Yi ẍeꞌn cyakꞌol chi ofrent yi eꞌ aj Macedonia
8
1 I bin jaluꞌ eꞌuꞌ wajwutz, na kaj kal scyeruꞌ yi ẍeꞌn cuꞌn nlajluchax yi banl talmaꞌ Ryos ẍchixoꞌl yi eꞌ cmon creyent yi najlcheꞌ lakak amaꞌl tzoneꞌj Macedonia. 2 Na te yi tiemp yi tuleꞌn wiꞌnin pilbil cyetz, nin te yi tiemp yi wiꞌnin qꞌuixcꞌuj ateꞌ cuꞌnt, mas tcunin nchitzatzin tkꞌab Kataj. Ej nin te yi jun tiempaꞌtz yi ateꞌ wutz peꞌm, mas cunin nchoyin chi eꞌ-k ric taneꞌn. 3 Nin tetz cuꞌn cyalmaꞌ yi cyakꞌol yi oyaꞌtz. Ej nin quinin xomquen te chiwalor, ma na mast cunin cyakꞌ. Nin in stiw teꞌj. 4 Na cuꞌ chiwutz sketz tan kukꞌol amaꞌl scyetz tan cyoqueꞌn tan quichꞌeyeꞌn yi eꞌ kajwutz aj Jerusalén. 5 Mas tcunin nchiban swutz yi txumijt kaꞌn ketz, na bajx ja cyakꞌ quib tetz Ryos tan chixconeꞌn tetz. Kalenaꞌtz tzun chixomeꞌn te ketz kachusuꞌn. 6 Ma jaluꞌ tan tuꞌ yi ja cyakꞌ cyetz yi jun oyaꞌtz, chaꞌstzun te ja kajak pawor tetz Tito tan toqueꞌnt junt tir tan chimoxeꞌnuꞌ tan chichajoluꞌ yi balaj ajtzaꞌkl yi na saj tu Ryos tan cyakꞌoluꞌ muꞌẍt oy, chi banak iꞌ jun tir. 7 Na na el katxum tetz yi eꞌ cyeruꞌ nkꞌeꞌtz pen tuꞌ na cyocsajuꞌ. Ej nin chin list nin eꞌuꞌ tan chichusleꞌn wunak. Nin chin tzꞌaknak cuꞌn cyajtzaꞌkluꞌ. Chin ẍcꞌatnak nin eꞌuꞌ. Nchaꞌtz wiꞌnin na chipekꞌuꞌ skeꞌj. Nin nkꞌeꞌtz pen tlen tuꞌk na chibanuꞌ jun takleꞌn. Chaꞌstzunk chibanuꞌ tan molcheꞌn jun oyaꞌtz tan quichꞌeyeꞌn yi eꞌ kajwutz aj Jerusalén.8 Qui na chintzan tan chicaweꞌnuꞌ yi tajweꞌn tan cyakꞌoluꞌ chipuꞌkuꞌ, ma na ntin na waj yil quibituꞌ yi chiẍcꞌatnakil yi eꞌ kajwutz tzoneꞌj. Ej nin yil quibituꞌ slajluchaxk yi nchaꞌtz eꞌuꞌ at lokꞌ ib scyuchꞌuꞌ tan quichꞌeyeꞌn junt txꞌakajt kajwutz. 9 Na el chitxumuꞌ tetz yi banl talmaꞌ Kajcaw Jesucristo. Na chin ric nin iꞌ, poro ja tocsaj tib mebaꞌ tan ẍchajleꞌn yi lokꞌ ib scyeruꞌ, nin tan cyoqueꞌnuꞌ tetz ric.
10 Ma jaluꞌ swaleꞌ nin junt cyajtzaꞌkluꞌ yi tzꞌakꞌonk baꞌn scyeruꞌ. Iꞌtz junix yob yi cweꞌnleꞌn chitxumuluꞌ tan molcheꞌn yi oyaꞌtz. Nin chin chigan cuninuꞌ yi cyoqueꞌnuꞌ kloꞌ tan molcheꞌn. 11 Chaꞌstzun te, tajweꞌn choꞌctuꞌ il tan molcheꞌn pwokaꞌtz chi yi cweꞌn chixeꞌtzaluꞌ. Xomok quentuꞌ te chiwaloruꞌ chijunalenuꞌ. 12 Na wiꞌnin na tzatzin Ryos teꞌj ko tetz cuꞌn kalmaꞌ yi na kakꞌ kaꞌofrent. Na na til Ryos yi ko itzꞌoꞌ cuꞌn nka quiꞌ. Na qui na tzan Ryos tan jakleꞌn yi eꞌchk takleꞌn yi quiꞌc at skuchꞌ.
13 Nchaꞌtz nkꞌeꞌtz wajbil yil tzꞌoc cyen jun tetz mebaꞌ ntin tan ẍchꞌeyeꞌn junt. 14 Ma na yi wetz wajbil iꞌtz yi nicyꞌ nin tuꞌ chichꞌeyaj quibuꞌ scyuchꞌ yi eꞌ aj Jerusalén. Na yi cyeruꞌ jaluꞌ itzꞌ nin muꞌẍ tal. Ma yi eꞌ cyetz quiꞌc ateꞌ cuꞌnt. Poro qui cunin batz tzꞌopon jun kꞌej yi eꞌ-t cyetz ẍchichꞌeyank scyeꞌjuꞌ. 15 At xeꞌ yi inyol yi na wal nin scyeruꞌ na tzꞌibaꞌnt cyen jun xtxolbil yi na tal: “Yi eꞌ yi wiꞌnin chiwaꞌ, quinin sobrin, nin yi eꞌ yi quiꞌc mas chiwaꞌ eꞌ el cyen tuꞌ teꞌj.”a Chaꞌstzun te chimol cunuꞌ yi jun oyaꞌtz.
Yi eꞌ tuchꞌ Tito yi xomcheꞌ teꞌj
16 Ntyoẍ tetz Ryos yi niꞌcuꞌn kutaneꞌn tu Tito tan xtxumleꞌn yi ẍeꞌn ljal chibanluꞌ, na Ryos mmoꞌcsan yi jun ajtzaꞌklaꞌtz le wiꞌ. 17 Ej nin cu nin tuꞌ-tz taꞌn tan toqueꞌn tan molcheꞌn yi pwok ẍchixoꞌluꞌ. Gan cuꞌn iꞌ tan chixajseꞌnuꞌ junt tir.
18 Nkꞌeꞌtz ẍchuc iꞌ tzꞌocopon, ma na mben kachakol junt kajwutz te iꞌ. Chumbalaj nin iꞌ ẍchiwutz yi eꞌ cmon creyent tzoneꞌj tan xtxoleꞌn yi balaj stziblal tetz colbil ibaj. 19 Ej nin nchaꞌtz, bixbaꞌnt cyakꞌun tan xomeꞌn skeꞌj, nin tan kuchꞌeyeꞌn tan molcheꞌn yi jun balaj ofrentaꞌtz. Na koꞌc il te kakꞌuneꞌj tan jaleꞌn kꞌej Kataj Ryos, nin tan ẍchaleꞌn yi at kagan tan quichꞌeyeꞌnuꞌ. 20 Ja bixeꞌ yi junt kuchꞌaꞌtz tan qui jaleꞌn yolbil ketz yi na katzan tan molcheꞌn yi pwokaꞌtz. 21 Na nucyꞌij tzij cuꞌn na kaj kaban yi kakꞌun swutz Ryos nin ẍchiwutz wunak.
22 Nchaꞌtz at junt kajwutz yi mben te Tito. Alaꞌix cunin tir kakꞌ tarey yaj, nin ja lajluchax yi chin ẍcꞌatnak nin iꞌ. Pyor nin jaluꞌ na nternin kꞌuklij cꞌuꞌl scyeꞌjuꞌ. 23 Ko alchok scyetz tzꞌoc tan jakleꞌn yi naꞌ scyetz iꞌ Tito, baꞌn cyaluꞌ scyetz yi iꞌ jun wamiw nin yi junit na kakꞌuj tuchꞌ tan quichꞌeyeꞌnuꞌ. Nchaꞌtz ko al scyetz lchijakon yi naꞌ scyetz eꞌ yi eꞌ mas kajwutz yi ẍchixomok nin te Tito, baꞌn cyaluꞌ scyetz yi chakijcheꞌ cyakꞌun yi cmon creyent tzoneꞌj Macedonia. Ej nin yi cobox kajwutzaꞌtz chumbalaj nin eꞌ na na chixcyeꞌ tan jalseꞌn kꞌej Ryos. 24 Chaꞌstzun te chichajeꞌuꞌ lokꞌ ib scyetz, bantz quibital yi eꞌ mas cmon creyent yi chitziblaluꞌ yi bintzi nin at lokꞌ ib scyuchꞌuꞌ, nin yi bintzi nin yi na katzan tan talcheꞌn yi eꞌuꞌ balaj.