Yi titzꞌeꞌn junt tir Cristo
15
1 I bin jaluꞌ eꞌuꞌ wajwutz, na waj noꞌc tan cꞌaseꞌn cyajtzaꞌkluꞌ te yi balaj stziblal yi ja wiꞌt intxol scyeruꞌ, yi ja wiꞌt cyocsajuꞌ, yi xomcheꞌuꞌ teꞌj. 2 Yaꞌstzun yi balaj stziblal yi ẍchiclaxkuꞌ taꞌn yi ko bintzinin na cyocsaj cuninuꞌ yi xtxolbil yi intxolnak scyeruꞌ.3 Bajx cunin eꞌ inchusuluꞌ te yi wetz yi chusij chint teꞌj, iꞌtz: Yi ja quim Cristo tan ẍchojleꞌn kil, quib yi tzꞌibaꞌnt cyen. 4 Nin ja mukxij iꞌ, poro le toxiꞌn kꞌej ja itzꞌij junt tir ẍchixoꞌl almaꞌ nin ja el cuꞌn teꞌj quib yi tzꞌibaꞌnt cyen le tuꞌj Kataj. 5 Ej nin ja ẍchaj tib iꞌ swutz Céfas. Nin yi teleꞌn tiemp, ẍchaj tibtz ẍchiwutz yi eꞌ mas apostl. 6 Ej nin at junt tir, yi ẍchaj tib ẍchiwutz mas oꞌ cient kajwutz te yi chichamoꞌn quib. Nin at wiꞌnin eꞌ itzꞌeꞌ jaluꞌ. Nchaꞌtz at eꞌ yi ten chiquim. 7 Nin yi teleꞌn tiemp ja ẍchaj tib iꞌ swutz Jacow. Nin ẍchiwutz cyakil yi eꞌ apostl.
8 Ej nin wiꞌtzbil tlen ja ẍchaj tib tzinwutz wetz. Poro yi ẍchajol tib, nsken balkꞌij tiemp. 9 Chaꞌstzun te, quiꞌc mas wetz inkꞌej ẍchiwutz yi eꞌ mas apostl, na quiꞌc inxac tan woqueꞌn tetz apostl. Na noꞌcnakin tan chibuchleꞌn yi eꞌ creyent. 10 Poro ntyoẍ tetz Ryos tan yi banl talmaꞌ iꞌ yi ja noꞌc tetz apostl. Nin ja jamelan cuꞌn yi banl talmaꞌ iꞌ, na mas na nakꞌuj wetz ẍchiwutz yi eꞌ mas. Poro nkꞌeꞌtz yi ink na nakꞌuj ma na iꞌtz yi porer Kataj. 11 Quiꞌc na ban, mpe ink na chintzan tan txoliꞌn nka yi eꞌ mas apostl, na iteꞌn nin xtxolbilaꞌtz na katxol scyuchꞌ. Nin iteꞌn nin xtxolbilaꞌtz yi na cyocsajuꞌ.
Yi eꞌ almaꞌ chitzꞌok junt tir
12 Ma jaluꞌ na tzun katzan tan xtxoleꞌn yi itzꞌnak junt tir Cristo ẍchixoꞌl almaꞌ. Poro ko yaꞌtz na kaban, ¿mbi tzuntz na cyalwit cobox ẍchixoꞌluꞌ, yi quiꞌc itzꞌeꞌn junt tir ẍchixoꞌl almaꞌ? 13 Na yi quiꞌk itzꞌeꞌn junt tir, qui tzun kloꞌ itzꞌnak Cristo. 14 Nin yi quiꞌk itzꞌnak iꞌ ẍchixoꞌl almaꞌ, quiꞌc tzun kloꞌ xac yi na katzan tan xtxoleꞌn, nin quiꞌc kloꞌ na takꞌ scyeruꞌ yi na cyocsajuꞌ kayol. 15 Nchaꞌtz yi quiꞌk itzꞌnak Cristo, oꞌ bin kloꞌ laꞌjaꞌtz tu kayol na na katzan tan talcheꞌn yi Ryos njeꞌsan tzaj Cristo ẍchixoꞌl almaꞌ.
16 Nchaꞌtz yi quiꞌk itzꞌeꞌn junt tir qui bin kloꞌ itzꞌnak Cristaꞌtz. 17 Nin yi quiꞌk itzꞌnak iꞌ quiꞌc kloꞌ na takꞌ yi na kocsaj. Iẍnin kloꞌ atoꞌ-tz tkꞌab kil. 18 Nchaꞌtz kloꞌ yi eꞌ, yi quimnakeꞌt tkꞌab Cristo, sotzel kloꞌ chiwutz. 19 Na yi ntink at kachꞌiw te Cristo tul yi tiemp yi akꞌij sketz tzoneꞌj wuxtxꞌotxꞌ, lastum tzun kloꞌ oꞌ-tz, na sotzel kloꞌ kawutz sbneꞌ.
20 Poro yi mero bintzi iꞌtz yi itzꞌnak Cristo ẍchixoꞌl almaꞌ. Nin iꞌ yi bajx yi ja itzꞌij ẍchixoꞌl almaꞌ. 21 Na tan tuꞌ paj jun yaj, na kaquim len. Poro nchaꞌtz tan tuꞌ junt yaj at rmeril yil kitzꞌij ẍchixoꞌl almaꞌ. 22 Na tan tuꞌ yi junit oꞌ tu Adam txꞌaklij len quimichil skawutz kacyakil cuꞌn. Poro yi ko junit oꞌ tu Cristo, skitzꞌok junt tir.
23 Poro aparchklen kaꞌoril tan kitzꞌeꞌn junt tir. Na Cristo iꞌ yi bajx. Poro yil tzꞌul tzaj junt tir, kalenaꞌs tzun chitzꞌijt yi eꞌ yi quimnakeꞌ tkꞌab iꞌ. 24 Ej nin kalenaꞌs tzun tzaj wiꞌ cyakil yi na bajij jaluꞌ. Ej nin yaꞌstzun yil sjatx nin iꞌ yi caꞌwl tkꞌab Kataj Ryos, yi tetz Taj. Poro nsken baj xitul yi cyajtzaꞌkl cyakil yi eꞌ bajxom, scyuchꞌ cyakil yi eꞌ yi at caꞌwl ẍchikꞌab, scyuchꞌ cyakil yi eꞌ yi chin cham nin eꞌ. Ma yil xcyeꞌ iꞌ tan xiteꞌn cyajtzaꞌkl cyakil yi eꞌ ajcawaꞌtz, kalenaꞌs tzun sjatx nin iꞌ yi caꞌwl tkꞌab Kataj Ryos.
25 Poro chin tajweꞌn cunin lcawun Cristo jalen cuꞌn yil choꞌc cyen cyakil yi eꞌ tetz contr jakꞌ tkan. 26 Ej nin yi wiꞌtzbil contr yi sloꞌonk taꞌn iꞌtz yi quimichil. 27 Na tzꞌibaꞌnt cyen le tuꞌj Kataj: “Chocopon cyakil eꞌchk takleꞌn jakꞌ tkan iꞌ.” Poro qui na jop yi tzꞌocopon Kataj Ryos jakꞌ caꞌwl iꞌ. Na Ryos tzꞌocsan cyakil jakꞌ tkan Cristo. 28 Ej nin yil tzꞌoc cyakil jakꞌ tkan yi Cyꞌajol, kalenaꞌs tzun lajluchax yi at iꞌ jakꞌ caꞌwl Ryos, yi Ryos yi moꞌcsan cyakil jakꞌ caꞌwl iꞌ. Ej nin kalenaꞌs tzun lajluchax yi atoꞌ len kacyakil cuꞌn tuml cyakil yi at beneꞌn tziꞌn tkꞌab Ryos.
29 Nchaꞌtz ¿mbil takꞌ scyetz yi eꞌ yi na chibajij bautizar, tetz chikꞌajbil yi eꞌ yi nsken chiquim, yi ko quiꞌc itzꞌeꞌn junt tir? Quiꞌc ltakꞌ.
30 Nchaꞌtz yi oꞌ ketz ¿mbil takꞌ sketz, yi na katij eꞌchk qꞌuixcꞌuj tan paj yi na kaxom te yol Kataj ko quiꞌc itzꞌeꞌn junt tir ẍchixoꞌl almaꞌ? 31 Eꞌuꞌ wajwutz jun cuꞌn yol yi yoleꞌj yi na wal nin scyeruꞌ. Quiꞌc nin jun kꞌej yi quiꞌk na oc inxoꞌwseꞌn tan inquimeꞌn, tan paj yi na wocsaj yi yol Kataj. Ma jaluꞌ yi ko quiꞌc itzꞌeꞌn ẍchixoꞌl almaꞌ ¿nxac na inmucꞌ yi eꞌchk qꞌuixcꞌujaꞌtz? 32 Nchaꞌtz ¿mbil takꞌ swetz yi na noꞌc tan wakꞌ ib scyuchꞌ yi eꞌ yi i cunin cyuchꞌ smaron txuc yi ateꞌ tzoneꞌj le tnum Efeso,a yi ko quil tzꞌitzꞌij walmaꞌ junt tir? Quiꞌc ltakꞌ. Ej nin ko quil chitzꞌij junt tir yi eꞌ yi quimnakeꞌ, baꞌn tcuꞌn tzun kloꞌ kakbantz, kawantz, kabneꞌ cuꞌn tetz yi kajbil, na qui na kil ko tzun kaquim ek caꞌp.
33 Chaꞌstzun te eꞌuꞌ wajwutz eꞌ xubsiꞌchuꞌ. Eꞌ xomiꞌch cyenuꞌ scyeꞌj yi eꞌ mal wunakaꞌtz yi qui na cyocsaj yi at junt tir itzꞌeꞌn, na ẍchixubsokuꞌ cyaꞌn. 34 Ma yi eꞌuꞌ cyeruꞌ cꞌasok bin cyajtzaꞌkluꞌ. Quiꞌt chixomuꞌ te yi jun chusuꞌnaꞌtz yi na tal yi quiꞌc itzꞌeꞌn junt tir. Na lastum eꞌuꞌ, na at eꞌ ẍchixoꞌluꞌ yi qui na cyocsaj yol Ryos.
Yi ẍeꞌn cuꞌn sbneꞌ chiwankil yi eꞌ yi chitzꞌok junt tir
35 I bin jaluꞌ at loꞌ eꞌ yi na chitzan tan jakleꞌn yi yoleꞌj: “¿Ẍchitzꞌok peꞌ junt tir yi eꞌ almaꞌ?” nka “¿Ẍeꞌn sbneꞌ chiwankil yil chitzꞌij?” cheꞌch loꞌ. 36 Chin ploj nin bin cyajtzaꞌklaꞌtz, ko yaꞌtz na chijak. ¿Qui peꞌ na el chitxum tetz? yi na oc jun ij ttxꞌotxꞌ na jeꞌ ul tal, ma yi xcꞌoml na kꞌay. 37 Nin yi na jeꞌ ul yi tal, nkꞌeꞌtz niꞌcuꞌn yubil tu yi bakꞌwutz ij yi ja oc cyen ttxꞌotxꞌ. Mpe ik ixiꞌn triw nka alchok scyetz jilwutz ijil, apart yubil yi na jeꞌ ul. 38 Na wenkseꞌn tib yi talmaꞌ yi ij tan Ryos, quib yi tajbil iꞌ. Nin aparchk len eꞌchk jilwutz ij taꞌn.
39 Nchaꞌtz kutaneꞌn ketz, nkꞌeꞌtz niꞌcuꞌn kachiꞌbel tu chichiꞌbel yi eꞌ txuc. Na apart yi smaron txuc nin apart cyetz cay, scyuchꞌ yi eꞌ yi na chixicyꞌin tcyaꞌj. 40 Nchaꞌtz quitaneꞌn yi eꞌ yi itzꞌeꞌ tcyaꞌj, nkꞌeꞌtz niꞌcuꞌn taneꞌn chiwankil tu yi oꞌ ketz yi atoꞌ tzoneꞌj wuxtxꞌotxꞌ. 41 Nchaꞌtz yi kꞌej, apart yubil tu yi xaw tu eꞌchk txꞌuml. 42 Ej nin choꞌn cuꞌn sbneꞌ yil chitzꞌij junt tir yi eꞌ almaꞌ. Na yi na mukxij kawankil, na kꞌay, poro yil chitzꞌij junt tir quiꞌt lkꞌay. 43 Na yi na mukxij yi kawankil quiꞌct kꞌej, poro yil tzꞌitzꞌij junt tir kawankil sjalok kꞌej. Ej nin quiꞌc ẍchamil kawankil yi na mukxij, poro yil tzꞌitzꞌij junt tir sjalok ẍchamil. 44 Nchaꞌtz yi kawankil, yi ntaxk quim, iꞌtz jun kawankil yi na cawun kajtzaꞌkl teꞌj. Ma yil kitzꞌijt, sjalok junt kawankil yi tzꞌocopon jakꞌ caꞌwl yi Espíritu cwent Ryos. 45 Ej nin je junt xtxolbileꞌj yi tzꞌibaꞌnt cyen: “Yi bnixeꞌn Adam, yi bajx wunak, akꞌij tuꞌ uꞌlij yi xew tan Ryos.” Ma yi Cristo, yi caꞌp Adam taneꞌn, iꞌ na akꞌon tetz kutzꞌajbil. Nin iꞌ yi ajxetzeꞌl taneꞌn tetz junt jilwutz acꞌaj wunak. Nin iꞌtz yi oꞌ ketz yi na kaxom te yi tetz tajbil. 46 Poro jaluꞌ ilenin na cawun yi tajbil yi kawankil skeꞌj. Ma yil kitzꞌij junt tir, nkꞌeꞌst tzun kawankil ajcaw skeꞌj sbneꞌ, ma na i yi kajtzaꞌkl balaj, yaꞌstzun ajcaw sbneꞌ te yi acꞌaj kawankil. 47 Yi bajx Adam choꞌn jaleꞌn teꞌtz wuxtxꞌotxꞌ. Nin txꞌotxꞌ tuꞌ iꞌ. Poro yi caꞌp Adam yi nchaꞌtz wunak nin iꞌ-tz, choꞌn mpon tzaj teꞌtz jalen tziꞌn tcyaꞌj. Nin iꞌ yi Cristo, yi Ajcaw skeꞌj. 48 Nchaꞌtz yi bajx Adam txꞌotxꞌ tuꞌ teꞌtz. Nin cyakil yi eꞌ yi ateꞌ wuxtxꞌotxꞌ, niꞌcuꞌn eꞌ tu yi bajx Adamaꞌtz. Poro yi oꞌ yi atoꞌ tkꞌab yi Adam yi choꞌn mpon tzaj tcyaꞌj, kocopon chi taneꞌn iꞌ. 49 Quib yi oꞌ teblal yi bajx Adam jaluꞌ yi txꞌotxꞌ tuꞌ iꞌ, nchaꞌtz tzun oꞌ ketz, kocopon tetz teblal yi jun yi choꞌn mpon tzaj tcyaꞌj.
Jepon txꞌixp kawankil
50 Ma jaluꞌ eꞌuꞌ wajwutz, yi ekaꞌn tan cyakil yi xtxolbilaꞌseꞌj, iꞌtz yi quiꞌc rmeril tan tponeꞌn kawankileꞌj kale na cawuneꞌt Ryos. Na quiꞌc rmeril tan tponeꞌn jun takleꞌn yi na kꞌay le amaꞌl kale quiꞌcleꞌt kꞌaynak. Tajweꞌn yi apart kawankil sbneꞌ.
51 Ma jaluꞌ, swaleꞌ nin scyeruꞌ yi mbi cuꞌn sbajok skeꞌj tzantzaj. Nin iꞌtz jun xtxolbil yi txeꞌn cunin quibituꞌ. Je puntileꞌj: Nkꞌeꞌtz cyakil oꞌ skaquimok, poro cyakil oꞌ kajepon txꞌixp. 52 Kajepon txꞌixp lajkeꞌl, chi na litꞌneꞌ kawutz. Na yil ẍchꞌin yi wiꞌtzbil chun, kajepon txꞌixp.
Ma yi eꞌ almaꞌ, chitzꞌok tu jun acꞌaj chiwankil. Na yil tzꞌoc yi chun kalenaꞌs tzun chitzꞌij junt tir tan quiꞌt kꞌayeꞌn yi jun acꞌaj chiwankilaꞌtz. Na yi kalmaꞌ colij tuꞌ tan jun kawankil yi baꞌn na kꞌay. Chaꞌstzun te chin tajweꞌn cunin yil jal junt acꞌaj chiwankil yi eꞌ almaꞌ yi quiꞌt kꞌay.
53 Inti yi oꞌ ketz, yi txeꞌn kaquim, kalenaꞌs tzun ljeꞌ txꞌixpuꞌn yi ketz kawankil. Na chin tajweꞌn cunin tan jeꞌn txꞌixpuꞌn kawankil bantz quil quim.
54 Ej nin yil jal junt chiwankil yi eꞌ almaꞌ, yi quil kꞌay, nin yil kajeꞌ txꞌixp ketz tan qui kaquimeꞌn, kalenaꞌs tzun tzꞌel cuꞌn te yi yol yi tzꞌibaꞌnt cyen yi na tal: “Quil xcyeꞌ quimichil skeꞌj. 55 ¿Lok tzun ẍchamil quimichil jaluꞌ? Quiꞌct.”b \p 56 Na na el katxum tetz, yi tan yi ley yi at cyen na lajluchax yi at kil. Nin tan tuꞌ yi na kajuch kil txꞌaklij quimichil skawutz. 57 Poro ntyoẍ tetz Kataj, yi tan tuꞌ yi mbi cuꞌn banak Kajcaw Jesucristo baꞌn keꞌl liwr tkꞌab quimichil.
58 Chaꞌstzun te eꞌuꞌ wajwutz, yi okꞌleꞌn chiwutzuꞌ waꞌn, quiwit. Benk quikanuꞌ ttxꞌotxꞌ. Ilenin kakꞌujk len te yi takꞌun Kajcaw, na nkꞌeꞌtz tan chaꞌtz tuꞌ na kakꞌuj, poro sjamelank yi kakꞌun.