Yi lokꞌ ib
13
1 Ma jaluꞌ je bin yi xtxolbil yi mas balaj, iꞌtz yi lokꞌ ib. Na ko chumbalaj nin kajilon, mpe ik chitaneꞌn chijilon yi eꞌ ángel, quiꞌc na takꞌ sketz yi ko quiꞌc lokꞌ ib skuchꞌ. Nchaꞌtz ko quiꞌc lokꞌ ib skuchꞌ, niꞌcuꞌn tzun oꞌ-tz tu jun chꞌichꞌ yi wiꞌnin na txajcan, nka tu eꞌchk wot yi na towneꞌ. 2 Nchaꞌtz mpe chumbalaj nink na katxolin, quiꞌc na takꞌ sketz ko quiꞌc lokꞌ ib skuchꞌ. Nin ko na el katxum tetz cyakil eꞌchk chusuꞌn, nin cyakil eꞌchk ajtzaꞌkl, quiꞌc na takꞌ sketz ko quiꞌc lokꞌ ib skuchꞌ. Nchaꞌtz mpe nink kaxcyeꞌ tan xtxꞌixpeꞌn luwaril jun juꞌwtz tan tuꞌ yi choꞌn kꞌuklij kacꞌuꞌl te Ryos, quiꞌc na takꞌ sketz ko quiꞌc lokꞌ ib skuchꞌ. 3 Nchaꞌtz mpe nink kajatx nin cyakil kamebiꞌl tan chicꞌaꞌcheꞌn yi eꞌ mebaꞌ, quiꞌc ltakꞌ sketz ko quiꞌc lokꞌ ib skuchꞌ. Nchaꞌtz mpe nink kakꞌ kawankil scyetz yi eꞌ kacontr tan chipatil, quiꞌc ltakꞌ sketz ko quiꞌc lokꞌ ib skuchꞌ.4 Poro ko at lokꞌ ib skuchꞌ, at tzun kapasens. Nin ko at lokꞌ ib skuchꞌ balaj tzun oꞌ-tz. Ko at lokꞌ ib skuchꞌ quil tzꞌel kalmaꞌ te eꞌchk takleꞌn yi at tkꞌab junt yi na takꞌ chiꞌch cꞌuꞌlal sketz. Nchaꞌtz qui kocsaj kib nim tu kajilon. Nin ko at lokꞌ ib skuchꞌ, quil kocsaj kib nim tu kajtzaꞌkl. 5 Nin ko at lokꞌ ib skuchꞌ, quil kajoy ntin yi ketz kajbil, ma na i yi tajbil yi kuchꞌ. Nin ko at lokꞌ ib skuchꞌ quiꞌc kamacleꞌn. Nin qui na kawnaj cuꞌn yi chiꞌch cꞌuꞌlal tetz kalmaꞌ. 6 Nin qui na tzatzin kalmaꞌ te jun takleꞌn cachiꞌ yi na bajij te junt, poro ilenin na katzatzin te yi eꞌchk takleꞌn balaj yi na bajij te junt. 7 Na ko at lokꞌ ib skuchꞌ, cyakil cunin tzun muqꞌuijtz kaꞌn. Nin ilenin na kocsaj yi at balajil junt. Nchaꞌtz ilenin at kachꞌiw yi slajluchaxk yi balajil jun skawutz. Nin na icyꞌpon cyakil yi eꞌchk takleꞌn cachiꞌ kaꞌn.
8 Yi lokꞌ ib quil sotz. Poro yi xtxꞌolcheꞌn xoꞌl yi yol Kataj tan porer yi Espíritu Sant, sotzok teraꞌtz. Ej nchaꞌtz yi yolcheꞌn junt jilwutz yol tan porer yi Espíritu Sant, sotzok teraꞌtz. Ej nin nchaꞌtz yi pujleꞌn xoꞌl eꞌchk xtxolbil sotzok teraꞌtz. 9 Poro quiꞌc nin jun yi at tajtzaꞌkl jaluꞌ yi tzꞌaknak cuꞌnk. Nin quiꞌc nin jun xtxolbil yi na katxol jaluꞌ yi tzꞌaknak cuꞌnk. 10 Poro tzantzaj yil jal kajtzaꞌkl yi tzꞌaknak cuꞌn, sotzok cyakil yi eꞌchk ajtzaꞌklaꞌtz yi nkꞌeꞌtz tzꞌaknak cuꞌn.
11 Na je jun elsawutzileꞌj: Yi in tzaj nitxaꞌ ja chinjilon chi na jilon jun nitxaꞌ. Nin yi in tzaj nitxaꞌ, choꞌn nin wajtzaꞌkl chi tajtzaꞌkl jun nitxaꞌ. Poro yi tijineꞌn incꞌuꞌl, nintzun cyaj wilol yi tajtzaꞌkl jun nitxaꞌ.
12 Nchaꞌtz yi kajtzaꞌkl jaluꞌ, niꞌcuꞌn chi yi na kaxmay nin yi kayubil tul jun spej yi maymuj. Poro tzantzaj slajluchaxk cyakil eꞌchk takleꞌn skawutz na yi jaluꞌ noqueꞌn nin pujx kaꞌn. Poro tzantzaj cyakil cuꞌn spujxok kakꞌun, chi na el xtxum Ryos sketz jaluꞌ. 13 Poro at ox ajtzaꞌkl yi quil sotz tetz ben kꞌej ben sak. Tajweꞌn tan kꞌukeweꞌn kacꞌuꞌl te Kataj Ryos. Tajweꞌn yi ilenin at kachꞌiw te iꞌ. Nin tajweꞌn yil kalokꞌ kib skibil kib. Poro yi mas tajweꞌn te yi ox xtxolbilaꞌtz, iꞌtz yi lokꞌ ib.