Yi eꞌ yi nkꞌeꞌtz eꞌ mero apostl
11
1 I bin jaluꞌ, lok cyakꞌuꞌ amaꞌl swetz tan walol muꞌẍ tal intontil scyeruꞌ. Max chicꞌuꞌluꞌ swibaj. Quibiteꞌuꞌ inyol. 2 Nternin na el walmaꞌ tan cyoqueꞌnuꞌ tetz balaj. Nin choꞌn na saj yi jun wajtzaꞌklaꞌtz tu Ryos. Nternin na waj yil choꞌcuꞌ tetz balaj, na tan in bixeweꞌt chitratuꞌ tu Cristo. Ej nin na waj cheꞌ injatxuꞌ tkꞌab iꞌ chi na jatxlij jun xun tkꞌab chmil. Ej nin yil cheꞌ injatxuꞌ tkꞌab Cristo, na kloꞌ waj yi chin tzꞌaknak cuꞌn eꞌuꞌ, chi taneꞌn jun xun yi txeꞌn cunin poꞌtzaj tib. 3 Poro na chimbisun muꞌẍ tal, na ko tzun xubsij cyajtzaꞌkluꞌ chi banak Eva tan yi lubaj. Na kloꞌ waj yil chipekꞌuꞌ te Cristo tetz cuꞌn cyalmaꞌuꞌ. 4 Poro na chimbisun muꞌẍ tal na ja loꞌ icyꞌ chitxoꞌbeꞌuꞌ chichusuꞌn yi eꞌ yi na chitzan tan xtxoleꞌn junt Jesús yi nkꞌeꞌtz niꞌcuꞌn tu yi ketz yi katxolnak scyeruꞌ. Lastum yi ja icyꞌ chitxoꞌbeꞌuꞌ junt jilwutz espíritu, nin qui na cyakꞌuꞌ amaꞌl tetz yi mero Espíritu Sant. Lastum yi na chixomuꞌ te junt jilwutz chusuꞌn nin qui na chixomuꞌ te yi balaj stziblal yi quibitnakuꞌ skeꞌj. 5 Le wutz wetz wajtzaꞌkl yi nkꞌeꞌtz ajnak tzaj yi inkꞌej ẍchiwutz yi eꞌ balaj apostlaꞌtz yi chin tzꞌaknak cuꞌn eꞌ taneꞌn ẍchiwutzuꞌ. 6 Bintzi loꞌ, nkꞌeꞌtz chusij chint tan jaleꞌn eꞌchk balaj weltil yol waꞌn, poro na el intxum tetz yi mbi na chintzan tan xtxoleꞌn, nin ja lajluchax ẍchiwutzuꞌ yi at wajtzaꞌkl tan cyakil yi eꞌchk takleꞌn balaj yi bajnak imbnol ẍchixoꞌluꞌ.7 Na quinin injak jun centaw scyeruꞌ yi xnaꞌkeꞌn tan xtxoleꞌn yi balaj stziblal Ryos ẍchixoꞌluꞌ. Mi baꞌn peꞌ mimban westz nka quiꞌ peꞌ, nin baꞌn peꞌ yi na wocsaj wib juy ntin tan jaleꞌn chikꞌejuꞌ. 8 Na yi woqueꞌn tan quichꞌeyeꞌnuꞌ quiꞌc nin jun centaw cyakꞌuꞌ swetz, poro choꞌn sajeꞌn ẍchꞌeybil wetz ẍchixoꞌl cobox cmon creyent yi ateꞌ joylaj. 9 Nin yi atin tzaj ẍchixoꞌluꞌ, nin yi woqueꞌn wutz peꞌm, quinin wakꞌ bis scyeruꞌ tan cyoqueꞌnuꞌ tan wuchꞌeyeꞌn. Poro yi eꞌ yi eꞌ octz tan wuchꞌeyeꞌn iꞌtz yi eꞌ kajwutz aj Macedonia yi eꞌ opontz. Ej nin quiꞌc nin jun tir yi jajk wakꞌ bis scyeruꞌ tan yi imbambil. Nin yaꞌtz nin tzimbneꞌ-tz sbneꞌ opon tunintz. 10 Sak ẍchiwutzuꞌ yi jun cuꞌn na el intxum tetz yi ẍchusuꞌn Cristo. Nin nchaꞌtz, jun cuꞌn quil makx intziꞌ tan talcheꞌn yi quiꞌc nin jun tir yi jajk wakꞌ bis scyeruꞌ tan jakleꞌn ẍchꞌeybil wetz scyeruꞌ. Ej nin chinxomok te yi jun wajtzaꞌklaꞌtz yil chimben lakak eꞌchk luwar cwent Acaya. 11 ¿Na peꞌ imban yi jeꞌj tan paj yi qui na chimpekꞌ scyeꞌjuꞌ? Quiꞌ. Na sak swutz Ryos yi na chimpekꞌ scyeꞌjuꞌ.
12 Ej nin quil tzintxꞌixpuj yi jun wajtzaꞌkl, yi jun wajtzaꞌklaꞌtz tan qui intzꞌamol pwok scyeruꞌ, na qui na waj wakꞌ amaꞌl scyetz yi coboxaꞌtz tan cyalol yi niꞌcuꞌn oꞌ scyuchꞌ. 13 Na nkꞌeꞌtz eꞌ mero apostl. Eꞌ subul nak. Cyocsaꞌn tuꞌ quib tetz apostl tetz Cristo. 14 Nin quil cheꞌl yabuꞌ te yi eꞌ yi na cyocsaj quib tetz apostl, na nchaꞌtz Satanás yi Baybaꞌn, baꞌn na tocsaj tib tetz jun ángel yi choꞌn na saj tu Ryos. 15 Ko yaꞌtz na ban Baybaꞌn, iteꞌn nin ẍchibneꞌ yi eꞌ ẍchakum iꞌ. Cyocseꞌ quib chi balaj wunak. Poro txꞌaklij chicaws le wiꞌtzbil kꞌejlal. Tul xom quen tuꞌ te yi mbi cuꞌn mbaj chibnol.
Yi eꞌchk qꞌuixcꞌuj yi tijnak Pawl tan tuꞌ yi iꞌ apostl
16 Ma jaluꞌ eꞌuꞌ wajwutz, qui na waj yi nink choꞌcuꞌ tan xtxumleꞌn yi in loc, poro ko yaꞌtz na chitxumuꞌ, quibiteꞌuꞌ cobox tal inyol. Na nchaꞌtz in, na waj lwakꞌ muꞌẍ tal inkꞌej chi na chiban yi eꞌ yi na cyocsaj quib tetz balaj apostl. 17 Nkꞌeraꞌtz tajbil Kajcaw yil kajoy yi ketz kakꞌej, na yaꞌstzun na chiban yi eꞌ yab, poro tajweꞌn chinjilon chi jun yab jalcuꞌn. Na tajweꞌn tan wukꞌol muꞌẍ inkꞌej. 18 At wiꞌnin eꞌ yi na cyocsaj quib nim tu yi cyetz cyajtzaꞌkl. Nchaꞌtz tzun in, swocseꞌ wib nim te yi ẍeꞌn cuꞌn wutaneꞌn. 19 Na at eꞌ cyeruꞌ yi na cyaluꞌ yi chin tzꞌaknak cuꞌn eꞌuꞌ, poro na cyakꞌuꞌ amaꞌl scyetz yi eꞌ wunakaꞌtz yi na cyocsaj quib nim. Quibiteꞌuꞌ bin cobox weri inyol. 20 Na cyakꞌuꞌ amaꞌl scyetz tan cyoqueꞌn tan chicaweꞌnuꞌ. Wech na ntin na chitzan tan chixileꞌnuꞌ. Nin na cyakꞌuꞌ amaꞌl scyetz tan cyoqueꞌn tetz cyajcawuꞌ. Poro yi eꞌaꞌtz na cyocsaj quib nim nin na el xak chitziꞌuꞌ cyaꞌn. 21 Txꞌixwil loꞌ tetz wetz na yaꞌstzun wetz qui mmaꞌw waꞌn.
Yi eꞌaꞌtz ja cyocsaj quib nim te yi ẍeꞌn quitaneꞌn, nchaꞌtz tzun in, baꞌn wocsaj wib chi jun yab tan walol yi ẍeꞌn wutaneꞌn. 22 Ko na cyal cyetz yi eꞌ aj Israel, nchaꞌtz in, in aj Israel. Ko na cyal yi eꞌ xonl kꞌajtzun Abraham, nchaꞌtz in, in xonl Abraham. 23 Ko na cyal yi eꞌ ẍchakum Cristo, pyor tzun in wetz, na wiꞌnin sacteꞌn ja intij sjuꞌ takꞌun Kataj. Mpe niꞌcuꞌnk in chi jun yab yi na chitzan tan talcheꞌn eꞌchk takleꞌneꞌj. Quiꞌc na ban, na jun cuꞌn, in ẍchakum Cristo. Na jatix loꞌ tir yi noꞌcnakin xetzeꞌ. Nin jat loꞌ tir yi ja chinloꞌon tan xicyꞌxab. Jat loꞌ tir muꞌẍt qui inquim cyakꞌun eꞌ incontr. 24 Oꞌix tir ocnak junak belulaj jiqueꞌ tzꞌuꞌm sweꞌj cyakꞌun yi eꞌ intanum judiy yi contr sweꞌj. 25 Oxix tir chinloꞌon cyaꞌn tan tzeꞌ. Nin jun tir ja chincꞌoxlij tan cꞌub. Oxix cuꞌn barc yi benakeꞌ mulkꞌuj xe aꞌ te yi na chinxon tul. Ej nin at jun tir yi incyaj jun kꞌej tu jun akꞌbal wi mar. 26 Bajnak inxoꞌmbel beneꞌn tziꞌn, ej nin jatix nin loꞌ tir yi txant qui neꞌl tan aꞌ. Jatix nin loꞌ tir neꞌl ẍchiwutz alkꞌom, nin nchaꞌtz jat nin loꞌ tir eꞌ oc yi eꞌ wetz intanum tan imbiyleꞌn. Nchaꞌtz iteꞌn nin eꞌ ban yi eꞌ awer nak sweꞌj. Jatix nin loꞌ tir yi txant qui nchinloꞌon lakak eꞌchk lmak tnum, nin jatix nin loꞌ tir yi txant qui nchinloꞌon lakak eꞌchk amaꞌl yi tzꞌinunin tuꞌ. Nin jatix nin loꞌ tir yi txant qui nchinloꞌon cyakꞌun yi eꞌ yi na cyocsaj quib kajwutz. 27 Ja chinjeꞌ ja chincuꞌ tan xtxoleꞌn yol Kataj. Nin jatix loꞌ watl ja inmucꞌ. Ja inmucꞌ weꞌj tu saktziꞌ. Nin jat loꞌ tir yi qui jal inwaꞌ, nin ja inmucꞌ cheꞌw, ja inmucꞌ buꞌyil.
28 Ej nin nkꞌeꞌtz ntinaꞌtz eꞌchk bisaꞌtz at swetz, ma na nchaꞌtz mas tcunin na chimbisun scyeꞌj yi eꞌ cmon creyent. 29 Na ko at eꞌ cotxcoj, nka at eꞌ yi ja chipakxij, na okꞌ incꞌuꞌl scyeꞌj, nin na takꞌ jun chin bis swetz. 30 Chaꞌstzun te ko tajweꞌn tan wocsal wib nim baꞌn wocsaj wib nim te eꞌchk xtxolbilaꞌseꞌj yi na ẍchaj yi ntin Ryos at tan wuchꞌeyeꞌn. 31 Sak swutz Ryos, yi Taj Kajcaw Jesucristo, yi jun yi tajweꞌn tan kukꞌol kakꞌajsbil tetz, yi nkꞌeꞌtz wi kakꞌ tuꞌ yi eꞌchk xtxolbilaꞌseꞌj yi ja wiꞌt wal scyeruꞌ. 32 Nin sak swutz iꞌ yi mbi imbanak yi atin tzaj Damasco. Na yi gobernador yi bixbaꞌnt tan yi rey Aretas, eꞌ baj cuꞌ wart taꞌn tziꞌak eꞌchk sawanil yi tapij yi at solteꞌj yi tnum. Na yi tajbil iꞌ iꞌtz tan intxꞌamxeꞌn, nin tan woqueꞌn pres. 33 Poro choꞌn weleꞌn tzaj ojk tul jun wentanuꞌ yi at te yi tapij. Nin tan incweꞌn muleꞌn wuxtxꞌotxꞌ, choꞌn incweꞌn tzaj tul jun moꞌtx. Chaꞌstzun te weleꞌn liwr ẍchikꞌab yi eꞌ incontraꞌtz.