Ja kaclax tan tuꞌ banl talmaꞌ Ryos
2
1 Poro tan paj yi oꞌ pajol caꞌwl sajleꞌn, nin tan paj yi oꞌ juchul il, quimnakoꞌt swutz Ryos. 2 Na xomnak kajtzaꞌkl te cyajtzaꞌkl yi eꞌ mas wunak wi munt. Nin xomnak te yi tajtzaꞌkl yi wiꞌtz Baybaꞌn yi taw yi muj cyekꞌekꞌ, yi jun yi na tzan tan xuyleꞌn quen le chiwiꞌ wunak tan cyoqueꞌn tan pajleꞌn caꞌwl Ryos. 3 Yaꞌstzun banakoꞌ sajleꞌn. Ntin ja kaxom te ketz kajbil. Ntin ja kaban tajbil kawankil tu eꞌchk kajtzaꞌkl cachiꞌ. Tan tuꞌ yi yaꞌtz oꞌ banaktz, ja chiꞌch cꞌuꞌl Ryos skeꞌj, chi na chiꞌch cꞌuꞌl iꞌ scyeꞌj yi eꞌ juchul il jaluꞌ. 4 Poro apart kutaneꞌn ketz jaluꞌ, na Ryos mmeꞌl kꞌajab skeꞌj. Nin ja ẍchaj iꞌ wiꞌnin lokꞌ ib sketz. 5 Na te yi quimnakoꞌt swutz iꞌ tan paj yi ilcꞌol ja el kꞌajab iꞌ skeꞌj, nin ja takꞌ iꞌ kutzꞌajbil tan tuꞌ yi junit oꞌ tu Cristo. Na tan tuꞌ banl talmaꞌ iꞌ nkaclaxeꞌt. 6 Na yi titzꞌeꞌn Jesucristo junt tir ẍchixoꞌl almaꞌ yaꞌstzun yi kitzꞌeꞌn ketz swutz Ryos. Nin yaꞌstzun nkoꞌ cꞌolchban xlaj Cristo Jesús jalen tziꞌn tcyaꞌj. 7 Na yi tajbil Ryos iꞌtz tan lajluchaxeꞌn yi banl talmaꞌ iꞌ skeꞌj. Na tul yi tiemp yi at tulbil slajluchaxk yi pawor yi mban iꞌ sketz tan Cristo Jesús. 8 Tan tuꞌ banl talmaꞌ Ryos nkaclaxeꞌt yi kꞌukeweꞌn kacꞌuꞌl teꞌj. Poro quinin kaclax tan tuꞌ yi ketz kabalajil, ma na cotziꞌn nkulej tetz Ryos. 9 Na qui na kaclax tan yi eꞌchk takleꞌn balaj yi na kaban. Na qui na taj Ryos yi nink kocsaj kib nim. 10 Ma na Ryos nkoꞌ bixban tkꞌab Cristo bantz koqueꞌn tan banleꞌn yi eꞌchk takleꞌn balaj. Txumijt cyen yi jun ajtzaꞌklaꞌtz taꞌn tentz.Tan Cristo na jaleꞌt tzatzin paz skaxoꞌl
11 Ja tzun kil eꞌuꞌ wajwutz yi tan tuꞌ banl talmaꞌ Ryos nkaclaxeꞌt, chaꞌstzun te chinachonkuꞌ te yi ẍeꞌn chisajleꞌnuꞌ. Eꞌuꞌ cuꞌn awer nak na qui banij cheꞌuꞌ circuncidar. 12 Nkꞌeꞌtz eꞌuꞌ tetz Cristo sajleꞌn, nin quibeꞌuꞌ cyajlal yi oꞌ aj Israel. Quiꞌc cyeruꞌ tuchꞌ yi eꞌchk takleꞌn yi sukiꞌnt cyen tan Ryos. Nin quiꞌc nin chichꞌiwuꞌ tan chiclaxeꞌnuꞌ. Sajleꞌn ateꞌuꞌ wi munt poro quiꞌc Ryos tetz cyajaluꞌ. 13 Chin joylaj nin chixoꞌluꞌ tu Ryos sajleꞌn. Poro yi jaluꞌ tan tuꞌ yi ateꞌuꞌ tkꞌab Cristo ja cyamiwi quibuꞌ tuchꞌ, na ja el kojxuj yi tetz ẍchꞌel tan ẍchojleꞌn quiluꞌ. 14 Nin tan iꞌ njaleꞌt tzatzin paz skaxoꞌl. Nin tan iꞌ nkanuchꞌwit kib scyuchꞌuꞌ, yi eꞌuꞌ yi nkꞌeꞌtz eꞌuꞌ judiy; na tan tuꞌ yi mbi cuꞌn banak Cristo, ja xcyeꞌ iꞌ tan xiteꞌn yi oyintziꞌ yi at skaxoꞌl. 15 Na yi quimeꞌn yi wankil Jesús, yaꞌstzun yi teleꞌn kꞌej yi eꞌchk cstumbr tetz yi ley Moisés. Ej nin yaꞌstzun tulejtz tan jaleꞌn junt acꞌaj cmon yi iꞌtz yi oꞌ scyuchꞌuꞌ. Nin yaꞌstzun tulejtz tan jaleꞌn tzatzin paz skaxoꞌl. 16 Na tan tuꞌ yi quimich yi ban iꞌ swutz pasyon ja xit yi oyintziꞌ yi at skaxoꞌl. Junit oꞌ jaluꞌ. Ej nin tan yi mbi cuꞌn banak Cristo ja kabansaj kib tu Ryos.
17 Wutzileꞌn cuꞌn Cristo ulak tan xtxoleꞌn yi balaj stziblal, yi at rmeril tan jaleꞌn tzatzin paz skaxoꞌl. Ulak iꞌ tan xtxoleꞌn sketz yi oꞌ judiy, yi oꞌ yi xomchoꞌ muꞌẍ tal te yi tajbil Ryos. Nin ulak iꞌ tan xtxoleꞌn scyeruꞌ yi eꞌuꞌ yi joylaj chixoꞌluꞌ tu Ryos sajleꞌn. 18 Ej nin tan tuꞌ yi mbi cuꞌn banak Cristo, baꞌn kajilon tu Ryos jaluꞌ na jun ntziꞌ Espíritu Sant at tetz kalmaꞌ kacyakil cuꞌn.
19 Chaꞌstzun te nkꞌeꞌtz eꞌuꞌ awer nak jaluꞌ, nkꞌeꞌtz eꞌuꞌ joylajil wunak skaxoꞌl. Ma na xansaꞌn cheꞌtuꞌ tan chixomeꞌnuꞌ te Ryos, chi kutaneꞌn ketz. Junit kaRyosil scyuchꞌuꞌ jaluꞌ, yi oꞌ yi oꞌ cmon creyent. 20 Niꞌcuꞌn oꞌ chi jun caꞌl yi na tzan banleꞌn. Ej nin yi xeꞌ yi kachusuꞌn choꞌn sajnak scyeꞌj yi eꞌ apostl, scyuchꞌ yi eꞌ elsanl stziꞌ Ryos tentz. Poro yi mero kaxeꞌ, yi mero xicyol ketz yi cꞌub taneꞌn, iꞌtz Cristo Jesús. 21 Nin na tzan iꞌ tan kanucꞌleꞌn tib yi jun chin cꞌubaꞌtz. Nin kocopon taꞌn tetz jun balaj caꞌl swutz Ryos, yi nternin xansaꞌnt. 22 Nchaꞌtz yi xtxolbileꞌj na jop yi eꞌ cyeruꞌ, na tan tuꞌ yi junit oꞌ scyuchꞌuꞌ tu Cristo na tzan kanucꞌleꞌn, nin ja wiꞌt koꞌc tetz najbil Ryos, kale najleꞌt yi tetz Espíritu.