Yi talol Pawl yi jun cuꞌn iꞌ apostl
10
1 I bin jaluꞌ, yi in wetz, yi in Pawl, copon inwutz scyeruꞌ. Ej nin xconk yi cꞌulutxumil tu putzpal Cristo waꞌn tan chinucꞌleꞌnuꞌ, na at loꞌ eꞌ yi na cyal yi chin al nin incꞌuꞌl yi atin ẍchixoꞌluꞌ. Nin na cyal yi ntin na jal inchamil yi quibin ẍchixoꞌluꞌ. 2 Poro yi wetz wajbil iꞌtz yi qui tajweꞌn tan inchajol inchamil yil nopon ẍchixoꞌluꞌ. Nchaꞌtz at loꞌ cobox ẍchixoꞌluꞌ yi na cyal yi at loꞌ eꞌchk takleꞌn yi na inwutz quen teꞌj, chi na chiban cyakil wunak. Poro quiꞌ. 3 Bintzi, in tuꞌ wunak, poro qui na xcon yi eꞌchk ajtzaꞌkl tetz tzoneꞌj wuxtxꞌotxꞌ waꞌn. 4 Ma na, na xcon yi ajtzaꞌkl yi na takꞌ Kataj swetz yi na noꞌc tan pakseꞌn chiyol. Nin yi jun ajtzaꞌklaꞌtz, yi choꞌn na saj tu Kataj, chin cham nin, na na xcyeꞌ tan xiteꞌn cyajtzaꞌkl cyakil yi eꞌ yi na cyocsaj quib nim tu cyetz cyajtzaꞌkl. Nin chaꞌtz na xcyeꞌ tan chixiteꞌn yi eꞌ yi na cyal yi chin cham nin eꞌ. 5 Na xcyeꞌ yi jun ajtzaꞌklaꞌtz yi akꞌij tan Ryos swetz tan xiteꞌn cyajtzaꞌkl yi eꞌ yi na chitzan tan telseꞌn kꞌej iꞌ, yi eꞌ yi na choꞌc tan poyseꞌn chiwutz wunak tan quiꞌt chixomeꞌn te Ryos. Poro yi ajtzaꞌkl yi na takꞌ Ryos na xcyeꞌ tan cyocseꞌn pres, bantz cyoqueꞌn cꞌulutxum jakꞌ caꞌwl Jesucristo. 6 Ej nin yi nink choꞌc cyeruꞌ cꞌulutxum, list atineꞌt tan takꞌleꞌn chicaws cyakil yi eꞌ pajol caꞌwlaꞌtz yi ateꞌ ẍchixoꞌluꞌ.7 Yi eꞌ cyeruꞌ ntin na chixomuꞌ te yi balajil jilon jun yaj, nin qui na choꞌcuꞌ tan xtxumleꞌn yi mbi ajtzaꞌklil na icyꞌ tcꞌuꞌl. Na at loꞌ eꞌ ẍchixoꞌluꞌ yi na cyal yi ntin eꞌ, eꞌ tetz Cristo. Poro tajweꞌn yil tzꞌel chitxum tetz yi nchaꞌtz oꞌ, oꞌ tetz Cristo. 8 Le wutz cyeruꞌ cyajtzaꞌkluꞌ na wocsaj wib nim tu wajtzaꞌkl tan chicaweꞌnuꞌ. Poro at rmeril tan woqueꞌn tan chicaweꞌnuꞌ, na akꞌij inkꞌej tan Ryos nin qui na chintxꞌixwij taꞌn. Na yi wetz intarey iꞌtz tan chitxicbajeꞌnuꞌ, nkꞌeꞌtz tan chixiteꞌnuꞌ. 9 Nchaꞌtz qui na waj yi nink choꞌcuꞌ tan xtxumleꞌn yi ntin na xcon eꞌchk cart waꞌn tan chixoꞌwseꞌnuꞌ. 10 Na at eꞌ ẍchixoꞌluꞌ yi na cyal yi chin quiw nin na chinjilon tcꞌuꞌl yi eꞌchk cart yi na opon waꞌn. Nchaꞌtz na cyal yi quiꞌc xac inyol, nin yi quiꞌc xtxolbil te yi atin ẍchixoꞌluꞌ. 11 Poro yi eꞌaꞌtz tajweꞌn tzꞌel chitxum tetz yi quil xtxꞌixpuj tib chinjilon, na yi ko na xcon quiw yol waꞌn tul eꞌchk cart, iteꞌn nin quiw yol xconk waꞌn yil nopon ẍchixoꞌluꞌ.
12 Nchaꞌtz na waj wal scyeruꞌ yi nkꞌeꞌtz niꞌcuꞌn wajtzaꞌkl scyuchꞌ yi coboxaꞌtz yi ateꞌ ẍchixoꞌluꞌ, yi eꞌ yi na cyal yi chin tzꞌaknak cuꞌn eꞌ, na yi eꞌaꞌtz chin yab nin eꞌ tu cyajtzaꞌkl. Na na cyal yi eꞌ balaj, poro ntin na xcon yi cyetz cyajtzaꞌkl cyaꞌn tan chimaꞌlal quib squibil quib. Nin ko nicyꞌ nin tuꞌ quitaneꞌn tu cyuchꞌ, na tzun cyocsaj quib yi eꞌ balaj. Poro quiꞌc xtxolbil yi jun ajtzaꞌklaꞌtz.
13 Ma yi oꞌ ketz nkꞌeꞌtz niꞌcuꞌn oꞌ scyuchꞌ, na qui na kal ketz yi chin tzꞌaknak cuꞌn oꞌ. Ntin na el katxum tetz yi at jun katarey yi akꞌij sketz tan Ryos, nin kol kaban taneꞌn yi jun katareyaꞌtz slajluchaxk yi ẍeꞌn kutaneꞌn. Ej nin yi jun katareyaꞌtz iꞌtz tan chiquiwseꞌnuꞌ. 14 Ma jaluꞌ, yi koponeꞌn ẍchixoꞌluꞌ nkꞌeꞌtz icyꞌeꞌn nkaban tul tarey junt, na oꞌ yi bajx yi oꞌ opon ẍchixoꞌluꞌ tan xtxꞌolcheꞌn xoꞌl yi mbi ekaꞌn tan Cristo. 15-16 Yi oꞌ ketz qui na kicyꞌ pokꞌ tul tarey junt. Qui na kal “ketz” te yi akꞌun yi na bnix tan junt yaj. Chaꞌstzun te yi koqueꞌn tan xtxoleꞌn scyeruꞌ. Ej nin yil chiquiwixuꞌ mas lok choꞌcuꞌ tan kuchꞌeyeꞌn tan kabeneꞌn tul junt amaꞌl tan xtxoleꞌn yi balaj stziblal yi ẍeꞌn chiclax wunak. Poro yil kaben na kaj kaben ẍchixoꞌl yi eꞌ yi txeꞌn cunin quibit, na qui na kaj ljal kakꞌej tan yi takꞌun junt.