Mas balaj yi acꞌaj xtxolbil swutz yi antiw
3
1 I bin jaluꞌ tan yi xtxolbilaꞌtz qui na katzan tan joyleꞌn yi ketz kakꞌej ẍchiwutzuꞌ. Ej nin qui na katzan tan jakleꞌn jun cart scyeruꞌ tan ẍchajleꞌn yi oꞌ balaj, chi na chiban cobox. 2 Quiꞌ, nkꞌeꞌtz tajweꞌn tetz ketz, na eꞌ teꞌnuꞌ yi cart taneꞌn yi na ẍchaj yi baꞌn atit kakꞌun. Na lajluch ẍchiwutz cyakil wunak yi ja txꞌixpuj cyajtzaꞌkluꞌ. Nin lajluch yi baꞌn mban kakꞌun ẍchixoꞌluꞌ. 3 Niꞌcuꞌn eꞌuꞌ tu jun cart yi Cristo mbnon, nin yi oꞌ ketz yaꞌstzun yi cyꞌanl tetz. Poro quinin xcon tint tan banleꞌn yi jun cartaꞌtz. Nin nkꞌeꞌtz choꞌn tzꞌibaꞌn swutz jun lepaj cꞌub. Poro ja bnix yi jun cartaꞌtz tan yi Espíritu Sant, nin choꞌn tzꞌibaꞌn te cyalmaꞌuꞌ. 4 Skawutz ketz baꞌn atit yi kakꞌun, poro tan tuꞌ yi junit oꞌ tu Cristo, nin tan tuꞌ yi choꞌn kꞌuklij kacꞌuꞌl te Ryos. 5 Na ko tzꞌaknak cuꞌn oꞌ te kamunl, choꞌn na saj kajtzaꞌkl tu Ryos. 6 Na iꞌ nkoꞌcsan tetz ẍchakum, nin iꞌ na akꞌon tzaj kajtzaꞌkl tan xtxoleꞌn yi acꞌaj xtxolbil yi bixbaꞌnt taꞌn. Na qui na katzan tan xtxoleꞌn eꞌchk caꞌwl yi tzꞌibaꞌnt cyen, ma na na katzan tan xtxoleꞌn yi tajbil yi Espíritu Sant. Na yi eꞌchk caꞌwl yi tzꞌibaꞌnt cyen ntin na xcyeꞌ tan kaquimseꞌn. Poro kol kakꞌ amaꞌl tetz yi Espíritu Sant tan cawuneꞌn skeꞌj sjalok tzun kutzꞌajbiltz.7 At kꞌej yi eꞌchk caꞌwlaꞌtz yi choꞌn tzꞌibxeꞌn wutz cꞌub, yi eꞌchk caꞌwlaꞌtz yi na xcyeꞌ tan kapitleꞌn nin tkꞌab quimichil. At wiꞌnin kꞌej na yi cweꞌn muleꞌn Moisés tuchꞌ wiꞌnin txekuneꞌn yi wutz iꞌ. Nin yi eꞌ aj Israel quinin eꞌ xcyeꞌ tan xmayeꞌn yi wutz iꞌ tan paj yi xtxekunil. Poro yi teleꞌn cobox kꞌej, tzajeꞌn nin ban yi xtxekunil yubil iꞌ. Ma jaluꞌ, yi ko at wiꞌnin kꞌej yi xtxolbil yi akꞌlij tetz Moisés, 8 ¿quiꞌc ptzun loꞌ mas kꞌej yi acꞌaj xtxolbil yi mmuꞌl tan yi Espíritu Sant? 9 Ej nin yi ko chumbalaj nin yi xtxolbil yi nxcon tan lajluchaxeꞌn kil, ¿nkꞌeꞌtz ptzun loꞌ mas balaj yi acꞌaj xtxolbil yi na xcyeꞌ tan jalseꞌn kabalajil swutz Ryos? 10 Bintzi at kꞌej yi antiw caꞌwl yi ntaxk ul yi jun acꞌaj xtxolbil. 11 Poro at mas kꞌej yi acꞌaj xtxolbil yi xconk sbneꞌ opon tunintz.
12 At kachꞌiw te jun itzꞌajbil, chaꞌstzun te qui na kacabej muꞌẍ tal kacꞌuꞌl te yi balajil tu kꞌej yi jun acꞌaj xtxolbil yi na kocsaj. 13 Ocnak tkꞌol Moisés jun xbuꞌk tan teweꞌn yi wutz yi wiꞌnin txekuneꞌn. Nin xcon yi jun xbuꞌkaꞌtz taꞌn jalen yi ticyꞌeꞌn paj yi pakꞌpuchal yi wutz. Poro yi oꞌ ketz qui na kaxom te yi jun ajtzaꞌklaꞌtz chi ban Moisés.
14 Poro nkꞌeꞌtz ntin yi wutz Moisés yi jopxij, ma na nchaꞌtz yi wutz yi cyajtzaꞌkl yi eꞌ aj Israel yi quinin el chitxum te yi mbi na elepont yi eꞌchk caꞌwlaꞌtz. Nchaꞌtz jaluꞌ at wiꞌnin eꞌ judiy yi jopij wutz cyajtzaꞌkl yi na choꞌc tan siꞌleꞌn yi antiw xtxolbilaꞌtz. Na niꞌcuꞌn yi atk jun xbuꞌk te chiwutz, poro ntin Cristo na xcyeꞌ tan telseꞌn yi jun moy wutzilaꞌtz scyeꞌj. 15 Ateꞌ tul moy wutzil, na yi na choꞌc tan siꞌleꞌn yi eꞌchk liwr yi cyajnak stzꞌibal Moisés, qui na pujx cyaꞌn yi mbi na elepont. 16 Poro yi nink chitxꞌixp cyajtzaꞌkl tan chixomeꞌn te Kajcaw, tzꞌelepon tzun yi jun moy wutzilaꞌtz yi at te cyajtzaꞌkl. 17 Na yi Kajcaw, iteꞌn iꞌaꞌtz yi Espíritu Sant. Ej nin ko najlij yi Espíritu Sant te jun yaj ja tzun el liwr jakꞌ caꞌwl yi antiw ley. 18 Yi oꞌ ketz elnak yi jun moy wutzilaꞌtz te kawutz. Niꞌcuꞌntz yi quiꞌct xbuꞌk te kawutz. Niꞌcuꞌn oꞌ tu jun spej yi na cꞌox nin jun pakꞌpuchal. Poro yi pakꞌpuchal yi na kacꞌox nin, iꞌtz yi kꞌej tu balajil Cristo. Na chebeleꞌn cuntuꞌ tzan xtxꞌixpeꞌn kajtzaꞌkl tan koqueꞌn chi taneꞌn Cristo. Poro nkꞌeꞌtz oꞌ cuntuꞌ yi tzan xtxꞌipeꞌn kajtzaꞌkl, ma na iꞌtz tan yi Espíritu Kajcaw.