Yi beneꞌn ticyꞌleꞌn Pawl Roma
27
1 Itzun bantz yi bixeweꞌn tan kabeneꞌn wi aꞌ tan koponeꞌn Italia, jatxleꞌn tzun Pawl scyuchꞌ cobox pres tkꞌab jun capitán yi na biꞌaj Julio. Iꞌ jun capitán tetz yi companiy yi na biꞌaj tetz Augusto. 2 Koqueꞌn tzuntz tcꞌuꞌl jun barc cwent tetz yi tnum Adramit, yi choꞌn at bembiltz lakak eꞌchk ujbil barc cwent tetz Asia. Kicyꞌeꞌn tzun wi aꞌ. Xomij Aristarco skeꞌj, jun aj Macedonia yi choꞌn najlij Tesalónica. 3 Le caꞌp kꞌej tzun koponeꞌntz Sidón. Nintzun takꞌ Julio lisens tetz Pawl tan beneꞌn scyeꞌj yi eꞌ tamiw tan chicꞌaꞌchal, na nin el kꞌajab Julio te Pawl. 4 Koqueꞌn nin tzun junt tir tcꞌuꞌl barc nin oꞌ icyꞌtz. Poro tan paj yi choꞌn na saj tojkbil cyekꞌekꞌ skawutz choꞌn tzun cyajeꞌn cyen Chipre le kamax.5 Itzun yi wiꞌt kicyꞌakeꞌntz nakaꞌjil Cilicia tu Panfilia, choꞌn tzun koponeꞌntz Mira, jun tnum cwent Licia.
6 Jaleꞌn tzun junt barc cwent Alejandría takꞌun yi capitán. Choꞌn at bembil yi barcaꞌtz Italia. Koqueꞌn tzuntz tcꞌuꞌl. 7 Alaꞌ tzun kꞌej oꞌ bantz wi aꞌ, na chin cheb cunin na xon barc wi aꞌ. Pentlen tunin koponeꞌntz swutzeꞌl tzaj Gnido. Kicyꞌakeꞌntz nakaꞌjil yi stziꞌ txꞌotxꞌ swutzeꞌl tzaj Salmón. 8 Kaleꞌn nin tzun il kicyꞌeꞌn cuꞌntz wi aꞌ tzi mar. Koponeꞌn tzuntz le jun amaꞌl yi na biꞌaj Balaj Ujbil Barc. Nakaꞌj tzun at yi tnum Lasea.
9 Itzun yi sken wiꞌt el nim tiemp kaꞌn le jun amaꞌlaꞌtz, nin yi sken wiꞌt jal qꞌuixbel tan kaxoneꞌn wi aꞌ, toqueꞌn tzun Pawl tan talcheꞌn jun tajtzaꞌkl yi aj tolinl barc tan qui kicyꞌeꞌn kale atoꞌt, na nsken wiꞌt icyꞌ kꞌejlal tan mucꞌleꞌn weꞌj.a Na na icyꞌ cuntuꞌ yi jun kꞌejlalaꞌtz yi na xeꞌtij kꞌalaj. 10 Je tzun tal Pawl scyetz:
—Ma jaluꞌ eꞌuꞌ wamiw, le wutz wetz wajtzaꞌkl quiꞌt scꞌul yil kicyꞌ wi aꞌ. Na sloꞌonk yi barc tu yi ektz nin nchaꞌtz oꞌ, skaquimok loꞌ, —stzun Pawl bantz scyetz.
11 Poro mas tcunin xomeꞌn wiꞌ yi capitán te yi tajtzaꞌkl yi aj tolinl barc tu yi taw barc swutz yi tajtzaꞌkl Pawl. 12 Nchaꞌtz wiꞌnin eꞌ yi xom chiwiꞌ te yi taw barc tan cyajeꞌn cyen quilol yi jun ujbil barcaꞌtz na ploj yi amaꞌl kale atoꞌt lakak eꞌchk kꞌalaj. I kloꞌ cyaj tan koponeꞌn Fenice, jun ujbil barc cwent tetz Creta, yi na xmayin nin ticyꞌeꞌn tziꞌn nin toqueꞌn tziꞌn. Yaꞌstzun kloꞌ cyajbiltz tan kacyajeꞌn cyen jalen kloꞌ ticyꞌeꞌn tiemp tetz kꞌalaj.
Yi xeꞌteꞌn yi jun chumam cyekꞌekꞌ wi mar
13 At tzun muꞌẍ tal cyekꞌekꞌtz saj bnol tibtz cweꞌn tziꞌn. Itzun le wutz yi cyetz cyajtzaꞌkl yi sken chicambaj yi cyetz cyajbil. Jeꞌn tzaj tzun chijutul yi eꞌchk tzꞌamol tetz barc xe aꞌ. Kicyꞌeꞌn tzuntz wi aꞌ nakaꞌjil Creta. 14 Itzun le rat nin xeꞌteꞌn jun chin wutzileꞌn cyekꞌekꞌ yi choꞌn sajeꞌn jeꞌn tziꞌn. 15 Toqueꞌn tzun cyekꞌekꞌ tan tolpeneꞌn barc. Quinin tzun xcyeꞌ barc te walor cyekꞌekꞌ. Kakꞌol tzun kib tkꞌab cyekꞌekꞌ nintzun oꞌ ben pitoltz. 16 Choꞌn tzun kicyꞌeꞌn cuꞌntz wutz coc jun tal juy isla yi na biꞌaj Clauda. Kaleꞌn nin tzun il oꞌ bantz tan colcheꞌn yi tal neꞌẍ barc yi jutuꞌn tan yi jun chin wutzileꞌn barc kale atoꞌt. 17 Yi wiꞌt chixcyeweꞌn tan kinlejeꞌn tzaj yi neꞌẍ barc, kalenaꞌs tzun cyoqueꞌntz tan cꞌalcheꞌn xe cꞌuꞌl yi nim barc tan qui teleꞌn jakxuj. Cweꞌn tzaj tzun kapujul yi eꞌchk xbuꞌktz, na wiꞌnin chixobeꞌn na ko tzun ẍeꞌn kopon le amaꞌl Sirte, kale quiꞌcleꞌt mas xeꞌ aꞌ. Pitij choꞌ nin tzuntz tan cyekꞌekꞌ. 18 Kaleꞌn nin tzun il atoꞌ cuntz tkꞌab jun chin wutzileꞌn cyekꞌekꞌ abal. Itzun le caꞌp kꞌej nintzun oꞌ octz tan joꞌleꞌn len eꞌchk ektz yi cyꞌaꞌn tan barc. 19 Ma le toxiꞌn kꞌejtz nintzun el kacꞌoxol yi eꞌchk maꞌcl yi na xcon tul barc. 20 Alaꞌ tzun kꞌej quinin kil wutz kꞌej tu yi eꞌchk txꞌuml. Caws nin tzun atoꞌ cuꞌnt tkꞌab jun chin wutzileꞌn cyekꞌekꞌ abalaꞌtz. Quiꞌct nin kachꞌiw tan kaclaxeꞌn.
21 Alaꞌ cunin tzun kꞌej qui oꞌ wantz. Jeꞌn tzun txiclok Pawl ẍchixoꞌl nintzun ben tlol scyetz:
—Eꞌuꞌ wamiw, chumbalaj nin kloꞌ ban yi nink eꞌ xomuꞌ te inyol yi wal scyeruꞌ yi qui kloꞌ oꞌ eltzaj Creta. Na ntintuꞌ jun loꞌoneꞌn tu jun tzꞌakoꞌn muꞌl kabneꞌ tzoneꞌj. 22 Ma jaluꞌ quiwixk bin chicꞌuꞌluꞌ, na cyaꞌl nin jun sotzok scyeruꞌ, ma na ntin yi barc sloꞌonk. 23 Na yi maꞌs lakꞌbal ja ẍchaj tib jun ángel tetz Ryos tzinwutz, yi Ryos yi atin wetz tkꞌab, yi Ryos yi na imban inmunl swutz. 24 Je tzun ntal swetz: ‘Pawl, quil cxob, na chin tajweꞌn cunin tan awuponeꞌn swutz César. Tan aẍ, Ryos lchicolon cyakil yi eꞌ yi xomcheꞌ tzaweꞌj le barc.’ 25 Chaꞌstzun te eꞌuꞌ wamiw, quiwixk bin chicꞌuꞌluꞌ, na na wocsaj yi tzꞌelk cuꞌn Ryos te yi maꞌlchij swetz maꞌs. 26 Chin tajweꞌn cunin tan kanojeꞌn pon te jun isla, —chij Pawl bantz scyetz.
27 Itzun le cyajlajiꞌn akꞌbal yi kasajleꞌnix pitij tan cyekꞌekꞌ wi mar Adriático eꞌchk nicyꞌakꞌbal loꞌ, le wutz cyajtzaꞌkl yi eꞌ aj tolinl barc yi txant tan cyoponeꞌn tzi txꞌotxꞌ. 28 Cyoqueꞌn tzuntz tan maꞌleꞌn xeꞌ yi aꞌ. Junak tzun jaꞌ yi xeꞌ. Chibeneꞌn nin tzun muꞌẍ nin eꞌ oc junt tir tan maꞌleꞌn. Oꞌlajt tcuꞌn tuꞌ jaꞌ yi xeꞌ. 29 Chixobeꞌn tzun yi eꞌ tolinl barc na ko tzun noj quen barc te eꞌchk cꞌub yi ateꞌn tzaj xe aꞌ. Beneꞌn tzun chitxukꞌpil cyaj tzꞌambil tetz barc xe aꞌ wutz coc len barc. Nternin tzun na chipekꞌ yi ẍeꞌnk tan tuleꞌn chan skil. 30 Cyoqueꞌn tzun yi eꞌ aj tolinl barc tan joyleꞌn juꞌ tan cyeleꞌn kloꞌ ojk. Cweꞌn tzun yi neꞌẍ barc cyaꞌn wi mar tan ẍkanseꞌn nin kloꞌ yi eꞌchk tzꞌambil juꞌ barc, na i kloꞌ cyaj tan koꞌ cweꞌn chisubul tan cyeleꞌn kloꞌ ojk. 31 Beneꞌn tzun tlol Pawl tetz yi capitán scyuchꞌ eꞌ sanlar:
—Ko quil chicyaj yi eꞌ aj tolinl tzoneꞌj tcꞌuꞌl barc nkaben mulkꞌuj xe aꞌ. Quiꞌc rmeril tan kaclaxeꞌn, —chij Pawl bantz scyetz.
32 Cweꞌn tzun chitamol yi eꞌ sanlar yi eꞌchk tzꞌamol tetz yi neꞌẍ barc, nintzun cyaj txꞌakxuj te neꞌẍ barcaꞌtz. 33 Itzun yi picyꞌpaxeꞌn tan tuleꞌn skil, toqueꞌn tzun Pawl tan chimoxeꞌn tan chiwaneꞌn. Itzun taltz scyetz:
—Cyajlajix kꞌej jaluꞌ yi qui na chiwituꞌ, nin quiꞌc nin na chibajsajuꞌ. 34 Chaꞌstzun te na cheꞌ inmoxuꞌ tan chiwaneꞌnuꞌ tan jaleꞌn chiwaloruꞌ, na quiꞌc nin jun xiꞌil chiwiꞌuꞌ yi nink txꞌakxij, —chij Pawl bantz scyetz.
35 Yi wiꞌt tlol Pawl yi yoleꞌj scyetz, jeꞌn tzun stzꞌamol Pawl yi waꞌ-tz nin tzun tyoẍin tetz Ryos. Ẍchiwutz cuꞌn cyakil wunak cweꞌn tzun piẍul yi waꞌ-tz nintzun octz tan waꞌaꞌn. 36 Quiwixeꞌn tzun chicꞌuꞌltz nin eꞌ baj octz tan waꞌaꞌn. 37 Cob cient oxcꞌal tu waklaj kaxoneꞌn atoꞌ tcꞌuꞌl barc. 38 Yi wiꞌt nojeꞌn chicꞌuꞌl, cyoqueꞌn tzuntz tan joꞌleꞌn len yi ixiꞌn triw wi aꞌ tan sasaxeꞌn yi barc.
Yi beneꞌn mulkꞌij barc xe aꞌ
39 Itzun yi tuleꞌn skil quinin tzun kajskej wutz yi luwar kale oꞌ oponeꞌt. Beneꞌn tzun quilol kale na ocoponeꞌt jun tzanlaꞌ tul mar. Samlicꞌ cuꞌn tzun attz stziꞌ. Chitxumul tzuntz tan telempon yi barc cyakꞌun wi samlicyꞌ. 40 Cweꞌn tzun chitamol yi eꞌchk stzꞌambil barc, nintzun baj cyaj cyen quiloltz xe mar. Iteꞌn nin tkujaꞌtz bajeꞌn chipujul yi eꞌchk timonil barc, nintzun jeꞌ cyakꞌol yi xbuꞌk yi na oc te juꞌ barc. Cyoqueꞌn tzuntz tan pileꞌn tan cyeleꞌn poneꞌn wi samlicyꞌ. 41 Choꞌn tzun koponeꞌntz kale na cꞌulwit tib yi pakꞌbil mar. Yaꞌstzun beneꞌt ẍukꞌil barc yi juꞌ-tz tcꞌuꞌl xkꞌol. Quiꞌt nin tzun yucantz. Bajeꞌn len tzun kotxꞌpuj yi wiꞌ cyꞌach barctz tan yi walor yi pakꞌbil mar. 42 Nintzun kloꞌ eꞌ oc yi eꞌ sanlar tan chiquimseꞌn yi eꞌ pres na ko tzun at eꞌ cheꞌl ojkujtz wi aꞌ. 43 Toqueꞌn tzun yi chibajxom yi eꞌ sanlar tan chimakleꞌn na na taj iꞌ tan claxeꞌn Pawl. Cawuneꞌn tzun yi chibajxom scyetz eꞌ sanlar yi baꞌn chijichin, tan chibeneꞌn bajx wi aꞌ tan cyeleꞌn pon stziꞌ. 44 Itzun yi eꞌ mas, at eꞌ eꞌ opontz wiꞌak eꞌchk takleꞌn yi at tcꞌuꞌl yi barc. Cyakil cunin tzun kaclaxeꞌntz, na oꞌ icyꞌuꞌl len tzi aꞌ.