Yi mbi mban Pawl Malta
28
1 Itzun yi wiꞌt kaclaxeꞌn, kubital tzuntz yi Malta biꞌ yi jun islajaꞌtz. 2 Itzun yi eꞌ wunak yi najlcheꞌ le amaꞌlaꞌtz, penin skꞌil koꞌ chicꞌulultz, nintzun cuꞌ jun kꞌakꞌtz cyaꞌn na na tzan abal nin wiꞌnin cheꞌw. Skꞌil nin cyakꞌol amaꞌltz sketz. 3 Ma Pawl xtxꞌamxeꞌn tzaj tzun cobox kꞌab tzeꞌ yi skejt taꞌn. Toqueꞌn tzun cꞌoxoltz wi kꞌakꞌ. Poro teleꞌn tzaj tzun ojkuj jun lubaj tan walor kꞌakꞌ. Cyenin tzun beneꞌn tan ẍchayeꞌn yi kꞌab Pawl. 4 Itzun yi beneꞌn quilol yi eꞌ yi najlcheꞌ nintz, yi chꞌinl quen yi lubaj te kꞌab Pawl, cyalol tzuntz squibil quib:—Biyolnak loꞌ yi jun yajeꞌj, na ja clax iꞌ xe mar poro quinin tzꞌel iꞌ swutz, —cheꞌch tzun bantz squibil quib.
5 Jeꞌn tzun ẍchitul yi kꞌabtz wi kꞌakꞌ. Tponeꞌn tzun txꞌakxuj tetz lubajtz tkꞌakꞌ. Quiꞌc nin tzun ban Pawltz. 6 Itzun yi eꞌ wunak na chichꞌiwan tan jeꞌn mal Pawl nka tan tponeꞌn cuchꞌpuj tziꞌn tan quimeꞌn. Poro yi quilol yi quiꞌc ban Pawl, jeꞌn tzun chitxꞌixpul cyajtzaꞌkl, nintzun cyaltz:
—Ryos loꞌ iꞌ, —cheꞌch bantz.
7 At tzun jun yaj yi na biꞌaj Publio. Wiꞌ banl wiꞌ iꞌ tcꞌuꞌl yi jun amaꞌlaꞌtz. At tzun caꞌl iꞌ-tz nakaꞌj. Iꞌ tzun akꞌon kaposar tetz ox kꞌej.
8 Itzun yi koponeꞌn, coylij yi taj Publiojaꞌtz wi xtxꞌach. Kꞌaꞌkl iꞌ at, nin xcocꞌ. Tocomponeꞌn tzun Pawl tan xmayeꞌn. Itzun yi nsken wiꞌt nach Kataj, jeꞌn tzun tkꞌol Pawl yi kꞌabtz tibaj, nin ul yos tuchꞌ. 9 Yi beneꞌn loꞌon stziblal, cyuleꞌn tzaj tzun cyakil yi eꞌ yabiꞌẍ yi ateꞌ-tz tul yi jun isla, nin baj ul len yos scyuchꞌ tan porer Kataj. 10 Wiꞌnin oy cyakꞌtz sketz. Ej nin nchaꞌtz yi txant tan kicyꞌeꞌn wi aꞌ cyoyil tzun yi eꞌchk takleꞌn yi mbi cuꞌn tajweꞌn sketz.
Yi tponeꞌn Pawl Roma
11 Itzun yi ticyꞌeꞌn ox xaw, choꞌn tzun kicyꞌeꞌntz tcꞌuꞌl junt barc cwent tetz yi tnum Alejandría. Choꞌn ticyꞌeꞌn kꞌalaj kaꞌn le jun islajaꞌtz. Te yi jun barcaꞌtz banij quen yi teblal Cástor tu Pólucs teꞌj. Yaꞌstzun chiryosil yi eꞌ taw barc. 12 Itzun yi koponeꞌn Siracusa yaꞌstzun oꞌ aꞌteꞌt ox kꞌejtz. 13 Keleꞌn tzuntz, choꞌn tzun kicyꞌeꞌntz stziꞌeꞌnleꞌn aꞌ jalen cuꞌn koponeꞌn Regio. Le junt eklok xeꞌteꞌn tzun jun cyekꞌekꞌtz yi choꞌn sajeꞌn wutz kacoc. Cob tzun kꞌej oꞌ oponeꞌt-tz jalen Puteoli. 14 Oꞌ nojopon tzuntz scyeꞌj yi eꞌ kajwutz yi ateꞌ-tz nintzun cuꞌ chiwutz tan kaꞌteꞌn juk kꞌej scyeꞌj. Kicyꞌeꞌn tzuntz tan koponeꞌntz Roma. 15 Ma yi bajeꞌn quibital yi eꞌ kajwutz yi at kopombil Roma, cyeleꞌn tzaj tzun tan kacꞌulcheꞌn. Choꞌn cyuleꞌn tan kacꞌulcheꞌn le tcꞌaꞌybil yi na biꞌaj Apio, tu yi luwar yi na biꞌaj Ox Witbil. Ma yi eꞌ beneꞌn tilol Pawl yi eꞌ kajwutz yi eꞌ ul tan kacꞌulcheꞌn, tyoẍineꞌn nin tzun tetz Kataj, nin quiwix talmaꞌ-tz. 16 Ma yi koponeꞌn Roma cheꞌ jatxol yi capitán yi eꞌ pres tkꞌab yi chibajxom yi eꞌ sanlar, ma Pawl akꞌlij amaꞌl tetz tan taꞌteꞌn tcꞌuꞌl jun tetz cꞌmoꞌn caꞌl. Poro ilenin xomcheꞌ sanlar tan qꞌuicyꞌleꞌn iꞌ.
Yi xtxolil Pawl yol Kataj le tnum Roma
17 Itzun yi teleꞌn ox kꞌej cheꞌ ẍchakol tzun Pawl yi eꞌ bajxom cyetz judiy. Ma yi chichamol quib toqueꞌn tzun Pawl tan yol scyetz:
—I bin jaluꞌ eꞌuꞌ intanum, cyaꞌl na noqueꞌt tan chipoꞌtzeꞌn katanum mpe ik tan telseꞌn kꞌej chicstumbr yi eꞌ kamam. Yi wetz quiꞌc wetz wil poro ja chinjatxlij ẍchikꞌab yi eꞌ aj Roma jalen Jerusalén. 18 Yi wiꞌt bajeꞌn chichꞌotil yi eꞌ aj Roma intziꞌ, nneꞌl tzun kloꞌ-tz liwr, na cyaꞌl jaleꞌt wil cyaꞌn tan incweꞌn chiquimsal. 19 Poro yi cyoqueꞌn yi eꞌ judiy tan takꞌleꞌn wil, cweꞌn tzun intxumultz yi chin tajweꞌn cunin tan wicyꞌeꞌn swutz César yi wiꞌtz kajcaw tzoneꞌj Roma, poro qui na waj lwakꞌ quil yi eꞌ intanum. 20 Chaꞌstzun te ja cheꞌ inchakuꞌ tan wilol chiwutzuꞌ nin tan kajiloneꞌn scyuchꞌuꞌ. Cꞌalij chin tan caren, poro tan tuꞌ yi at inchꞌiw tan inclaxeꞌn chi quitaneꞌn cyakil yi eꞌ katanum yi eꞌ aj Israel, —stzun Pawl bantz scyetz.
21 —Cyaꞌl muꞌleꞌt uꞌj Judea yi na jilon teꞌjuꞌ, nin cyaꞌl muꞌlakit jun katanum tan takꞌleꞌn tiluꞌ nka tan yolcheꞌnuꞌ. 22 Poro na kaj kubit teruꞌ yi mbi na elepont yi na tocsajuꞌ, na alchok tunin na tzaneꞌt yolcheꞌn yi quiꞌc xac yi jun acꞌaj chusuꞌneꞌj, —cheꞌch yi chiwiꞌ banl wiꞌ yi eꞌ judiy yi najlcheꞌ Roma.
23 Bixeweꞌn tzun jun kꞌejtz cyaꞌn tan quibital yi xtxolbil yi na kocsaj. Wiꞌnin tzun eꞌ eꞌ opontz kale atit yi posar Pawl. Jalchan tzun xeꞌteꞌntz tan xtxꞌolcheꞌn xoꞌl scyetz, nin baj cuꞌn kꞌejtz taꞌn tan xtxoleꞌn yi ẍeꞌn cuꞌn sbneꞌ Ryos tan cawuꞌn, nin xcon yi ley Moisés taꞌn, tu cyakil yi tzꞌibaꞌnt cyen cyakꞌun yi eꞌ elsanl stziꞌ Ryos tentz. I kloꞌ taj yi ẍeꞌnk tan chitxꞌixpul cyajtzaꞌkl tan cyocsal yi Jesús iꞌ yi Cristo. 24 At tzun eꞌ cyocsaj yi yol yi tal Pawl scyetz, nin at eꞌ yi quinin cyocsaj. 25 Yi cyajeꞌn, quinin tzun cꞌul tib chiyoltz. Je tzun ben tlol Pawl scyetz:
—Bintzinin yi xtxolbil yi talnak yi Espíritu Sant scyetz eꞌ chimamuꞌ tan Isaías yi elsanl stziꞌ Ryos:
26 ‘Quiloꞌk ẍchixoꞌl yi eꞌ wunakeꞌj, nin txolaj scyetz:
Tzitbiteꞌwok poro quinin tzꞌel itxum tetz.
Tzitileꞌwok poro quil pujx itakꞌun, cẍchij sban scyetz.
27 Alaj yi xtxolbileꞌj,
na ja poꞌtij cyajtzaꞌkl yi eꞌ wunakeꞌj.
Nin ja chcanix chiwiꞌ.
Jopij wutz cyajtzaꞌkl tan qui teleꞌn chitxum tetz yi bintzi.
Quil quibit. Quil pujx cyaꞌn. Nin quil chitxꞌixpuj cyajtzaꞌkl.
Chaꞌstzun te quil chiclax waꞌn.’
Yaꞌstzun yol yi Espíritu Sant yi alijt cyen tan Isaías. 28 Ma jaluꞌ quibitzajuꞌ, yi sbneꞌ opon tunintz yi claxeꞌn yi na tzan Ryos tan sukeꞌn, tzꞌicyꞌpon scyetz yi eꞌ yi nkꞌeꞌtz eꞌ katanum, nin scyocsajeꞌ, —chij Pawl scyetz.
29 Yi wiꞌt tlol Pawl yi yolaꞌs, nintzun eꞌ baj eltz. Wiꞌnin chimakꞌsal quib te chiyol yi cyeleꞌn. 30 Cob tzun yob aꞌtij Pawl le jun caꞌlaꞌtz yi cꞌamij taꞌn. Wiꞌnin na tzatzin iꞌ scyeꞌj yi eꞌ yi na chopon tan xajseꞌn iꞌ. 31 Nin ilenin xtxol iꞌ scyetz yi ẍeꞌn cuꞌn sbneꞌ Ryos tan cawuꞌn, nin yi mbi ekaꞌn tan Kajcaw Jesucristo. Qui xob iꞌ tan xtxoleꞌn, nin cyaꞌl jun oc tan makleꞌn wutz iꞌ.