Na ẍchaj Pawl yi bintzinin na xom te jun ajtzaꞌklaꞌtz
9
1 Ma jaluꞌ, in apostl, nin at cu tan imbnol yi eꞌchk takleꞌn chi na chiban yi eꞌ mas apostl. Na nchaꞌtz in, wilnak wutz Kajcaw Jesús. Nin tan in nchoꞌqueꞌtuꞌ tkꞌab Kajcaw. 2 Mpe atk eꞌ yi na cyal yi nkꞌeꞌtz in apostl, quiꞌc rmeril yi yaꞌtzk cyal cyeruꞌ, na ja chinxcon tan Ryos tan cyocseꞌnuꞌ tkꞌab iꞌ. Yi in wetz at rmeril tan imbnol quib yi na chiban yi eꞌ mas apostl. Poro qui na imban.3 Chaꞌstzun te tzincoleꞌ wib ẍchikꞌab yi eꞌ yi na chitzan tan inyolcheꞌn. 4 Iẍkaj quiꞌc tzunk cu tan inwaneꞌn te yi inmunl na in apostl. 5 Iẍkaj quiꞌck tzunk cu tan toqueꞌn wuxkel chi quitaneꞌn yi eꞌ mas apostl, scyuchꞌ yi eꞌ titzꞌun Kajcaw, nin chi taneꞌn Luꞌ. 6 Nka ¿ntin ptzun oꞌ ketz tu Bernabé yi quiꞌk cu tan cyajeꞌn quen kilol yi kakꞌun tan kabeneꞌn tan xtxoleꞌn yol Kataj? 7 Na quiꞌc nin jun yaj yi na ben tan sanlariꞌn yi nak cꞌaꞌchaj tib ẍchuc. Nin cyaꞌl atit jun yaj yi na oc tujul yi quiꞌk na wan te yi takꞌun. Nin cyaꞌl atit jun yi ateꞌ wacẍ yi quiꞌk na baj muꞌẍ tetz taꞌn te yi lech.
8 Ej nin nkꞌeꞌtz ntin cyajtzaꞌkl wunak na xcon waꞌn tan xiteꞌn chiyol yi eꞌ incontraꞌtz, na at xeꞌ yi inyol le ley Moisés. 9 Na je na tal yi ley yi tzꞌibaꞌnt cyen tan Moisés: “Quiꞌc cu tan toqueꞌn jun sam te chitziꞌ yi eꞌ wacẍ yi na choꞌc tan bujleꞌn triw.” Nin nkꞌeꞌtz ntin yi eꞌ wacẍ na tzan Ryos tan chitxumleꞌn, 10 ma na nchaꞌtz yi oꞌ ketz yi oꞌ yi na kakꞌuj te takꞌun Kataj. Na kol tzꞌoc jun yaj tan akꞌun wi txꞌotxꞌ, at ẍchꞌiw iꞌ te ẍchojoꞌn. Nchaꞌtz yi na oc jun tan bujleꞌn triw, at ẍchꞌiw tan cambal muꞌẍ tetz teꞌj. 11 Niꞌcuꞌn tzun oꞌ ketz, na katzan tan xtxoleꞌn yol Kataj scyeruꞌ, ¿quiꞌc ptzun loꞌ cu tan kacambal muꞌẍ ẍchꞌeybil ketz scyeꞌjuꞌ? At. 12 Yi ko akꞌij chiwaꞌ yi eꞌ mas aj txolinl cyanuꞌ, pyor tzun kloꞌ yi oꞌ kestz.
Poro quiꞌc cunin jun tir yi jajk intzꞌam muꞌẍ tal ẍchꞌeybil wetz scyeruꞌ. Ma na muqꞌuij cuntunintz waꞌn, na qui na waj yi nink makxij yi balaj stziblal tetz Cristo tan tuꞌ yil tzintzꞌam eꞌchk ẍchꞌeybil wetz scyeꞌruꞌ. 13 Poro elnak chitxumuꞌ tetz, yi eꞌ yi na chiban chimunl le caꞌl Ryos choꞌn na chiwan cyeraꞌtz te eꞌchk oy yi na opon cyaꞌn wunak. Nchaꞌtz yi eꞌ yi na chakꞌuj tan pateꞌn yi eꞌchk chitxꞌixwatz wunak, na chiwan teꞌj.
14 Ej nin talnak Kajcaw jun xtxolbil, iꞌtz, yi eꞌ yi na chakꞌuj tan xtxoleꞌn yi balaj stziblal, baꞌn chiwantz teꞌj. 15 Poro yi in wetz, cyaꞌl cunin mintzꞌam wit jun jilwutz chꞌeybil wetz. Nin qui na chintzan tan stzꞌibeꞌn nin yi xtxolbileꞌj tan cyakꞌoluꞌ pwok swetz. Baꞌn tcuꞌn chinquim swutz yi nink xit yi jun tzatzin yi at swetz tan tuꞌ yi na chintzan tan xtxoleꞌn yi balaj stziblal oy tuꞌ.
16 Poro nchaꞌtz quil wocsaj wib nim tan tuꞌ yi na chintzan tan xtxoleꞌn yi jun balaj stziblalaꞌtz, na elnak intxum tetz yi chin tajweꞌn cunin tan intxolil. Lastum in ko quil tzintxol yi balaj stziblal. 17 Na ik yi wajbil tuꞌk yi na chintzan tan xtxoleꞌn, tzinjakeꞌ tzun kloꞌ inchojoꞌntz. Poro tan tuꞌ yi ja chincawij tan woqueꞌn tan xtxoleꞌn, chaꞌstzun na chintzan tan banleꞌn taneꞌn. 18 ¿Mbiꞌtz inchojoꞌn jaluꞌ? Yi wetz inchojoꞌn jaluꞌ iꞌtz yi na takꞌ tzatzin swetz yi qui na chintzan tan jakleꞌn ẍchꞌeybil wetz yi na chintzan tan xtxoleꞌn yi balaj stziblal scyetz wunak.
Ja tamiwij tib Pawl scyuchꞌ cyakil jilwutz wunak tan chicambajeꞌn tetz Cristo
19 Chaꞌstzun te, ja neꞌl liwr jakꞌ chicaꞌwl eꞌ wunak, poro ja noꞌc chi quitaneꞌn alchok jilwutz wunak tan incambal cobox tan cyoqueꞌn tkꞌab Cristo. 20 Je na wulejeꞌj te yi atin ẍchixoꞌl yi eꞌ judiy na wocsaj wib chi quitaneꞌn yi eꞌ judiyaꞌtz tan cheꞌ incambal tetz Cristo. Na te yi atin ẍchixoꞌl yi eꞌ yi na chixom te yi ley Moisés qui na noꞌyintzin scyuchꞌ, na na waj tan cheꞌ incambal tan chixomeꞌn te yi balaj stziblal. 21 Nchaꞌtz te yi atin ẍchixoꞌl yi eꞌ yi qui na chixom te chiley yi eꞌ judiy, nchaꞌtz in qui na chinxom te yi chiley yi eꞌ judiy. Poro ilenin atin jakꞌ caꞌwl Ryos na atin jakꞌ caꞌwl Cristo. Yaꞌstzun na imban, na na waj yil chixom yi eꞌ wunakaꞌtz te yi balaj stziblal tetz Jesucristo. 22 Nchaꞌtz qui na cheꞌ inxux yi eꞌ creyent yi eꞌ cotxcoj, na yi wajbil iꞌtz tan chiquiwixeꞌn. Na bin wocsaj wib chi quitaneꞌn cyakil jilwutz wunak bantz chiclaxeꞌn jujun ẍchixoꞌl. 23 Tzinwutz wetz, chumbalaj nin yi balaj stziblal, chaꞌstzun te na imban cyakil yi eꞌchk xtxolbilaꞌseꞌj, tan kaclaxeꞌn scyuchꞌuꞌ.
Skaquiwixk tkꞌab Kataj kol kamak kib te eꞌchk takleꞌn yi na xcyeꞌ tan poꞌtzeꞌn junt
24 Ja wiꞌt el chitxumuꞌ tetz, yi cyakil yi eꞌ yi na choꞌc tan pil ib te jun ojkeꞌl, tircuꞌn eꞌ na choꞌjkel, poro jun ntziꞌ yi na txꞌacon scyetz. Nchaꞌtz oꞌ ketz baꞌn yi nink kabuch kib tan katxꞌaconeꞌn te yi itzꞌajbil yi quinin bajsbeꞌn tetz. 25 Cyakil yi eꞌ yi na cyaj choꞌc tan pil ib tan ojkeꞌl, na chiqꞌuicyꞌlej quib. Yaꞌstzun na chiban tan chitxꞌaconeꞌn, bantz jaleꞌn chikꞌej. Poro yi chikꞌej yi na chicambaj iꞌtz tetz cobox ntziꞌ kꞌej na sotzok teraꞌtz. Ma yi oꞌ ketz yi na koꞌjkel teꞌj, iꞌtz tan kacambal yi jun oy yi quil sotz.
26 Ma yi in wetz yi na noꞌjkel, ntin na chinxmayinin kale atit wupombil. Iꞌtz te Ryos yi at tziꞌn tcyaꞌj. Ej nin je junt elsawutzileꞌj: Na quiluꞌ yi na chipil quib cob yaj tan biyoꞌn ib tan chikꞌab. Nkꞌeꞌtz alchok tuꞌk na chinicyꞌ cyent yi chikꞌab, ma na, na chijoy puntil tan nojeꞌn quen te cyuchꞌ. Nchaꞌtz in na injoy puntil tan qui xtxꞌaconeꞌn yi eꞌchk takleꞌn cachiꞌ sweꞌj. 27 Yi in, na chintzan tan makleꞌn yi tajbil inwankil tan qui wukꞌol amaꞌl tetz tan banleꞌn yi eꞌchk takleꞌn cachiꞌ. Na lastum tuꞌ in yi ko in teꞌn tzimpoꞌtzaj wib. Wech na sken wiꞌt intxol yi balaj stziblal scyetzak wunak.