞌt tzun tzimbajsajtz sbneꞌ opon tunintz, na qui na waj yi ik tan impaj yil poꞌtij jun wajwutz yi txeꞌn quiwix tkꞌab Kataj. Chaꞌstzun te na inmak wib te eꞌchk takleꞌnaꞌtz.