YI CART YI BEN STZꞌIBAL PAWL SCYETZ YI Eꞌ AJ GALACIA
Xeꞌtzbil yol Pawl
1
1 I bin jaluꞌ eꞌuꞌ wajwutz, in Pawl. Chakij chin tan Kataj Ryos, nin bixbaꞌn chint taꞌn tetz jun mero apostl. Na nkꞌeꞌtz jun wunak nchin chakon tzaj, nin nkꞌeꞌtz jun wunak nchinbixban, ma na iꞌtz Jesucristo yi jun yi itzꞌij junt tir ẍchixoꞌl almaꞌ tan porer Kataj. 2 Ej nin yi in wetz, scyuchꞌ eꞌ kajwutz yi ateꞌ sweꞌj, na katzan tan stzꞌibeꞌn nin yi carteꞌj scyeruꞌ yi eꞌuꞌ yi najlcheꞌuꞌ lakak eꞌchk amaꞌl cwent Galacia. 3 Takꞌ tzaj Kataj Ryos tu Kajcaw Jesucristo yi banl tu tzatzin paz squibuꞌ. 4 Yi Jesucristojaꞌtz yi na wal nin scyeruꞌ, yaꞌstzun yi jun yi ntakꞌ tib tkꞌab quimichil tan ẍchojleꞌn kil, nin tan kelseꞌn tkꞌab yi ilcꞌol. Yaꞌstzun tulejtz na yaꞌstzun tajbil Kataj Ryos. 5 Kakꞌeꞌ bin kakꞌajsbil tetz, tetz ben kꞌej ben sak. Amén.Quiꞌc junt chusuꞌn yi nink kaclax taꞌn
6 Ma jaluꞌ eꞌuꞌ wajwutz, wiꞌnin na neꞌl yab scyeꞌjuꞌ yi jalcunin tzan cyajeꞌn cyen quiloluꞌ Ryos. Wech iꞌ eꞌ moxon tzajuꞌ tan yi banl talmaꞌ Cristo. Poro lastum yi tzan chixomeꞌnuꞌ te junt jilwutz chusuꞌn tan chicolpeꞌn kloꞌuꞌ. 7 Poro iẍkaj at tzunk junt chusuꞌn yi baꞌn kaclax taꞌn. I tu na at eꞌ ẍchixoꞌluꞌ yi na chitzan tan chixuxeꞌnuꞌ, nin tan poꞌtzeꞌn yi ẍchusuꞌn Cristo. 8 Poro swaleꞌ nin jun cyajtzaꞌkluꞌ, kol tzꞌoc jun tan xtxoleꞌn junt jilwutz chusuꞌn tan chiclaxeꞌnuꞌ, nin ko qui na xom te yi chusuꞌn yi ja wiꞌt katxol scyeruꞌ, tzꞌocopon Ryos tan cawseꞌn yi junaꞌtz. Nin sotzel wutz sbneꞌ. Mpe ink noꞌc tan xtxoleꞌn junt jilwutz chusuꞌn, quil cyocsajuꞌ na ko yaꞌtz tzimban, Ryos tzꞌakꞌonk incaws tan insotzeꞌn. Ej nin yi nink tzꞌopon tzaj jun ángel tcyaꞌj tan xtxoleꞌn junt jilwutz chusuꞌn, quil cyocsajuꞌ, na scawsok teraꞌtz tan Ryos. 9 Walnak nin jun tir scyeruꞌ, nin swaleꞌ nin junt tir: Ko at jun tzꞌoc tan xtxoleꞌn junt jilwutz chusuꞌn yi qui xomij te yi chusuꞌn yi ja wiꞌt quibituꞌ, quil cyocsajuꞌ, na scawsok teraꞌtz tan Ryos.
10 Yi xtxolbilaꞌseꞌj yi na chintzan tan talcheꞌn nin scyeruꞌ, nkꞌeꞌtz yi ik tan cyakꞌoluꞌ inkꞌej, ma na iꞌtz tan tkꞌol Ryos inkꞌej. Iẍkaj yaꞌstzun wajbil tan cyakꞌol alchok jilwutz wunakil inkꞌej. Na yi najk chintzan tan joyleꞌn inkꞌej ẍchiwutz wunak, nkꞌeꞌtz tzunk kloꞌ in jun ẍchakum Cristo.
Nkꞌeꞌtz wunak txumul tetz yi ẍchusuꞌn Pawl
11 Ma jaluꞌ eꞌuꞌ wajwutz, quil cyocsajuꞌ junt chusuꞌn yi apart. Na yi chusuꞌn yi intxolnak scyeruꞌ, nkꞌeꞌtz wunak tuꞌ txumul tetz, ma na kawutzileꞌn cuꞌn Jesucristo. 12 Na nkꞌeꞌtz choꞌnk wital scyetz wunak, nin cyaꞌl jun mmoꞌc tan inchusleꞌn teꞌj, ma na ntin Cristo aꞌlon swetz.
13 Na bitaꞌnt cyanuꞌ yi ẍeꞌn cuꞌn wutaneꞌn sajleꞌn tan banleꞌn taneꞌn yi ketz kacstumbr yi oꞌ judiy. Ej nin bitaꞌnt cyanuꞌ yi chin cham nin in sajleꞌn tan chibuchleꞌn yi eꞌ yi eꞌ xom te Cristo. Na yi wajbil sajleꞌn iꞌtz tan cyeleꞌn cuꞌn kloꞌ swutz. 14 Nchaꞌtz yi atin tzaj tan banleꞌn taneꞌn kacstumbr yi oꞌ ketz yi oꞌ judiy, ntin cuꞌn in at inẍcꞌatnakil ẍchiwutz yi eꞌ mas wuchꞌ te yi jun tiempaꞌtz. 15 Poro bixbaꞌn chint tan Ryos yi ntaxk nuꞌl itzꞌok tan inxconeꞌn tetz iꞌ. Na tan tuꞌ yi banl talmaꞌ iꞌ ja chin jeꞌ xtxaꞌol. 16 Ej nin yi tponeꞌn yi kꞌejlal tan inxconeꞌn tetz, ja ẍchaj yi tetz Cyꞌajl swetz. Yaꞌstzun tulejtz na yi tajbil iꞌ iꞌtz tan imbeneꞌn tan xtxoleꞌn yi balaj stziblal tetz Cristo scyetz yi eꞌ yi nkꞌeꞌtz eꞌ judiy. Yi wiꞌt ẍchajol tib Jesucristo tzinwutz cyaꞌl nin inxnaꞌkeꞌt tan jakleꞌn tkanil wajtzaꞌkl. 17 Nchaꞌtz quinin nxnaꞌk tan jakleꞌn wajtzaꞌkl scyetz yi eꞌ apostl yi ateꞌ Jerusalén. Ma na choꞌn xnaꞌkeꞌn tul jun amaꞌl tzꞌinunin tuꞌ cwent Arabia. Ej nin yi weleꞌn tzaj Arabia, choꞌn wuponeꞌnt junt tir le tnum Damasco.
18 Ma yi teleꞌn ox yob kalenaꞌs tzun xnaꞌkeꞌntz Jerusalén tan yol tu kajwutz Luꞌ. Oꞌlaj kꞌej nnaꞌtijtz tuchꞌ. 19 Poro quinin wil chiwutz yi eꞌ mas apostl ntin cuꞌn Jacow yi titzꞌun Kajcaw Jesucristo. 20 Ej nin sak swutz Ryos yi bintzi yi yol yi na wal nin scyeruꞌ. Nkꞌeꞌtz wi wakꞌ tuꞌ.
21 Ej itzun bantz yi ticyꞌeꞌn poneꞌn yi cobox kꞌejaꞌtz waꞌn, choꞌn tzun xnaꞌkeꞌn lakak eꞌchk amaꞌl cwent Siria, nin tul eꞌchk amaꞌl cwent Cilicia. 22 Ma yi eꞌ cmon creyent yi najlcheꞌ lakak eꞌchk amaꞌl cwent Judea, quinin cyajskej inwutz. 23 Ntin tuꞌ intziblal nsken quibit. Ej nin yi intziblal yi nsken quibit iꞌtz: “Yi jun aj xitunl yi ocnak tan kaxiteꞌn, na tzan iꞌ jaluꞌ tan xtxoleꞌn yi balaj stziblal te yi jun yi ja kꞌukeꞌ ketz kacꞌuꞌl teꞌj. Wech na ocnak iꞌ tan xiteꞌn yi kachusuꞌn,” cheꞌch. 24 Yi quibital yi jun xtxolbilaꞌtz, nin eꞌ octz tan takꞌleꞌn chikꞌajsbil swutz Ryos.