Quiꞌc paltil yi ẍchusuꞌn Pawl ẍchiwutz yi eꞌ mas apostl
2
1 Ma yi teleꞌn cyajlajt yob, nintzun imben junt tirtz Jerusalén. Xomcheꞌ Bernabé tu Tito sweꞌj. 2 Ja xnaꞌk Jerusalén, na nin ẍchaj Ryos swetz yi yaꞌstzun tajbil iꞌ tan imbeneꞌn. Ma yi wuponeꞌn, bixeꞌ jun katxumuꞌn ntin scyuchꞌ yi eꞌ wiꞌ banl wiꞌ yi chin tzꞌaknak cuꞌn eꞌ. Ej nin yi koqueꞌn tan yol, ja noꞌc tan xtxꞌolcheꞌn xoꞌl yi chusuꞌn yi na intxol scyetz yi eꞌ yi nkꞌeꞌtz eꞌ judiy. Yaꞌstzun wulejtz tan maꞌleꞌn yi inchusuꞌn yi ko baꞌn nka quiꞌ. Na lastum ko quiꞌc xtxolbil. 3 Ej nin xomij yi kajwutz Tito sweꞌj. Nkꞌeꞌtz judiy iꞌ poro quinin cyal yi tajweꞌn tan banleꞌn circuncidar iꞌ. Chaꞌstzun te ja lajluchax yi baꞌn atit inchusuꞌn. 4 Poro tcꞌuꞌl yi jun katxumuꞌnaꞌtz yi oc, at cobox yi cyocsaj quib tetz creyent. Poro quinin xom chiwiꞌ te ketz katxumuꞌn, na yi cyetz cyajbil iꞌtz tan kabnol taneꞌn yi ley. Eꞌ octz skaxoꞌl tan maꞌleꞌn tuꞌ yi kachusuꞌn, yi ja keꞌl liwr tkꞌab yi ley nin yi qui tajweꞌn tan kajeꞌn poneꞌn te jun cꞌoloj caꞌwl na ja wiꞌt koꞌc tkꞌab Cristo. Yi cyetz cyajbil iꞌtz yi nink koꞌc pres jakꞌ caꞌwl yi ley. 5 Poro quinin kakꞌ amaꞌl scyetz. Na yi ketz kajbil iꞌtz yi quiꞌt cabej chicꞌuꞌluꞌ te yi balaj stziblal yi ja wiꞌt quibituꞌ.6 Inti yi eꞌ wiꞌ banl wiꞌaꞌtz, quinin jal paltil inchusuꞌn cyaꞌn. Poro quiꞌc wetz scyuchꞌ yi ko eꞌ balaj bajxom nka quiꞌ, na qui na tzan Ryos tan xtxumleꞌn yi mbi ekaꞌn tan jun yaj. Ntinaꞌtz na tzan Ryos tan tilweꞌn yi mbi na icyꞌ tkacꞌuꞌl. 7 Poro yi eꞌaꞌtz ja tzunk cyal junt acꞌaj chusuꞌn swetz, quiꞌ. Poro ntinaꞌtz mbantz iꞌtz yi ja el chitxum tetz yi Ryos nchin bixbaꞌn tan intxolil yi balaj stziblal scyetz yi eꞌ yi nkꞌeꞌtz eꞌ judiy, chi yi mban Luꞌ tan Ryos tan xtxoleꞌn yi balaj stziblal scyetz yi eꞌ judiy. 8 Na Ryos ocsan Luꞌ tetz jun apostl tan xtxoleꞌn yi balaj stziblal scyetz yi eꞌ judiy, nin iteꞌn nin mban Ryos sweꞌj. Na ja noꞌc taꞌn tetz jun apostl tan xtxoleꞌn scyetz yi eꞌ yi nkꞌeꞌtz eꞌ judiy.
9 Inti Jacow tu Luꞌ tu Waꞌn, yi eꞌ cuꞌn aj xetzeꞌl taneꞌn tan xicyleꞌn yi cmon creyent Jerusalén, yi meꞌl chitxum tetz yi Ryos makꞌon inkꞌej tan txoliꞌn ninin cyakꞌ chikꞌab swetz. Bixeweꞌn tzuntz cyakꞌun tan kabeneꞌn ketz tu Bernabé tan xtxoleꞌn yi yol Kataj scyetz yi eꞌ yi nkꞌeꞌtz eꞌ judiy, ma yi eꞌ cyetz bixeweꞌn tzuntz cyakꞌun tan chibeneꞌn tan akꞌun ẍchixoꞌl yi eꞌ judiy. 10 Ntinaꞌtz cyal sketz yi tajweꞌn tan cheꞌ kuchꞌeyal yi eꞌ mebaꞌ, poro yaꞌstzun na katzan tan banleꞌn sajleꞌn tunintz.
Yi toqueꞌn Pawl tan makleꞌn wutz Luꞌ Antioquía
11 Itzun bantz te yi atin tzaj le tnum Antioquía, nin opon kajwutz Luꞌ tan chixajseꞌn yi eꞌ cmon creyentaꞌtz. Poro nin noꞌc tan makleꞌn wutz iꞌ ẍchiwutz cyakil kajwutz, na tech cuꞌn tib yi apart tajtzaꞌkl. 12 Na yi ntaxk chuꞌl coboxt kajwutz yi eꞌ saj ẍchakol kawutzileꞌn Jacow, nternin tzatzin Luꞌ yi nwan scyuchꞌ yi eꞌ kajwutz yi nkꞌeꞌtz eꞌ judiy. Poro yi cyuleꞌn yi coboxaꞌtz, quiꞌt wan iꞌ scyeꞌj, na nin xob iꞌ scyetz tan paj yi na cyal yi tajweꞌn tan bajeꞌn circuncidar jun yaj yi ko na taj tzꞌoc tkꞌab Ryos. 13 Nchaꞌtz yi eꞌ mas kajwutz judiy, yi najlcheꞌ-tz Antioquía, ja chixom te tajtzaꞌkl Luꞌ. Wech na elnak chitxum tetz yi nkꞌeꞌtz tajweꞌn yi circuncisión. Poro nchaꞌtz Bernabé, nin xom nint tajtzaꞌkl scyeꞌj. 14 Poro yi wilol yi quinin xom Luꞌ te yi xeꞌ yi balaj stziblal, nintzun wal cobox yol tetz ẍchiwutz cunin cyakil yi cmon creyentaꞌtz. Je tzun waltzeꞌj: “I bin jaluꞌ taꞌ Luꞌ, oꞌ judiy tuchꞌuꞌ nin ilenin ja kawan scyuchꞌ yi eꞌ kajwutz yi nkꞌeꞌtz eꞌ judiy. ¿Nxac tzun qui na wanuꞌ scyuchꞌ jaluꞌ nin na tzanuꞌ tan talcheꞌn jaluꞌ yi quil chiclax ko quil chixom te ketz kacstumbr?”
Cyakil cuꞌn wunak na chiclax tan tuꞌ yi na kꞌukeꞌ chicꞌuꞌl
15 “Yi oꞌ ketz tuchꞌuꞌ taꞌ Luꞌ, oꞌ mero judiy, na eꞌ mero judiy yi eꞌ kataj katxuꞌ. Nin nkꞌeꞌtz oꞌ pajol caꞌwl chi quitaneꞌn yi eꞌ awer nak. 16 Poro yi jaluꞌ na el katxum tetz yi cyaꞌl nin jun yi nink ljal balajil swutz Ryos tan tuꞌ yi na buch tib tan banleꞌn taneꞌn yi eꞌchk cstumbr yi na tal yi ley Moisés. Chaꞌstzun te yi oꞌ ketz yi oꞌ judiy, ja kꞌukeꞌ kacꞌuꞌl te Jesucristo. Yaꞌstzun kulejtz na ja el katxum tetz yi quil jal kabalajil swutz Ryos tan tuꞌ yil kaban taneꞌn yi eꞌchk cstumbraꞌtz, ma na ntin kol kꞌukeꞌ kacꞌuꞌl te Jesucristo. Na quil jal balajil jun yaj swutz Ryos tan tuꞌ yi na buch tib tan banleꞌn taneꞌn yi eꞌchk cstumbr tetz yi ley Moisés.
17 “I bin jaluꞌ, yi oꞌ ketz tuchꞌuꞌ taꞌ Luꞌ, oꞌ judiy nin ja jal kabalajil swutz Ryos tan tuꞌ yi ja kꞌukeꞌ kacꞌuꞌl te Jesucristo. Ej nin tan tuꞌ yi yaꞌtz nkaban oꞌ pajol caꞌwl taneꞌn ẍchiwutz eꞌ kataj. Poro ¿na peꞌ elepont yi xtxolbileꞌj yi tan tuꞌ yi na kꞌukeꞌ kacꞌuꞌl te Jesucristo ja kajuch kil? Quiꞌ. 18 Na yi nink kꞌukeꞌ incꞌuꞌl junt tir te jun xtxolbil yi nsken wal yi quiꞌc xac ẍchajonk tzuntz yi jun cuꞌn in pajol caꞌwl. 19 Poro te yi xomnakin te yi jun leyaꞌtz ja lajluchax tzinwutz yi quiꞌc rmeril tan inclaxeꞌn taꞌn. Chaꞌstzun te ja chinquim taneꞌn swutz yi jun leyaꞌtz, bantz incambal wutzꞌajbil te Ryos. 20 Na yi quimeꞌn Cristo swutz pasyon, niꞌcuꞌn yi jajk chinquim wetz. Chaꞌstzun te nkꞌeꞌtz inchuc na incaw wib jaluꞌ, ma na Cristo na cawun sweꞌj, na choꞌn najlij iꞌ sweꞌj. Xomij iꞌ tan inxicyleꞌn. Na yi jun tal ẍutuj Cyꞌajl Ryos yi choꞌn kꞌuklij incꞌuꞌl teꞌj, yaꞌstzun yi jun yi na tzan tan wuchꞌeyeꞌn. Wiꞌnin na pekꞌ iꞌ sweꞌj, na ja takꞌ tib tkꞌab quimichil tetz inxel. 21 Chaꞌstzun te qui na waj yi quiꞌk tzintzꞌam yi na tzan Ryos tan toyeꞌn swetz, na quiꞌc rmeril tan jaleꞌn balajil jun yaj swutz Ryos tan tuꞌ yi na buch tib tan banleꞌn taneꞌn yi ley Moisésaꞌtz. Yi yaꞌtzk, ¿mbi tzun kloꞌ xac yi nquim Cristo swutz pasyon?