Stzajsbil wiꞌ yol Pawl
13
1 Ma yil nopon ẍchixoꞌluꞌ, yaꞌstzun yi toxiꞌn tir wukantz tan chixajseꞌnuꞌ. Ej nin yil noꞌc tan pujleꞌn chixoꞌluꞌ, tzinjakeꞌ cob nka ox stiw tan lajluchaxeꞌn yi ko bintzi nka quiꞌ cyakil yi eꞌchk yol yi na tzan. 2 Yi caꞌp tir yi xnaꞌkeꞌn tan chixajseꞌnuꞌ in noꞌc tan chimakleꞌn yi eꞌ yi nsken chijuch quil. Iteꞌn nin na chintzan tan banleꞌn jalcuꞌn, mpe quibink ẍchixoꞌluꞌ. Yil nopon, swakꞌeꞌ chicaws yi eꞌ yi na chitzan tan juchleꞌn quil. 3 Slajluchaxk ẍchiwutzuꞌ yi jun cuꞌn na chinxcon tan Cristo tan talcheꞌn yi tetz tajbil. Yi Cristo nkꞌeꞌtz alcaweꞌt, ma na chin cham nin iꞌ, nin stkꞌeꞌ chicaws cyakil yi eꞌ yi at chipaj. 4 Bintzi quiꞌc ẍchamil wankil Cristo yi quimeꞌn swutz pasyon, poro itzꞌ iꞌ jaluꞌ, nin chin cham nin iꞌ tan porer Kataj Ryos. Nchaꞌtz oꞌ ketz, ploj yi kawankil poro yil koꞌc tan chibanleꞌn taneꞌnuꞌ sjalok kachamil tan porer Kataj.5 Chitxumeꞌuꞌ bin cyajtzaꞌkluꞌ ẍchijunalenuꞌ, yi ko jun cuꞌn kꞌuklij chicꞌuꞌluꞌ te Ryos nka quiꞌ. Chimaꞌleꞌuꞌ cyajtzaꞌkluꞌ ẍchijunalenuꞌ. ¿Qui ptzun loꞌ chixcyeꞌuꞌ tan xtxumleꞌn yi ko najlij Cristo te cyalmaꞌuꞌ nka quiꞌ? ¿Nka chitziꞌ tuwuꞌ, chiplaj tuwuꞌ na cyocsaj quibuꞌ tetz creyent? 6 Poro elnak chitxumuꞌ tetz yi ketz nkꞌeꞌtz kawutz tuꞌ kaplaj tuꞌ na kocsaj ketz. 7 Poro ilenin na katzan tan nachleꞌn Kataj squibuꞌ tan qui chibanoluꞌ eꞌchk takleꞌn cachiꞌ. Nin yi na kanach Kataj squibuꞌ tan cyoqueꞌnuꞌ tetz balaj, nkꞌeꞌtz ik ketz kakꞌej na katzan tan joyleꞌn, ma na yi ketz kajbil iꞌtz yi nink choꞌcuꞌ tetz balaj. Mpe nink cyaluꞌ yi quiꞌc kaxac, quil kamakxij tan nachleꞌn Kataj squibuꞌ. 8 Na quiꞌc rmeril yi nink koꞌc ketz tan xiteꞌn tajtzaꞌkl jun yi na xom te yi bintzi, ma na yi ketz kajbil iꞌtz tan chitxicbajeꞌnuꞌ. 9 Nin skatzatzink kol chiquiwixuꞌ. Quiꞌc na ban kol cyal wunak yi oꞌ cotxcoj. Chaꞌstzun te ilenin na kanach Kataj squibuꞌ tan cyoqueꞌnuꞌ tetz tzꞌaknak cuꞌn. 10 Nin na chintzan tan stzꞌibeꞌn nin yi eꞌchk xtxolbilaꞌseꞌj scyeruꞌ yi ntaxk nopon tan chixajseꞌnuꞌ, na yil nopon qui na waj tzinxconsaj quiw yol. Ma na ntin na waj lxcon yi eꞌchk caꞌwl yi akꞌij swetz tan Kajcaw Jesucristo tan chitxicbajeꞌnuꞌ, nkꞌeꞌtz tan chixiteꞌnuꞌ.
Wiꞌtzbil yol
11 I bin jaluꞌ eꞌuꞌ wajwutz, quil tuꞌ quibuꞌ. Chijoyeꞌuꞌ puntil tan cyoqueꞌnuꞌ tetz tzꞌaknak cuꞌn. Max chicꞌuꞌluꞌ te cobox inyol yi mben intzꞌibal tul yi carteꞌj. Junit sban chitxumuꞌnuꞌ. Lok jal yi tzatzin paz ẍchixoꞌluꞌ. Ej nin lok najan Kataj Ryos scyeꞌjuꞌ, yi Ryosaꞌtz yi na akꞌon lokꞌ ib tu tzatzin paz sketz. 12 Chikꞌajlaj quibuꞌ squibil quibuꞌ. 13 Nin cyakil yi eꞌ kajwutz yi ateꞌ tzoneꞌj na chitzan tan talcheꞌn nin jun yos scyeruꞌ.
14 Takꞌ tzaj bin Kajcaw Jesucristo yi banl talmaꞌ squibuꞌ. Lok jal mas lokꞌ ib ẍchixoꞌluꞌ tu Ryos. Nin lok jal mas tzatzin paz ẍchixoꞌluꞌ tan porer yi Espíritu Sant. Amén.