Baꞌn tcuꞌn quil tzꞌel nin kalmaꞌ te yi eꞌchk takleꞌn yi xcyek tan kapoꞌtzeꞌn chi banakeꞌ yi eꞌ aj Israel
10
1 Chaꞌstzun te, eꞌuꞌ wajwutz, yi wetz wajbil iꞌtz yi nink chinachonuꞌ te yi mbi banakeꞌ yi eꞌ kamam kateꞌ tentz. Na cyakil cuꞌn eꞌ ja chixon jakꞌ jun bocꞌoj sbakꞌ. Nin cyakil cuꞌn eꞌ ja chicyꞌ tcꞌuꞌl yi mar. 2 Nin cyakil eꞌ eꞌ bajij bautizar taneꞌn tan chichajol yi xomcheꞌ te ẍchusuꞌn Moisés. Na yi quicyꞌeꞌn tcꞌuꞌl yi mar, nin yi chixoneꞌn jakꞌ yi sbakꞌ, yaꞌstzun chibautism bantz. 3 Ej nin cyakil eꞌ, eꞌ wan te yi waj yi takꞌ Kataj scyetz. 4 Nin eꞌ ucꞌaꞌ lentz te yi aꞌ yi akꞌlij scyetz. Na eꞌ ucꞌaꞌ len te yi aꞌ yi eltzaj wutz cꞌub. Na yi jun cꞌubaꞌtz, yaꞌstzun jun elsawutzil tetz Cristo. Na xomij yi porer iꞌ scyeꞌj. 5 Poro ilenin at wiꞌnin eꞌ yi qui nin tzatzin Ryos scyeꞌj. Chaꞌstzun te eꞌ baj cuꞌ sotzal le amaꞌl tzꞌinunin tuꞌ.6 Yi xtxolbilaꞌseꞌj na xcon tan ẍchajleꞌn sketz yi baꞌn tcuꞌn quil tzꞌel nin kalmaꞌ te yi eꞌchk takleꞌn cachiꞌ chi banakeꞌ cyetz. 7 Xom ninch cyajtzaꞌkluꞌ te yi eꞌchk takleꞌn yi banij quitaneꞌn chi banakeꞌ yi eꞌ kamam kateꞌ, na tzꞌibaꞌnt cyen: “Yi wiꞌt chibnixeꞌn tan waꞌaꞌn, ja chiban yi cyetz cyajbil swutz yi teblal yi neꞌẍ wacẍ.”+\fr 10.7 \ft Ex 32.6. 8 Nchaꞌtz eꞌ oquiꞌchuꞌ tan xnaꞌniꞌn nka tan yajiꞌn chi banakeꞌ cyetz, na junit kꞌej eꞌ sotzeꞌn junak ox mil chixoneꞌn tan paj yi chijuchul quil. 9 Nchaꞌtz eꞌ oquiꞌchuꞌ tan pileꞌn Kajcaw chi banakeꞌ cyetz na quin tech nin eꞌ, eꞌ sotz tan lubaj.a 10 Nin eꞌ oquiꞌchuꞌ tan yolcheꞌn Kajcaw chi banakeꞌ cyetz, na nin eꞌ cuꞌ sotzal Ryos.b
11 Ej nin cyakil yi eꞌchk takleꞌn yi bajij scyeꞌj, iꞌtz jun techl tetz ketz. Na yi eꞌchk xtxolbilaꞌtz, tzꞌibaꞌnt cyen tetz ketz tan kabnol cwent kib. Na cyakil yi eꞌchk takleꞌn yi bnixnak sajleꞌn tunintz le xeꞌtzbil tzaj iꞌtz tan takꞌleꞌn jun kajtzaꞌkl. 12 Chaꞌstzun te, or quiluꞌ, na qui cunin batz chiloꞌonkuꞌ yi eꞌuꞌ yi na cyaluꞌ yi chin quiw nin eꞌuꞌ.
13 Poro, yi sajleꞌn tunintz quiꞌc pilbil cyeruꞌ yi quiꞌk micyꞌpon cyanuꞌ. Kꞌukek bin chicꞌuꞌluꞌ te Ryos, na na el cuꞌn iꞌ te tetz yol. Nin quil takꞌ amaꞌl scyeruꞌ tetz jun pilbil cyeruꞌ yi quiꞌk tzꞌicyꞌpon cyanuꞌ. Na ko na xon tzaj jun chumam pilbil cyeruꞌ, stkꞌeꞌ Ryos yi ẍchꞌeybil cyeruꞌ tan chimucꞌuluꞌ.
Eꞌ benchuꞌ tan waꞌaꞌn ẍchixoꞌl yi eꞌ yi na cyakꞌ kꞌej yi eꞌchk chiryosil yi banij tuꞌ taneꞌn
14 Chaꞌstzun te, yi eꞌuꞌ yi okꞌleꞌn chiwutzuꞌ waꞌn, swaleꞌ nin scyeruꞌ: Eꞌ benchuꞌ tan waꞌaꞌn ẍchixoꞌl yi eꞌ yi na cyakꞌ kꞌej yi eꞌchk chiryosil yi banij tuꞌ taneꞌn. 15 Bintzi, at cyajtzaꞌkl yi eꞌ yi na cyal yi nkꞌeꞌtz xan. Poro choꞌk binuꞌ tan xtxumleꞌn yi yoleꞌj.
16 Yi na kajak yi banl Kataj tibaj yi aꞌ yi at tul yi lak nin yi na kucꞌaj len, na ẍchaj sketz yi junit oꞌ tkꞌab Cristo, yi jun yi sajnak kojxuj yi ẍchꞌel.
Nchaꞌtz, yi na kapiẍ cuꞌn yi pam, na ẍchaj sketz yi junit oꞌ tkꞌab iꞌ. Na, loꞌonak yi tetz wankil tan kacolpeꞌn kacyakil cuꞌn. 17 Nin jun ntziꞌ pam na xcon kaꞌn. Nchaꞌtz kutaneꞌn ketz, jun ntziꞌ oꞌ mpe alaꞌ-k kaxoneꞌn. Na jun ntziꞌ pam na jatxlij skaxoꞌl.
18 Nchaꞌtz choꞌkuꞌ tan xtxumleꞌn yi ẍeꞌn quitaneꞌn yi eꞌ aj Israel yi choꞌn xomcheꞌ te yi antiw ley, yi eꞌ cyetz ja chibajsaj yi ẍchiꞌbel chitxꞌixwatz. Nin tan tuꞌ yi ja chibajsaj na elepont yi junit quitaneꞌn tu yi chiRyosil.
19 Poro tan yi yolaꞌseꞌj qui na chintzan tan talcheꞌn yi atk kꞌej yi chitxꞌixwatz tu chiryosil yi eꞌ wunak jaluꞌ. Quiꞌ. 20 Na nkꞌeꞌtz choꞌn na cyakꞌ chitxꞌixwatz tetz ketz kaRyosil, ma na choꞌn na cyakꞌ scyetz yi eꞌ espíritu cwent Baybaꞌn. Chaꞌstzun te bajiꞌch ẍchiꞌbel chitxꞌixwatz cyanuꞌ, na kol baj cyanuꞌ junit ẍchibneꞌuꞌ scyuchꞌ eꞌ espíritu cwent Baybaꞌnaꞌtz.
21 Chaꞌstzun te quiꞌc cu tan jeꞌn quicꞌajaluꞌ yi aꞌ yi na xcon tan tulseꞌn txꞌakx Kajcaw tkacꞌuꞌl, yi ko na chibenakuꞌ tan tcꞌajleꞌn yi xcꞌalaꞌ yi na xcon tan mayseꞌn chicꞌuꞌl yi eꞌchk chiryosil wunak. Quiꞌc rmeril tan chibajsaluꞌ yi pam yi na xcon tetz jun elsawutzil tetz yi wankil Kajcaw ko na chibenakuꞌ tan waꞌaꞌn kale na chitzanwit tan takꞌleꞌn chikꞌej yi eꞌchk ryos yi banij cuntuꞌ. 22 ¿Qui peꞌ lcyakax Kajcaw skeꞌj yi ko yaꞌtz na kaban? Scyakaxk. Ej nin ¿mas peꞌ at ketz kachamil swutz iꞌ? Quiꞌc rmeril.
23 Bintzinin at cu tan kabnol alchok eꞌchk takleꞌn, poro at eꞌchk takleꞌn yi quiꞌc na takꞌ sketz. At cu tan kabnol cyakil, poro nkꞌeꞌtz cyakil eꞌchk takleꞌn na xcyeꞌ tan kaquiwseꞌn. 24 Qui bin chibanuꞌ ntin yi cyeruꞌ cyajbiluꞌ, ma na chijoyeꞌuꞌ puntil tan chiquiwseꞌn yi eꞌ mas kajwutz.
25 Chaꞌstzun te yi na chilokꞌuꞌ chiꞌbaj lakak carniceꞌr, chijakiꞌchuꞌ yi ko ja xcon yi ẍchꞌel tetz chitxꞌixwatz wunak. Na ko qui na quibituꞌ yi ja xcon yi ẍchꞌel tetz chitxꞌixwatz wunak qui tzun ltakꞌ bis scyeruꞌ, 26 na tetz Ryos cyakil jilwutz chiꞌbaj tu cyakil eꞌchk takleꞌn yi at wuskil. Nin quil jal kil kol baj kaꞌn.
27 Nchaꞌtz kol tzꞌaꞌlchij jun waꞌaꞌn scyeruꞌ tan jun yi nkꞌeꞌtz creyent, quiꞌc na ban. Baꞌn chibenuꞌ. Nin baꞌn chiwanuꞌ-tz te yi mbi tzꞌakꞌlij scyeruꞌ. Tin tuꞌ chijakiꞌchuꞌ yi ko ja xcon yi ẍchꞌel tetz chitxꞌixwatz. 28 Poro ko at jun kajwutz tzꞌaꞌlon tetz, yi ja xcon yi ẍchꞌel tetz chitxꞌixwatz, baꞌn tcuꞌn quil chibajsajuꞌ bantz qui cyakꞌoluꞌ bis tetz yi jun kajwutzaꞌtz. Poro elnak katxum tetz, yi tetz Ryos yi chiꞌbaj tu cyakil yi eꞌchk takleꞌn yi at wuskil. Nin quiꞌc kil teꞌj kol baj kaꞌn. 29 Poro baꞌn tcuꞌn quil chibajsajuꞌ, na stkꞌeꞌ bis tetz yi jun yi txeꞌn el xtxum mas te yol Kataj.
Poro ko at jun creyent yil sjak tzaj: “¿Nxac tzun quiꞌc cu tan kabajsal yi chiꞌbajaꞌtz? 30 ¿Mbi tzun jaleꞌt kil teꞌj? na ja bin katyoẍin tibaj,” ko chij yi junaꞌtz sban scyeruꞌ. 31 Je bin puntileꞌj tan stzaꞌweꞌn nin tetz yaj: “Yi na kawan, nin yi na kucꞌaꞌ, nka alchok scyetz takleꞌnil yi na kaban, baꞌn xcon kaꞌn tan takꞌleꞌn kꞌej Ryos.”
32 Chaꞌstzun te quil chibanuꞌ yi eꞌchk takleꞌn yi na takꞌ bis scyetz yi eꞌ judiy. Nchaꞌtz quil chibanuꞌ yi eꞌchk takleꞌn yi juntlen ẍchiwutz yi eꞌ mas wunak. Quil chibanuꞌ yi eꞌchk takleꞌnaꞌtz. Na at eꞌchk takleꞌn yi na takꞌ bis scyetz yi eꞌ creyent yi eꞌ cotxcoj yi ateꞌ ẍchixoꞌluꞌ. Quil chibanuꞌ yi eꞌchk takleꞌnaꞌtz. 33 Inti in wetz, ilenin na chintzan tan joyleꞌn puntil tan chimayseꞌn yi eꞌ mas wunak. Qui na waj tzimban ntin yi wetz wajbil, ma na na waj yi ẍeꞌnk chiclax tkꞌab Baybaꞌn.