6
1 Junit bin kutaneꞌn ketz tan akꞌun tu Ryos, chaꞌstzun te na cuꞌ kawutz scyeruꞌ yi nkꞌeꞌtz tan chaꞌtz tuꞌ lcyakꞌuꞌ amaꞌl tetz yi banl talmaꞌ iꞌ. 2 Na at jun xtxolbil yi tzꞌibaꞌnt cyen yi na tal:“Tul yi tiemp yi list in tan tbiteꞌn yi itziꞌ yi ikul,
yaꞌstzun lwulej.
Ej nin tul yi tiemp yi bixbaꞌnt waꞌn tan iclaxeꞌn, yaꞌstzun yi tiemp yi nxwuchꞌeyaj,” stzun Ryos banak cyen.a
Yi jun xtxolbilaꞌtz na elepont, yi jaluꞌ yaꞌstzun yi tiemp yi list Ryos tan koꞌ tbital, nin yi jaluꞌ yaꞌstzun yi tiemp tan kaclaxeꞌn.
3 Chaꞌstzun te chin puntil cuꞌn na kulej yi ketz kakꞌun tan qui jaleꞌn yolbil ketz, na qui na kaj ltxꞌakxij jun wunak tan kapaj. 4 Na yi kajbil iꞌtz yil lajluchax yi bintzinin oꞌ ẍchakum Ryos tan cyakil eꞌchk takleꞌn yi na kaban. Na tan yi na kamucꞌ qꞌuixcꞌuj na lajluchax yi na takꞌ Ryos kapasens. 5 Nin wiꞌnin tir ja kaloꞌon tan xicyꞌxab. Nin wiꞌnin tir ocnakoꞌ xetzeꞌ. Nin wiꞌnin tir yi ja chisaj nil wunak skeꞌj tan kabiyleꞌn. Nin quin techix nin sacteꞌn katij sjuꞌ takꞌun Kataj. Nin quin techix nin watl. Quin techix nin weꞌj katij. Ja bin katij qꞌuixcꞌujaꞌtz tan lajluchaxeꞌn yi bintzinin oꞌ ẍchakum Ryos.
6 Nchaꞌtz tan ẍchajleꞌn scyetz cyakil wunak yi oꞌ ẍchakum Ryos na kaqꞌuicyꞌlej kib tkꞌab yi eꞌchk takleꞌn cachiꞌ. Nin na koꞌc il tan teleꞌn mas katxum tetz yi xtxolbil yi na kocsaj. Nchaꞌtz, na kamucꞌ chitziꞌ tu cyajtzaꞌkl wunak. Poro na kaban pawor scyetz. Nin na kachaj jun lokꞌ ib scyetz yi bintzinin. Nchaꞌtz na lajluchax yi oꞌ ẍchakum Ryos tan yi Espíritu Sant yi xomij skeꞌj.
7 Ej nin tan ẍchajleꞌn yi bintzinin yi oꞌ ẍchakum Ryos, na kajilon bintzi cuꞌn poro iꞌtz tan porer Ryos. Nin yi na koꞌc tan xtxoleꞌn iꞌtz tan yi tetz porer. Nchaꞌtz tan kacolol kib ẍchikꞌab kacontr ntin na kachaj yi jicyuch te yi kajtzaꞌkl, yi quiꞌc laꞌjil tuchꞌ. 8 Nchaꞌtz at na ban cuꞌnt na cyakꞌ wunak kakꞌej, nin at na ban cuꞌnt yi na el kakꞌej cyaꞌn. Nin at na ban cuꞌnt yi na choꞌc tan kayolcheꞌn, nin at na ban cuꞌnt yi na cyal yi baꞌn oꞌ. Nchaꞌtz at na ban cuꞌnt na cyal yi oꞌ subul nak, nin at na ban cuꞌnt na cyal yi bintzi kayol. 9 At na ban cuꞌnt na cyal yi oꞌ awer nak, nin at na ban cuꞌnt na cyal yi kamiw kib scyuchꞌ. Jat loꞌ tir yi txant qui oꞌ quim cyaꞌn. Na ja kabuchlij cyaꞌn, poro quinin na keꞌl cuꞌn swutz. Na yi tajbil Ryos iꞌtz tan lajluchaxeꞌn yi oꞌ ẍchakum iꞌ. 10 Ej nin at wiꞌnin eꞌchk takleꞌn yi na ul skawutz tan kabisuneꞌn kloꞌ, poro qui na kajlaj, ma na ilenin na katzatzin. Oꞌ mebaꞌ, poro na kaxcyeꞌ tan takꞌleꞌn jun chin riquil scyetz wiꞌnin wunak. Quiꞌc nin atoꞌ cuꞌnt, poro at cyakil yi tajweꞌn sketz.
11 Ma jaluꞌ eꞌuꞌ kajwutz aj Corint, quinin nkaxob tan talcheꞌn clar cunin yi ẍeꞌn quitaneꞌnuꞌ. Na quiꞌc jun eꞌchk takleꞌn yi tunink na icyꞌ quen kacꞌuꞌl scyeꞌjuꞌ na wiꞌnin na kapekꞌ scyeꞌjuꞌ. 12 Ateꞌuꞌ tetz kajal, poro cuquen, mi atoꞌ peꞌ tetz cyajaluꞌ, nka quiꞌ peꞌ. 13 Na yi oꞌ ketz ntin na katzan tan chimoxeꞌnuꞌ chi na chiban wunak tan chimoxeꞌn chinitxaꞌ. Chipekꞌok binuꞌ skeꞌj chi na kapekꞌ ketz scyeꞌjuꞌ.
Yi oꞌ ketz chi caꞌl Ryos kutaneꞌn
14 I bin jaluꞌ tan ẍchajleꞌn yi bintzinin na chipekꞌuꞌ skeꞌj, quil cyokꞌbej quibuꞌ scyuchꞌ yi eꞌ yi qui na cyocsaj yol Jesucristo. Na qui na tcyꞌaj tib jun balaj ajtzaꞌkl tu jun yab ajtzaꞌkl. Niꞌcuꞌn chi taneꞌn yi tkan skil tu yi tzꞌoꞌtz, qui na tcyꞌaj tib. 15 Ej nin ¿ẍeꞌn quicyꞌaj quib Cristo tu Baybaꞌn? ¿Ẍeꞌn tcyꞌaj tib tajtzaꞌkl jun creyent tu jun yi qui na tocsaj? 16 Ej nin ¿ẍeꞌn tcyꞌaj tib jun yi najlij Ryos te talmaꞌ tu jun yi na mejeꞌ ẍchiwutz yi eꞌchk takleꞌn yi banij quitaneꞌn? Na yi ketz kawankil iꞌtz caꞌl Ryos, yi Ryos yi itzꞌ nin tetz, na yaꞌstzun talnak iꞌ:
“Ẍchin najank tzixoꞌlwok na in iRyosil,
cxocoponwok tetz inmeꞌl incyꞌajl.”b
17 Nchaꞌtz talnak iꞌ:
“Tajweꞌn cxeꞌlwok tzaj ẍchixoꞌl yi eꞌ yi qui na chixom te weri inyol.
Jatxwok len itib scyeꞌj.
Quiꞌc tzitajquen scyetz.c
Ej nin ko yaꞌtz tzibanwok,
18 nocopon tzuntz tetz mero itaj,
nin yi axwok itetz cxocopon tetz mero
inmeꞌl incyꞌajl,”
stzun Ryos banak cyen, yi Ryos yi cyaꞌl jun na xcyeꞌ teꞌj.d