Aparchklen kamunl yi akꞌij sketz poro jun ntziꞌ yi akꞌol tetz
12
1 Ma jaluꞌ wajwutz na waj yil tzꞌel chitxumuꞌ tetz yi eꞌchk jilwutz ajtzaꞌkl yi na takꞌ yi Espíritu Sant sketz tan xconeꞌn kaꞌn. 2 Na chinachonuꞌ teꞌj yi ẍeꞌn cuꞌn quitaneꞌnuꞌ yi ateꞌ tzajuꞌ tkꞌab yi chicstumbruꞌ. Nin na chinachonuꞌ teꞌj yi ẍeꞌn cunin nchiben ticyꞌleꞌnuꞌ tan Baybaꞌn ẍchiwutz yi eꞌchk takleꞌn yi banij cuntuꞌ yi qui na chijilon. 3 Poro yi jaluꞌ, swaleꞌ nin scyeruꞌ yi xtxolbileꞌj. Yi eꞌ yi na chijison teꞌj Jesús, yaꞌstzun yi eꞌ yi quiꞌc Espíritu Sant tetz cyalmaꞌ. Poro yi eꞌ yi tetz cuꞌn cyalmaꞌ na cyal: “Yi Jesús, iꞌ cuꞌn iꞌ Ajcaw sweꞌj,” itzun eꞌaꞌs yi at yi Espíritu Sant tetz cyalmaꞌ.4 I bin jaluꞌ at wiꞌnin jilwutz kamunl yi akꞌij len sketz. Poro jun ntziꞌ akꞌol tetz, nin iꞌtz yi Espíritu Sant. 5 Ej nin at wiꞌnin jilwutz puntil tan kaxconeꞌn, poro jun ntziꞌ Ajcaw skeꞌj. 6 Nin at wiꞌnin jilwutz kamunl yi akꞌij len sketz tan kaRyosil nin nkꞌeꞌtz junt txumul tetz.
7 Nchaꞌtz akꞌij len kamunl tan yi Espíritu Sant tan jalseꞌn chibanl cyakil cmon. 8 Na at jujun yi akꞌijt cyajtzaꞌkl tan yi Espíritu Sant tan pujleꞌn xoꞌl jun xtxolbil. Nin at jujunt yi na el chitxum tetz yi eꞌchk xtxolbil yi at tul yol Kataj yi at qꞌuixbel nin na chixcyeꞌ tan chichusleꞌn yi eꞌ mas teꞌj, poro iꞌtz tan porer yi Espíritu Sant. 9 Nchaꞌtz at jujunt yi nternin kꞌuklij chicꞌuꞌl te yol Ryos, poro i yi Espíritu Sant akꞌol te yi jun ajtzaꞌklaꞌtz scyetz. Nchaꞌtz at jujunt yi na chixcyeꞌ tan tulseꞌn yos tu jun yabiꞌẍ, poro iteꞌn nin yi Espíritu Sant akꞌol tetz yi jun poreraꞌtz scyetz. 10 Ej nin at jujunt yi baꞌn na chiban eꞌchk milawr, poro tan tuꞌ yi porer yi Espíritu Sant. Ej nin at jujunt yi chin list nin eꞌ tan xtxꞌolcheꞌn xoꞌl yi yol Kataj, poro tan tuꞌ yi porer yi Espíritu Sant. Nin at jujunt yi na chixcyeꞌ tan teleꞌn chitxum tetz yi ko iꞌtz yi Espíritu Ryos nka jun espíritu cwent Baybaꞌn yi na tzan tan pitleꞌn nin jun yaj. Ej nin at jujun yi at na ban cuꞌn na xcon chitziꞌ takꞌun yi Espíritu Sant tan yolcheꞌn junt jilwutz yol yi qui na aꞌw cyakꞌun. Nin at eꞌ yi baꞌn chixcyeꞌ tan xtxꞌixpeꞌn eꞌchk yolaꞌtz le cyetz chiyol. Poro iꞌtz tan tuꞌ porer yi Espíritu Sant. 11 Na cyakil yi eꞌchk jilwutz ajtzaꞌklaꞌtz, iteꞌn nin Espíritu Sant akꞌol tetz. Nin jatxijt len sketz quib yi tajbil iꞌ.
Yi oꞌ ketz yi oꞌ creyent oꞌ wankil Cristo taneꞌn
12 Yi wankil jun yaj jun ntziꞌ taneꞌn, poro alaꞌ len cuꞌn wekl. Chaꞌstzun kutaneꞌn yi oꞌ creyent. Junit kutaneꞌn tkꞌab Cristo. 13 Na yi kabajeꞌn bautizar, junit kꞌuꞌj oꞌ nkaban. Nin iteꞌn nin Espíritu yi nkoꞌcsan jakꞌ caꞌwl. Ma jaluꞌ junit kꞌuꞌj oꞌ. Quiꞌc na ban mpe oꞌ-k judiy nka quiꞌ. Quiꞌc na ban yi ko oꞌ esclaw nka quiꞌ.
14 Choꞌn kutaneꞌn ketz yi oꞌ creyent chi taneꞌn wankil jun yaj. Nkꞌeꞌtz yi jun ntziꞌ-k wekl yi wankil, ma na alaꞌ len cuꞌn wekl taneꞌn poro junit iꞌ. Niꞌcuꞌn tzun kutaneꞌn ketz tkꞌab Cristo junit oꞌ. 15 Na quiꞌc rmeril yi nink tal tkan jun yaj: “Tan tuꞌ yi nkꞌeꞌtz in yi kꞌab, nkꞌeꞌtz in tetz yi wankil yaj.” Quiꞌc rmeril yi nink tal yi jun xtxolbilaꞌtz, na iteꞌn nin wankil yajaꞌtz yi tkan. 16 Nchaꞌtz yi nink tal yi ẍchin jun yaj: “Tan tuꞌ yi nkꞌeꞌtz in yi wutz, nkꞌeꞌtz in tetz yi wankil.” Quiꞌc rmeril, na iteꞌn nin wankil yajaꞌtz. 17 Na yi wutzaj cuꞌnk cyakil yi kawankil, ¿lok tzun kaẍchintz, nin ẍeꞌn kubit jun yol? Nin yi ẍchimbaj cuꞌnk cyakil yi kawankil, ¿lok tzun kajuꞌ-tz, nin ẍeꞌn kasakon? 18 Ma na quiꞌ. Na Ryos txumun cyen tetz cyakil jilwutz kawekl. Nin iꞌ bixban cyen kale tajweꞌneꞌt eꞌchk weklaꞌtz. 19 Yi juneꞌnk wekl taneꞌn yi kawankil, ¿naꞌ tzun atit yi mas wekl kawankiltz? 20 Poro yi kawankil, alaꞌ len cuꞌn wekl, poro junit taneꞌn.
21 Quiꞌc rmeril yi nink tal kawutz tetz kakꞌab: “Quiꞌc axac swetz.” Nchaꞌtz quiꞌc rmeril yi nink tal kawiꞌ tetz kukan: “Quiꞌc axac swetz.” Quiꞌc rmeril. 22 Na yi eꞌchk kawekl yi i cuꞌn quiꞌc xac taneꞌntz, yaꞌstzun yi mas tajweꞌn. 23 Nin yaꞌstzun yi at kꞌej. Nchaꞌtz yi eꞌchk kawekl yi na katxꞌixwij taꞌn, i tzun iꞌaꞌtz yi wekij mas kaꞌn. 24 Poro yi mero bintzi iꞌtz, Ryos bnol tetz cyakil kawankil. Nin ja takꞌ iꞌ mas kꞌej yi eꞌchk kawekl yi quiꞌc mas kꞌej taneꞌn. 25 Yi tajbil Ryos te eꞌchk wekl kawankil iꞌtz tan quichꞌeyal quib squibil quib. Nkꞌeꞌtz tajbil iꞌ tan chijatxol quib yi eꞌchk wekl kawankil. 26 Chaꞌstzun te ko at jun kawekl yi na yobtij, tircuꞌn tzun kawankil na bisuntz taꞌn. Nin ko at jun kawekl yi na jal kꞌej, tircuꞌn tzun yi eꞌ mas kawekl na chitzatzintz teꞌj.
27 Yi xeꞌ yi xtxolbilaꞌseꞌj yi nwal scyeruꞌ iꞌtz: Yi oꞌ ketz, yi oꞌ creyent, oꞌ wankil Cristo taneꞌn. Nin cyakil oꞌ, oꞌ len jun wekl iꞌ. 28 At eꞌ skaxoꞌl yi bixbaꞌncheꞌt tan Ryos tan chixconeꞌn tetz apostl. Ej nin at eꞌ yi bixbaꞌncheꞌt tan xtxoleꞌn yi yol Ryos, nin at eꞌ yi bixbaꞌncheꞌt tan chichusleꞌn wunak. Ej nin nchaꞌtz at eꞌ yi baꞌn na chiban milawr. Ej nin at eꞌ yi baꞌn na ul yos cyaꞌn tu yabiꞌẍ. Ej nin at eꞌ yi list eꞌ tan ẍchꞌeyeꞌn junt. Ej nin at eꞌ yi at cyajtzaꞌkl tan cawuꞌn. Ej nin at eꞌ yi at na ban cuꞌnt na xcon chitziꞌ takꞌun yi Espíritu Sant tan yolcheꞌn junt jilwutz yol, yi qui na pujx cyakꞌun.
29 Poro nkꞌeꞌtz oꞌ len apostl. Ej nin nkꞌeꞌtz oꞌ len aj txolinl, nin nkꞌeꞌtz oꞌ len aj chusunl. Nin nkꞌeꞌtz cyakil cuꞌn oꞌ na kaban eꞌchk milawr. 30 Nin nkꞌeꞌtz cyakil oꞌ akꞌij len porer sketz tan chitzꞌaqueꞌn yabiꞌẍ. Nkꞌeꞌtz cyakil oꞌ yi na xcon katziꞌ takꞌun yi Espíritu Sant tan yolcheꞌn junt jilwutz yol yi qui na pujx kaꞌn. Nchaꞌtz nkꞌeꞌtz cyakil oꞌ yi baꞌn na aꞌw xtxꞌixpeꞌn yi jun jilwutz yolaꞌtz kaꞌn. 31 Ma jaluꞌ, xoꞌl yi jun cꞌoloj kamunlaꞌtz, chijoyeꞌuꞌ yi cyeruꞌ cyajbiluꞌ yi mas balaj tcuꞌn ẍchiwutzuꞌ.
Poro yi in wetz, na waj wal scyeruꞌ yi xtxolbil yi mas balaj tcuꞌn.