Yi eꞌchk xtxolbil yi til Pawl chi tul wutzicyꞌ
12
1 Poro quiꞌc na takꞌ swetz yi in teꞌn na inyolbej wib. Ma na baꞌn tcuꞌn yil wal scyeruꞌ yi eꞌchk takleꞌn yi ẍchajnak tib tzinwutz tan Kajcaw tan jaleꞌn mas wajtzaꞌkl. 2 Na at jun kajwutz yi ajskeꞌn wutz waꞌn yi ja el cyajlajix yob yi xaꞌkleꞌnix iꞌ jalen le toxiꞌn tcyaꞌj.a Mi xaꞌk peꞌ cyakil tu wankil nka quiꞌ peꞌ, cuquen, qui na wil wetz, ntin Ryos ilon tetz. \v 3 Ntin tuꞌ na el intxum tetz yi bintzinin, aj ticyꞌleꞌn yi junaꞌtz jalen tcyaꞌj. Mi xaꞌk peꞌ tu cyakil yi wankil nka quiꞌ peꞌ, cuquen, ntin Ryos na ilon tetz. 4 Ej nin yi xaꞌkeꞌn iꞌ tul yi jun amaꞌlaꞌtz ja tbit eꞌchk xtxolbil yi quiꞌc cu tan yolol iꞌ tetz jun. 5 Swakꞌeꞌ chikꞌej yi eꞌ yi niꞌcuꞌn eꞌ tu yi jun yajaꞌtz, poro yi in wetz quil wocsaj wib nim te yi mbnix waꞌn tan wajtzaꞌkl cuntuꞌ. Ntin swaleꞌ yi eꞌchk xtxolbil yi na ẍchaj yi quiꞌc inxac. 6 Mpe nink wocsaj wib nim tan talcheꞌn yi in nchimbnon yi eꞌchk takleꞌnaꞌtz nkꞌeꞌtz in yab na jun cuꞌn yaꞌstzun yi mero bintzi. Poro quil wal yi xtxolbilaꞌtz na qui na waj yil cyakꞌ wunak inkꞌej tan tuꞌ yi eꞌchk takleꞌn yi na wal, ma na mas baꞌn tcuꞌn yi nink cyakꞌ inkꞌej tan yi eꞌchk takleꞌn balaj yi na quil, nin yi na quibit sweꞌj.7 Bintzi ja jal wiꞌnin wajtzaꞌkl tan yi eꞌchk xtxolbilaꞌtz yi wilnak. Poro ja jal jun chin yabil swetz yi qui na icyꞌ. Poro chinch wetz iꞌtz tan qui wocsal wib nim tu wajtzaꞌklaꞌtz, na chin il nin atin cuꞌnt taꞌn. Niꞌcuꞌn chi ik jun maꞌcl Satanás yi Baybaꞌn, tan makleꞌn inwutz nin tan inxuxeꞌn. 8 Oxix tir injak tetz Kataj tan ticyꞌeꞌn kloꞌ, 9 poro quinin na icyꞌ. Ntin tal Kataj swetz: “Quil cẍbisun tan ayablil na at nin imbanl tzaweꞌj. Nin mas tcuꞌn na lajluchax yi wetz inchamil tan jun yaj yi ploj, yi quiꞌc walor, yi quiꞌc mas ekaꞌn taꞌn,” stzun Kataj swetz. Chaꞌstzun te mas tcunin na chintzatzin yi na el intxum tetz yi in ploj. Na yi na chin nachon te yi implojil, yaꞌstzun yi na oc mas yi porer Cristo tan wuchꞌeyeꞌn. 10 Chaꞌstzun te mas tcunin na chintzatzin yi na chinnachon te yi implojil, nin yi quiꞌc inxac. Mas tcunin na chintzatzin yi na choꞌc wunak tan imbuchleꞌn, nin tan inxoꞌwseꞌn. Mas tcunin na chintzatzin yi na choyintzin wunak sweꞌj tan tuꞌ yi in xconsbeꞌtz Cristo. Mas tcunin na chintzatzin yi na bajij yi eꞌchk takleꞌnaꞌtz sweꞌj, na na jal mas inchamil yi na chin nachon te yi quiꞌc inxac.
Wiꞌnin na bisun Pawl scyeꞌj yi cmon creyent Corint
11 Poro niꞌcuꞌn in chi jun yab yi na chintzan tan talcheꞌn nin cyakil yi eꞌchk xtxolbilaꞌseꞌj scyeruꞌ. Poro iꞌtz chipajuꞌ, na eꞌuꞌ kloꞌ na chitzanuꞌ tan takꞌleꞌn inkꞌej. Na el intxum tetz yi quiꞌc inxac, poro ilenin nkꞌeꞌtz ajnak tzaj inkꞌej ẍchiwutz yi eꞌaꞌtz yi na cyocsaj quib wiꞌtz apostl. 12 Na te yi atin tzaj ẍchixoꞌluꞌ ja lajluchax yi in apostl tan tuꞌ yi at impasens. Nin ja lajluchax yi in apostl tan yi eꞌchk milawr tu eꞌchk balaj xtxolbil yi bnixnak waꞌn ẍchixoꞌluꞌ. 13 Quib nin na imban ẍchixoꞌl yi eꞌ mas creyent iteꞌn nin na imbanaꞌtz ẍchixoꞌluꞌ, ntin tuꞌ qui na wakꞌ gast scyeruꞌ. Chicuyeꞌuꞌ impaj te jun impaltilaꞌtz.
14 Ma jaluꞌ, ja wiꞌt txumxij waꞌn tan chixajseꞌnuꞌ junt tir. Nin yil nopon yaꞌstzun toxiꞌn tir wukan tan chixajseꞌnuꞌ. Iteꞌn nin sbneꞌaꞌs yil nopon junt tir ẍchixoꞌluꞌ, quil wakꞌ gast scyeꞌruꞌ. Na qui na waj tzincambaj jun eꞌchk takleꞌn yi at scyuchꞌuꞌ. Poro yi wetz wajbil iꞌtz tan cheꞌ incambaluꞌ tan chixconeꞌnuꞌ tetz Cristo. Nkꞌeꞌtz tajweꞌn tan chin quichꞌeyaluꞌ, na nkꞌeraꞌtz chimunl yi eꞌ nitxaꞌ tan joyleꞌn chipuꞌk yi chitaj, ma na iꞌtz chitarey yi eꞌ ajcaw tan joyleꞌn yi tajweꞌn scyetz chinitxajil. 15 Ej nin yaꞌstzun tzimbneꞌ scyeꞌjuꞌ. Tzinsotzajeꞌ yi wetz yi colij waꞌn tan takꞌoneꞌn baꞌn scyeruꞌ. Nchaꞌtz, list in tan wukꞌol wib tan claxeꞌn cyalmaꞌuꞌ. Poro lastum yi na quiluꞌ yi mas cunin na chimpekꞌ scyeꞌjuꞌ, pekꞌeꞌn chint quiꞌt na chibanuꞌ sweꞌj.
16 Nchaꞌtz at eꞌ ẍchixoꞌluꞌ yi na cyal: “Bintzi qui loꞌ ntakꞌ gast skeꞌj, poro chin list nin iꞌ tan kaxileꞌn.” 17 Poro ¿ẍeꞌn mimban tan chixileꞌnuꞌ? Quiꞌc rmeril. 18 Nchaꞌtz ja cuꞌ inwutz tetz Tito tan beneꞌn tan chixajseꞌnuꞌ. Nin ja ben inchakol junt kajwutz tan xomeꞌn teꞌj. ¿Eꞌ oc peꞌ tan chixileꞌnuꞌ? Quiꞌ loꞌ. Na niꞌcuꞌn kajtzaꞌkl tu Tito.
19 Na loꞌ chitxumuꞌ yi na kacol kib tan yi eꞌchk yolaꞌseꞌj yi na wal scyeruꞌ. Poro quiꞌ, ntin tan jaleꞌn kꞌej Ryos, ja wal yi xtxolbilaꞌseꞌj, nin tan jaleꞌn kꞌej Jesucristo. Na yi ketz kajbil scyeꞌjuꞌ, yi eꞌuꞌ jun cꞌoloj wajwutz, iꞌtz tan chiquiwixeꞌnuꞌ tkꞌab Kataj. 20 Poro na chimbisun muꞌẍ tal, ko tzun nkꞌeꞌtz baꞌn ateꞌtuꞌ yil nopon tan chixajseꞌnuꞌ. Or bin quiluꞌ, na ko tzun takleꞌn biꞌ at ẍchixoꞌluꞌ jepon intxꞌixpul wajtzaꞌkl scyeꞌjuꞌ. Nin or quiluꞌ ko tzun at oyintziꞌ ẍchixoꞌluꞌ; ko tzun at chiꞌch cꞌuꞌlal; ko tzun at cyakal makꞌmal; ko tzun ntin na chitzan lenuꞌ tan joyleꞌn yi cyajbiluꞌ. Or quiluꞌ ko tzun ntin na chitzanuꞌ tan telseꞌn chikꞌejuꞌ squibil quibuꞌ; ko tzun ntin na chitzanuꞌ tan ẍchaqꞌueꞌn yol; ko tzun at eꞌ ẍchixoꞌluꞌ yi na cyocsaj quib nim tu cyajtzaꞌkl; ko tzun quiꞌc nin jikꞌbil wutz quitaneꞌnuꞌ. 21 Or quiluꞌ na yil nopon tan chixajseꞌnuꞌ qui na waj yil tzꞌel intxꞌix cyanuꞌ swutz Ryos. Nchaꞌtz chimbisunk ko tzun ljal cobox ẍchixoꞌluꞌ yi qui na chibisun tan quil, yi txeꞌn chitxꞌixpuj yi cyajtzaꞌkl cachiꞌ yi cyꞌaꞌn cyaꞌn. Na at loꞌ aj xnaꞌninl tu aj yajinl ẍchixoꞌluꞌ, scyuchꞌ yi eꞌ yi bich cuntunin na chiban.