7
1 Eꞌuꞌ kajwutz, yi jun xtxolbilaꞌtz yi alijt cyen tan Ryos, iꞌtz tetz ketz. Katxꞌajeꞌ bin kib. Poro nkꞌeꞌtz ntin kawankil, ma na i yi kajtzaꞌkl cachiꞌ, kacyajseꞌ cyen. Ko na kaj kek ẍchiꞌ Ryos, koꞌken bin tetz balaj.Yi ẍeꞌn cunin xtxꞌixpeꞌn cyajtzaꞌkl yi eꞌ creyent Corint
2 Eꞌuꞌ kajwutz baꞌn chipekꞌuꞌ skeꞌj, na cyaꞌl cunin na kanucꞌwit quen jun takleꞌn scyeꞌjuꞌ. Cyaꞌl cunin ocnakoꞌt tan poꞌtzeꞌn cyajtzaꞌkluꞌ. Cyaꞌl cunin ocnakoꞌt tan chisubleꞌnuꞌ. 3 Qui na chintzan tan talcheꞌn nin yi atk quiluꞌ tzinwutz, na ja wiꞌt wal scyeruꞌ yi wiꞌnin na chimpekꞌ scyeꞌjuꞌ. Na list in tan inquimeꞌn tetz jun techl yi wiꞌnin na chimpekꞌ scyeꞌjuꞌ. Poro kol ben ẍkon intiemp, iꞌtz tan inxconeꞌn scyeruꞌ, na wiꞌnin na chimpekꞌ scyeꞌjuꞌ.
4 Siquierk muꞌẍ tal najk cabej incꞌuꞌl scyeꞌjuꞌ. Ma na wiꞌnin na chintzatzin scyeꞌjuꞌ. Wiꞌnin qꞌuixcꞌuj na katij, poro yi na kubit yi chitziblaluꞌ jat loꞌ tzatzin na jal swetz. 5 Na jetz yi kunleꞌn tzoneꞌj Macedonia, quiꞌc muꞌẍ tal ujleꞌn na kaban, Kasajleꞌnix cuntunin oꞌ-tz swutz qꞌuixcꞌuj. Na wiꞌnin oyintziꞌ skeꞌj. Ej nin ilenin na kaxob swutz. 6 Poro yi Kataj Ryos yi na oc tan chimayseꞌn yi eꞌ yi na chibisun, iꞌ nxcyeꞌ tan kamayseꞌn yi tuleꞌn Tito skeꞌj. 7 Ja katzatzin nkꞌeꞌtz ntin tuꞌ yi tuleꞌn iꞌ, poro nchaꞌtz yi kubital yi ẍeꞌn na tzatzin iꞌ scyeꞌjuꞌ. Ja tal iꞌ sketz yi wiꞌnin na el cyalmaꞌuꞌ tan quiloluꞌ kawutz junt tir. Ej nin nchaꞌtz ja tal iꞌ sketz yi ẍeꞌn na chibisunuꞌ sweꞌj, nin yi ẍeꞌn na okꞌ chicꞌuꞌluꞌ sweꞌj. Chaꞌstzun te ja jal tzatzin tetz ketz.
8 Bintzi loꞌ ja loꞌ chibisunuꞌ tan yi xtxolbil yi at tul yi jun incart yi oponak ẍchiwutzuꞌ. Nchaꞌtz in, imbisun taꞌn. Poro yi jaluꞌ quiꞌt na chimbisun taꞌn. 9 Ma na chintzatzin. Poro qui na chintzatzin tan paj yi eꞌ bisunuꞌ tan yi jun cartaꞌtz, poro na chintzatzin yi ja xcyeꞌ yi bis yi ntakꞌ yi cart tan xtxꞌixpeꞌn cyajtzaꞌkluꞌ. Quinin xcyeꞌ yi jun bis tan chixiteꞌnuꞌ, ma na ja akꞌon baꞌn scyeruꞌ. 10 Na yi bis yi na tzatzin Ryos teꞌj iꞌtz jun bis yi na xcyeꞌ tan xtxꞌixpeꞌn kajtzaꞌkl. Na yi jun jilwutz bisaꞌtz na akꞌon baꞌn sketz, nin skaclaxok taꞌn. Nkꞌeꞌtz niꞌcuꞌn teꞌtz tu yi bis yi na jal ẍchixoꞌl yi eꞌ yi qui na cyocsaj Ryos. 11 Na quinin nchibenuꞌ joylaj tan yi jun bis yi nwakꞌ scyeruꞌ. Ej nin wiꞌnin na tzatzin Ryos te cyajtzaꞌkluꞌ yi quinin nchibenuꞌ joylaj taꞌn. Ej nin nchaꞌtz ja akꞌon baꞌn scyeruꞌ. Na ja xcon yi jun bisaꞌtz tan cꞌaseꞌn cyajtzaꞌkluꞌ tan cyoqueꞌnuꞌ il tan xtxꞌajleꞌn te yi jun ilaꞌtz yi jalnak ẍchixoꞌluꞌ. Ej nin xcon yi jun bisaꞌtz tan cꞌaseꞌn cyajtzaꞌkluꞌ bantz chicolol quibuꞌ, nin tan ẍchajleꞌn yi nkꞌeꞌtz chicyakiluꞌ aj paj. Ej nin tan yi bisaꞌtz ja jeꞌ ẍchiwutzuꞌ yi mbi bajij ẍchixoꞌluꞌ. Nchaꞌtz xcon tan chixoꞌwseꞌnuꞌ, nin tan yi jun bisaꞌtz el cyalmaꞌuꞌ tan kilolt kib scyuchꞌuꞌ. Nchaꞌtz eꞌ ocuꞌ il tan takꞌleꞌn caws yi jun aj pajaꞌtz. Ma jaluꞌ tan cyakil yi eꞌchk takleꞌnaꞌtz yi nchibanuꞌ ja lajluchax yi ja chixcyeꞌuꞌ tan banleꞌn taneꞌn yi problem. 12 Yi cart yi oponak waꞌn ẍchikꞌabuꞌ nkꞌeꞌtz tetz yi yaj yi njuchun, nin nkꞌeꞌtz tetz yi jun yi na bisun, ma na sak swutz Ryos yi ja bnix yi jun cartaꞌtz waꞌn tan cꞌaseꞌn cyajtzaꞌkluꞌ nin tan teleꞌn chitxumuꞌ tetz yi na chixomuꞌ te wetz wajtzaꞌkl nin yi bintzinin na chipekꞌuꞌ sweꞌj. 13 Chaꞌstzun te jaluꞌ na katzatzin. Nin quiꞌt na kabisun.
Nchaꞌtz wiꞌnin na katzatzin te Tito, na tan tuꞌ yi nchoꞌcuꞌ cꞌulutxum ja chixcyeꞌuꞌ tan xiteꞌn yi bis yi cyakꞌnakuꞌ tetz. 14 Nchaꞌtz jaluꞌ qui na chintxꞌixwij tan inyol yi walnak tetz Tito yi chumbalaj nin eꞌuꞌ. Na ja lajluchax yi bintzi yi nwal tetz Tito nin yi nwal scyeruꞌ. 15 Ej nin yi na ul txꞌakx tcꞌuꞌl Tito yi ẍeꞌn cuꞌn cyoqueꞌnuꞌ cꞌulutxum jakꞌ caꞌwl iꞌ, wiꞌnin na tzatzin iꞌ teꞌj. 16 Quiꞌc bin muꞌẍ tal yi najk kacabej kacꞌuꞌl na wiꞌnin na katzatzin scyeꞌjuꞌ.