2
1 Chaꞌstzun te bixeweꞌn waꞌn tan qui wicyꞌakeꞌn tan chixajseꞌnuꞌ, na nkꞌeraꞌtz wajbil tan jaleꞌn mas bis ẍchixoꞌluꞌ. 2 Na kol wakꞌ bis scyeruꞌ, ¿ẍeꞌn tzun chintzatzin wetz? Na ntin scyeꞌjuꞌ na jaleꞌt tzatzin waꞌn. 3 Quinin nicyꞌak tan chixajseꞌnuꞌ, na yi nink nnicyꞌak, ja kloꞌ jal bis waꞌn ẍchixoꞌluꞌ tan paj yi jun cart yi benak waꞌn. Nin na el intxum tetz yi ko qui na chintzatzin wetz, nchaꞌtz eꞌ cyeruꞌ quil chitzatzinuꞌ. Chaꞌstzun te qui nnicyꞌak scyeꞌjuꞌ na nkꞌeraꞌtz wajbil tan wukꞌol mas bis scyeruꞌ. 4 Poro yi woqueꞌn tan stzꞌibeꞌn yi jun cartaꞌtz ja chimbisun nin ja nokꞌ. Poro nkꞌeraꞌtz wajbil tan takꞌleꞌn bis scyeruꞌ, ma na tan ẍchajleꞌn scyeruꞌ yi wiꞌnin na chimpekꞌ scyeꞌjuꞌ, nin yi na chimbisun te yi mbi na bajij ẍchixoꞌluꞌ.Yi talol Pawl yi tajweꞌn tan cuyleꞌn paj jun juchul il
5 I bin jaluꞌ, yi jun akꞌol bis yi at ẍchixoꞌluꞌ yi wal scyeruꞌ tcꞌuꞌl yi jun cartaꞌtz ja takꞌ bis swetz, poro ja takꞌ mas bis tetz cyeruꞌ. 6 Poro chinch wetz tzicuꞌn yi caws yi jun yajaꞌtz yi txumijt cyanuꞌ. 7 Ma jaluꞌ ntin na taj cuyleꞌn paj, nin na taj mayseꞌn iꞌ, na qui na yub kol ben joylaj tu tajtzaꞌkl tan paj bis oꞌkl. 8 Ma na mas balaj yil chichajuꞌ lokꞌ ib tetz. 9 Benak intzꞌibal jun cyajtzaꞌkluꞌ te yi jun problemaꞌtz, poro iꞌtz tan chipileꞌnuꞌ nin tan tilweꞌn yi ko bintzinin chixomokuꞌ te yi wetz wajtzaꞌkl. 10 Quiꞌc wetz woyintziꞌ tu yaj yi njuch til ma na choꞌn njuch iꞌ til ẍchiwutzuꞌ. Poro tan tuꞌ yil chicuyuꞌ paj, nchaꞌtz in tzincuyeꞌ paj. Tzincuyeꞌ paj na na waj yil jal chibalajiluꞌ junt tir. Nin sak cuꞌn swutz Kajcaw Jesucristo yi bintzi yi yoleꞌj yi na chintzan tan talcheꞌn. 11 Nchaꞌtz tajweꞌn tan kacuyul paj, na qui na kaj kakꞌ amaꞌl tetz Satanás, yi Baybaꞌn, tan toqueꞌn tan kapoꞌtzeꞌn. Na na el katxum tetz yi chin list nin iꞌ tan kasubleꞌn.
Yi beneꞌn Pawl Macedonia
12 Yi waꞌteꞌn le tnum Troas, ja takꞌ Ryos wiꞌnin amaꞌl swetz tan xtxoleꞌn yi balaj stziblal tetz Cristo scyetz cyakil wunak. 13 Poro quinin kꞌuklchin bantz tan paj yi qui wil wutz kajwutz Tito. Chaꞌstzun te cheꞌ cyajeꞌn cyen wilol yi eꞌ kajwutz le yi jun tnumaꞌtz tan wuleꞌn tzoneꞌj le amaꞌl cwent Macedonia tan joyleꞌn iꞌ.
14 Poro ntyoẍ tetz Kataj yi xomchoꞌ te Cristo jaluꞌ na ja wiꞌt xcyeꞌ iꞌ tan kacambajeꞌn. Ej nin ntyoẍ yi oꞌ xconsbeꞌtz iꞌ jaluꞌ tan beneꞌn loꞌon yi balajil Ryos beneꞌn tziꞌn wi munt. 15 Na yi oꞌ ketz oꞌ xconsbeꞌtz Cristo, niꞌcuꞌn oꞌ tu cꞌoꞌcal insens. Na tan tuꞌ yi mbi banak Cristo ja koꞌc ketz chi jun balaj insens swutz Ryos. Nchaꞌtz ẍchiwutz wunak. Nin na el jucl katziblal ẍchixoꞌl yi eꞌ yi ẍchiclaxok, nin na el jucl ẍchixoꞌl yi eꞌ yi at cyopombil tqꞌuixcꞌuj. 16 Ej nin yi katziblalaꞌtz yi na el jucl niꞌcuꞌn na ban tuꞌ wenen ẍchiwutz yi eꞌ yi at cyopombil tqꞌuixcꞌuj. Ma scyetz yi eꞌ yi ẍchiclaxok, niꞌcuꞌn taneꞌn katziblal ẍchiwutz chi taneꞌn insens yi wiꞌnin cꞌoꞌcal yi na takꞌ itzꞌajbil. Poro ¿naꞌ nin scyetz jun yi at tajtzaꞌkl tan jeꞌn poneꞌn te yi jun munlaꞌtz? Cyaꞌl. 17 Poro nkꞌeꞌtz choꞌn kutaneꞌn ketz chi quitaneꞌn yi eꞌ yi na chitzan tan sukeꞌn yi yol Kataj tan tuꞌ yi cyetz chipuꞌk na cyaj quen teꞌj. Ej nin nkꞌeꞌtz niꞌcuꞌn oꞌ scyuchꞌ yi eꞌ yi na chitxꞌixpuj yi xtxolbil yi yol Kataj. Poro yi oꞌ ketz na katxol yi mero yol Kataj. Ej nin qui na el kalmaꞌ tan kacambal kapuꞌk teꞌj, na junit oꞌ tu Cristo. Ej nin chakij choꞌ tan Ryos tan txoliꞌn. Ej nin nchaꞌtz, puntil cuꞌn na kulej yi kakꞌun, na na tzan iꞌ tan kaxmayeꞌn yi ko baꞌn na kaban nka quiꞌ.