Yi jeꞌn jun ofrent tan quichꞌeyeꞌn cobox kajwutz
9
1 Poro nkꞌeꞌtz tajweꞌn kloꞌ tan beneꞌn intzꞌibal scyeruꞌ te yi ẍchꞌeybil cyetz yi eꞌ mas kajwutz yi na tzan molcheꞌn ẍchixoꞌluꞌ, 2 na elnak intxum tetz yi chibalajiluꞌ. Na alaꞌix tir wal scyetz yi eꞌ kajwutz tzoneꞌj Macedonia yi jun yobix tzaj list ateꞌtuꞌ, yi eꞌuꞌ aj Acaya, tan quichꞌeyeꞌn yi eꞌ kajwutz aj Jerusalén. Chaꞌstzun te at wiꞌnin aj tzoneꞌj yi ja quibit chitziblaluꞌ, nin ja chixom te cyajtzaꞌkluꞌ. 3 Poro ilenin nchiben inchakol yi coboxt kajwutzaꞌtz tan quilol yi ko bintzi nin yi yol yi walnak scyetz, yi list eꞌuꞌ tan ichꞌeyaꞌn. Na kloꞌ waj yi chiban list quibuꞌ tu chiꞌofrentuꞌ chi walnak scyetz, 4 na at wupombil scyeꞌjuꞌ tan molcheꞌn, poro at muꞌẍt tan woponeꞌn. Ej nin kol chixom nin coboxt aj tzoneꞌj sweꞌj, chintxꞌixwok ko nkꞌeꞌtz list ateꞌtuꞌ tu yi muꞌẍ oyaꞌtz. Nchaꞌtz eꞌuꞌ, chitxꞌixwokuꞌ ko quiꞌc. 5 Chaꞌstzun te ja cuꞌ intxumul tan chibajxeꞌn nin Tito scyuchꞌ yi eꞌ kajwutzaꞌtz tan quichꞌeyeꞌnuꞌ tan molcheꞌn yi pwok yi chisuknakuꞌ. Nin yi ko list atit cyanuꞌ yil kopon, slajluchaxk yi nkꞌeꞌtz puers tuꞌ lcyakꞌwituꞌ, ma na tetz cuꞌn cyalmaꞌuꞌ.6 Ulk bin txꞌakx yi jun xtxolbileꞌj ẍchicꞌuꞌluꞌ: Alchok scyetz yi quiꞌc mas tujul na oc ttxꞌotxꞌ, quiꞌc mas cosech na jeꞌ. Nin alchok scyetz yi nim tujul na oc ttxꞌotxꞌ, chumam cosech na jeꞌ. 7 Baꞌn tzun cyakꞌuꞌ chijunaluꞌ yi mbi na saj buꞌk tetz cyalmaꞌuꞌ. Poro quil cyakꞌuꞌ tan cob cꞌuꞌlal, nka puers tuꞌ, na wiꞌnin na pekꞌ Ryos scyeꞌj yi eꞌ yi tetz cuꞌn cyalmaꞌ na cyakꞌ. 8 Ej nin xcyek Ryos tan kuchꞌeyeꞌn te yi xtxolbileꞌj. Na kol kakꞌ, tzꞌul kojol iꞌ yi banl talmaꞌ skibaj bantz jaleꞌn cyakil yi tajweꞌn sketz, nin sjalok kabambil taꞌn tan kabnol wiꞌnin eꞌchk pawor. 9 Na at jun xtxolbil yi tzꞌibaꞌn cyen yi na tal:
“Yi eꞌ yi wiꞌnin na choyin
scyetz yi eꞌ yi at tajweꞌn scyetz,
quil tzꞌel chibalajil te chicꞌuꞌl wunak.”a
10 Nchaꞌtz yi kaRyosil, yi na akꞌon tzaj yi quijuꞌ yi na cyawajuꞌ, nin yi na akꞌon tzaj walor yi chiwankiluꞌ, iꞌ tzꞌakꞌon cyakil yi tajweꞌn scyeruꞌ bantz cyakꞌoluꞌ scyetz yi eꞌ yi at tajweꞌn scyetz. Ej nin ko yaꞌtz cyulejuꞌ, sjalok chibalajiluꞌ, nin ẍchiwutzinkuꞌ chi na ban jun balaj cosech. 11 Ko yaꞌtz cyulejuꞌ, sjalok wiꞌnin jilwutz chimebiꞌluꞌ tan toyeꞌn scyetz yi eꞌ yi at tajweꞌn scyetz. Ej nin yil chitzꞌam kajwutz yi cyoyuꞌ chityoẍink tetz Kataj, 12 na nkꞌeꞌtz quichꞌeyeꞌn tuꞌ na chibanuꞌ ma na tan yi cyoyuꞌ scyakꞌeꞌ chikꞌajsbil tetz Ryos. 13 Scyakꞌeꞌ chikꞌajsbil tetz Ryos, na slajluchaxk ẍchiwutz yi na chixomuꞌ te yi ẍchusuꞌn Cristo, nin slajluchaxk ẍchiwutz yi list eꞌuꞌ tan quichꞌeyeꞌn yi eꞌ cyetz scyuchꞌ alchok jilwutz wunak. 14 Ẍchinacheꞌ Kataj squibuꞌ, nin ẍchipekꞌok scyeꞌjuꞌ, na tzꞌelepon chitxum tetz yi wiꞌnin banl Kataj squibuꞌ. 15 Ntyoẍ bin tetz Kataj yi ja takꞌ iꞌ yi jun chumbalaj oy sketz. Poro qui na kaxcyeꞌ tan xtxumleꞌn yi mbi tzuntz yi yaꞌstzun tulej iꞌ.