11
1 Chixomok binuꞌ te yi wetz yi na imban, na na chinxom te yi mbi cuꞌn banak Cristo.Yi eꞌ xnaꞌn yi qui na choꞌc jakꞌ caꞌwl quichmil
2 Ma jaluꞌ eꞌuꞌ wajwutz, baꞌn na chibanuꞌ, na, na nuꞌl txꞌakx chicꞌuꞌluꞌ, nin na chitzanuꞌ tan banleꞌn taneꞌn yi eꞌchk chusuꞌn, quib yi walnak scyeruꞌ. 3 Poro na waj yil tzꞌel chitxumuꞌ te yi junt xtxolbileꞌj: Kataj Ryos iꞌ wiꞌ banl wiꞌ teꞌj Cristo. Nin Cristo iꞌ wiꞌ banl wiꞌ scyeꞌj yi eꞌ yaj. Nin yi eꞌ yaj eꞌ wiꞌ banl wiꞌ scyeꞌj quixkel. 4 Chaꞌstzun te chin txꞌixwil nin scyetz yi eꞌ yaj yi ko qui elnak chitwiꞌ yi na choꞌc tan nachleꞌn Kataj, nka tan xtxoleꞌn yi yol iꞌ. 5 Nchaꞌtz yi eꞌ xnaꞌn, yi na choꞌc tan nachleꞌn Kataj, nka tan txoliꞌn. Chin txꞌixwil nin yi ko quiꞌc jun xbuꞌk jeꞌnak te chiwiꞌ. Eꞌ teꞌn na elsan chitxꞌix. Na yi ko qui jeꞌnak jun xbuꞌk te chiwiꞌ, niꞌcuꞌntz yi ik elnak jukij xiꞌil chiwiꞌ. 6 Chaꞌstzun te ko at jun xnaꞌn yi qui na taj tan jeꞌn jun xbuꞌk te wiꞌ, baꞌn tcuꞌn cꞌapleꞌ len yi xiꞌil wiꞌ. Poro ko na txꞌixwij tan teleꞌn cꞌapluꞌn yi xiꞌil wiꞌ, baꞌn tcuꞌn yil jeꞌ jun xbuꞌk te wiꞌ.a
7 Ma yi eꞌ yaj, quiꞌc cu tan jeꞌn jun takleꞌn te chiwiꞌ, na eꞌ teblal Ryos, nin na jal kꞌej Ryos cyaꞌn. Poro yi eꞌ xnaꞌn na jal chikꞌej yi eꞌ yaj cyaꞌn. 8 Na yi bajx yaj, nkꞌeꞌtz choꞌn tenleꞌn tzaj te jun xnaꞌn, ma na i xnaꞌn choꞌn tenleꞌn tzaj te yi bajx yaj. 9 Nchaꞌtz yi eꞌ yaj, nkꞌeꞌtz banijcheꞌ tan chixconeꞌn scyetz yi eꞌ xnaꞌn, ma na eꞌ xnaꞌn ja chibnix tan chixconeꞌn nin tan quichꞌeyeꞌn yi eꞌ yaj. 10 Chaꞌstzun te chin tajweꞌn cunin yil jeꞌ jun takleꞌn te chiwiꞌ yi eꞌ xnaꞌn tan ẍchajleꞌn ẍchiwutz yi eꞌ wunak nin ẍchiwutz yi eꞌ ángel yi eꞌ cꞌulutxum jakꞌ caꞌwl quichmil.
11 Poro skaxoꞌl ketz yi oꞌ creyent, yi oꞌ yi atoꞌ tkꞌab Kajcaw, nicyꞌ nin tuꞌ kakꞌej tu kaxnaꞌnil. Na at chikꞌej yi eꞌ xnaꞌn nin at chikꞌej yi eꞌ yaj. At len kaxac, na junit oꞌ. 12 Bintzinin bajx tenleꞌn tzaj xnaꞌn te yi bajx yaj. Poro jaluꞌ choꞌn na chitzꞌij yi eꞌ yaj scyeꞌj yi eꞌ xnaꞌn. Poro Ryos txumul cyen tetz cyakil yi xtxolbilaꞌtz.
13 Choꞌk binuꞌ tan xtxumleꞌn. ¿Baꞌn peꞌ kol tzꞌoc jun xnaꞌn tan nachleꞌn Ryos yi ko qui jeꞌnak jun xbuꞌk te wiꞌ? Qui na yub.
14 Nchaꞌtz yi oꞌ ketz yi oꞌ yaj, na el katxum tetz yi qui na yub yi ko quil tzꞌel jakꞌ kawiꞌ. 15 Ma yi eꞌ xnaꞌn, na jal cyetz chikꞌej yi ko at xiꞌil chiwiꞌ, na akꞌij cyen xiꞌil chiwiꞌ tan teweꞌn muꞌẍ te chiwankil. 16 I bin jaluꞌ, ko at jun ẍchixoꞌluꞌ yi qui na taj yil xom te yi xtxolbilaꞌseꞌj nin ko na taj tzꞌoc tan wakꞌ ib teꞌj, baꞌn cyaluꞌ tetz yi yaꞌstzun ketz katxumuꞌn. Nin nchaꞌtz cyakil yi eꞌ mas cmon yi xomcheꞌ teꞌj Ryos, yaꞌstzun cyetz yi na chixom teꞌj.
At jatxoꞌn ib yi na choꞌc tan banleꞌn yi Santa Cena
17 Ma jaluꞌ, qui na chintzan tan takꞌleꞌn chikꞌejuꞌ tan yi junt xtxolbileꞌj yi swaleꞌ nin scyeruꞌ. Na qui na yub yi mbi na chibanuꞌ yi na chicham cuꞌn quibuꞌ. Wech na iꞌtz kloꞌ tan takꞌoneꞌn baꞌn scyeruꞌ, poro quiꞌ. 18 Na ja wit yi txꞌakajiꞌn na chibanuꞌ, nin bintzinin loꞌ. 19 Chaꞌstzun te ja jal jatxoꞌn ib ẍchixoꞌluꞌ poro tan yi jun xtxolbilaꞌtz ẍchilajluchaxk yi eꞌ mero creyent yi na tzatzin Ryos scyeꞌj. 20 Nin tan tuꞌ yi yaꞌtz na chibanuꞌ, nkꞌeꞌtz nin yi waꞌaꞌn yi bixbaꞌnt tan Kajcaw na chitzanuꞌ tan banleꞌn taneꞌn. 21 Na chijunalenuꞌ na chiwanuꞌ. Nin qui na chichꞌiwuꞌ yi eꞌ mas cyajwutzuꞌ. Nin at eꞌuꞌ yi tu na chibent quen tuꞌ tan waꞌaꞌn nin qui na chitxumuꞌ yi eꞌ yi quiꞌc cyetz chiwaꞌ. Ej nin at eꞌ ẍchixoꞌluꞌ yi na oc aꞌ ẍchiwiꞌ tan yi nim tcunin win na baj cyaꞌn. 22 ¿Mbi tzuntz qui na chiwan tzajuꞌ-tz xeꞌak chicaꞌluꞌ? ¿Quiꞌc ptzun kꞌej yi cmon tetz Ryos ẍchiwutzuꞌ? Na na chitzanuꞌ tan telseꞌn chitxꞌix yi eꞌ mebaꞌ yi quiꞌc cyetz chiwaꞌ. Chaꞌstzun te quiꞌc rmeril tan wakꞌol chikꞌejuꞌ na qui na yub yi eꞌchk takleꞌnaꞌtz yi na chibanuꞌ.
Yi mbi ekaꞌn tan yi Santa Cena
(Mt 26.26-29; Mr 14.22-25; Lc 22.14-20)
23 Na je puntileꞌj yi cyajnak talol Kajcaw swetz. Nin iteꞌn nin iꞌaꞌtz eꞌ inchusnakuꞌ teꞌj. Yi akꞌbal yi txant tan beneꞌn jatxij Kajcaw Jesús, nintzun jeꞌ tcyꞌal yi pamtz. 24 Itzun yi wiꞌt tyoẍineꞌn tibaj, nintzun cuꞌ piẍultz, nin taltz: “Yi jeꞌj yaꞌstzun yi inwankil yi sloꞌonk tan jaleꞌn ibanl. Banwok taneꞌn chi mimbaneꞌj, tan wuleꞌn txꞌakx ticꞌuꞌl.” 25 Ej nin iteꞌn nin banaꞌs yi chibnixeꞌn tan waꞌaꞌn, nin jeꞌ tcyꞌal yi laktz, nin ben tlol scyetz: “Yi at tcꞌuꞌl yi lakeꞌj, iꞌtz yi techl yi ja bixeꞌ jun acꞌaj trat tan Ryos tan inẍchꞌel. Cyakil tir yil tzibanwok yi xtxolbileꞌj, baꞌn tzitcꞌajeꞌn tan wuleꞌn txꞌakx ticꞌuꞌl,” stzun Jesús bantz.
26 Chaꞌstzun te, cyakil tir yi na chibajsajuꞌ yi pam, nin yi na quicꞌajeꞌnuꞌ yi at tcꞌuꞌl yi lak, na tzun chitzanuꞌ-tz tan xtxoleꞌn yi quimichil yi wiꞌtz Kajcaw jalen cuꞌn yil tzꞌul tzaj junt tir.
Sjalok kil ko qui na pujx kaꞌn yi mbi ekaꞌn tan yi Santa Cena
27 Chaꞌstzun te qui na yub yi na chibanuꞌ yi na baj yi Santa Cena cyanuꞌ. Na ko qui na pujx kaꞌn yi mbi ekaꞌn tan yi pam, nin kol koꞌc tan bajseꞌn, sjalok tzun kil teꞌj. Nchaꞌtz ko qui na pujx kaꞌn yi mbi ekaꞌn tan yi aꞌ yi at tul yi lak nin kol baj kaꞌn, sjalok kil teꞌj, na na tzun katzan tan telseꞌn kꞌej yi wankil tu yi ẍchꞌel Kajcaw.b 28 Chaꞌstzun te, skajunal cuꞌn kanachonk teꞌj yi ko na el katxum tetz yi mbi na elepont. Baꞌn tzun koꞌctz tan bajseꞌn yi pamaꞌtz nin tan tcꞌajleꞌn yi aꞌ yi at tcꞌuꞌl yi lak. 29 Na yi jun yil bajsan nka lcꞌajan, nin ko qui na el xtxum tetz yi mbi na elepont, cawsteꞌn iꞌ na tzan tan bajseꞌn, nin tan tcꞌajleꞌn. Na qui na pujx taꞌn yi ẍeꞌn taneꞌn yi wankil Cristo.c
30 Chaꞌstzun te at wiꞌnin yabiꞌẍ ẍchixoꞌluꞌ, nin at wiꞌnin eꞌ yi ja wiꞌt chiquim. 31 Poro kol kamaꞌlaj kib yi ẍeꞌn kutaneꞌn, quil bajij xtisyaꞌ skeꞌj nin quil takꞌ Kajcaw kacaws. 32 Poro kol takꞌ Ryos kacaws iꞌtz tan kanucꞌleꞌn bantz qui kabeneꞌn tqꞌuixcꞌuj scyeꞌj yi eꞌ mas wunak.
33 Chaꞌstzun te eꞌuꞌ wajwutz, yi na chicham cuꞌn quibuꞌ tan banleꞌn taneꞌn yi waꞌaꞌn tetz Kajcaw, chichꞌiweꞌ quibuꞌ jalen cuꞌn yil chimol quibuꞌ chicyakiluꞌ. Ej nin ko at eꞌ yi na chiquim tan weꞌj ẍchixoꞌluꞌ baꞌn tcuꞌn chiwank tzaj xeꞌak chicaꞌl tan qui tkꞌol Ryos chicaws. 34 Ma yi mas puntil, katxꞌajeꞌ teꞌj yil nopon scyeꞌjuꞌ.