Mas balaj yi xtxꞌolcheꞌn xoꞌl yol Kataj swutz yolcheꞌn junt jilwutz yol
14
1 I bin jaluꞌ chilokꞌeꞌ bin quibuꞌ squibil quibuꞌ. Nin chijoyeꞌuꞌ puntil tan chicambaluꞌ yi eꞌchk ajtzaꞌkl yi na takꞌ yi Espíritu Sant sketz. Poro yi ajtzaꞌkl yi mas balaj yi at rmeril tan chicambaluꞌ iꞌtz yi xtxꞌolcheꞌn xoꞌl yi yol Kataj tan porer yi Espíritu Sant. 2 Na ko at jun yi na jilon le junt jilwutz yol, cyaꞌl jun na el xtxum tetz. Na nkꞌeꞌtz choꞌn na jilon nin scyetz wunak, ma na ntin Ryos na bitan tetz. Bintzi tan porer yi Espíritu Sant na jiloneꞌt yaj, poro qui na el chitxum wunak tetz yi mbi na tzan tan yolcheꞌn. 3 Poro yi eꞌ yi na choꞌc tan xtxꞌolcheꞌn xoꞌl yi yol Kataj tan porer yi Espíritu Sant na tzun chixcyeꞌ cyetz tan chiquiwseꞌn nin tan chimayseꞌn yi eꞌ cmon creyent. 4 Poro alchok scyetz yi na jilon le junt jilwutz yol, yi cyaꞌl jun na el xtxum tetz, ẍchuc cuntuꞌ iꞌ teꞌj. Poro yi eꞌ yi na chitxol yi yol Kataj tan porer yi Espíritu Sant, na tzun chitzan cyeraꞌtz tan chiquiwseꞌn yi eꞌ cmon creyent. 5 Baꞌn atit yi nink choꞌc lenuꞌ tan yolcheꞌn eꞌchk jilwutz yol tan porer yi Espíritu Sant. Poro yi mero wajbil scyeꞌjuꞌ iꞌtz yi nink choꞌc lenuꞌ tan xtxꞌolcheꞌn xoꞌl yi yol Kataj le cyeruꞌ chiyoluꞌ tan porer yi Espíritu Sant. Na mas balaj tcuꞌn yi eꞌ yi na chitxol yi yol Kataj swutz yi eꞌ yi na chiyol eꞌchk jilwutz yol yi cyaꞌl jun na el xtxum tetz. Na yi ko yaꞌtz quil chiquiwix yi cmon creyent cyaꞌn. Na ntin chiquiwixk kol choꞌc tan xtxꞌixpeꞌn le chiyol yi eꞌ yi na chitzan tan tbiteꞌn.6 Ma jaluꞌ bin wajwutz ¿mbil takꞌ scyeruꞌ yi nink nopon tan yolcheꞌn eꞌchk jilwutz yol ẍchixoꞌluꞌ yi qui na el chitxumuꞌ tetz? Quiꞌc ltakꞌ scyeruꞌ na quil tzꞌel chitxumuꞌ tetz. Ma na tzꞌakꞌonk baꞌn scyeruꞌ kol noꞌc tan xtxꞌolcheꞌn xoꞌl jun xtxolbil yi nẍchaj Ryos swetz nka kol wal jun ajtzaꞌkl yi bintzinin tetz. Na quiꞌc takꞌ scyeruꞌ yi ko quil tzintxꞌol xoꞌl yi yol Kataj, nka ko quil tzintxꞌol xoꞌl jun chusuꞌn yi akꞌijt swetz tan Ryos.
7 Ej nin je jun elsawutzileꞌj: At wiꞌnin eꞌchk takleꞌn chi taneꞌn jun suꞌ nka jun quitar yi baꞌn na tzlincan poro ko quiꞌc xtxolbil yi kulil yi son yi na tzan ¿ẍeꞌn tzꞌel katxum tetz mbi sonil? 8 Niꞌcuꞌn chi taneꞌn yi chun yi na xcon cyakꞌun eꞌ sanlar. Yi ko quiꞌc kulil yi wiꞌ yi chun yi na tzan ¿ẍeꞌn tzꞌel chitxum yi eꞌ sanlar tetz yi ko tajweꞌn chiban list quib tan oyintziꞌ? 9 Nchaꞌtz bin eꞌuꞌ ko cyaꞌl na el xtxum te chiyoluꞌ, ¿ẍeꞌn tzun tzꞌel chitxum tetz yi mbi na chitzanuꞌ tan yolcheꞌn? Na cyekꞌekꞌ tuꞌ na icyꞌan nin chiyoluꞌ. 10 Bintzi at wiꞌnin jilwutz yol wi munt, nin quiꞌc nin jun yi quiꞌck xtxolbil. 11 Poro ko qui na el intxumtz tetz, in bin awer nakaꞌtz swutz yi taw yi jun yolaꞌtz. Nin nchaꞌtz iꞌ, iꞌ awer nak taneꞌn tzinwutz wetz. 12 Chaꞌstzun te eꞌuꞌ wajwutz, tan tuꞌ yi na el cyalmaꞌuꞌ te yi eꞌchk ajtzaꞌkl yi na takꞌ yi Espíritu Sant sketz, chijoyeꞌuꞌ bin yi eꞌchk ajtzaꞌkl yi na xcon tan chiquiwseꞌn yi cmon creyent.
13 Chaꞌstzun te ko at jun ẍchixoꞌluꞌ yi na jilon le junt jilwutz yol tan porer yi Espíritu Sant, baꞌn tzun sjak iꞌ ẍchꞌeybil tetz tetz Ryos tan xtxꞌixpeꞌn le chiyol yi eꞌ mas creyent. 14 Ej nin kol noꞌc tan nachleꞌn Kataj le junt jilwutz yol yi qui na el intxum tetz, na tzun chintzan tan nachleꞌn Kataj tan porer yi Espíritu Sant, poro yi wetz wajtzaꞌkl qui na el xtxum tetz yi mbi loꞌ na inyolbej. 15 ¿Mbi tzun kabantz? Baꞌn atit kol kanach Kataj le junt jilwutz yol tan porer yi Espíritu Sant, poro nchaꞌtz tajweꞌn yil kanach Kataj tan kajtzaꞌkl tan teleꞌn katxum tetz yi mbi na kayol. Baꞌn kabitzin le junt jilwutz yol tan porer yi Espíritu Sant, poro nchaꞌtz tajweꞌn kabitzin tan kajtzaꞌkl tan teleꞌn katxum tetz yi mbi i il na kabitzij. 16 Na ko ntin na chitzanuꞌ tan takꞌleꞌn chikꞌajsbiluꞌ tetz Kataj le junt jilwutz yol ¿ẍeꞌnl pujx cyaꞌn yi eꞌ mas kajwutz? nin ¿ẍeꞌn tzun lcyal “Amén” ko qui na el chitxum te yi yol yi na xcon cyanuꞌ? 17 Bintzinin baꞌn atit yi na chityoẍinuꞌ le junt jilwutz yol yi cyaꞌl na el xtxum tetz, poro ¿ẍeꞌn chiquiwix yi eꞌ mas cyanuꞌ? 18 Ntyoẍ tetz Ryos yi baꞌn na xcon intziꞌ tan yi Espíritu Sant tan yolcheꞌn junt jilwutz yol yi cyaꞌl na el xtxum tetz. Ej nin mas na imban yi jeꞌj ẍchiwutz cyeruꞌ. 19 Poro yi na noꞌc tan ẍchusleꞌn jun cmon creyent, mas baꞌn tcuꞌn yi oꞌ ntziꞌ tkan yol xcon waꞌn yi at xtxolbil swutz lajuj mil yol yi quil pujx cyaꞌn.
20 Ma jaluꞌ eꞌuꞌ wajwutz nkꞌeꞌtz bin eꞌuꞌ nitxaꞌ. Chitxumiꞌchuꞌ yi tajtzaꞌkl jun nitxaꞌ. Poro baꞌn cyocsaj quibuꞌ chi taneꞌn jun nitxaꞌ yi qui na tzan tan xtxumleꞌn eꞌchk ajtzaꞌkl cachiꞌ. Choꞌkuꞌ bin tzꞌaknak cuꞌn tu chitxumuꞌnuꞌ 21 Na at jun xtxolbil le yol Kataj yi tzꞌibaꞌnt cyen: “Chin jilonk scyetz yi eꞌ wunakeꞌj tan junt jilwutz yol, nin tan chitziꞌ yi eꞌ awer nak. Poro quiꞌc ltakꞌ na quil cyocsaj.” 22 Yi xtxolbilaꞌtz na ẍchaj sketz yi quiꞌc na takꞌ yolcheꞌn junt jilwutz yol scyetz yi eꞌ creyent. Poro baꞌn xcon tan cꞌaseꞌn cyajtzaꞌkl yi eꞌ yi qui na cyocsaj. Poro yi tajweꞌn scyetz yi eꞌ cmon creyent iꞌtz yi xtxꞌolcheꞌn xoꞌl yi yol Kataj tan porer yi Espíritu Sant. Mpe quiꞌk pujx mas cyakꞌun yi eꞌ yi qui na cyocsaj.
23 Chaꞌstzun te, ko ilenin na chitzanuꞌ tan yolcheꞌn eꞌchk jilwutz yol yi cyaꞌl na el xtxum tetz, chelpon yab wunak scyeꞌjuꞌ. Nin kol chocopon kale chichamoneꞌt quibuꞌ, scyaleꞌ yi eꞌuꞌ yab. 24 Poro yi nink choꞌc lenuꞌ tan xtxꞌolcheꞌn xoꞌl yi yol Kataj tan porer yi Espíritu Sant tzꞌelepon chitxum tetz yi eꞌ juchul il. Ej nin qui cunin batz chibisunk taꞌn. 25 Nin chinachonk te eꞌchk ajtzaꞌkl cachiꞌ yi cyꞌaꞌn cyaꞌn. Nin ẍchimejbajeꞌ quib swutz Ryos tan cꞌuꞌlajeꞌn iꞌ. Na kol quibit jun yol yi at xtxolbil tzꞌelepon chitxum tetz yi bintzinin at porer Ryos ẍchixoꞌluꞌ.
Tajweꞌn yi xtxolbil cuꞌn kulej kamunl
26 Chaꞌstzun te eꞌuꞌ wajwutz, yi na chicham cuꞌn quibuꞌ, baꞌn ko cyꞌaꞌn len jujun bitz cyanuꞌ. Nin baꞌn ko cyꞌaꞌn len jujun chusuꞌn cyanuꞌ. Ko at jun yi ja el xtxum tetz jun xtxolbil le yol Kataj baꞌn xtxol iꞌ. Ko at jun yil syol junt jilwutz yol tan porer yi Espíritu Sant, tajweꞌn tan xtxꞌixpeꞌn le cyeruꞌ chiyoluꞌ. Cyakil yi xtxolbileꞌj xconk tan chiquiwseꞌn yi cmon. 27 Ko at eꞌ yi na cyaj chijilon le junt jilwutz yol baꞌn atit, poro tajweꞌn ntin chijilon cob nka ox. Ej nin nkꞌeꞌtz junit tir chijilon yi oxaꞌtz. Nin kol jilon jun le junt jilwutz yol yi cyaꞌl na el xtxum tetz, tajweꞌn cunin tan toqueꞌn junt tan xtxꞌixpeꞌn le cyeruꞌ chiyoluꞌ. 28 Na yi ko quiꞌc jun tan xtxꞌixpeꞌn yi jun jilwutz yolaꞌtz, baꞌn tcuꞌn tzun quil chijilontz ẍchixoꞌl cmon, ma na chichuc cuntuꞌ tu Ryos. 29 Nin nchaꞌtz yi eꞌ aj txolinl, baꞌn tcuꞌn ko ntin cob nka ox chijilon. Ma yi eꞌ mas baꞌn tzun choꞌctz tan tbiteꞌn chiyol. 30 Poro ko at jun yi na ẍchaj Kataj jun acꞌaj xtxolbil tetz, baꞌn takꞌ yi jun yi na jilon amaꞌl tetz tan yol. 31 Na baꞌn choꞌc len yi eꞌ aj txolinl tan txoliꞌn, poro chijunalen cuꞌn. Tzꞌelepon tzun chitxum cyakil yi cmon tetz yi ẍchusuꞌn, nin ẍchiquiwixk taꞌn. 32 Na jun aj txolinl yi bintzinin iꞌ tetz Ryos na mak tib te yi yol yi na jilon. 33 Xtxolbil cuꞌn bin lkulej kamunl na qui na pekꞌ Ryos te jun kamunl yi quiꞌc xtxolbil.
34 I bin jaluꞌ, qui na yub yi ko tu nin na chijilon tuꞌ yi eꞌ xnaꞌn le caꞌl Ryos. Na nkꞌeꞌtz na chiban yi eꞌ mas cmon creyent. Na qui na yub ko tu na chijilon tuꞌ yi eꞌ xnaꞌn te yi ateꞌ le caꞌl Ryos. Ma na tajweꞌn tan cyoqueꞌn cꞌulutxum jakꞌ caꞌwl quichmil chi tzꞌibaꞌnt cyen le ley Moisés.a 35 Poro ko at jun xtxolbil yi na cyaj tzꞌel chitxum tetz, baꞌn tcuꞌn chijakeꞌ scyetz quichmil xe chicaꞌl. Na qui na yub yi na chijilon eꞌ xnaꞌn le caꞌl Ryos.
36 Quil cyocsaj quibuꞌ nim tu cyajtzaꞌkluꞌ na nkꞌeꞌtz choꞌn xeꞌtleꞌn yi yol Kataj ẍchixoꞌluꞌ. Nin nkꞌeꞌtz ntin tetz cyeruꞌ yi akꞌleꞌt yol Kataj. 37 Ej nin ko at eꞌ ẍchixoꞌluꞌ yi at cyajtzaꞌkl nin yi nojnak cyalmaꞌ tan yi Espíritu Sant, scyakꞌeꞌ kꞌej yi xtxolbilaꞌseꞌj, na na el chitxum tetz yi iꞌtz yi caꞌwl Kataj yi na chintzan tan talcheꞌn nin scyeruꞌ. 38 Poro ko at jun yi qui na taj yil xom te yi xtxolbilaꞌseꞌj, cyajk tuꞌ iꞌ-tz tu yi tetz tajtzaꞌkl.