4
1 Chaꞌstzun te qui na kakꞌeꞌxij sjuꞌ takꞌun Kataj, na tan tuꞌ banl talmaꞌ iꞌ nkoꞌ bixban tan kaxconeꞌn tetz. 2 Quiꞌt na kaban yi eꞌchk takleꞌn yi chin txꞌixwil nin, yi ewun cuꞌn nkaban sajleꞌn. Nin quiꞌt na katzan tan chisubleꞌn wunak chi kasajleꞌn. Ej nin qui na katzan tan xtxꞌixpeꞌn yi xtxolbil yi at tul yol Kataj, ma na ntin na katzan tan xtxꞌolcheꞌn xoꞌl yi bintzi. Na sak swutz Ryos, nin lajluch cuꞌn ẍchiwutzuꞌ yi yaꞌtz na kaban. 3 Poro ko at eꞌ yi qui na pujx yi balaj stziblal yi na katxol iꞌtz jun techl yi at chibembil tqꞌuixcꞌuj. 4 Na jopij wutz cyajtzaꞌkl tan yi Baybaꞌn, yi ryos yi na cawun tzoneꞌj wi munt. Jopij wutz cyajtzaꞌkl taꞌn, bantz qui lajluchaxeꞌn ẍchiwutz yi kꞌej tu yi balajil yi stziblal Cristo, yi jun yi iteꞌn nin iꞌ Ryos. 5 Ma yi oꞌ ketz oꞌ chixconsbeꞌtzuꞌ nin qui na katzan tan xtxoleꞌn yi ketz kakꞌej, ma na yi kꞌej Kajcaw Cristo Jesús. Na yi ketz kajbil iꞌtz tan jaleꞌn mas kꞌej iꞌ. 6 Yaꞌtz na kaban na Ryos mpacon len yi tzꞌoꞌtz wutzil te kawutz. Nin baꞌn na xcyeꞌ teꞌj, na yi at tzaj tzꞌoꞌtz wuxtxꞌotxꞌ iteꞌn iꞌ aꞌlon: “Jaloken tkan skil,” nin jaltz. Chaꞌstzun te ja wiꞌt el katxum tetz yi kꞌej Ryos, na ja lajluchax skawutz tan Cristo.Na intxol yol Kataj na ja wocsaj cunin
7 Yi oꞌ ketz yi oꞌ cyꞌanl tetz yi balaj porer Ryosaꞌtz niꞌcuꞌn oꞌ tu jun cꞌul yi txꞌotxꞌ tuꞌ, bantz lajluchaxeꞌn yi choꞌn na saj yi jun poreraꞌtz te Ryos nin nkꞌeꞌtz ketz. 8 Na yi oꞌ ketz chin il nin atoꞌ cuꞌnt ẍchikꞌab wunak, poro qui na chixcyeꞌ tan kamakleꞌn. Nin at na ban cuꞌnt quiꞌt na jal puntil kaꞌn ẍeꞌn lkaban, poro qui na cabej kacꞌuꞌl tan paj. 9 Wiꞌnin eꞌ na chitzan tan kaxuxeꞌn, poro qui tzakpuꞌn kukanil. Ninin na kacuꞌ bocꞌl cyaꞌn, poro quiꞌc na kaban. 10 Quiꞌc nin jun kꞌej yi quiꞌk na katij muꞌẍ qꞌuixcꞌuj, chi qꞌuixcꞌuj yi icyꞌnak pon tan Jesús. Poro tan eꞌchk qꞌuixcꞌujaꞌtz yi na kamucꞌ, na lajluchax yi xomij yi porer Jesús skeꞌj. 11 Ej nin tan tuꞌ yi xomchoꞌ te Jesús, quiꞌc nin jun kꞌej yi liwr oꞌ tkꞌab quimichil. Poro tan yi na katij ketz yi eꞌchk qꞌuixcꞌujaꞌtz na takꞌ amaꞌl sketz tan lajluchaxeꞌn yi porer Jesucristo, yi choꞌn najlil te kawankileꞌj yi squimok. 12 Yi ekaꞌn tan yi jun xtxolbilaꞌtz iꞌtz, at kloꞌ kaquimbil tan tuꞌ yi na katzan tan xtxoleꞌn, poro ntyoẍ tetz Kataj yi ja jal cyeruꞌ quitzꞌajbiluꞌ. 13 At jun xtxolbil yi tzꞌibaꞌnt cyen yi na tal: “Ja wocsaj cunin, chaꞌstzun te na chintzan tan xtxoleꞌn.” Niꞌcuꞌn tzun kutaneꞌn ketz. Ja kocsaj cunin, chaꞌstzun te yi na katzan tan xtxoleꞌn yi balaj stziblal. 14 Na elnak katxum tetz yi Ryos lkajeꞌsan tzaj ẍchixoꞌl almaꞌ, na iꞌ njeꞌsan tzaj Kajcaw Jesús ẍchixoꞌl almaꞌ. Ej nin iꞌ lkucyꞌan nin scyuchꞌuꞌ tan koponeꞌn kale atiteꞌt iꞌ. 15 Na cyakil yi eꞌchk takleꞌn yi na kamucꞌ iꞌtz tan takꞌoneꞌn baꞌn scyeruꞌ. Ej nin ko at wiꞌnin eꞌ yil cyocsaj, sjalok tzun wiꞌnin eꞌ yi chityoẍink tetz Kataj, nin sjalok yi tetz kꞌej.
16 Chaꞌstzun te qui na kakꞌeꞌxij sjuꞌ takꞌun Kataj. Tzan plojixeꞌn kawankil, poro tcꞌuꞌl yi jujun kꞌej tzan quiwixeꞌn mas kacꞌuꞌl. 17 Na qui tu kꞌusij yi qꞌuixcꞌuj yi na katij tzoneꞌj wuxtxꞌotxꞌ, na stzajk teraꞌtz. Poro tan tuꞌ yi na katij yi muꞌẍ tal qꞌuixcꞌujaꞌtz, sjalok wiꞌnin kakꞌej, nin skatzatzink tetz ben kꞌej ben sak. 18 Na nkꞌeꞌtz choꞌn kꞌuklij kacꞌuꞌl te yi eꞌchk takleꞌn yi sotzok. Ma na choꞌn ajlij ketz kacꞌuꞌl te yi eꞌchk takleꞌn yi quil sotz tetz ben kꞌej ben sak.