5
1 Na elnak katxum tetz yi kol tzꞌel cuꞌn swutz yi kawankileꞌj, yi caꞌlil yi kalmaꞌ, at junt yi ja wiꞌt bnix tcyaꞌj tan Ryos tetz ketz, yi nkꞌeꞌtz wunak bnol tetz. 2 Te yi muꞌẍ tal tiemp yi najlij yi kalmaꞌ tul yi kawankileꞌj, wiꞌnin na katxꞌayneꞌ. Chaꞌstzun te nternin na el kalmaꞌ tan jaleꞌn junt acꞌaj kawankil yi choꞌn sjalok tcyaꞌj. 3 Na yi jun acꞌaj caꞌlaꞌtz yi na chꞌiwan tetz ketz, xcyek tan jopleꞌn kalmaꞌ chi na ban jun beꞌch ketz tan jopleꞌn kawankil. 4 Poro te yi najlij yi kalmaꞌ tul yi kawankileꞌj, wiꞌnin na katxꞌayneꞌ. Nin wiꞌnin qꞌuixcꞌuj na katij. Poro nkꞌeraꞌtz kajbil tan kaquimeꞌn chan. Poro mas balaj yi nink kacambaj yi jun acꞌaj kawankil tan kaxconsal chan. 5 Ryos txumul tetz tan jaleꞌn yi jun acꞌaj kawankilaꞌtz. Ej nin iꞌ makꞌon tzaj yi Espíritu Sant tan najeweꞌn skeꞌj. Yaꞌstzun jun techl yi jun cuꞌn tzꞌelepon kꞌab Ryos te yol.6 Chaꞌstzun te qui na kabisun siquier muꞌẍ tal te yi mbi sbajok skeꞌj, na na el katxum tetz yi te yi tiemp yi najlchoꞌ tul kawankileꞌj, quiboꞌ tul yi mero kacaꞌlil. Na txeꞌn kopon te Kajcaw. 7 Txeꞌn lajluchax skawutz poro choꞌn kꞌuklij kacꞌuꞌl teꞌj yi sjalok junt kawankil. 8 Qui na kacabej kacꞌuꞌl muꞌẍ tal te yi jun xtxolbilaꞌtz. Nin qui na kaj kaꞌtij mas tul yi jun kawankileꞌj, na na kaj kaꞌtij chan tu Kajcaw. 9 Poro yi mas tajweꞌn tan kabnol iꞌtz tan kajoyol puntil tan stzatzineꞌn Kajcaw skeꞌj. Quiꞌc na ban yi ko atoꞌt tul yi kawankileꞌj, nka quiboꞌ tul, ntin kajoyeꞌ puntil tan stzatzineꞌn iꞌ skeꞌj. 10 Na tajweꞌn yil kachaj kib swutz yi pujbil xtisyaꞌ Cristo tan kubital yi mbi tzꞌakꞌlok sketz. Tu nin xom quen te yi mbi cuꞌn baj kabnol te yi tiemp yi xcon kawankileꞌj, na tzꞌocopon iꞌ tan kamaꞌleꞌn.
11 Chaꞌstzun te na kek ẍchiꞌ Ryos, nin na koꞌc il tan chimoxeꞌn wunak tan cyoqueꞌn cꞌulutxum jakꞌ caꞌwl iꞌ. Na na til Ryos yi ẍeꞌn kutaneꞌn, nin yi baꞌn atoꞌt, Lok tzꞌel cyeruꞌ chitxumuꞌ tetz. 12 Qui na katzan tan talcheꞌn yi xtxolbilaꞌtz scyeruꞌ ik tan jaleꞌn ketz kakꞌej ẍchiwutzuꞌ, ma na iꞌtz tan jaleꞌn puntil cyanuꞌ tan pakseꞌn nin chiyol yi eꞌ yi na cyal yi chumbalaj nin eꞌ, poro yi mero bintzi iꞌtz yi chin cachiꞌ nin yi na icyꞌ chicꞌuꞌl. 13 Poro ko oꞌ yab, chi na cyal cyetz, iꞌtz tan jaleꞌn kꞌej Kataj. Ej nin yi chin list nink oꞌ tan chisubleꞌn wunak chi na cyal cobox, iꞌtz tan jaleꞌn chibanluꞌ. 14 Na el katxum tetz yi wiꞌnin na pekꞌ Cristo skeꞌj, chaꞌstzun te tajweꞌn tan kaxconeꞌn tetz, na iꞌ caꞌwl ketz. Ej nin na el katxum tetz yi jun ntziꞌ nquim tetz kaxel kacyakil cuꞌn, nin yi quimeꞌn iꞌ niꞌcuꞌn yi yaꞌtzk kaquimeꞌn ketz te iꞌ. 15 Na ja quim Cristo tetz kaxel kacyakil cuꞌn, chaꞌstzun te baꞌn tcuꞌn quil kaban yi ketz kajbil tul yi muꞌẍ tal tiemp yi akꞌij sketz tzoneꞌj wuxtxꞌotxꞌ, ma na i tajbil yi jun yi nquim tetz kaxel nin yi itzꞌnak junt tir. 16 Chaꞌstzun te quiꞌt koꞌc tan maꞌleꞌn cyajtzaꞌkl yi eꞌ kajwutz chi kasajleꞌn yi ntaxk kocsaj, na yi jaluꞌ oꞌ cuꞌn acꞌaj wunak. Bintzi ocnakin wetz tan telseꞌn kꞌej Cristo, poro yi jaluꞌ quiꞌt. 17 Na cyakil yi oꞌ yi atoꞌ tkꞌab Cristo, oꞌ acꞌaj wunak, na ja wiꞌt cyaj kacyajsal yi eꞌchk ajtzaꞌkl cachiꞌ yi xomnakoꞌ teꞌj sajleꞌn, ma jaluꞌ oꞌ acꞌaj wunak.
18 Poro cyakil yi xtxolbilaꞌseꞌj, Ryos txumul tetz. Na iꞌ njoyon puntil yi nxcon Cristo taꞌn tan kabansal kib tuchꞌ. Ej nin akꞌij len katarey taꞌn tan kaxconeꞌn bantz chibansal quib yi eꞌ mas wunak tuchꞌ. 19 Yi na elepont yi xtxolbilaꞌseꞌj iꞌtz: Quinin ntakꞌ Ryos yi kacaws ma na ja xcon Cristo taꞌn tan kabansal kib tuchꞌ. Ej nin yi ketz katarey yi akꞌij len sketz iꞌtz tan xtxoleꞌn scyetz cyakil wunak yi at rmeril tan chibansal quib tu Ryos. 20 Oꞌ len kꞌajbil Cristo, nin yi na cuꞌ kawutz ẍchiwutz wunak iꞌtz niꞌcuꞌn yi ik Cristo na cuꞌ wutz ẍchiwutz: Banswok itib tu Ryos, koꞌch. 21 Na yi Kajcaw Jesucristo quiꞌc muꞌẍ tetz til, poro tan jaleꞌn cuybil ketz kapaj, nin tan koqueꞌn ketz tetz balaj, ja oc iꞌ tetz tajlal juchul il.