Baꞌn lkoꞌc tetz nitxajil Ryos kol kocsaj cunin
3
1 Eꞌuꞌ wajwutz aj Galacia, chin juntlen nin cyajtzaꞌkluꞌ. ¿Naꞌ njuclun quen yi jun yab ajtzaꞌklaꞌtz le chiwiꞌuꞌ? ¿Mbi tzuntz yi qui na chixomuꞌ te ketz kachusuꞌn yi bintzinin tetz? Na ja lajluchax ẍchiwutzuꞌ yi mbi ekaꞌn tan yi quimichil yi ban Jesucristo swutz pasyon. 2 Poro ntin na waj lwal jun xtxolbil scyeruꞌ. Quinin makꞌlij yi Espíritu Sant scyeruꞌ tan tuꞌ yi jajk chijeponuꞌ te jun cꞌoloj caꞌwl, poro ja akꞌlij yi Espíritu Sant scyeruꞌ tan tuꞌ yi ja cyocsajuꞌ yi chusuꞌn yi txolij scyeruꞌ. 3 Poro chin juntlen nin cyajtzaꞌkluꞌ jaluꞌ, na le wutz cyeruꞌ cyajtzaꞌkluꞌ chocoponuꞌ tetz balaj tan tuꞌ yi na chitzanuꞌ tan banleꞌn taneꞌn yi eꞌchk cstumbr tetz yi ley Moisés. Wech le xeꞌtzbil tzaj ntin ja kꞌukeꞌ chicꞌuꞌluꞌ te yi porer yi Espíritu Sant. 4 Nin cyakil yi eꞌchk qꞌuixcꞌuj yi icyꞌnak pon cyanuꞌ, quiꞌc ltakꞌ scyeruꞌ ko kꞌuklij chicꞌuꞌluꞌ te ley Moisés. Poro eꞌuꞌ wajwutz, nkꞌeꞌtz tan chaꞌtz tuꞌk nchitijuꞌ qꞌuixcꞌujaꞌtz.Snajank yi Espíritu Sant skeꞌj kol kocsaj cunin
5 Nin ¿i peꞌ tan tuꞌ yi na chitzanuꞌ tan banleꞌn taneꞌn yi eꞌchk cstumbr tetz yi ley Moisés yi ntakꞌ wit Ryos yi Espíritu Sant scyeruꞌ? Quiꞌ. Nin ¿i peꞌ tan paj yi nchixomuꞌ te yi ley Moisés mbnixeꞌt eꞌchk milawr ẍchixoꞌluꞌ? Quiꞌ. Nkꞌeraꞌtz puntil. Na ja takꞌ Ryos yi Espíritu Sant scyeruꞌ nin ja bnix eꞌchk milawraꞌtz ẍchixoꞌluꞌ tan tuꞌ yi ncyocsajuꞌ yi xtxolbil yi nquibituꞌ.
6 Na yaꞌstzun banak Abraham, ntin tocsaj yi yol Ryos. Ej nin tan tuꞌ yi tocsal yi jun yolaꞌtz ja jal balajil iꞌ swutz Ryos.a 7 Yi ko yaꞌtz banak Abraham, elk bin chitxumuꞌ tetz: Yi eꞌ yi nternin na kꞌukeꞌ chicꞌuꞌl te Ryos chi banak Abraham, yaꞌstzun yi eꞌ yi na choꞌc tetz mero xonl iꞌ taneꞌn. 8 Na, tan yi xtxolbil yi tzꞌibaꞌnt cyen le tuꞌj Kataj na el katxum tetz, yi eꞌ yi nkꞌeꞌtz eꞌ judiy, sjalok chibalajil swutz Ryos ko ntin lcyocsaj yi yol Ryos. Na talnak iꞌ jun balaj xtxolbil tetz Abraham: “Tan aẍ lwakꞌwit imbanl squibaj cyakil jilwutz wunak.”b 9 Yi na elepont yi jun xtxolbilaꞌtz iꞌtz yi sjalok chibanl cyakil yi eꞌ yil cyocsaj cunin yol Ryos, chi banak Abraham.
10 Nchaꞌtz tzꞌakꞌlok chicaws cyakil yi eꞌ yi na cyocsaj yi sjalok chibalajil tan tuꞌ yi na chixom te eꞌchk cstumbr tetz yi ley Moisés. Na tzꞌibaꞌnt cyen: “Alchok scyetz yi qui na jepon tan banleꞌn taneꞌn cyakil yi eꞌchk cstumbr yi tzꞌibaꞌnt cyen le ley Moisés, banij tetz cawsaꞌtz.”c 11 Na quil jal kabalajil swutz Ryos tan tuꞌ yi na kabuch kib tan banleꞌn taneꞌn yi eꞌchk leyaꞌtz, na at jun xtxolbil yi tzꞌibaꞌnt cyen yi na tal: “Sjalok quitzꞌajbil yi eꞌ balaj wunak tan tuꞌ yi na kꞌukeꞌ chicꞌuꞌl te Ryos.”d 12 Poro apart na tal yi ley Moisés, na qui na tal yi tajweꞌn tan kꞌukeweꞌn kacꞌuꞌl, ma na na tal: “Yi eꞌ yil chijepon tan banleꞌn taneꞌn, yaꞌstzun yi eꞌ yi ẍchicambajeꞌ yi quitzꞌajbil.”e 13 Poro tan paj yi cyaꞌl jun nak jepon tan banleꞌn taneꞌn cyakil eꞌchk caꞌwlaꞌtz, banijt chicaws. Poro Cristo nkoꞌ colon tkꞌab yi jun kacawsaꞌtz yi txꞌaklij skawutz, na iꞌ ntijon yi kacaws. Nin bintzinin yi xtxolbileꞌj, na at jun xtxolbil yi tzꞌibaꞌnt cyen le tuꞌj Kataj yi na tal: “Ẍcheꞌ cawseꞌ Ryos cyakil yi eꞌ yi na chiquim swutz jun pasyon.”f 14 Ej nin yaꞌstzun ntulej Ryos Jesucristo, bantz ketzal ketz yi banl yi suknak tetz Abraham tentz. Nchaꞌtz suknak iꞌ yi Espíritu Sant nin baꞌn lketzaj kol kꞌukeꞌ kacꞌuꞌl teꞌj.
Quinin xcyeꞌ yi ley Moisés tan xiteꞌn yi yol Ryos yi suknak tetz Abraham
15 Ma jaluꞌ, eꞌuꞌ wajwutz, swaleꞌ jun elsawutzil scyeruꞌ yi chin sensiy nin, yi ilenin na kil. Yi na bnix jun uꞌj tan jun yaj tetz quiwel jun yol, nin na cuꞌ cyen wi kꞌab teꞌj, quiꞌc rmeril tan cweꞌn xitul. 16 Nchaꞌtz tzun taneꞌn yi xtxolbil yi bixbaꞌnt tan Ryos tu Abraham. Na at eꞌchk oy yi sukiꞌnt tan Kataj Ryos tetz Abraham scyuchꞌ yi eꞌ xonl. Poro qui na tal yol Kataj yi tan tuꞌk eꞌ xonl Abraham yaꞌstzunk tzꞌakꞌleꞌt yi oyaꞌtz, poro na tal yi tan tuꞌ jun xonl Abraham tzꞌakꞌleꞌt yi oyaꞌtz. Nin iꞌtz yi Cristo. 17 Poro yi xeꞌ yi chusuꞌn yi na waj tzꞌel chitxumuꞌ tetz iꞌtz: At jun xtxolbil yi talnak Ryos tetz Abraham nin quiꞌc rmeril tan xiteꞌn. Nchaꞌtz quiꞌc rmeril tan toqueꞌn yi ley Moisés tan xiteꞌn, na nsken el cyaj cient tu junaklaj yob yi sukil Kataj yi jun oyaꞌtz tetz Abraham yi takꞌleꞌn yi ley tetz Moisés. Chaꞌstzun te, quiꞌc rmeril tan toqueꞌn yi ley Moisés tan xiteꞌn yi xtxolbil yi alijt cyen tan Kataj tetz Abraham. 18 Na kol kal yi tajweꞌn tan kajeꞌn poneꞌn te yi caꞌwl yi akꞌlij tetz Moisés, quiꞌc tzun kloꞌ xac yi yol yi alijt cyen tan Ryos tetz Abraham. Poro nkꞌeraꞌtz puntil, na suknak Kataj Ryos yi oyaꞌtz, nin nkꞌeꞌtz tajweꞌn tan bnol Abraham jun eꞌchk takleꞌn tan cambal.
Yi mbi ekaꞌn tan yi ley Moisés
19 I bin jaluꞌ eꞌuꞌ wajwutz, ko yaꞌtz bintzi, ¿mbi tzun ekaꞌntz tan ley Moisés? Je puntileꞌj: Tzantzaj tlen saj tkꞌol Ryos yi eꞌchk leyaꞌtz tan ẍchajleꞌn yi at kapaltil. Akꞌlij yi leyaꞌtz, poro ntin tetz cobox ntziꞌ kꞌej, jalen yi tulakeꞌn yi jun xonl Abraham tan toyeꞌn yi jun oyaꞌtz sketz yi alijt cyen tan Ryos. Ej nin yi tkꞌol Ryos yi leyaꞌtz tetz Moisés ntin ja xcon jun ángel taꞌn. Ej nin nchaꞌtz xconak Moisés tan xtxꞌolcheꞌn xoꞌl yi jun leyaꞌtz. 20 Poro yi sukil iꞌ yi oy tetz Abraham, quinin xcon jun yolol taꞌn, nka jun elsanl stziꞌ iꞌ. Ma na wutzileꞌn cuꞌn Ryos bixban yi jun trataꞌtz. Chaꞌstzun te at mas kꞌej yi suknak Ryos tetz Abraham tu yi tetz xonl swutz yi ley yi akꞌlij tetz Moisés.
21 Ma jaluꞌ eꞌuꞌ wajwutz ja bin koꞌc tan xtxꞌajleꞌn te yi mbi ekaꞌn tan yi ley Moisés tu yi yol yi alijt cyen tan Kataj tetz Abraham. Iẍkaj na tzunk chintzan tan talcheꞌn yi najk tzan yi ley Moisés tan xiteꞌn yi yol yi alijt cyen tan Kataj, na baꞌn atit. Quiꞌc rmeril yi nink chixit quib squibil quib, na at len ekaꞌn cyaꞌn. Apart yi ekaꞌn tan yi ley Moisés, nin apart yi ekaꞌn tan yi yol yi alijt cyen tan Kataj tetz Abraham. Poro quiꞌc nin jun jilwutz ley yi nink jal kutzꞌajbil taꞌn. Yi yaꞌtzk, ja kloꞌ jal balajil jun yaj tan tuꞌ yi moꞌc il tan banleꞌn taneꞌn. 22 Poro quiꞌ, na yi yol Kataj yi tzꞌibaꞌnt cyen na tal yi cyakil wunak eꞌ cuꞌn pres tkꞌab yi ilcꞌol. Poro alchok scyetz yi eꞌ yil cyocsaj yi yol yi alijt cyen tan Ryos, nin kol kꞌukeꞌ chicꞌuꞌl te Jesucristo, ẍchicambok cyeraꞌtz te yi jun oyaꞌtz yi sukiꞌnt tan Ryos.
23 Na yi sajleꞌn yi ley Moisés yaꞌstzun makol kawutz tan qui kabeneꞌn tul il. Makij choꞌ taꞌn jalen cuꞌn yi lajluchaxeꞌn yi xtxolbil skawutz yi at rmeril tan jaleꞌn kabalajil swutz Ryos tan tuꞌ yil kꞌukeꞌ kacꞌuꞌl. 24 Na yi ley Moisés niꞌcuꞌn banak teꞌtz chi jun qꞌuicyꞌlom nitxaꞌ. Na xconak tan makleꞌn kawutz jalen cuꞌn tulakeꞌn Cristo. 25 Nin yi kꞌukeweꞌn kacꞌuꞌl te Cristo, ja jal kabalajil swutz Ryos. Chaꞌstzun te nkꞌeꞌtz tajweꞌn jun qꞌuicyꞌlom ketz jaluꞌ.
Oꞌ mero xonl Abraham
26 Tan tuꞌ yi nkocsaj yi yol yi alijt tan Kataj Ryos, ja koꞌc tetz meꞌl cyꞌajl iꞌ, na ja kokꞌbej kib tu Cristo. 27 Nchaꞌtz yi jeꞌnleꞌn aꞌ tkawiꞌ, ja lajluchax yi xomchoꞌ te Cristo. 28 Quiꞌc na ban ko oꞌ judiy, nka nkꞌeꞌtz oꞌ judiy. Quiꞌc na ban yi ko oꞌ esclaw nka quiꞌ. Nin quiꞌc na ban yi ko yaj nka xnaꞌn, na cyakil cuꞌn oꞌ junit oꞌ tu Cristo. 29 Nchaꞌtz yi ko junit oꞌ tu Cristo, niꞌcuꞌn chi oꞌ-k xonl Abraham. Ej nin yi ko oꞌ xonl iꞌ, skacambok te yi oy yi suknak Kataj tetz.